The Comprehensive Aramaic Lexicon

082:297	ܘܕܲܒܪܸܗ ܠܡܵܪܲܢ ܘܲܐܩܝܼܡܸܗ ܗ̄ܘܵܐ ܠܥܸܠ ܡܸܢ ܟܸܢܦܵܐ܃
082:298	ܕܗܲܝܟܲܠ ܩܽܘܕܫܵܐ ܕܢܸܥܒܸܕ ܬܲܡܵܢ ܕܲܪܵܐ ܕܲܬܪܸܝܢ܀
082:299	ܗܵܪܟܵܐ ܫܸܡܥܵܐ ܠܥܸܠ ܡܸܢ ܫܸܡܥܵܐ ܗܲܘ ܕܲܥܝܵܕܵܐ܃
082:300	ܒܵܥܝܵܐ ܢܲܦܫܵܐ ܘܟܸܢ ܡܸܣܬܲܟܠܵܐ ܠܲܕܡܸܬܐܲܡܪ̈ܵܢ܀
082:301	ܠܓܲܘ ܡܸܢܵܟ ܨܽܘܬ ܪܽܘܚܵܢܵܐܝܼܬ ܐܸܢ ܨܵܐܸܬ ܐܲܢ̄ܬ܃
082:302	ܠܵܐ ܠܒܲܪ ܢܸܗܘܸܐ ܦܵܢܸܐ ܚܝܵܪܵܟ ܡܵܐ ܕܫܵܡܲܥ ܐܲܢ̄ܬ܀
082:303	ܟܬܝܼܒ ܗܵܟܲܢܵܐ ܕܕܲܒܪܸܗ ܠܝܸܫܽܘܥ ܐܵܟܸܠܩܲܪܨܵܐ܃
082:304	ܘܲܐܩܝܼܡܸܗ ܗ̄ܘܵܐ ܠܥܸܠ ܡܸܢ ܟܸܢܦܸܗ ܕܗܲܝܟܲܠ ܩܽܘܕܫܵܐ܀
082:305	ܘܵܐܠܨܵܐ ܗܵܪܟܵܐ ܥܲܠ ܣܽܘ̈ܟܵܠܸܐ ܪ̈ܽܘܚܵܢܵܝܸܐ܃
082:306	ܘܥܲܠ ܪܸܥܝܵܢܵܐ ܕܗܲܝܡܵܢܽܘܬܵܐ ܕܲܡܠܸܐ ܬܸܗܪܵܐ܀
082:307	ܕܢܸܒܥܸܐ ܗܲܘܢܵܐ ܕܲܐܝܟܲܢ ܐܸܫܟܲܚ ܐܵܟܸܠܩܲܪܨܵܐ܃
082:308	ܕܢܸܕܒܲܪ ܢܲܝܬܸܐ ܠܒܲܪ ܐܲܠܵܗܵܐ ܠܗܲܝܟܲܠ ܩܽܘܕܫܵܐ܀
082:309	ܐܲܝܟܲܢ ܕܲܒܪܸܗ ܐܲܝܟ ܓܲܢ̄ܒܵܪܵܐ ܠܲܐܝܢܵܐ ܕܲܡܚܝܼܠ܃
082:310	ܚܵܣ ܬܸܬܡܲܠܲܠ ܕܲܡܚܝܼܠ ܡܸܡܬܽܘܡ ܒܪܵܐ ܕܲܐܠܵܗܵܐ܀
082:311	ܐܲܝܟܲܢ ܕܲܒܪܸܗ ܟܲܕ ܠܵܐ ܒܵܥܸܐ ܕܢܼܐܙܲܠ ܥܲܡܸܗ܃
082:312	ܚܵܣ ܐܵܦ ܗܵܕܸܐ ܬܸܣܲܩ ܡܸܡܬܽܘܡ ܥܲܠ ܪܸܥܝܵܢܵܐ܀
082:313	ܘܲܐܝܟܲܢ ܕܲܒܪܸܗ ܠܗܲܘ ܓܲܢ̄ܒܵܪܵܐ ܕܥܵܠܡܸ̈ܐ ܡܵܪܲܢ܃
