The Comprehensive Aramaic Lexicon

018:241	ܕܲܡܫܲܒܚܝܼܢ ܠܸܗ ܟܝܵܢܸ̈ܐ ܟܽܠܗܽܘܢ ܩܽܘܫܬܵܐ ܣܵܗܸܕ܃
018:242	ܕܲܐܝܟܲܢܵܐ ܕܹܝܢ ܠܵܐ ܐ̄ܢܵܫ ܡܲܕܪܸܟ݂ ܠܲܡܡܲܠܵܠܽܘ܀
018:243	ܠܵܐ ܐ̄ܢܵܫ ܝܵܕܲܥ ܒܲܐܝܢܵܐ ܦܽܘܡܵܐ ܘܒܲܐܝܢܵܐ ܩܵܠܵܐ܃
018:244	ܙܵܡܪܵܐ ܐܲܪܥܵܐ ܫܽܘܒ݂ܚܵܐ ܕܡܵܪܵܗ݀ ܡܵܐ ܕܡܸܬܬܲܒ݂ܥܵܐ܀
018:245	ܕܲܡܫܲܒܚܵܐ ܕܹܝܢ ܕܲܘܝܼܕ ܣܵܗܸܕ ܟܲܕ ܬܵܒܲܥ ܗ̄ܘܵܐ܃
018:246	ܘܵܐܦ ܠܸܐܣܛܽܘ̈ܟ݂ܣܸܐ ܕܢܸܬܠܽܘܢ ܫܽܘܒ݂ܚܵܐ ܒܲܟ݂ܝܵܢܲܝ̈ܗܽܘܢ܀
018:247	ܢܽܘܪܵܐ ܘܒܲܪܕܵܐ ܓܠܝܼܕܵܐ ܘܬܲܠܓܵܐ ܐܵܦ ܬܲܢܝܼ̈ܢܸܐ܃
018:248	ܬܗܽܘܡܸ̈ܐ ܟܽܠܗܽܘܢ ܘܲܐܪܥܵܐ ܘܛܽܘܪܸ̈ܐ ܐܵܦ ܪ̈ܵܡܵܬ݂ܵܐ܀
018:249	ܠܗܵܠܸܝܢ ܫܽܘܒ݂ܚܵܐ ܬܒܲܥ ܗ̄ܘܵܐ ܕܲܘܝܼܕ ܐܲܝܟ݂ ܡܲܕܲܐܬ݂ܵܐ܃
018:250	ܕܲܠܥܵܒ݂ܽܘܕܵܐ ܢܸܣܲܩ ܫܽܘܒ݂ܚܵܐ ܡܸܢ ܒܸܪ̈ܝܵܬܸܗ܀
018:251	ܢܫܲܒ̈ܚܵܢ ܪ̈ܽܘܚܸܐ ܐܵܦ ܥܲܠ̈ܥܵܠܸܐ ܚܲܦܸܛ݂ ܐܸܢܸܝܢ܃
018:252	ܘܸܐܠܽܘ ܪܓܝܼܫ ܗ̄ܘܵܐ ܕܠܵܐ ܡܫܲܒ̈ܚܵܢ ܗ̄ܘܲܝ̈ ܠܵܐ ܡܚܲܦܸܛ ܗ̄ܘܵܐ܀
018:253	ܒܪܽܘܚܵܐ ܕܩܽܘܕܫܵܐ ܙܵܥ ܗ̄ܘܵܐ ܕܲܘܝܼܕ ܘܲܐܙܝܼܥ ܐܸܢܽܘܢ܃
018:254	ܘܲܠܥܸܠܵܝܸ̈ܐ ܘܲܠܬܲܚܬܵܝܸ̈ܐ ܥܲܠ ܬܸܫܒܽܘܚܬܵܐ܀
018:255	ܠܫܸܡܫܵܐ ܘܣܲܗܪܵܐ ܘܲܠܢܲܗܝܼܪܸ̈ܐ ܕܼܐܝܬ݂ ܒܲܪܩܝܼܥܵܐ܃
018:256	ܠܲܐܪܥܵܐ ܘܛܽܘܪܸ̈ܐ ܘܲܠܪ̈ܵܡܵܬ݂ܵܐ ܐܵܦ ܠܼܐܝܠܵܢܸ̈ܐ܀
018:257	ܫܲܒܲܚܘ ܠܡܵܪܝܵܐ ܠܗܵܠܸܝܢ ܟܽܠܗܽܘܢ ܐ̄ܡܲܪ ܗ̄ܘܵܐ ܕܲܘܝܼܕ܃
