The Comprehensive Aramaic Lexicon

018:141	ܟܪ̈ܽܘܒܸܐ ܙܵܝܥܝܼܢ ܕܲܢܒܲܪܟ݂ܽܘܢܵܝܗܝ ܒܲܐܬ݂ܪܸܗ ܪܵܡܵܐ܃
018:142	ܘܲܡܫܲܒܚܝܼܢ ܠܸܗ ܥܠܲܝ̈ܡܸܐ ܒܥܽܘܡܩܵܐ ܒܽܐܘܫܲܥܢܲܝ̈ܗܽܘܢ܀
018:143	ܒܲܪ̄ܬ݂ ܥܲܡܵܐ ܕܹܝܢ ܚܸܣܡܲܬ̤݂ ܦܸܩܪܲܬ̤݂ ܟܲܕ ܡܸܫܬܲܒܲܚ܃
018:144	ܘܢܸܫܠܸܐ ܫܽܘܒ݂ܚܵܐ ܡܸܢ ܟܽܠ ܦܽܘܡ̈ܝܼܢ ܝܲܨܝܼܦܵܐ ܗ̄ܘܵܬ݂܀
018:145	ܠܵܐ ܫܵܠܡܵܐ ܗ̄ܘܵܬ ܠܵܐ ܠܥܸܠܵܝܸ̈ܐ ܘܠܵܐ ܠܬܲܚܬܵܝܸ̈ܐ܃
018:146	ܕܲܡܫܲܒܚܝܼܢ ܗ̄ܘܲܘ ܠܽܐܘܪܚܸܗ ܕܲܒ݂ܪܵܐ ܕܡܲܠܝܵܐ ܬܸܗܪܵܐ܀
018:147	ܬܫܲܬܸܩ ܐܸܢܽܘܢ ܠܲܡܫܲܒܚܵܢܸ̈ܐ ܣܲܓܝܼ ܠܸܐܝܲܬ݂̤܃
018:148	ܘܥܲܠ ܕܲܡܠܸܐ ܗ̄ܘܵܐ ܫܪܵܪܵܐ ܦܽܘܡܗܽܘܢ ܠܵܐ ܐܸܫܬܲܬܲܩܘ܀
018:149	ܣܵܒܸ̈ܐ ܕܥܲܡܵܐ ܚܣܲܡܘ ܒܲܛܠܵܝܸ̈ܐ ܘܒ݂ܽܐܘܫܲܥܢܲܝ̈ܗܽܘܢ܃
018:150	ܘܲܪܛܲܢܘ ܟܵܗ̈ܢܸܐ ܘܒܲܓܸܢܘ ܣܵܦܪܸ̈ܐ ܡܸܢ ܩܵܠܲܝ̈ܗܽܘܢ܀
018:151	ܡܫܲܒܚܝܼܢ ܗ̄ܘܲܘ ܠܸܗ ܥܝܼܪܸ̈ܐ ܠܲܒ݂ܪܵܐ ܒܲܐܬ݂ܪܸܗ ܪܵܡܵܐ܃
018:152	ܘܲܒ݂ܓ݂ܲܘ ܥܽܘܡܩܵܐ ܥܠܲܝܡܸ̈ܐ ܦܫܝܼ̈ܛܸܐ ܥܲܡ ܬܲܠܡܝܼ̈ܕܸܐ܀
018:153	ܣܥܲܘ ܝܽܗ̄ܘ̈ܕ݂ܵܝܸܐ ܣܵܢ̈ܝܲܝ ܟܽܠܗܸܝܢ ܫܲܦܝܼܪ̈ܵܬ݂ܵܐ܃
018:154	ܘܲܩܪܸܒ݂ܘ ܨܸܐܕܲܘܗܝ ܘܲܡܦܝܼܣܝܼܢ ܠܸܗ ܢܫܲܬܸܩ ܐܸܢܽܘܢ܀
018:155	ܠܵܐ ܫܵܡܲܥ ܐܲܢ̄ܬ ܡܵܢܵܐ ܩܵܥܸܝܢ ܐܵܡܪܝܼܢ ܗ̄ܘܲܘ ܠܸܗ܃
018:156	ܐܲܝܟ݂ ܡܵܐ ܕܲܫܩܲܠ ܫܽܘܒ݂ܚܵܐ ܫܐܝܼܠܵܐ ܕܠܲܘ ܕܝܼܠܸܗ ܗ̄ܽܘ܀
018:157	ܡܸܢ ܬܲܘܬܵܪܸ̈ܐ ܕܫܽܘܒ݂ܚܸܗ ܪܲܒܵܐ ܡܸܫܬܲܒܲܚ ܗ̄ܘܵܐ܃
