The Comprehensive Aramaic Lexicon

082:247	ܘܡܸܫܬܲܒܗܲܪ ܗ̄ܘܵܐ ܐܵܟܸܠܩܲܪܨܵܐ ܕܲܐܣܓܝܼ ܢܲܟܠܸܗ܃
082:248	ܥܕܲܡܵܐ ܕܢܸܣܛܸܐ ܡܸܢ ܡܽܘܟܵܟܵܐ ܕܫܲܪܝܼ ܗ̄ܘܵܐ ܒܸܗ܀
082:249	ܡܸܛܽܠ ܗܵܢܵܐ ܠܵܐ ܨܒܵܐ ܢܼܐܡܲܪ ܢܸܗܘܸܐ ܠܲܚܡܵܐ܃
082:250	ܕܠܵܐ ܢܚܲܘܸܐ ܗ̄ܘܵܐ ܒܫܽܘܒܚܵܐ ܢܲܦܫܸܗ ܘܢܸܙܟܸܐ ܒܝܼܫܵܐ܀
082:251	ܐܸܠܵܐ ܒܣܵܟܸܗ ܕܗܲܘ ܡܽܘܟܵܟܵܐ ܕܩܵܐܸܡ ܗ̄ܘܵܐ ܒܸܗ܃
082:252	ܩܲܘܝܼ ܘܒܲܣܪܸܗ ܠܲܡܢܲܣܝܵܢܵܐ ܟܡܵܐ ܐܸܬܡܲܟܲܟ܀
082:253	ܘܠܵܐ ܚܲܘܝܼ ܗ̄ܘܵܐ ܕܡܸܫܟܲܚ ܢܸܥܒܸܕ ܠܲܚܡܵܐ ܗܵܝܕܸܝܢ܃
082:254	ܐܵܦܠܵܐ ܕܝܲܕܥܸܗ ܠܲܒܥܸܠܕܲܪܵܐ ܟܲܕ ܢܵܟܸܠ ܠܸܗ܀
082:255	ܐܲܪܟܸܢ ܪܲܘܡܸܗ ܘܲܠܡܽܘܟܵܟܵܐ ܘܲܠܢܸܣܝܵܢܵܐ܃
082:256	ܘܩܲܘܝܼ ܒܟܲܦܢܵܐ ܘܒܲܡܚܝܼܠܽܘܬܵܐ ܕܸܐܬܬܲܚܬܝܼ ܠܵܗ݀܀
082:257	ܘܟܲܕ ܝܵܕܲܥ ܠܸܗ ܠܵܐܟܸܠܩܲܪܨܵܐ ܗܵܐ ܡܸܢ ܥܵܠܲܡ܃
082:258	ܠܵܐ ܨܒܵܐ ܢܚܲܘܸܐ ܕܝܵܕܲܥ ܗ̄ܘܵܐ ܠܸܗ ܒܕܲܪܵܐ ܬܲܡܵܢ܀
082:259	ܘܟܲܕ ܡܸܫܟܲܚ ܗ̄ܘܵܐ ܢܸܥܒܸܕ ܠܲܚܡܵܐ ܐܲܝܟ ܕܸܐܡܲܪ ܠܸܗ܃
082:260	ܠܵܐ ܥܒܲܕ ܠܲܚܡܵܐ ܕܠܵܐ ܢܚܲܘܸܐ ܗ̄ܘܵܐ ܒܬܸܗܪܵܐ ܢܲܦܫܸܗ܀
082:261	ܘܟܲܕ ܐܸܠܽܘ ܨܒܵܐ ܦܫܝܼܩܵܐ ܗ̄ܘܵܬ̤ ܠܸܗ ܐܵܦܠܵܐ ܢܸܟܦܲܢ܃
082:262	ܠܵܐ ܨܒܵܐ ܢܸܛܪܽܘܕ ܟܲܦܢܵܐ ܡܸܢܸܗ ܒܨܲܘܡܵܐ ܕܲܠܒܲܟ܀