082:314	ܘܥܲܠ ܐܲܩܝܼܡܸܗ ܠܥܸܠ ܡܸܢ ܟܸܢܦܵܐ ܕܗܲܝܟܲܠܩܽܘܕܫܵܐ܀
082:315	ܐܵܟܸܠܩܲܪܨܵܐ ܥܒܲܕ ܗ̄ܘܵܐ ܕܲܪܵܐ ܗܲܘ ܩܲܕܡܵܝܵܐ܃
082:316	ܘܚܵܒ ܗ̄ܘܵܐ ܒܕܲܪܵܐ ܘܬܽܘܒ ܢܸܬܟܲܬܲܫ ܡܸܬܪܲܓܪܲܓ ܗ̄ܘܵܐ܀
082:317	ܘܲܐܠܨܲܬ̤ ܗ̄ܘܵܬ̤ ܠܸܗ ܢܸܥܒܸܕ ܥܲܡܸܗ ܕܲܪܵܐ ܕܲܬܪܸܝܢ܃
082:318	ܘܲܕܠܵܐ ܥܸܠܬܵܐ ܠܵܐ ܐܝܼܬ ܦܽܘܪܣܵܐ ܕܢܸܗܘܸܐ ܕܲܪܵܐ܀
082:319	ܠܕܲܪܵܐ ܩܲܕܡܵܐ ܟܲܦܢܵܐ ܗܘܵܐ ܠܸܗ ܥܸܠܬܵܐ ܢܸܗܘܸܐ܃
082:320	ܡܸܛܽܠ ܟܲܦܢܸܗ ܕܒܲܪ ܐܲܠܵܗܵܐ ܢܲܣܝܸܗ ܒܝܼܫܵܐ܀
082:321	ܘܲܥܒܲܕ ܕܲܪܵܐ ܘܸܐܫܬܲܪܝܲܬ̤ ܗ̄ܘܵܬ̤ ܥܸܠܬܵܐ ܕܲܗܘܵܬܹ܃
082:322	ܘܥܸܠܬܵܐ ܐ̄ܚܪܼܬܵܐ ܠܕܲܪܵܐ ܕܲܬܪܸܝܢ ܡܸܬܒܲܥܝܵܐ ܗ̄ܘܵܬܹ܀
082:323	ܘܡܲܕܒܪܵܐ ܕܬܲܡܵܢ ܡܸܬܢܲܣܸܐ ܗ̄ܘܵܐ ܒܪܵܐ ܕܲܐܠܵܗܵܐ܃
082:324	ܠܵܐ ܐܝܼܬ ܗ̄ܘܵܐ ܒܸܗ ܥܸܠܬܵܐ ܕܝܵܗܒܵܐ ܠܕܲܪܵܐ ܐܝܼܕܵܐ܀
082:325	ܡܸܬܡܲܪܡܲܪ ܗ̄ܘܵܐ ܐܵܟܸܠܩܲܪܨܵܐ ܘܡܸܬܚܲܫܲܒ ܗ̄ܘܵܐ܃
082:326	ܕܡܲܢ ܕܹܝܢ ܝܲܗ̄ܒ ܠܝܼ ܥܽܘܡܩܵܐ ܗܵܪܟܵܐ ܐܲܘ ܚܲܒܵܪܵܐ܀
082:327	ܘܲܡܓܲܪܸܓ ܗ̄ܘܝܼܬ ܘܲܡܫܲܕܸܠ ܠܸܗ ܕܢܸܫܕܸܐ ܢܲܦܫܸܗ܃
082:328	ܘܝܵܠܸܦ ܗ̄ܘܝܼܬ ܠܸܗ ܐܸܢ ܪܽܘܚܵܢܵܐ ܗ̄ܘ ܐܸܠܵܐ ܡܲܗܲܪ܀
082:329	ܘܸܐܢ ܦܲܓܪܵܢܵܐ ܗ̄ܘ ܥܵܒܸܕ ܗ̄ܘܝܼܬ ܠܸܗ ܒܸܙܚܵܐ ܪܲܒܵܐ܃
082:330	ܡܵܐ ܕܲܐܪܗܸܒܬܸܗ ܘܲܒܓܽܘܪܵܓܵܐ ܣܚܲܦܬܸܗ ܢܸܦܸܠ܀