018:158	ܘܚܵܣܡܝܼܢ ܗ̄ܘܲܘ ܒܸܗ ܐܲܝܟ݂ ܗܽܘ ܕܲܚܛܲܦ ܫܽܘܒ݂ܚܵܐ ܕܲܐ̄ܚܪܝܼܢ܀
018:159	ܒܸܨܪܵܐ ܙܥܽܘܪܵܐ ܡܸܢ ܬܸܫܒܽܘܚܬܸܗ ܩܥܲܘ ܒܽܐܘܫܲܥ̈ܢܸܐ܃
018:160	ܘܲܚܣܲܡܘ ܣܵܦܪܸ̈ܐ ܐܲܝܟ݂ ܡܵܐ ܕܠܵܐ ܩܢܸܐ ܫܽܘܒ݂ܚܵܐ ܡܸܡܬ݂ܽܘܡ܀
018:161	ܐܵܡܪܝܼܢ ܗ̄ܘܲܘ ܠܸܗ ܕܸܐܡܲܪ ܢܸܫܠܽܘܢ ܡܸܢ ܬܸܫܒܽܘܚܬܵܐ܃
018:162	ܐܲܝܟ݂ ܗܽܘ ܕܸܐܠܽܘ ܫܠܝܼܘ ܝܲܠܽܘܕܸ̈ܐ ܒܛܸܠ ܠܸܗ ܫܽܘܒ݂ܚܵܐ܀
018:163	ܐܽܘ ܝܽܗ̄ܘ̈ܕܵܝܸܐ ܣܵܢ̈ܝܲܝ ܢܽܘܗܪܵܐ ܐܲܝܟܲܢ ܢܸܫܠܽܘܢ܃
018:164	ܡܸܢ ܬܸܫܒܽܘܚܬܸܗ ܕܡܲܠܝܵܐ ܡܸܢܵܗ݀ ܫܡܲܝܵܐ ܘܲܐܪܥܵܐ܀
018:165	ܐܸܢ ܠܲܥܠܲܝ̈ܡܸܐ ܕܲܫܩܲܠܘ ܣܲܘ̈ܟܸܐ ܗܵܐ ܡܫܲܬܩܝܼܢ ܐܢ̄ܬܽܘܢ܃

018:166	ܗܵܐ ܐܝܼܬ݂ ܗ̄ܽܘ ܠܸܗ ܟܸܢܫܸ̈ܐ ܒܲܐܬ݂ܪܸܗ ܕܠܵܐ ܡܸܫܬܲܠܸܝܢ܀

018:167	ܪܸܒܽܘ ܪܸ̈ܒܘܵܢ ܘܵܐܠܸܦ ܐܲܠܦܝܼ̈ܢ ܕܲܫܡܲܝܵܢܸ̈ܐ܃
018:168	ܗܵܐ ܡܫܲܒܚܝܼܢ ܠܸܗ ܘܡܲܢܽܘ ܡܵܛܸܐ ܢܫܲܬܸܩ ܐܸܢܽܘܢ܀
018:169	ܐܸܢܗܽܘ ܕܗܵܢܵܐ ܟܸܢܫܵܐ ܙܥܽܘܪܵܐ ܦܫܝܼܩ ܗ̄ܽܘ ܢܸܫܠܸܐ܃
018:170	ܠܗܵܝ ܠܸܓ݂ܝܽܘܢܵܐ ܕܒܸܝܬ݂ ܓܲܒ݂ܪܼܐܝܸܠ ܡܲܢܽܘ ܦܵܩܸܕ܀
018:171	ܐܵܡܪܝܼܢ ܗ̄ܘܲܘ ܠܸܗ ܕܸܐܡܲܪ ܢܸܫܠܽܘܢ ܘܦܲܢܝܼ ܠܗܽܘܢ ܗܽܘ܃
018:172	ܕܸܐܢܗܽܘ ܕܫܵܠܸܝܢ ܟܼܐܦܸ̈ܐ ܩܵܥ̈ܝܵܢ ܠܲܡܫܲܒܵܚܽܘ܀
018:173	ܘܗܵܟܲܢ ܐܝܼܬܸܝܗ݀ ܐܲܝܟܲܢ ܕܸܐܡܲܪ ܡܲܠܸܦ ܩܽܘܫܬܵܐ܃
018:174	ܕܸܐܠܽܘ ܫܬܸܩܘ ܗ̄ܘܲܘ ܟܼ̈ܐܦܸܐ ܡܲܠܸܠ ܐܲܝܟ݂ ܕܸܐܡܲܪ ܗ̄ܘܵܐ܀
