← Back
The Comprehensive Aramaic Lexicon
← Return to the Text Browser
click on the file description for more information

63404: JSBhom 82: on Our Lord's fight with Satan

Click on a word for lexical analysis
Click on a red-colored coordinate for comments and/or translations of the line

▲ earlier lines

082:435 ܘܲܐܘܬܸܒ ܡܲܠܟܸ̈ܐ ܘܲܐܩܝܼܡ ܪ̈ܲܒܲܝ ܚܲܝ̈ܠܲܘܵܬܵܐ܀
082:436 ܘܲܣܕܲܪ ܘܲܐܩܝܼܡ ܥܲܡ̈ܡܝܼܢ ܥܲܡ̈ܡܝܼܢ ܒܲܐܬܪ̈ܝܼܢ ܐܲܬܪ̈ܝܼܢ܃
082:437 ܘܚܲܘܝܼ ܬܲܡܵܢ ܫܽܘܒܚܵܐ ܕܡܲܠܟܸ̈ܐ ܘܚܸܙܘܵܐ ܪܲܒܵܐ܀
082:438 ܘܲܟܫܵܐ ܥܽܘܬܪܵܐ ܕܫܲܠܝܼ̈ܛܵܢܸܐ ܥܲܠ ܕܲܪ̈ܓܲܝܗܽܘܢ܃
082:439 ܘܲܡܠܵܝܗ̄ܝ ܠܲܐܬܪܵܐ ܟܽܘܪ̈ܣܲܘܵܬܵܐ ܘܡܵܪ̈ܲܘܵܬܵܐ܀
082:440 ܥܲܡ̈ܡܸܐ ܕܣܵܓܕܝܼܢ ܠܲܐܠܵܗܲܝ̈ܗܽܘܢ ܒܲܬܚܽܘ̈ܡܲܝܗܽܘܢ܃
082:441 ܘܟܽܠ ܐܸܡ̈ܘܵܬܵܐ ܕܢܵܩ̈ܫܵܢ ܟܲܦܸ̈ܐ ܠܲܦܬܲܟܪ̈ܲܝܗܸܝܢ܀
082:442 ܟܸܢ̈ܫܸܐ ܕܣܵܓܕܝܼܢ ܠܲܣܪܝܼܩܽܘܬܵܐ ܒܲܐܬܪ̈ܲܘܵܬܵܐ܃
082:443 ܘܟܽܘܡܪܸ̈ܐ ܕܥܲܡ̈ܡܸܐ ܕܡܲܣܩܝܼܢ ܕܸܒ̈ܚܸܐ ܠܲܐܠܵܗ̈ܵܬܵܐ܀
082:444 ܕܲܗܒܵܐ ܕܠܵܐ ܣܵܟ ܘܣܼܐܡܵܐ ܕܲܟܫܸܐ ܕܠܵܐ ܡܲܬܩܵܠܵܐ܃
082:445 ܠܒܽܘ̈ܫܸܐ ܡܫܲܒ̈ܚܸܐ ܘܛܲܒ̈ܥܸܐ ܘܟܼܐܦܸ̈ܐ ܝܲܩܝܼܪ̈ܵܬܵܐ܀
082:446 ܟܽܠ ܡܲܠܟ̈ܘܵܬܵܐ ܥܲܡ ܫܽܘ̈ܒܚܲܝܗܸܝܢ ܐܵܦ ܥܽܘܬܪ̈ܲܝܗܸܝܢ܃
082:447 ܒܲܐܬܪ̈ܲܘܵܬܗܸܝܢ ܒܫܽܘ̈ܠܛܵܢܲܝܗܸܝܢ ܘܲܒܥܲܡ̈ܡܲܝܗܸܝܢ܀