018:258	ܘܲܕܝܵܕܲܥ ܗ̄ܘܵܐ ܕܲܡܫܲܒܚܝܼܢ ܠܸܗ ܐܲܥܝܼܪ ܐܸܢܽܘܢ܀
018:259	ܐܲܝܟܲܢܵܐ ܕܹܝܢ ܐܲܘ ܒܲܐܝܢܵܐ ܙܢܵܐ ܝܵܗܒܝܼܢ ܫܽܘܒ݂ܚܵܐ܃
018:260	ܠܵܐ ܬܸܬ݂ܒܲܥ ܡܸܢܝ ܕܲܥܛܸܠ ܗ̄ܽܘ ܠܝܼ ܕܸܐܦܲܫܸܩ ܠܵܟ݂܀
018:261	ܐ̄ܪ̈ܵܙܸ݂ܐ ܟ̈ܣܲܝܵܐ ܕܒܸܝܬ݂ ܐܲܠܵܗܵܐ ܘܲܠܒܸܪ̈ܝܵܬܸܗ܃
018:262	ܐܝܼܬ݂ ܠܸܗ ܘܫܵܡܲܥ ܡܵܐ ܕܲܡܫܲܒ̈ܚܵܢ ܒܸܐܣܟܼܡܲܝ̈ܗܸܝܢ܀
018:263	ܩܵܥ̈ܝܵܢ ܐܸܢܸܝܢ ܟܼܐܦܸ̈ܐ ܫܽܘܒ݂ܚܸܗ ܡܵܐ ܕܡܸܬܬܲܒ̈ܥܵܢ܃
018:264	ܘܗܽܘ ܒܲܠܚܽܘܕܲܘܗܝ ܝܵܕܲܥ ܢܸܫܡܲܥ ܠܸܫܵܢܲܝ̈ܗܸܝܢ܀
018:265	ܘܲܡܛܲܝ̈ܒܵܢ ܗ̄ܘܲܝ̈ ܟܲܕ ܥܲܠ ܥܝܼܠܵܐ ܡܸܙܕܲܝܲܚ ܗ̄ܘܵܐ܃
018:266	ܕܲܢܫܲܒ̈ܚܵܢ ܗ̄ܘܲܝ̈ ܠܽܐܘܪܚܵܐ ܚܕܲܬܵܐ ܕܡܲܟܝܼܟ݂ܽܘܬܸܗ܀
018:267	ܘܥܲܠ ܕܲܥܠܲܝ̈ܡܸܐ ܫܩܲܠܘ ܗ̄ܘܲܘ ܣܲܘ̈ܟܸܐ ܠܲܡܫܲܒܵܚܽܘ܃
018:268	ܠܵܐ ܐܵܠܨܵܐ ܗ̄ܘܵܬ݂ ܕܢܸܬ̈ܠܵܢ ܟܼܐܦܸ̈ܐ ܫܽܘܒ݂ܚܵܐ ܗܵܝܕܸܝܢ܀
018:269	ܘܸܐܠܽܘ ܫܬܸܩܘ ܗ̄ܘܲܘ ܗܵܠܸܝܢ ܕܲܫܩܲܠܘ ܣܲܘ̈ܟܸܐ ܬܲܡܵܢ܃
018:270	ܟܼܐܦܸ̈ܐ ܒܙܲܘܥܵܐ ܡܫܲܒ̈ܚܵܢ ܗ̄ܘܲܝ̈ ܠܸܗ ܠܡܲܠܟܵܐ ܕܸܐܬܵܐ܀
018:271	ܘܟܲܕ ܝܽܗ̄ܘ̈ܕܵܝܸܐ ܢܫܲܬܩܽܘܢ ܫܽܘܒ݂ܚܸܗ ܕܲܒ݂ܪܵܐ ܝܼܨܸܦ݂ܘ܃
018:272	ܦܲܢܝܼ ܠܗܽܘܢ ܗܽܘ ܕܟܼܐܦܸ̈ܐ ܩܵܥ̈ܝܵܢ ܡܸܛܽܠܵܬܸܗ܀
018:273	ܐܵܦ ܩܵܥ̈ܝܵܢ ܗ̄ܘܲܝ̈ ܐܲܝܟ݂ ܕܸܐܡܲܪ ܗ̄ܘܵܐ ܫܲܪܝܼܪܵܐܝܼܬ݂܃
018:274	ܕܠܵܐ ܐܝܼܬ݂ ܦܽܘܪܣܵܐ ܕܢܸܫܠܸܐ ܫܽܘܒ݂ܚܸܗ ܡܸܢ ܒܸܪ̈ܝܵܬ݂ܵܐ܀
