The Comprehensive Aramaic Lexicon

082:347	ܠܲܘ ܬܸܢܵܢܵܐ ܡܨܸܐ ܗ̄ܘܵܐ ܕܢܸܕܒܲܪ ܠܪܽܘܚܵܐ ܡܸܡܬܽܘܡ܃
082:348	ܐܵܦܠܵܐ ܥܽܘܪܵܐ ܕܢܲܪܡܸܐ ܐܝܼܕܸܗ ܥܲܠ ܥܲܠܥܵܠܵܐ܀
082:349	ܗܽܘ ܨܒܵܐ ܡܵܪܲܢ ܐܲܝܟ ܨܸܒܝܵܢܸܗ ܕܵܐܟܸܠܩܲܪܨܵܐ܃
082:350	ܢܸܕܒܲܪ ܝܵܬܸܗ ܠܕܽܘܟܬܵܐ ܕܝܵܗܒܵܐ ܠܕܲܪܵܐ ܐܝܼܕܵܐ܀
082:351	ܘܥܲܠܗܵܝ ܕܕܲܒܪܸܗ ܐܵܟܸܠܩܲܪܨܵܐ ܡܸܬܟܲܬܒܵܐ ܗ̄ܘܵܬܹ܃
082:352	ܩܵܡ ܒܲܪ ܚܲܝܵܐ ܠܥܸܠ ܡܸܢ ܟܸܢܦܵܐ ܕܗܲܝܟܲܠܩܽܘܕܫܵܐ܀
082:353	ܘܡܸܚܕܵܐ ܩܪܸܒ ܗ̄ܘܵܐ ܗܲܘ ܕܲܡܢܲܣܸܐ ܘܵܐܡܲܪ ܗ̄ܘܵܐ ܠܸܗ܃
082:354	ܕܸܐܢܗܽܘ ܕܲܐܢ̄ܬ ܗ̄ܽܘ ܒܪܵܐ ܕܲܐܠܵܗܵܐ ܐܲܪܡܵܐ ܢܲܦܫܵܟ܀
082:355	ܚܙܵܐ ܣܵܛܵܢܵܐ ܐܲܬܪܵܐ ܪܵܡܵܐ ܘܥܽܘܡܩܵܐ ܪܲܒܵܐ܃
082:356	ܘܲܠܡܲܦܽܘܠܬܵܐ ܕܢܸܚܙܸܐ ܬܲܡܵܢ ܡܸܬܪܲܓܪܲܓ ܗ̄ܘܵܐ܀
082:357	ܘܫܲܪܝܼ ܢܸܬܢܸܐ ܡܸܢ ܡܲܙܡܽܘܪܵܐ ܠܒܲܪ ܐܲܠܵܗܵܐ܃
082:358	ܥܲܠ ܕܲܫܡܲܥ ܗ̄ܘܵܐ ܟܬܵܒܵܐ ܡܸܢܸܗ ܒܕܲܪܵܐ ܩܲܕܡܵܐ܀
082:359	ܠܦܽܘܬ ܪܸܥܝܵܢܸܗ ܡܲܠܸܠ ܥܲܡܸܗ ܐܲܝܟ ܕܲܣܒܲܪ ܠܸܗ܃
082:360	ܕܲܚܙܵܐ ܕܪܵܚܸܡ ܢܸܬܢܸܐ ܟܬܵܒܸ̈ܐ ܘܦܽܘ̈ܫܵܩܲܝܗܽܘܢ܀
082:361	ܡܸܢ ܐܽܘܪܵܝܬܵܐ ܡܲܠܸܠ ܡܵܪܲܢ ܘܲܐܡܪܲܚ ܒܝܼܫܵܐ܃
082:362	ܕܡܸܢ ܡܲܙܡܽܘܪܵܐ ܢܡܲܠܸܠ ܥܲܡܸܗ ܒܕܲܪܵܐ ܕܲܬܪܸܝܢ܀
082:363	ܒܲܪ ܐܲܠܵܗܵܐ ܬܢܵܐ ܡܸܢ ܡܽܘܫܸܐ ܠܽܘܩܒܲܠ ܒܝܼܫܵܐ܃
