The Comprehensive Aramaic Lexicon

082:009	ܐܵܦ ܡܲܚܙܝܼܬܵܐ ܟܡܵܐ ܕܚܵܐܲܪ ܒܵܗ݀ ܗܽܘ ܚܲܙܵܝܵܐ܃
082:010	ܗܵܘܝܵܐ ܛܥܝܼܢܵܐ ܨܽܘܪܬܸܗ ܒܓܲܘܵܗ݀ ܘܡܸܙܕܲܝܲܚ ܒܵܗ݀܀
082:011	ܘܸܐܢܗܽܘ ܕܡܲܪܚܸܩ ܡܸܣܬܲܦܩܵܐ ܠܵܗ݀ ܘܠܵܐ ܡܩܲܘܸܐ ܒܵܗ݀܃
082:012	ܒܲܚܙܵܬܸܗ ܓܹܝܪ ܥܵܬܪܵܐ ܡܸܢܸܗ ܡܵܐ ܕܚܵܐܲܪ ܒܵܗ݀܀
082:013	ܣܦܝܼܩܵܐ ܗ̄ܝ ܟܽܠܵܗ݀ ܡܸܢ ܕܸܡ̈ܘܵܬܵܐ ܘܡܸܢ ܨܽܘܪ̈ܵܬܵܐ܃
082:014	ܟܡܵܐ ܕܚܲܙܵܝܵܐ ܪܲܚܝܼܩ ܡܸܢܵܗ݀ ܘܠܵܐ ܚܵܐܲܪ ܒܵܗ݀܀
082:015	ܘܗܵܘܝܵܐ ܫܒܝܼܩܵܐ ܒܲܡܓܲܙܝܽܘܬܵܐ ܘܡܸܣܟܼܢܽܘܬܵܐ܃
082:016	ܘܲܚܪܽܘܒ ܥܽܘܒܵܗ݀ ܘܠܵܐ ܐܝܼܬ ܨܲܠܡܵܐ ܕܢܸܙܕܲܝܲܚ ܒܵܗ݀܀
082:017	ܘܟܲܕ ܢܲܗܝܼܪܵܐ ܠܵܐ ܫܲܦܝܼܪܵܐ ܕܠܵܐ ܚܲܙܵܝܵܐ܃
082:018	ܘܠܲܝܬ ܒܵܗ݀ ܡܸܕܸܡ ܐܸܠܵܐ ܚܵܪ ܒܵܗ݀ ܗܲܘ ܕܲܩܢܸܐ ܠܵܗ݀܀
082:019	ܡܵܐ ܕܚܵܪ ܒܵܗ݀ ܕܹܝܢ ܡܸܚܕܵܐ ܒܵܛܢܵܐ ܘܛܵܥܢܵܐ ܡܸܢܸܗ܃
082:020	ܘܥܵܐܸܠ ܫܵܪܸܐ ܒܥܽܘܒܵܗ݀ ܕܲܟܝܵܐ ܘܥܵܬܪܵܐ ܡܸܢܸܗ܀
082:021	ܘܪܵܥܡܵܐ ܒܫܽܘܦܪܸ̈ܐ ܘܲܒܨܽܘܪ̈ܵܬܵܐ ܘܲܒܕܸܡ̈ܘܵܬܵܐ܃
082:022	ܕܚܵܪ ܒܵܗ݀ ܡܵܪܵܗ݀ ܠܸܒܫܲܬ̤ ܩܵܡܲܬ̤ ܨܲܠܡܵܐ ܪܲܒܵܐ܀
082:023	ܒܲܪ ܐܲܠܵܗܵܐ ܚܽܘܪ ܒܵܗ݀ ܒܢܲܦܫܵܐ ܘܬܸܡܠܸܐ ܫܽܘܦܪ̈ܲܝܟ܃
082:024	ܘܟܲܬܲܪ ܨܸܐܕܸܝܗ݀ ܕܠܵܐ ܬܸܣܬܲܦܲܩ ܡܸܢ ܥܸܢܝܵܢܵܟ܀