018:275	ܡܫܲܒܚܝܼܢ ܠܵܟ݂ ܡܵܪܝ ܦܽܘ̈ܡܸܐ ܡܠܝܼ̈ܠܸܐ ܒܠܸܫܵܢܲܝ̈ܗܽܘܢ܃
018:276	ܘܙܵܡܪܝܼܢ ܫܽܘܒ݂ܚܵܟ݂ ܟܝܵܢܸ̈ܐ ܚܲܪ̈ܫܸܐ ܒܸܐܣܟܼܡܲܝ̈ܗܽܘܢ܀
018:277	ܡܲܘܕܸܐ ܠܵܟ݂ ܡܵܪܝ ܟܝܵܢܵܐ ܟܽܠܸܗ ܕܸܐܬ݂ܚܲܕܲܬ݂ ܒܵܟ݂܃
018:278	ܕܟ݂ܽܠܸܗ ܚܲܝܵܒ݂ ܢܲܘܕܸܐ ܒܬܸܗܪܵܐ ܠܡܲܟܝܼܟ݂ܽܘܬ݂ܵܟ݂܀
018:279	ܣܵܓܸܕ ܪܲܘܡܵܐ ܠܵܟ݂ ܕܸܐܬܬܲܚܬܝܼܬ݁ ܨܝܕ ܐܲܪ̈ܥܵܢܸܐ܃
018:280	ܘܲܡܫܲܒܲܚ ܠܵܟ݂ ܥܽܘܡܩܵܐ ܕܪܵܡ ܐܲܢ̄ܬ ܡܸܢ ܥܸܠܵܝܸ̈ܐ܀
018:281	ܡܝܲܒܸܒ݂ ܠܵܟ݂ ܡܵܪܝ ܟܸܢܫܵܐ ܦܪܝܼܩܵܐ ܕܥܼܕܲܬ݂ ܥܲܡܡܸ̈ܐ܃
018:282	ܕܲܐܢ̄ܬ ܚܲܪܲܪܬܵܗ݀ ܡܸܢ ܬܽܘ̈ܩܠܵܬ݂ܵܐ ܕܨܲܠܡܸ̈ܐ ܚܲܪ̈ܒܸܐ܀
018:283	ܕܵܝܨܵܐ ܒܝܲܘܡܵܟ݂ ܒܲܪ̄ܬ݂ ܐܲܪ̈ܡܵܝܸܐ ܘܲܦܨܝܼܚܵܐ ܒܵܟ݂܃
018:284	ܚܠܵܦ ܕܸܐܬ݂ܟܲܡܪܲܬ̤ ܫܵܛܲܬ̤ ܪܸܓܙܲܬ̤ ܒܲܪ̄ܬ݂ ܥܸܒ݂ܪ̈ܵܝܸ̈ܐ܀
018:285	ܗܵܐ ܡܫܲܒܚܝܼܢ ܠܵܟ݂ ܥܠܲܝ̈ܡܸܐ ܒܣܲܘ̈ܟܸܐ ܕܡܸܢ ܐܝܼܠܵܢܸ̈ܐ܃
018:286	ܘܲܚܠܝܼܛ ܩܵܠܵܐ ܕܫܽܘܒ݂ܚܵܐ ܕܣܵܒܸ̈ܐ ܥܲܡ ܕܲܛܠܵܝܸ̈ܐ܀
018:287	ܗܵܐ ܣܵܓ݂ܕܝܼܢ ܠܵܟ݂ ܪ̈ܵܥܲܘܵܬ݂ܵܐ ܘܲܓ݂ܸܙܪ̈ܲܝܗܽܘܢ܃
018:288	ܚܠܵܦ ܗܵܝ ܥܵܢ̈ܵܐ ܕܙܸܩܦܲܬ̤ ܪܵܥܝܵܗ݀ ܥܲܠ ܓܵܓ݂ܽܘܠܬܵܐ܀
018:289	ܗܵܐ ܡܒܲܪܟ݂ܝܼܢ ܠܵܟ݂ ܟܸܢܫܸ̈ܐ ܕܥܲܡܡܸ̈ܐ ܒܟ݂ܽܠ ܐܲܬ݂ܪ̈ܲܘܵܢ܃
018:290	ܚܠܵܦ ܕܸܐܨܛܲܚܝܼܬ݁ ܡܸܢ ܗܵܝ ܓܽܘܕܵܐ ܕܒܸܝܬ݂ ܩܲܝܵܦܵܐ܀
018:291	ܗܵܐ ܩܵܥܸܝܢ ܠܵܟ݂ ܩܲܕܝܼܫ ܩܲܕܝܼܫ ܒܲܟ݂ܢܽܘ̈ܫܵܬ݂ܵܐ܃