The Comprehensive Aramaic Lexicon

082:147	ܐܲܪܦܲܘ ܐܝܼܕܵܐ ܒܦܲܚܸ̈ܐ ܛܡܝܼܪܸ̈ܐ ܘܒܲܡܨܝܼ̈ܕܵܬܵܐ܃
082:148	ܘܲܠܚܲܕ ܢܸܨܠܸܐ ܘܸܐܢ ܗܽܘ ܡܸܬܬܨܝܼܕ ܓܲܢ̄ܒܵܪܽܘܬܵܐ ܗ̄ܝ܀
082:149	ܩܫܸܐ ܠܝܼ ܕܲܪܵܐ ܕܠܲܘ ܗܽܘ ܒܵܥܸܐ ܕܢܸܙܟܸܐ ܒܲܠܚܽܘܕ܃
082:150	ܐܸܠܵܐ ܠܵܐܕܵܡ ܗܲܘ ܕܲܣܚܲܦܬܸܗ ܒܵܥܸܐ ܕܲܢܩܝܼܡ܀
082:151	ܘܸܐܢܗܽܘ ܕܩܵܐܸܡ ܐܵܕܵܡ ܕܲܢܦܲܠ ܠܲܢ ܡܲܦܽܘܠܬܵܐ ܗ̄ܝ܃
082:152	ܬܲܘ ܢܸܬܟܲܫܲܪ ܠܵܐ ܬܸܨܦܲܚ ܠܲܢ ܚܲܝܵܒܽܘܬܵܐ܀
082:153	ܟܽܠܗܽܘܢ ܫܼܐܕܸ̈ܐ ܙܵܥܘ ܒܲܩܪܵܒܸܗ ܕܒܲܪ ܐܲܠܵܗܵܐ܃
082:154	ܘܲܠܣܸܡܵܠܵܐ ܟܽܠܵܗ݀ ܐܲܪܗܸܒ ܟܲܕ ܡܸܬܟܲܬܲܫ܀
082:155	ܙܵܥܘ ܗ̄ܘܲܘ ܡܸܢܸܗ ܡܸܛܽܠ ܬܸܗܪܵܐ ܕܡܲܟܝܼܟܽܘܬܸܗ܃
082:156	ܘܡܸܛܽܠ ܕܲܚܙܲܘ ܫܲܝܢܸܗ ܪܲܒܵܐ ܘܲܒܗܝܼܠܽܘܬܸܗ܀
082:157	ܘܡܸܛܽܠ ܕܲܐܛܥܝܼ ܘܕܲܘܸܕ ܐܸܢܽܘܢ ܒܦܲܓܪܸܗ ܚܲܣܝܵܐ܃
082:158	ܘܠܵܐ ܝܵܕܥܝܼܢ ܗ̄ܘܲܘ ܐܸܢ ܬܲܚܬܵܝܵܐ ܗ̄ܘ ܘܸܐܢ ܥܸܠܵܝܵܐ܀
082:159	ܐܲܪܒܥܝܼܢ ܝܲܘ̈ܡܝܼܢ ܣܕܲܪ ܢܸܣܝܽܘ̈ܢܲܘܗ̄ܝ ܐܵܟܸܠܩܲܪܨܵܐ܃
082:160	ܟܲܕ ܡܥܝܼܪ ܗ̄ܘܵܐ ܩܪ̈ܵܒܸܐ ܟܣܲܝ̈ܵܐ ܥܲܠ ܦܵܪܽܘܩܵܐ܀ 343
082:161	ܒܥܵܐ ܕܲܒܚܸܠܡܸ̈ܐ ܘܲܒܣܽܘܪ̈ܵܕܸܐ ܕܠܲܝ̈ܠܲܘܵܬܵܐ܃
082:162	ܢܲܩܪܸܒ ܥܲܡܸܗ ܘܠܲܝܬ ܗ̄ܘܵܐ ܐܲܬܪܵܐ ܠܕܲܓܵܠܽܘܬܸܗ܀
082:163	ܐܸܬܦܲܪܲܣ ܗ̄ܘܵܐ ܕܲܒܚܽܘ̈ܫܵܒܸܐ ܒܝܼ̈ܫܸܐ ܢܲܪܡܸܝܘܗ̄ܝ܃