082:025	ܠܵܐ ܡܵܪܝ ܬܲܪܚܸܩ ܕܸܐܢ ܡܲܪܚܸܩ ܐܲܢ̄ܬ ܐܵܒܕܵܐ ܡܸܢܵܟ܃
082:026	ܒܲܚܙܵܬܵܟ ܓܹܝܪ ܛܵܥܢܵܐ ܘܡܵܠܝܵܐ ܘܣܵܒܥܵܐ ܫܽܘܦܪ̈ܲܝܟ܀
082:027	ܚܙܝܼܢܝ̄ ܚܵܙܸܐ ܟܽܠ ܘܲܡܠܝܼܢܝ ܬܸܗܪܵܐ ܕܓܲܢ̄ܒܵܪܽܘܬܵܟ܃
082:028	ܕܲܒܬܸܕܡܽܘܪܬܵܐ ܐܲܙܝܼܥ ܡܼܐܡܪܵܟ ܥܲܬܝܼܪܵܐܝܼܬ܀
082:029	ܗܲܒ ܡܸܢ ܕܝܼܠܵܟ ܡܸܠܬܵܐ ܕܡܲܠܝܵܐ ܦܵܪܽܘܫܽܘܬܵܐ܃
082:030	ܘܦܽܘܡܵܐ ܕܙܵܡܲܪ ܫܽܘܒܚܵܐ ܫܲܦܝܵܐ ܕܠܵܐ ܕܽܘܘܵܕܵܐ܀
082:031	ܘܗܲܘܢܵܐ ܕܬܵܗܲܪ ܒܽܐܘܪܚܵܟ ܪܵܡܲܬ ܡܸܢ ܒܵܨܽܘ̈ܝܸܐ܃
082:032	ܘܩܵܠܵܐ ܕܲܡܥܝܼܪ ܐ̄ܢܵܫܵܐ ܠܫܽܘܒܚܵܟ ܟܲܫܝܼܪܵܐܝܼܬ܀
082:033	ܒܕܲܪܵܟ ܬܸܗܪܸܬ ܟܲܕ ܡܲܩܪܸܒ ܐܲܢ̄ܬ ܥܲܡ ܣܵܛܵܢܵܐ܃
082:034	ܘܡܸܢܸܗ ܕܬܸܗܪܵܐ ܙܵܥ ܒܝܼ ܡܹܐܡܪܵܐ ܠܡܸܬܡܲܠܵܠܽܘ܀
082:035	ܘܗܵܐ ܚܵܐܲܪ ܒܸܗ ܗܲܘܢܵܐ ܒܕܲܪܵܟ ܘܲܡܠܸܐ ܡܸܢܸܗ܃
082:036	ܬܸܗܪܵܐ ܘܦܸܗܝܵܐ ܘܲܐܝܟܲܢ ܐܼܡܪܵܟ ܠܵܐ ܝܵܕܲܥ ܐ̄ܢܵܐ܀
082:037	ܐܲܠܵܗܵܐ ܐܲܢ̄ܬ ܘܲܐܝܟܲܢ ܠܵܐ ܕܚܸܠ ܒܝܼܫܵܐ ܡܸܢܵܟ܃
082:038	ܢܲܩܪܸܒ ܥܲܡܵܟ ܐܸܢ ܝܵܕܲܥ ܗ̄ܘܵܐ ܕܡܲܢܽܘ ܐܝܼܬܲܝܟ܀
082:039	ܒܪܸܗ ܕܐ̄ܢܵܫܵܐ ܐܲܢ̄ܬ ܟܲܣܝܵܐ ܘܓܲܠܝܵܐ ܘܝܼܚܝܼܕܵܝܵܐ܃
082:040	ܘܵܐܟܸܠܩܲܪܨܵܐ ܒܦܲܓܪܵܢܽܘܬܵܟ ܡܸܬܕܲܘܲܕ ܗ̄ܘܵܐ܀
082:041	ܒܨܲܘܡܵܟ ܬܸܗܪܸܬ ܕܲܠܣܵܛܵܢܵܐ ܗܽܘ ܐܲܛܥܝܼ ܗ̄ܘܵܐ܃
