The Comprehensive Aramaic Lexicon

082:097	ܐܲܪܒܥܝܼܢ ܝܲܘ̈ܡܝܼܢ ܨܵܡ ܐܲܝܟ ܡܽܘܫܸܐ ܘܲܐܝܟ ܐܸܠܝܼܵܐ܃
082:098	ܢܗܲܠܸܟ ܒܽܐܘܪܚܵܐ ܗܵܝ ܕܲܕܪܲܫܘ ܠܸܗ ܢܒܝܼܸ̈ܐ ܕܲܐܒܽܘܗ̄ܝ܀
082:099	ܩܲܕܸܡܘ ܕܵܩܽܘܗ̄ܝ ܒܲܢܒܝܼܽܘܬܵܐ ܚܵܙܝܲܬ ܐ̄ܪ̈ܵܙܸܐ܃
082:100	ܘܲܒܨܲܘ̈ܡܲܝܗܽܘܢ ܨܵܪܘ ܗ̄ܘܲܘ ܨܲܘܡܸܗ ܕܲܢܕܲܡܽܘܢ ܒܸܗ܀
082:101	ܫܲܪܝܼ ܒܨܲܘܡܵܐ ܘܙܵܥ ܐܲܪܟܽܘܢܸܗ ܕܥܵܠܡܵܐ ܡܸܢܸܗ܃
082:102	ܘܲܣܕܲܪ ܕܲܪܵܐ ܕܢܸܐܪܽܘܥ ܩܼܐܪܣܵܐ ܓܲܢ̄ܒܵܪܵܐܝܼܬ܀
082:103	ܘܲܡܕܲܘܲܕ ܗ̄ܘܵܐ ܘܡܲܢܽܘ ܘܒܲܪ ܡܲܢ ܠܵܐ ܝܵܕܲܥ ܗ̄ܘܵܐ܃
082:104	ܕܒܲܪ ܐܲܠܵܗܵܐ ܘܲܒܪܸܗ ܕܐ̄ܢܵܫܵܐ ܣܒܲܪ ܕܼܐܝܬܲܘܗ̄ܝ ܗ̄ܘܵܐ܀
082:105	ܡܸܛܽܠ ܕܼܐܝܬ ܗ̄ܘܵܐ ܓܸܫܬܵܐ ܘܓܽܘܫܡܵܐ ܠܒܲܪ ܐܲܠܵܗܵܐ܃
082:106	ܡܸܬܠܲܒܲܒ ܗ̄ܘܵܐ ܥܲܠ ܬܲܟܬܽܘܫܵܐ ܕܢܲܩܪܸܒ ܥܲܡܸܗ܀
082:107	ܘܲܕܠܵܐ ܐܝܼܬ ܗ̄ܘܵܐ ܒܦܲܓܪܸܗ ܚܛܝܼܬܵܐ ܕܲܒܢܲܝܢܵܫܵܐ܃
082:108	ܡܸܣܬܲܪܲܕ ܗ̄ܘܵܐ ܕܕܲܠܡܵܐ ܗܽܘܝܽܘ ܒܪܵܐ ܕܲܐܠܵܗܵܐ܀
082:109	ܘܟܲܕ ܝܵܕܲܥ ܗ̄ܘܵܐ ܘܟܲܕ ܠܵܐ ܝܵܕܲܥ ܩܪܸܒ ܢܸܬܟܲܬܲܫ܃
082:110	ܕܲܒܢܸܣܝܵܢܵܐ ܢܼܐܠܲܦ ܢܸܚܙܸܐ ܢܲܗܝܼܪܵܐܝܼܬ܀
082:111	ܐܲܪܒܥܝܼܢ ܝܲܘ̈ܡܝܼܢ ܝܼܬܸܒ ܚܵܐܲܪ ܐܵܟܸܠܩܲܪܨܵܐ܃
082:112	ܕܸܐܢ ܟܵܦܸܢ ܗ̄ܘܵܐ ܐܲܘ ܠܵܐ ܟܵܦܸܢ ܒܲܪ ܐܲܠܵܗܵܐ܀