082:448 ܘܚܲܘܝܸܗ ܠܲܒܪܵܐ ܥܽܘܬܪܸ̈ܐ ܘܓܲܙܸ̈ܐ ܘܟܽܠ ܣܝܼ̈ܡܵܬܵܐ܃
082:449 ܘܟܲܕ ܡܸܬܡܲܟܲܟ ܩܲܒܸܠ ܡܵܪܲܢ ܢܸܚܙܸܐ ܗܵܠܸܝܢ܀
082:450 ܐܸܠܽܘ ܠܵܐ ܒܥܵܐ ܠܵܐ ܚܵܙܸܐ ܗ̄ܘܵܐ ܟܲܕ ܚܲܘܝܼ ܠܸܗ܃
082:451 ܐܸܠܵܐ ܡܸܛܽܠ ܡܲܟܝܼܟܽܘܬܸܗ ܚܙܵܐ ܗ̄ܘܵܐ ܗܵܠܸܝܢ܀
082:452 ܐܲܝܟܲܢ ܕܲܨܒܵܐ ܢܚܲܘܸܐ ܒܝܼܫܵܐ ܚܙܵܐ ܗ̄ܘܵܐ ܡܵܪܲܢ܃
082:453 ܕܲܢܚܲܘܸܐ ܠܸܗ ܕܠܵܐ ܡܸܬܪܲܓܪܲܓ ܠܲܫܐܝܼ̈ܠܵܬܸܗ܀
082:454 ܘܩܵܡ ܣܵܛܵܢܵܐ ܒܛܽܘܪܵܐ ܪܵܡܵܐ ܨܹܝܕ ܦܵܪܽܘܩܲܢ܃
082:455 ܘܚܲܘܝܼ ܗ̄ܘܵܐ ܠܸܗ ܥܲܡ̈ܡܸܐ ܘܡܲܠܟܸ̈ܐ ܘܽܐܘ̈ܚܕܵܢܲܝܗܽܘܢ܀
082:456 ܘܸܐܡܲܪ ܗ̄ܘܵܐ ܠܸܗ ܕܗܵܠܸܝܢ ܟܽܠܗܽܘܢ ܗܵܐ ܕܝܼܠܝ ܐܸܢܽܘܢ܃
082:457 ܦܸܠ ܘܲܣܓܽܘܕ ܠܝܼ ܘܣܲܒ ܠܵܟ ܟܽܠܗܽܘܢ ܐܸܢ ܨܵܒܸܐ ܐܲܢ̄ܬ܀
082:458 ܡܵܪܽܘܕܽܘܬܵܐ ܒܲܛܪܽܘܢܽܘܬܵܐ ܕܠܲܝܬ ܠܵܗ݀ ܣܵܟܵܐ܃
082:459 ܥܲܘܵܠܽܘܬܵܐ ܒܡܲܪܵܚܽܘܬܵܐ ܕܠܵܐ ܡܸܬܡܲܫܚܵܐ܀
082:460 ܕܲܐܡܪܲܚ ܢܼܐܡܲܪ ܦܸܠ ܘܲܣܓܽܘܕ ܠܝܼ ܠܒܲܪ ܐܲܠܵܗܵܐ܃
082:461 ܒܕܲܪܵܐ ܕܚܝܼܠܵܐ ܕܲܡܠܸܐ ܙܲܘܥܵܐ ܘܬܸܗܪܵܐ ܪܲܒܵܐ܀
082:462 ܥܲܠ ܕܸܐܬܡܲܟܲܟ ܢܸܥܒܸܕ ܕܲܪܵܐ ܥܲܡ ܚܲܣܝܼܢܵܐ܃
082:463 ܣܒܲܪ ܡܵܪܽܘܕܵܐ ܕܲܟܒܲܪ ܙܵܟܸܐ ܐܸܢ ܡܸܬܟܲܬܲܫ܀
082:464 ܘܲܐܪܡܝܼ ܢܲܦܫܸܗ ܒܕܲܪܵܐ ܪܲܒܵܐ ܗܲܘ ܕܲܬܠܵܬܵܐ܃
082:465 ܟܡܵܐ ܕܼܐܝܬ ܗ̄ܘܵܐ ܒܸܗ ܚܲܝܠܵܐ ܕܢܲܡܪܲܚ ܥܲܠ ܙܲܟܵܝܵܐ܀
082:466 ܐܲܪܓܸܫ ܗ̄ܘܵܐ ܠܸܗ ܕܣܸܓܕܲܬ ܥܲܡ̈ܡܸܐ ܒܵܥܸܐ ܢܲܦܢܸܐ܃
082:467 ܒܪܵܐ ܠܒܸܝܬ ܐܲܒܽܘܗ̄ܝ ܐܸܢܗܽܘ ܕܲܒܪܵܐ ܗ̄ܘ ܐܲܝܟ ܕܸܐܣܬܲܒܪܲܬܹ܀