082:263	ܐܲܪܒܥܝܼܢ ܝܲܘ̈ܡܝܼܢ ܨܵܡ ܗ̄ܘܵܐ ܡܽܘܫܸܐ ܘܠܵܐ ܟܬܝܼܒ ܕܲܟܦܸܢ܃
082:264	ܘܒܲܪ ܐܲܠܵܗܵܐ ܟܦܸܢ ܗ̄ܘܵܐ ܒܨܲܘܡܸܗ ܟܲܕ ܡܸܬܢܲܣܸܐ܀
082:265	ܠܵܐ ܟܦܸܢ ܡܽܘܫܸܐ ܡܸܛܽܠ ܕܲܚܙܵܝܗ̄ܝ ܠܲܐܒܵܐ ܡܸܚܙܵܐ܃
082:266	ܘܲܒܪܵܐ ܕܼܐܝܬܲܘܗ̄ܝ ܟܽܠܸܗ ܒܲܐܒܵܐ ܠܡܽܘܢ ܟܵܦܸܢ ܗ̄ܘܵܐ܀
082:267	ܟܦܸܢ ܕܲܢܚܲܘܸܐ ܕܲܫܩܲܠ ܦܲܓܪܵܐ ܘܲܗܘܵܐ ܡܸܢܲܢ܃
082:268	ܘܸܐܬܕܲܡܝܼ ܠܲܢ ܘܲܟܦܸܢ ܥܲܡܲܢ ܘܡܸܛܽܠܵܬܲܢ܀
082:269	ܠܵܐ ܟܵܦܸܢ ܗ̄ܘܵܐ ܦܲܓܪܸܗ ܕܡܸܠܬܵܐ ܕܲܗܘܵܐ ܒܸܣܪܵܐ܃
082:270	ܐܸܠܵܐ ܡܸܛܽܠ ܕܲܨܒܵܐ ܢܸܟܦܲܢ ܟܲܕ ܡܸܬܡܲܟܲܟ܀
082:271	ܠܨܲܘܡܸܗ ܕܡܽܘܫܸܐ ܠܵܐ ܩܪܸܒ ܟܲܦܢܵܐ ܘܒܲܪܢܵܫܵܐ ܗ̄ܘܵܐ܃
082:272	ܘܒܲܪ ܐܲܠܵܗܵܐ ܟܦܸܢ ܗ̄ܘܵܐ ܒܨܲܘܡܸܗ ܘܲܐܠܵܗܵܐ ܗ̄ܘܵܐ܀
082:273	ܐܸܠܽܘܠܵܐ ܟܦܸܢ ܠܵܐ ܡܲܟܝܼܟ ܗ̄ܘܵܐ ܐܲܝܟ ܕܸܐܬܡܲܟܲܟ܃
082:274	ܘܠܵܐ ܩܵܝܡܵܐ ܗ̄ܘܵܬ̤ ܗܵܝ ܕܸܐܬܡܲܟܲܟ ܘܲܗܘܵܐ ܡܸܢܲܢ܀
082:275	ܐܸܠܽܘ ܐܸܡܲܪ ܕܢܸܗܘܸܐ ܠܲܚܡܵܐ ܐܲܝܟ ܕܸܐܬܢܲܣܝܼ܃
082:276	ܠܵܐ ܡܲܟܝܼܟ ܗ̄ܘܵܐ ܐܲܝܟ ܕܸܐܫܲܥܝܵܐ ܩܪܵܝܗ̄ܝ ܡܲܟܝܼܟܵܐ܀
082:277	ܐܸܢ ܠܲܡ ܐܲܢ̄ܬ ܗ̄ܽܘ ܒܪܵܐ ܕܲܐܠܵܗܵܐ ܐܵܡܲܪ ܗ̄ܘܵܐ ܠܸܗ܃
082:278	ܐܵܟܸܠܩܲܪܨܵܐ ܥܒܸܕ ܡܸܢ ܟܼܐܦܸ̈ܐ ܠܲܚܡܵܐ ܘܲܐܟܽܘܠ܀
082:279	ܘܠܽܘܩܒܲܠ ܪܲܘܡܸܗ ܕܲܡܢܲܣܝܵܢܵܐ ܦܲܢܝܼ ܡܵܪܲܢ܃
082:280	ܘܲܒܡܲܟܝܼܟܽܘܬ ܪܽܘܚܵܐ ܡܲܠܸܠ ܟܲܕ ܐܵܡܲܪ ܠܸܗ܀