082:113	ܘܡܸܬܚܲܫܲܒ ܗ̄ܘܵܐ ܕܸܐܠܵܐ ܟܵܦܸܢ ܪܽܘܚܵܢܵܝܵܐ ܗ̄ܘ܃
082:114	ܐܸܢܕܸܝܢ ܟܵܦܸܢ ܙܵܟܸܐ ܐ̄ܢܵܐ ܠܸܗ ܕܡܸܢ ܦܲܓܪ̈ܵܢܸܐ ܗ̄ܘ܀
082:115	ܘܲܒܚܽܘ̈ܫܵܒܸܐ ܣܪ̈ܝܼܩܸܐ ܒܝܼܫܵܐ ܡܸܬܩܲܠܸܐ ܗ̄ܘܵܐ܃
082:116	ܘܡܸܬܡܲܪܡܲܪ ܗ̄ܘܵܐ ܘܡܸܬܕܲܠܲܚ ܗ̄ܘܵܐ ܘܡܸܬܚܲܫܲܒ ܗ̄ܘܵܐ܀
082:117	ܐܲܪܥܵܢܵܐ ܗ̄ܘ ܟܲܝ ܫܡܲܝܵܢܵܐ ܗ̄ܘ ܟܲܝ ܡܽܘܢ ܟܲܝ ܒܵܥܸܐ܃
082:118	ܠܡܽܘܢ ܟܲܝ ܨܵܐܸܡ ܘܲܐܝܟܲܢ ܨܵܐܸܡ ܘܲܚܠܵܦ ܡܲܢܽܘ܀
082:119	ܒܦܲܓܪܸܗ ܕܝܼܠܸܗ ܚܛܝܼܬܵܐ ܕܐ̄ܢܵܫܵܐ ܠܵܐ ܡܸܬܓܲܫܫܵܐ܃
082:120	ܘܗܵܐ ܕܵܡܸܐ ܠܝܼ ܕܲܚܠܵܦ ܐܵܕܵܡ ܒܵܥܸܐ ܕܲܢܨܽܘܡ܀
082:121	ܡܸܣܬܲܒܪܵܐ ܠܝܼ ܕܪܸܓܠܵܐ ܕܢܸܦܠܲܬ̤ ܒܵܥܸܐ ܕܲܢܩܝܼܡ܃
082:122	ܘܕܲܪܸܗ ܕܵܐܕܵܡ ܒܵܥܸܐ ܢܚܲܕܸܬ ܕܲܢܒܲܙܲܚ ܒܝܼ܀
082:123	ܠܵܐ ܚܽܘ̈ܫܵܒܸܐ ܒܝܼ̈ܫܸܐ ܡܩܲܒܸܠ ܐܲܝܟ ܒܲܪܢܵܫܵܐ܃
082:124	ܘܵܐܦܠܵܐ ܒܪܸܢܝܵܐ ܕܲܪ̈ܓܝܼܓܵܬܵܐ ܦܫܝܼܩ ܢܸܫܬܲܕܲܠ܀
082:125	ܚܛܝܼܬܵܐ ܕܦܵܬܚܵܐ ܬܲܪܥܵܐ ܠܡܲܘܬܵܐ ܒܦܲܓܪܸܗ ܠܵܐ ܐܝܼܬ܃
082:126	ܘܲܐܝܟܲܢ ܐܸܥܽܘܠ ܕܸܐܢ ܢܵܩܸܫ ܐ̄ܢܵܐ ܠܵܐ ܦܵܬܲܚ ܠܝܼ܀
082:127	ܒܗܝܼܠ ܗ̄ܘܵܐ ܡܵܪܲܢ ܘܲܡܠܸܐ ܟܽܠܵܗ݀ ܡܲܟܝܼܟܽܘܬܵܐ܃
082:128	ܘܲܠܒܝܼܟ ܨܲܘܡܵܐ ܘܪܵܕܸܐ ܒܽܐܘܪܚܵܐ ܕܙܲܕܝܼܩܽܘܬܵܐ܀
082:129	ܝܵܩܸܕ ܒܝܼܫܵܐ ܘܲܡܠܸܐ ܟܽܠܵܗ݀ ܡܵܪܽܘܕܽܘܬܵܐ܃