082:164	ܘܠܵܐ ܡܩܲܒܸܠ ܗ̄ܘܵܐ ܠܸܩܛܸܗ ܛܲܡܵܐܐ ܕܩܲܕܝܼܫܵܐ ܗ̄ܘܵܐ܀
082:165	ܠܵܐ ܡܸܫܟܲܚ ܗ̄ܘܵܐ ܢܫܲܕܠܸܗ ܒܛܽܘܥܝܲܝ ܕܲܪ̈ܓܝܼܓܵܬܵܐ܃
082:166	ܕܠܵܐ ܐܝܼܬ ܗ̄ܘܵܐ ܒܸܗ ܚܛܝܼܬܵܐ ܕܪܵܓܵܐ ܝܲܬܝܼܪ̈ܵܬܵܐ܀
082:167	ܟܡܵܐ ܐܸܢ ܐܲܣܓܝܼ ܘܸܐܬܬܲܚܬܝܼ ܗ̄ܘܵܐ ܒܪܵܐ ܕܲܐܠܵܗܵܐ܃
082:168	ܘܠܵܐ ܐܸܬܬܲܚܬܝܼ ܐܸܠܵܐ ܥܕܲܡܵܐ ܠܪܲܘܡܸܗ ܕܵܐܕܵܡ܀
082:169	ܠܡܽܘܫܚܲܬ ܐܵܕܵܡ ܥܲܕܠܵܐ ܢܸܐܟܽܘܠ ܡܸܢ ܐܝܼܠܵܢܵܐ܃
082:170	ܢܚܸܬ ܒܲܪ ܚܲܝܵܐ ܕܢܲܚܸܐ ܠܵܐܕܵܡ ܕܲܚܛܵܐ ܘܸܐܒܲܕ܀
082:171	ܘܲܩܪܸܒ ܨܸܐܕܲܘܗ̄ܝ ܐܵܟܸܠܩܲܪܨܵܐ ܕܢܸܥܒܸܕ ܕܲܪܵܐ܃
082:172	ܘܠܲܝܬ ܗ̄ܘܵܐ ܚܛܝܼܬܵܐ ܕܗܝܼ ܗܘܵܬ̤ ܥܸܠܬܵܐ ܕܢܸܦܸܠ ܐܵܕܵܡ܀
082:173	ܝܼܚܝܼܕܵܝܵܐ ܟܲܕ ܡܸܢ ܡܲܪܝܲܡ ܐܸܬܕܲܡܝܼ ܠܲܢ܃
082:174	ܚܛܝܼܬܵܐ ܠܲܓܡܵܪ ܠܵܐ ܩܸܪܒܲܬ̤ ܠܸܗ ܕܝܼܚܝܼܕܵܝܵܐ ܗ̄ܘ܀
082:175	ܣܛܲܪ ܡܸܢ ܚܛܝܼܬܵܐ ܐܸܬܕܲܡܝܼ ܠܲܢ ܟܲܕ ܐܸܬܕܲܡܝܼ܃
082:176	ܘܲܒܡܲܦܽܘܠܬܵܐ ܠܵܐ ܐܸܬܕܲܡܝܼ ܠܲܕܒܸܝܬ ܐܵܕܵܡ܀
082:177	ܗܽܘ ܣܵܛܵܢܵܐ ܕܠܵܐ ܡܸܨܥܵܝܵܐ ܐܲܩܪܸܒ ܥܲܡܸܗ܃
082:178	ܕܠܲܝܬ ܗ̄ܘܵܐ ܚܲܘܵܐ ܠܵܐ ܐ̄ܬܵܐ ܚܸܘܝܵܐ ܐܲܝܟ ܩܲܕܡܵܝܵܐ܀
082:179	ܐܲܦܝܼ̈ܢ ܒܲܐܦܝܼ̈ܢ ܠܽܘܩܒܲܠ ܡܲܠܟܵܐ ܢܦܲܩ ܡܵܪܽܘܕܵܐ܃
082:180	ܕܗܽܘ ܢܸܬܟܲܬܲܫ ܥܲܠ ܕܲܩܫܸܐ ܗ̄ܘܵܐ ܩܪܵܒܵܐ ܡܸܢܸܗ܀
