The Comprehensive Aramaic Lexicon

082:397	ܗܵܐ ܠܵܐ ܣܦܝܼܩ ܐܲܢ̄ܬ ܠܵܐ ܠܩܸܪܝܵܢܵܐ ܘܠܵܐ ܠܲܟܬܵܒܵܐ܃
082:398	ܐܸܠܵܐ ܠܦܲܚܸ̈ܐ ܘܲܡܨܝܼ̈ܕܵܬܵܐ ܕܲܛܡܝܼܪ̈ܵܢ ܠܵܟ܀
082:399	ܐܲܝܟܲܢ ܗܵܫܵܐ ܗܵܐ ܡܲܙܡܽܘܪܵܐ ܥܲܡ ܦܽܘܫܵܩܸܗ܃
082:400	ܬܵܢܸܝܬ ܠܲܒܪܵܐ ܐܲܝܟ ܡܲܠܦܵܢܵܐ ܕܫܲܪܝܼܪ̈ܵܬܵܐ܀
082:401	ܠܡܽܘܢ ܡܲܠܸܦ ܐܲܢ̄ܬ ܘܲܡܢܲܣܸܐ ܐܲܢ̄ܬ ܟܲܕ ܢܵܟܸܠ ܐܲܢ̄ܬ܃
082:402	ܕܠܵܐ ܡܸܫܬܲܡܥܵܐ ܡܲܠܦܵܢܽܘܬܵܐ ܕܼܐܝܬ ܒܵܗ݀ ܢܸܟܠܵܐ܀
082:403	ܠܢܲܟܽܘܠܬܵܢܵܐ ܐܵܦܠܵܐ ܫܪܵܪܵܐ ܡܵܐ ܕܲܡܡܲܠܸܠ܃
082:404	ܫܵܡܲܥ ܠܸܗ ܐ̄ܢܵܫ ܫܲܠܵܐ ܢܲܦܫܵܟ ܡܸܢ ܬܽܘܪܓܵܡܵܐ܀
082:405	ܟܬܝܼܒ ܕܠܵܐ ܬܢܲܣܸܐ ܠܡܵܪܝܵܐ ܡܵܪܵܟ ܘܲܠܐܲܠܵܗܵܟ܃
082:406	ܟܬܵܒܵܐ ܫܲܪܝܼܪ ܢܼܐܠܲܦ ܡܸܢܸܗ ܫܲܪܝܼܪ̈ܵܬܵܐ܀
082:407	ܒܗܸܬ ܣܵܛܵܢܵܐ ܒܕܲܪܵܐ ܕܲܬܪܸܝܢ ܡܸܢ ܦܵܪܽܘܩܲܢ܃
082:408	ܘܬܽܘܒ ܚܵܒܸܨ ܗ̄ܘܵܐ ܥܲܠ ܬܲܟܬܽܘܫܵܐ ܕܡܸܢܸܗ ܢܸܒܗܲܬ܀
082:409	ܬܢܵܐ ܡܲܦܽܘܠܬܵܐ ܘܠܵܐ ܣܸܦܩܲܬ̤ ܠܸܗ ܚܲܝܵܒܽܘܬܵܐ܃
082:410	ܘܲܠܡܲܦܽܘܠܬܵܐ ܕܲܬܠܵܬ ܝܼܨܸܦ ܕܲܢܩܲܕܸܐ ܗ̄ܘܵܐ܀
082:411	ܒܗܲܘ ܩܲܕܡܵܝܵܐ ܕܲܪܵܐ ܢܦܲܠ ܗ̄ܘܵܐ ܘܠܵܐ ܟܲܕܽܘ ܠܸܗ܃
082:412	ܘܲܒܗܸܬ ܗ̄ܘܵܐ ܬܽܘܒ ܒܲܬܪܲܝܵܢܵܐ ܘܬܽܘܒ ܓܵܙܸܡ ܗ̄ܘܵܐ܀
082:413	ܘܡܸܬܪܲܓܪܲܓ ܗ̄ܘܵܐ ܠܕܲܪܵܐ ܐ̄ܚܪܼܢܵܐ ܗܲܘ ܕܲܬܠܵܬܵܐ܃