082:331	ܟܬܵܒܵܐ ܝܵܕܲܥ ܘܡܸܢ ܐܽܘܪܵܝܬܵܐ ܫܩܝܼܠ ܠܸܗ ܙܲܝܢܵܐ܃
082:332	ܐܸܒܥܸܐ ܟܬܵܒܵܐ ܕܲܡܓܲܪܸܓ ܠܸܗ ܘܡܸܚܕܵܐ ܢܵܦܸܠ܀
082:333	ܐܸܠܽܘ ܩܵܐܸܡ ܗܵܫܵܐ ܒܪܲܘܡܵܐ ܨܵܠܸܐ ܗ̄ܘܝܼܬ ܠܸܗ܃
082:334	ܦܲܚܵܐ ܒܥܽܘܡܩܵܐ ܘܡܲܪܟܸܢ ܗ̄ܘܝܼܬ ܠܸܗ ܨܹܝܕ ܡܲܦܽܘܠܬܵܐ܀
082:335	ܘܟܲܕ ܣܵܒܲܪ ܠܸܗ ܐܵܟܸܠܩܲܪܨܵܐ ܕܸܐܠܽܘ ܡܸܫܟܲܚ܃
082:336	ܥܸܠܬܵܐ ܕܝܵܗܒܵܐ ܐܝܼܕܵܐ ܠܕܲܪܵܐ ܗܽܘ ܙܵܟܸܐ ܗ̄ܘܵܐ܀
082:337	ܐܸܬܬܙܝܼܥ ܡܵܪܲܢ ܥܲܠ ܣܽܘܥܪܵܢܵܐ ܪܽܘܚܵܢܵܐܝܼܬ܃
082:338	ܘܥܲܠ ܡܸܢ ܡܲܕܒܪܵܐ ܘܩܵܡ ܥܲܠ ܟܸܢܦܵܐ ܕܗܲܝܟܲܠܩܽܘܕܫܵܐ܀
082:339	ܘܲܒܥܸܠܕܲܪܵܐ ܠܵܐ ܝܵܕܲܥ ܗ̄ܘܵܐ ܕܡܸܛܽܠ ܡܵܢܵܐ܃
082:340	ܚܲܠܸܦ ܕܽܘܟܬܵܐ ܒܗܲܘ ܥܸܕܵܢܵܐ ܒܪܵܐ ܕܲܐܠܵܗܵܐ܀
082:341	ܘܲܚܕܝܼ ܒܝܼܫܵܐ ܕܸܐܫܟܲܚ ܥܸܠܬܵܐ ܠܕܲܪܵܐ ܢܸܥܒܸܕ܃
082:342	ܘܒܲܪ ܐܲܠܵܗܵܐ ܥܒܲܕ ܠܸܗ ܥܸܠܬܵܐ ܕܬܽܘܒ ܢܸܬܟܲܐܲܪ܀
082:343	ܡܸܛܽܠܗܵܢܵܐ ܒܕܽܘܟܬܵܐ ܕܪܵܡܵܐ ܩܵܡ ܗ̄ܘܵܐ ܡܵܪܲܢ܃
082:344	ܠܦܽܘܬ ܨܸܒܝܵܢܸܗ ܕܲܒܥܸܠܕܲܪܵܐ ܕܗܝܼ ܒܵܥܸܐ ܗ̄ܘܵܐ܀
082:345	ܡܸܛܽܠܗܵܢܵܐ ܟܬܝܼܒ ܗ̄ܽܘ ܕܕܲܒܪܸܗ ܐܵܟܸܠܩܲܪܨܵܐ܃
082:346	ܥܲܠ ܕܲܐܝܟ ܕܲܒܥܵܐ ܝܲܗ̄ܒ ܠܸܗ ܥܸܠܬܵܐ ܒܪܵܐ ܕܲܐܠܵܗܵܐ܀
082:347	ܠܲܘ ܬܸܢܵܢܵܐ ܡܨܸܐ ܗ̄ܘܵܐ ܕܢܸܕܒܲܪ ܠܪܽܘܚܵܐ ܡܸܡܬܽܘܡ܃