082:468 ܘܡܸܬܚܲܫܲܒ ܗ̄ܘܵܐ ܕܸܐܢܗܽܘ ܕܲܒܪܵܐ ܗ̄ܘ ܫܵܩܸܠ ܗ̄ܽܘ ܠܵܗ݀܃
082:469 ܡܽܘܢ ܐܸܥܒܸܕ ܠܸܗ ܕܕܝܼܠܸܗ ܒܵܥܸܐ ܘܠܵܐ ܡܲܪܦܸܐ ܠܵܗ݀܀
082:470 ܐܸܩܕܽܘܡ ܐܸܬܠܝܼܗ݀ ܠܣܸܓܕܲܬ ܥܲܡ̈ܡܸܐ ܒܛܝܼ̈ܡܸܐ ܬܼܐܙܲܠ܃
082:471 ܐܵܙܵܠ̄ܐ ܠܵܗ݀ ܡܸܢܝ ܐܸܣܲܒ ܛܝܼ̈ܡܸܝܗ݀ ܐܸܢ ܝܵܗܒܝܼܢ ܠܝܼ܀
082:472 ܚܕܵܐ ܙܒܲܢ ܒܲܠܚܽܘܕ ܐܸܢ ܣܵܓܸܕ ܠܝܼ ܡܵܐ ܕܫܲܓܸܫܬܸܗ܃
082:473 ܚܠܵܦ ܣܸܓ̈ܕܵܬܵܐ ܕܟܽܠܗܽܘܢ ܥܲܡ̈ܡܸܐ ܡܸܬܚܲܫܒܵܐ ܠܝܼ܀
082:474 ܐ̄ܡܲܪ ܗ̄ܘܵܐ ܒܝܼܫܵܐ ܥܲܠ ܫܽܘ̈ܠܛܵܢܸܐ ܕܕܝܼܠܸܗ ܐܸܢܽܘܢ܃
082:475 ܘܗܵܪܟܵܐ ܚܲܘܝܼ ܛܢܵܢܵܐ ܡܵܪܲܢ ܟܲܕ ܓܵܥܲܪ ܒܸܗ܀
082:476 ܐܸܬܬܥܝܼܩ ܝܵܪܬܵܐ ܥܲܠ ܩܸܢܝܵܢܸܗ ܕܲܐܒܵܐ ܕܲܒܙܝܼܙ܃
082:477 ܘܸܐܬܥܲܙܲܙ ܗ̄ܘܵܐ ܕܢܲܦܢܸܐ ܫܒܝܼܬܵܐ ܡܸܢ ܫܲܒܵܝܵܐ܀
082:478 ܫܲܡܥܸܗ ܕܸܐܡܲܪ ܥܲܠ ܫܽܘ̈ܠܛܵܢܸܐ ܕܕܝܼܠܸܗ ܐܸܢܽܘܢ܃
082:479 ܘܟܸܪܝܲܬ̤ ܗ̄ܘܵܬ̤ ܠܸܗ ܥܲܠ ܕܲܫܒܸܝܢ ܗ̄ܘܲܘ ܡܸܢ ܒܸܝܬ ܐܲܒܽܘܗ̄ܝ܀
082:480 ܐܵܘ ܡܵܪܽܘܕܵܐ ܠܲܘ ܕܝܼܠܵܟ ܗ̄ܘܲܘ ܠܵܐ ܬܸܫܬܲܒܗܲܪ܃
082:481 ܡܸܫܒܵܐ ܫܒܸܝܢ ܠܵܟ ܘܡܸܫܬܲܩܠܵܐ ܠܵܗ݀ ܫܒܝܼܬܵܐ ܡܸܢܵܟ܀
082:482 ܐܸܠܽܘ ܠܵܐ ܨܒܲܘ ܢܸܗܘܽܘܢ ܕܝܼܠܵܟ ܠܵܐ ܗܵܘܸܝܢ ܗ̄ܘܲܘ܃
082:483 ܕܲܐܒܵܐ ܐܸܢܽܘܢ ܘܲܒܨܸܒܝܵܢܗܽܘܢ ܐܸܫܬܲܥܒܲܕܘ ܠܵܟ܀
082:484 ܠܡܽܘܢ ܡܲܡܪܲܚ ܐܲܢ̄ܬ ܬܼܐܡܲܪ ܗܵܫܵܐ ܕܕܝܼܠܵܟ ܐܸܢܽܘܢ܃
082:485 ܕܠܵܐ ܡܸܫܬܲܒܩܝܼܢ ܢܸܗܘܽܘܢ ܕܝܼܠܵܟ ܡܸܟܵܐ ܘܲܠܗܲܠ܀

▼ later lines