082:414	ܘܕܲܒܪܸܗ ܠܲܒܪܵܐ ܠܛܽܘܪܵܐ ܪܵܡܵܐ ܐܲܝܟܲܢ ܕܲܟܬܝܼܒ܀
082:415	ܗܽܘ ܝܲܗ̄ܒ ܢܲܦܫܸܗ ܕܢܼܐܙܲܠ ܥܲܡܸܗ ܐܲܝܟܲܢ ܕܲܨܒܵܐ܃
082:416	ܠܲܘ ܒܲܩܛܝܼܪܵܐ ܕܵܒܲܪ ܗ̄ܘܵܐ ܠܸܗ ܟܲܕ ܠܵܐ ܨܵܒܸܐ܀
082:417	ܒܪܵܐ ܓܲܢ̄ܒܵܪܵܐ ܐܸܬܡܲܟܲܟ ܠܸܗ ܠܗܲܘ ܡܵܪܽܘܕܵܐ܃
082:418	ܘܲܐܝܟܲܢ ܕܲܒܥܵܐ ܝܲܗ̄ܒ ܠܸܗ ܐܝܼܕܵܐ ܕܢܲܩܪܸܒ ܥܲܡܸܗ܀
082:419	ܕܢܸܨܠܸܐ ܒܝܼܫܵܐ ܟܽܠܗܽܘܢ ܦܲܚܲܘ̈ܗ̄ܝ ܘܲܪ̈ܓܝܼܓܵܬܸܗ܃
082:420	ܘܲܟܡܵܐ ܟܡܼܐܢܸ̈ܐ ܕܼܐܝܬ ܠܸܗ ܢܲܝܬܸܐ ܥܲܠ ܦܵܪܽܘܩܵܐ܀
082:421	ܘܲܟܡܵܐ ܓܸܐܪܸ̈ܐ ܕܼܐܝܬ ܠܸܗ ܢܸܫܕܸܐ ܘܢܲܘܦܸܐ ܐܸܢܽܘܢ܃
082:422	ܘܲܢܫܲܠܸܡ ܗ̄ܘܵܐ ܪܸ̈ܗܛܸܐ ܟܽܠܗܽܘܢ ܕܽܐܘܡܵܢܽܘܬܸܗ܀
082:423	ܘܲܢܛܲܠܸܩ ܗ̄ܘܵܐ ܟܽܠܗܽܘܢ ܦܽܘܪ̈ܣܸܐ ܕܲܢܟܝܼܠܽܘܬܸܗ܃
082:424	ܘܠܵܐ ܢܲܪܦܸܐ ܠܸܗ ܘܠܵܐ ܚܲܕ ܦܲܚܵܐ ܕܠܵܐ ܨܵܠܸܐ ܠܸܗ܃
082:425	ܘܠܵܐ ܚܲܕ ܢܸܫܒܵܐ ܡܸܢ ܡܨܝܼ̈ܕܵܬܸܗ ܕܠܵܐ ܛܵܡܲܪ ܠܸܗ܀
082:426	ܘܡܸܛܽܠ ܗܵܢܵܐ ܡܲܓܲܪ ܗ̄ܘܵܐ ܠܸܗ ܒܲܪ ܐܲܠܵܗܵܐ܃
082:427	ܟܲܕ ܡܸܬܢܲܣܸܐ ܕܲܒܟܽܠ ܦܽܘܪ̈ܣܝܼܢ ܗܽܘ ܢܸܒܗܲܬ ܗ̄ܘܵܐ܀
082:428	ܘܲܒܟܽܠ ܙܵܟ̈ܘܵܢ ܘܲܒܟܽܠ ܕܲܪ̈ܝܼܢ ܡܸܬܡܲܟܲܟ ܗ̄ܘܵܐ܃
082:429	ܡܫܝܼܚܵܐ ܕܢܸܙܟܸܐ ܘܲܢܙܲܟܸܐ ܟܽܠ ܒܡܲܟܝܼܟܽܘܬܸܗ܀
082:430	ܘܟܲܕ ܐܸܫܬܲܗܝܼ ܩܵܛܸܠ ܐ̄ܢܵܫܵܐ ܒܕܲܪܵܐ ܕܲܬܪܸܝܢ܃