082:281	ܠܵܐ ܗ̄ܘܵܐ ܒܠܲܚܡܵܐ ܘܡܲܝ̈ܵܐ ܒܲܠܚܽܘܕ ܚܵܝܸܐ ܐ̄ܢܵܫܵܐ܃
082:282	ܐܸܠܵܐ ܒܡܸܠܲܬ ܦܽܘܡܸܗ ܕܡܵܪܝܵܐ ܚܵܝܸܐ ܟܽܠܢܵܫ܀
082:283	ܡܸܠܬܸܗ ܕܡܵܪܝܵܐ ܚܲܝܸ̈ܐ ܐܝܼܬܸܝܗ݀ ܠܲܒܢܲܝܢܵܫܵܐ܃
082:284	ܘܠܵܐ ܗ̄ܘܵܐ ܒܠܲܚܡܵܐ ܘܡܲܝ̈ܵܐ ܚܵܝܸܐ ܐܲܝܟ ܕܵܐܡܲܪ ܐܲܢ̄ܬ܀
082:285	ܒܪܵܐ ܚܲܟܝܼܡܵܐ ܙܲܝܢܵܐ ܐܲܦܸܩ ܡܸܢ ܒܸܝܬ ܐܲܒܽܘܗ̄ܝ܃
082:286	ܕܒܸܗ ܢܸܐܪܽܘܥ ܗ̄ܘܵܐ ܠܵܐܟܸܠܩܲܪܨܵܐ ܕܲܐܩܪܸܒ ܥܲܡܸܗ܀
082:287	ܫܵܛܸܗ ܠܟܲܦܢܵܐ ܘܠܵܐ ܨܒܵܐ ܕܢܸܥܒܸܕ ܐܵܬܵܐ ܬܲܡܵܢ܃
082:288	ܘܫܵܛ ܪܵܡܽܘܬܵܐ ܘܠܵܐ ܨܒܵܐ ܢܚܲܘܸܐ ܕܒܲܪ ܐܲܠܵܗܵܐ ܗ̄ܘ܀
082:289	ܘܫܵܛ ܠܝܼܕܲܥܬܵܐ ܘܲܐܝܟ ܠܵܐ ܝܲܕܥܸܗ ܠܲܒܥܸܠܕܲܪܵܐ܃
082:290	ܡܡܲܠܸܠ ܗ̄ܘܵܐ ܠܸܗ ܟܲܕ ܡܸܬܢܲܣܸܐ ܒܡܲܟܝܼܟܽܘܬܵܐ܀
082:291	ܘܬܵܢܸܐ ܠܩܽܘܒܠܸܗ ܟܬܵܒܵܐ ܕܡܽܘܫܸܐ ܕܡܸܠܬܸܗ ܕܡܵܪܝܵܐ܃
082:292	ܝܵܗܒܵܐ ܚܲܝܸ̈ܐ ܘܲܕܠܵܐ ܠܲܚܡܵܐ ܡܨܸܐ ܚܵܝܸܐ ܐ̄ܢܵܫ܀
082:293	ܘܲܒܠܲܥ ܒܝܼܫܵܐ ܒܓܸܐܪܵܐ ܕܲܢܦܲܩ ܡܸܢ ܒܸܝܬ ܙܲܝܢܸܗ܃
082:294	ܕܲܐܒܵܐ ܟܲܣܝܵܐ ܒܡܲܟܝܼܟܽܘܬܸܗ ܕܝܼܚܝܼܕܵܝܵܐ܀
082:295	ܘܬܽܘܒ ܐܸܬܡܲܪܡܲܪ ܕܲܒܢܸܣܝܵܢܵܐ ܢܸܬܢܸܐ ܕܲܪܵܐ܃
082:296	ܘܲܠܙܵܟܽܘܬܵܐ ܡܸܬܪܲܓܪܲܓ ܗ̄ܘܵܐ ܒܡܲܪܵܚܽܘܬܸܗ܀
082:297	ܘܕܲܒܪܸܗ ܠܡܵܪܲܢ ܘܲܐܩܝܼܡܸܗ ܗ̄ܘܵܐ ܠܥܸܠ ܡܸܢ ܟܸܢܦܵܐ܃