082:364	ܘܫܲܪܝܼ ܕܢܸܬܢܸܐ ܗܽܘ ܡܸܢ ܕܲܘܝܼܕ ܐܲܝܟ ܝܵܕܽܘܥܵܐ܀
082:365	ܗܵܟܲܢܵܐ ܟܬܝܼܒ ܕܲܠܡܲܠܲܐܟܸ̈ܐ ܢܦܲܩܸܕ ܥܠܲܝܟ܃
082:366	ܘܲܕܢܸܫܩܠܽܘܢܵܟ ܥܲܠ ܕܪ̈ܵܥܲܝܗܽܘܢ ܘܠܵܐ ܡܲܗܲܪ ܐܲܢ̄ܬ܀
082:367	ܠܵܐ ܡܸܬܬܲܩܠܵܐ ܒܟܹܐܦܵܐ ܪܸܓܠܵܟ ܐܸܢܗܽܘ ܕܲܐܢ̄ܬ ܗ̄ܽܘ܃
082:368	ܒܪܵܐ ܕܲܐܠܵܗܵܐ ܫܕܝܼ ܠܲܡ ܢܲܦܫܵܟ ܠܵܐ ܡܲܗܲܪ ܐܲܢ̄ܬ܀
082:369	ܐܵܡܲܪ ܡܵܪܲܢ ܬܽܘܒ ܗܵܟܲܢܵܐ ܟܬܝܼܒ ܒܲܢܒܝܼܵܐ܃
082:370	ܕܲܐܢ̄ܬ ܠܵܐ ܬܢܲܣܸܐ ܠܡܵܪܝܵܐ ܡܵܪܵܟ ܘܲܠܐܲܠܵܗܵܟ܀
082:371	ܠܵܐ ܡܢܲܣܸܐ ܐ̄ܢܵܐ ܘܠܵܐ ܢܵܦܸܠ ܐ̄ܢܵܐ ܐܲܝܟ ܕܵܐܡܲܪ ܐܲܢ̄ܬ܃
082:372	ܐܲܢ̄ܬ ܠܵܐ ܬܢܲܣܸܐ ܕܲܠܢܸܣܝܵܢܵܟ ܠܵܐ ܫܵܡܲܥ ܐ̄ܢܵܐ܀
082:373	ܫܪܵܪܵܐ ܫܲܦܝܼܪ ܡܸܢ ܟܽܠ ܫܽܘܦܪ̈ܝܼܢ ܕܼܐܝܬ ܒܲܒܪܝܼܬܵܐ܃
082:374	ܘܲܕܕܵܡܸܐ ܠܸܗ ܫܽܘܦܪܵܐ ܐ̄ܚܪܼܢܵܐ ܒܥܵܠܡܵܐ ܠܵܐ ܐܝܼܬ܀
082:375	ܫܪܵܪܸܗ ܕܕܲܒܪܵܐ ܐܝܼܬܲܘܗ̄ܝ ܫܽܘܦܪܸܗ ܐܵܦ ܬܸܫܒܽܘܚܬܸܗ܃
082:376	ܕܵܐܦ ܡܸܢ ܪ̈ܵܚܡܸܐ ܐܵܦ ܡܸܢ ܣܵܢ̈ܐܸܐ ܫܽܘܦܪܸܗ ܢܵܨܲܚ܀
082:377	ܙܡܲܪܘ ܠܸܗ ܢܒܝܼܸ̈ܐ ܫܽܘܒܚܵܐ ܒܢܽܘܗܪܵܐ ܕܓܸܠܝܵܢܲܝ̈ܗܽܘܢ܃
082:378	ܘܲܕܪ̈ܵܚܡܸܐ ܗ̄ܘܲܘ ܡܲܠܸܠܘ ܐ̄ܪ̈ܵܙܲܘܗ̄ܝ ܒܲܟܬܵܒܲܝ̈ܗܽܘܢ܀
082:379	ܐܵܦ ܣܵܛܵܢܵܐ ܕܲܡܢܲܣܸܐ ܠܸܗ ܟܲܕ ܣܵܢܸܐ ܠܸܗ܃
082:380	ܐ̄ܪ̈ܵܙܲܘܗ̄ܝ ܕܝܼܠܸܗ ܡܦܲܢܸܐ ܗ̄ܘܵܐ ܠܸܗ ܘܦܽܘ̈ܫܵܩܲܝܗܽܘܢ܀