082:181	ܘܠܵܐ ܫܲܕܲܪ ܗ̄ܘܵܐ ܚܸܘܝܵܐ ܠܘܵܬܸܗ ܕܠܲܝܬ ܗ̄ܘܵܐ ܚܲܘܵܐ܃
082:182	ܘܗܽܘ ܒܲܩܢܽܘܡܸܗ ܢܲܣܝܸܗ ܠܲܒܪܵܐ ܕܠܵܐ ܡܸܨܥܵܝܵܐ܀
082:183	ܘܲܐܪܒܥܝܼܢ ܝܲܘ̈ܡܝܼܢ ܐܸܬܦܲܪܲܣ ܗ̄ܘܵܐ ܘܠܵܐ ܐܸܫܟܲܚ ܗ̄ܘܵܐ܃
082:184	ܥܸܠܬܵܐ ܕܝܵܗܒܵܐ ܐܝܼܕܵܐ ܠܢܸܟܠܸܗ ܨܹܝܕ ܦܵܪܽܘܩܵܐ܀
082:185	ܠܵܐ ܒܫܽܘ̈ܓܵܫܸܐ ܘܠܵܐ ܒܕܽܘ̈ܚܵܠܸܐ ܘܠܵܐ ܒܣܽܘܪ̈ܵܕܸܐ܃
082:186	ܘܠܵܐ ܒܚܽܘ̈ܫܵܒܸܐ ܘܠܵܐ ܒܚܸܙܘ̈ܵܢܸܐ ܕܕܲܓܵܠܽܘܬܵܐ܀
082:187	ܘܠܵܐ ܟܲܕ ܣܵܕܲܪ ܫܪܲܓܪ̈ܵܓܝܵܬܸܗ ܒܠܲܝ̈ܠܲܘܵܬܵܐ܃
082:188	ܘܠܵܐ ܒܼܐܝ̈ܡܵܡܸܐ ܟܲܕ ܡܸܬܚܲܫܲܚ ܒܲܕܚܝܼ̈ܠܵܬܵܐ܀
082:189	ܫܓܝܼܫ ܗ̄ܘܵܐ ܒܝܼܫܵܐ ܘܲܒܥܸܠܕܲܪܸܗ ܐܵܕܵܡܵܣ ܗ̄ܘܵܐ܃
082:190	ܟܹܐܦܵܐ ܕܠܵܐ ܐܝܼܬ ܡܸܕܸܡ ܕܡܲܟܸܐ ܠܫܲܪܝܼܪܽܘܬܵܗ݀܀
082:191	ܐܲܪܒܥܝܼܢ ܝܲܘ̈ܡܝܼܢ ܪܽܘܚܵܢܵܐܝܼܬ ܐܲܩܪܸܒ ܥܲܡܸܗ܃
082:192	ܘܲܒܟܽܠ ܦܽܘܪ̈ܣܝܼܢ ܥܠܲܘܗ̄ܝ ܦܵܢܝܵܐ ܗ̄ܘܵܬ̤ ܚܲܝܵܒܽܘܬܵܐ܀
082:193	ܘܲܒܫܽܘܠܵܡܵܐ ܕܲܐܪܒܥܝܼܢ ܝܲܘ̈ܡܝܼܢ ܟܦܸܢ ܗ̄ܘܵܐ ܡܵܪܲܢ܃
082:194	ܘܲܗܘܵܐ ܐܲܬܪܵܐ ܠܵܐܟܸܠܩܲܪܨܵܐ ܕܲܢܢܲܣܸܐ ܗ̄ܘܵܐ܀
082:195	ܟܦܸܢ ܗ̄ܘܵܐ ܡܫܝܼܚܵܐ ܡܕܲܒܪܵܢܵܐܝܼܬ ܘܲܟܝܵܢܵܐܝܼܬ܃
082:196	ܠܬܲܪ̈ܬܲܝܗܸܝܢ ܓܹܝܪ ܐܝܼܬ ܗ̄ܘܵܐ ܥܸܠܬܵܐ ܒܝܼܚܝܼܕܵܝܵܐ܀
082:197	ܡܕܲܒܪܵܢܵܐܝܼܬ ܥܲܠ ܕܲܐܠܵܗܵܐ ܗ̄ܘ ܥܲܡ ܝܵܠܽܘܕܸܗ܃