082:042	ܕܲܢܢܲܣܸܝܟ ܗ̄ܘܵܐ ܘܢܸܕܲܥ ܡܲܢ ܐܲܢ̄ܬ ܒܲܪ ܐܲܠܵܗܵܐ܀
082:043	ܘܒܲܝܢܵܬ ܗܵܠܸܝܢ ܐܲܚܕܲܢܝ ܬܸܡܗܵܐ ܒܡܲܟܝܼܟܽܘܬܵܟ܃
082:044	ܕܟܲܕ ܓܲܢ̄ܒܵܪܵܐ ܐܢ̄ܬ ܐܲܝܟ ܚܲܠܵܫܵܐ ܥܒܲܕܬ ܐܲܓܽܘܢܵܐ܀
082:045	ܟܲܣܝܼܬ ܚܲܝܠܵܟ ܒܲܡܚܝܼܠܽܘܬܵܟ ܟܲܕ ܡܲܩܪܸܒ ܐܲܢ̄ܬ܃
082:046	ܐܵܦ ܪܲܒܽܘܬܵܟ ܐܸܬܓܲܢܝܲܬ̤ ܠܵܗ݀ ܒܲܙܥܽܘܪܽܘܬܵܟ܀
082:047	ܘܲܒܐ̄ܢܵܫܽܘܬܵܟ ܐܲܠܵܗܽܘܬܵܟ ܚܲܟܝܼܡܵܐܝܼܬ܃
082:048	ܘܲܛܥܵܐ ܒܝܼܫܵܐ ܘܲܥܒܲܕ ܕܲܪܵܐ ܕܬܸܗܪܵܐ ܥܲܡܵܟ܀
082:049	ܘܗܵܐ ܡܙܝܼܥܝܼܢ ܠܝܼ ܓ̈ܲܠܠܸܐ ܕܡܼܐܡܪܵܟ ܣܲܓܝܼ ܬܸܗܪܸ̈ܐ܃
082:050	ܗܲܒ ܠܝܼ ܡܸܠܬܵܐ ܕܲܕܠܵܐ ܒܨܵܬܵܐ ܡܡܲܠܠܵܐ ܫܲܪܒܵܟ܀
082:051	ܒܲܪ ܐܲܠܵܗܵܐ ܚܲܘܒܲܬ ܓܲܘܵܐ ܒܥܵܐ ܗ̄ܘܵܐ ܢܸܦܪܽܘܥ܃
082:052	ܘܡܸܛܽܠܗܵܢܵܐ ܣܒܲܠ ܢܸܣܝܽܘܢܸܗ ܕܵܐܟܸܠܩܲܪܨܵܐ܀
082:053	ܥܲܠ ܕܲܢܦܲܠ ܗ̄ܘܵܐ ܒܕܲܪܵܐ ܐܵܕܵܡ ܟܲܕ ܐܸܬܢܲܣܝܼ܃
082:054	ܐܸܬܚܲܕܲܬ ܗ̄ܘܵܐ ܕܲܪܵܐ ܕܲܢܚܽܘܒ ܐܵܟܸܠܩܲܪܨܵܐ܀
082:055	ܕܚܵܒ ܗ̄ܘܵܐ ܐܵܕܵܡ ܘܲܐܠܸܦ ܠܲܒܢܲܘ̈ܗ̄ܝ ܚܲܝܵܒܽܘܬܵܐ܃
082:056	ܒܲܪ ܐܲܠܵܗܵܐ ܐܲܠܸܦ ܐܸܢܽܘܢ ܕܲܐܝܟܲܢ ܢܸܙܟܽܘܢ܀
082:057	ܘܡܸܛܽܠܗܵܢܵܐ ܢܚܸܬ ܗ̄ܘܵܐ ܠܕܲܪܵܐ ܗܲܘ ܙܵܟܸܐ ܟܽܠ܃
082:058	ܕܢܸܗܘܸܐ ܕܡܽܘܬܵܐ ܠܟܽܠܡܲܢ ܕܵܐܟܸܦ ܥܲܠ ܙܵܟܽܘܬܵܐ܀
082:059	ܘܚܲܘܝܼ ܠܐ̄ܢܵܫܵܐ ܕܲܐܝܟܲܢ ܢܸܙܟܽܘܢ ܠܲܒܥܸܠܕܲܪܵܐ܃