082:381	ܗܵܐ ܡܸܢ ܪ̈ܵܚܡܸܐ ܘܗܵܐ ܡܸܢ ܣܵܢ̈ܐܸܐ ܟܽܠ ܦܽܘ̈ܫܵܩܝܼܢ܃
082:382	ܟܽܠ ܩܸܪ̈ܝܵܢܝܼܢ ܟܽܠ ܬܽܘܪ̈ܓܵܡܝܼܢ ܥܲܠ ܦܵܪܽܘܩܵܐ܀
082:383	ܗܵܐ ܣܵܛܵܢܵܐ ܡܦܲܫܸܩ ܐ̄ܪ̈ܵܙܲܘܗ̄ܝ ܢܲܗܝܼܪܵܐܝܼܬ܃
082:384	ܥܲܡܵܐ ܗ̄ܘ ܒܲܠܚܽܘܕ ܣܲܟܲܪ ܐܸܕ̈ܢܲܘܗ̄ܝ ܡܸܢ ܣܽܘܟܵܠܵܐ܀
082:385	ܬܵܐ ܝܽܗ̄ܘܕܵܝܵܐ ܫܡܲܥ ܡܸܢ ܣܵܢܐܸܗ ܡܽܘܢ ܐܵܡܲܪ ܠܸܗ܃
082:386	ܕܲܡܢܲܣܸܐ ܠܸܗ ܘܬܵܢܸܐ ܐ̄ܪ̈ܵܙܲܘܗ̄ܝ ܢܲܗܝܼܪܵܐܝܼܬ܀
082:387	ܐܲܘ ܠܲܢܒܝܼܸ̈ܐ ܫܡܲܥ ܕܲܡܡܲܠܠܝܼܢ ܥܲܠ ܓܸܠܝܵܢܸܗ܃
082:388	ܐܲܘ ܠܲܟܬܵܒܵܐ ܩܪܝܼ ܘܗܵܐ ܬܲܡܵܢ ܡܸܫܟܲܚ ܐܲܢ̄ܬ ܠܸܗ܀
082:389	ܐܲܘ ܬܵܐ ܩܲܒܸܠ ܡܸܢ ܣܵܛܵܢܵܐ ܡܲܠܦܵܢܽܘܬܵܐ܃
082:390	ܕܒܲܪ ܐ̄ܪܵܙܵܟ ܗ̄ܽܘ ܘܫܵܡܲܥ ܐܲܢ̄ܬ ܠܸܗ ܚܲܒܝܼܒܵܐܝܼܬ܀
082:391	ܕܽܘܡܵܪܵܐ ܗ̄ܘܵܐ ܕܵܐܟܸܠܩܲܪܨܵܐ ܡܸܢ ܡܲܙܡܽܘܪܵܐ܃
082:392	ܬܢܵܐ ܠܲܡܫܝܼܚܵܐ ܟܲܕ ܢܵܟܸܠ ܠܸܗ ܘܲܡܢܲܣܸܐ ܠܸܗ܀
082:393	ܐܵܘ ܡܵܪܽܘܕܵܐ ܐܲܝܟܵܐ ܩܪܸܐ ܠܵܟ ܒܲܣܦܲܪ ܐܵܫܝܼܪ܃
082:394	ܘܡܲܢ ܡܲܙܡܽܘܪܵܐ ܟܬܲܒ ܠܵܟ ܬܼܐܠܲܦ ܐܲܝܟ ܬܲܠܡܝܼܕܵܐ܀
082:395	ܒܲܐܝܢܵܐ ܙܲܒܢܵܐ ܗܘܵܐ ܠܵܟ ܫܸܠܝܵܐ ܡܸܢ ܒܝܼ̈ܫܵܬܵܐ܃
082:396	ܕܬܸܩܪܸܐ ܘܬܼܐܠܲܦ ܗܲܘ ܡܲܙܡܽܘܪܵܐ ܕܲܡܦܲܫܸܩ ܐܲܢ̄ܬ܀
082:397	ܗܵܐ ܠܵܐ ܣܦܝܼܩ ܐܲܢ̄ܬ ܠܵܐ ܠܩܸܪܝܵܢܵܐ ܘܠܵܐ ܠܲܟܬܵܒܵܐ܃