082:130	ܡܕܲܘܲܕ ܘܲܕܠܝܼܚ ܘܓܵܙܸܡ ܪܸܒܲܬ ܥܲܠ ܙܵܟܽܘܬܵܐ܀
082:131	ܡܫܝܼܚܵܐ ܒܨܲܘܡܸܗ ܡܸܬܒܲܣܲܡ ܗ̄ܘܵܐ ܡܲܟܝܼܟܵܐܝܼܬ܃
082:132	ܘܒܲܪ ܐܲܒܕܵܢܵܐ ܡܥܝܼܪ ܬܲܟܬܽܘܫܵܐ ܥܲܙܝܼܙܵܐܝܼܬ܀
082:133	ܘܲܩܪܵܐ ܠܫܼܐܕܸ̈ܐ ܚܲܝ̈ܠܲܘܵܬܸܗ ܕܲܢܥܲܕܪܽܘܢܵܝܗ̄ܝ܃
082:134	ܘܲܠܠܸܓܝܽܘ̈ܢܲܘܗ̄ܝ ܕܲܒܣܲܓܝܼܸ̈ܐܐ ܢܩܝܼܡ ܙܵܟܽܘܬܵܐ܀
082:135	ܘܲܐܟܡܵܐ ܕܗܵܠܸܝܢ ܡܸܬܐܲܡܪ̈ܵܢ ܗ̄ܘ̈ܲܝ ܡܸܢ ܣܵܛܵܢܵܐ܃
082:136	ܠܚܲܝ̈ܠܲܘܵܬܵܐ ܒܢ̈ܲܝ ܚܸܫܽܘܟܵܐ ܕܢܲܩܝܼܦܝܼܢ ܠܸܗ܀
082:137	ܗܵܐ ܡܲܩܪܸܒ ܥܲܡܝ ܚܲܕ ܐܲܪܥܵܢܵܐ ܘܲܫܡܲܝܵܢܵܐ܃
082:138	ܐܲܠܵܗ ܒܲܪܢܵܫ ܕܵܐܦ ܪܽܘܚܵܢܵܐ ܗ̄ܘ ܐܵܦ ܦܲܓܪܵܢܵܐ܀
082:139	ܘܠܵܐ ܝܵܕܲܥ ܐ̄ܢܵܐ ܐܸܢ ܥܸܠܵܝܵܐ ܗ̄ܘ ܐܲܘ ܬܲܚܬܵܝܵܐ܃
082:140	ܘܗܵܐ ܒܲܐܓܽܘܢܵܐ ܩܵܐܸܡ ܘܲܒܗܝܼܠ ܘܲܡܒܲܣܲܪ ܒܝܼ܀
082:141	ܬܲܘ ܚܲܝ̈ܠܲܘܵܬܝ ܡܸܢ ܟܽܠ ܓܲܒܝܼ̈ܢ ܘܡܸܢ ܟܽܠ ܦܸܢ̈ܝܵܢ܃
082:142	ܠܵܐ ܫܚܝܼܡ ܕܲܪܵܐ ܟܽܠܲܢ ܐܲܟܚܲܕ ܢܸܬܟܲܫܲܪ ܒܸܗ܀
082:143	ܐܸܢܗܽܘ ܙܵܟܸܐ ܠܟܽܠܲܢ ܦܵܟܲܪ ܟܽܠܲܢ ܚܵܒܸܫ܃
082:144	ܠܟܽܠܲܢ ܒܵܣܲܪ ܟܽܠܲܢ ܢܸܬܬܥܝܼܪ ܥܲܠ ܐܲܓܽܘܢܵܐ܀
082:145	ܒܗܵܠܸܝܢ ܝܲܘ̈ܡܸܐ ܫܠܲܘ ܡܸܢ ܬܸܐܓܪܸ̈ܐ ܘܡܸܢ ܗܸܪ̈ܵܬܵܐ܃
082:146	ܘܡܸܢ ܒܝܼ̈ܫܵܬܵܐ ܘܡܸܢ ܡܲܨ̈ܘܵܬܸܗ ܕܥܵܠܡܵܐ ܟܽܠܸܗ܀
082:147	ܐܲܪܦܲܘ ܐܝܼܕܵܐ ܒܦܲܚܸ̈ܐ ܛܡܝܼܪܸ̈ܐ ܘܒܲܡܨܝܼ̈ܕܵܬܵܐ܃