082:431	ܘܲܐܡܪܲܚ ܢܸܥܒܸܕ ܗܲܘ ܕܲܬܠܵܬܵܐ ܒܛܽܘܪܵܐ ܪܵܡܵܐ܀
082:432	ܙܠܲܚ ܥܲܠ ܐܲܪܥܵܐ ܛܸܠܵܢ̈ܝܵܬܵܐ ܕܲܓ̈ܵܠܵܬܵܐ܃
082:433	ܘܲܡܠܵܐ ܛܽܘܪܵܐ ܫܪܲܓܪ̈ܵܓܝܵܬܸܗ ܟܲܕܵܒ̈ܵܬܵܐ܀
082:434	ܘܨܵܪ ܕܸܡ̈ܘܵܬܵܐ ܕܲܡܕܝܼ̈ܢܵܬܵܐ ܘܲܕܡܵܚܽܘ̈ܙܸܐ܃
082:435	ܘܲܐܘܬܸܒ ܡܲܠܟܸ̈ܐ ܘܲܐܩܝܼܡ ܪ̈ܲܒܲܝ ܚܲܝ̈ܠܲܘܵܬܵܐ܀
082:436	ܘܲܣܕܲܪ ܘܲܐܩܝܼܡ ܥܲܡ̈ܡܝܼܢ ܥܲܡ̈ܡܝܼܢ ܒܲܐܬܪ̈ܝܼܢ ܐܲܬܪ̈ܝܼܢ܃
082:437	ܘܚܲܘܝܼ ܬܲܡܵܢ ܫܽܘܒܚܵܐ ܕܡܲܠܟܸ̈ܐ ܘܚܸܙܘܵܐ ܪܲܒܵܐ܀
082:438	ܘܲܟܫܵܐ ܥܽܘܬܪܵܐ ܕܫܲܠܝܼ̈ܛܵܢܸܐ ܥܲܠ ܕܲܪ̈ܓܲܝܗܽܘܢ܃
082:439	ܘܲܡܠܵܝܗ̄ܝ ܠܲܐܬܪܵܐ ܟܽܘܪ̈ܣܲܘܵܬܵܐ ܘܡܵܪ̈ܲܘܵܬܵܐ܀
082:440	ܥܲܡ̈ܡܸܐ ܕܣܵܓܕܝܼܢ ܠܲܐܠܵܗܲܝ̈ܗܽܘܢ ܒܲܬܚܽܘ̈ܡܲܝܗܽܘܢ܃
082:441	ܘܟܽܠ ܐܸܡ̈ܘܵܬܵܐ ܕܢܵܩ̈ܫܵܢ ܟܲܦܸ̈ܐ ܠܲܦܬܲܟܪ̈ܲܝܗܸܝܢ܀
082:442	ܟܸܢ̈ܫܸܐ ܕܣܵܓܕܝܼܢ ܠܲܣܪܝܼܩܽܘܬܵܐ ܒܲܐܬܪ̈ܲܘܵܬܵܐ܃
082:443	ܘܟܽܘܡܪܸ̈ܐ ܕܥܲܡ̈ܡܸܐ ܕܡܲܣܩܝܼܢ ܕܸܒ̈ܚܸܐ ܠܲܐܠܵܗ̈ܵܬܵܐ܀
082:444	ܕܲܗܒܵܐ ܕܠܵܐ ܣܵܟ ܘܣܼܐܡܵܐ ܕܲܟܫܸܐ ܕܠܵܐ ܡܲܬܩܵܠܵܐ܃
082:445	ܠܒܽܘ̈ܫܸܐ ܡܫܲܒ̈ܚܸܐ ܘܛܲܒ̈ܥܸܐ ܘܟܼܐܦܸ̈ܐ ܝܲܩܝܼܪ̈ܵܬܵܐ܀
082:446	ܟܽܠ ܡܲܠܟ̈ܘܵܬܵܐ ܥܲܡ ܫܽܘ̈ܒܚܲܝܗܸܝܢ ܐܵܦ ܥܽܘܬܪ̈ܲܝܗܸܝܢ܃
082:447	ܒܲܐܬܪ̈ܲܘܵܬܗܸܝܢ ܒܫܽܘ̈ܠܛܵܢܲܝܗܸܝܢ ܘܲܒܥܲܡ̈ܡܲܝܗܸܝܢ܀