018:175	ܥܸܕܵܢܵܐ ܗ̄ܘܵܐ ܕܡܸܬܬܚܝܼܒ݂ ܗ̄ܘܵܐ ܒܸܗ ܫܽܘܒ݂ܚܵܐ ܠܲܒ݂ܪܵܐ܃
018:176	ܘܸܐܠܽܘ ܛܲܠܡܽܘܗܝ ܦܵܪ̈ܥܵܢ ܗ݂̄ܘܲܝ̈ ܠܸܗ ܟܸ̈ܐܦܸܐ ܫܽܘܒ݂ܚܵܐ܀
018:177	ܐܸܠܽܘ ܛܠܵܝܸ̈ܐ ܒܣܲܘ̈ܟܸܐ ܕܕܸܩ̈ܠܸܐ ܠܵܐ ܫܲܒܲܚܘ ܗ̄ܘܲܘ܃
018:178	ܫܽܘܥܸ̈ܐ ܛܡܝܼ̈ܡܸܐ ܡܫܲܒܚܝܼܢ ܗ̄ܘܲܘ ܠܸܗ ܒܟܸܢܵܪ̈ܲܝܗܽܘܢ܀
018:179	ܡܵܪܸܐ ܡܲܠܟܸ̈ܐ ܪܟ݂ܝܼܒ݂ ܗ̄ܘܵܐ ܥܝܼܠܵܐ ܒܲܪ ܐܲܬܵܢܵܐ܃
018:180	ܘܙܵܥ ܗ̄ܘܵܐ ܟܝܵܢܵܐ ܕܢܸܬܸܠ ܫܽܘܒ݂ܚܵܐ ܥܲܠ ܡܽܘܟܵܟܸܗ܀
018:181	ܘܟ݂ܵܗ̈ܢܸܐ ܘܣܵܦܪܸܐ ܘܪ̈ܝܼܫܸܐ ܕܥܲܡܵܐ ܚܲܝܵܒ݂ܝܼܢ ܗ̄ܘܲܘ܃
018:182	ܕܲܢܡܲܠܠܽܘܢܵܗ݀ ܠܗܵܝ ܬܸܫܒܽܘܚܬܵܐ ܕܡܸܬ݂ܒܲܥܝܵܐ ܗ̄ܘܵܬ݂܀
018:183	ܘܥܲܠ ܕܲܛܠܲܡܘ ܗ̄ܘܲܘ ܣܵܒܸ̈ܐ ܫܽܘܒ݂ܚܵܐ ܕܥܸܕܵܢܸܗ ܗ̄ܘܵܐ܃
018:184	ܛܠܵܝܸ̈ܐ ܪܵܒ݂ܘ ܗ̄ܘܲܘ ܕܢܸܬܠܽܘܢ ܫܽܘܒ݂ܚܵܐ ܒܽܐܘܫܲܥܢܲܝ̈ܗܽܘܢ܀
018:185	ܘܸܐܠܽܘ ܫܬܸܩܘ ܗ̄ܘܲܘ ܠܵܐ ܒܵܛܸܠ ܗ̄ܘܵܐ ܫܽܘܒ݂ܚܵܐ ܬܲܡܵܢ܃
018:186	ܕܟܼ̈ܐܦܸܐ ܒܙܲܘܥܵܐ ܙܵܡܪ̈ܵܢ ܗ̄ܘܲܝ̈ ܠܵܗ݀ ܠܗܵܝ ܬܸܫܒܽܘܚܬܵܐ܀
018:187	ܟܝܵܢܵܐ ܠܡܵܪܸܗ ܕܢܸܦܪܽܘܥ ܫܽܘܒ݂ܚܵܐ ܡܸܬ݂ܚܲܦܲܛ ܗ̄ܘܵܐ܃
018:188	ܘܸܐܠܽܘ ܡܠܝܼ̈ܠܸܐ ܠܵܐ ܡܲܠܸܠܘ ܗ̄ܘܲܘ ܚܲܪ̈ܫܸܐ ܡܲܠܸܠܘ܀
018:189	ܟܲܕ ܡܲܠܦܵܢܸ̈ܐ ܗܘܲܘ ܛܵܠܽܘܡܸ̈ܐ ܦܫܝܼ̈ܛܸܐ ܡܲܠܸܠܘ܃
018:190	ܘܸܐܠܽܘ ܫܬܸܩܘ ܬܽܘܒ݂ ܐܝܼܬ݂ ܗ̄ܘܵܐ ܕܢܸܬ̈ܠܵܢ ܟܼܐܦܸ̈ܐ ܫܽܘܒ݂ܚܵܐ܀
018:191	ܒܗܲܘ ܥܸܕܵܢܵܐ ܫܽܘܒ݂ܚܵܐ ܕܢܸܫܠܸܐ ܠܵܐ ܡܸܫܟܲܚ ܗ̄ܘܵܐ܃