← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 82: on Our Lord's fight with Satan

Click on a word for lexical analysis
Click on a red-colored coordinate for comments and/or translations of the line

▲ earlier lines

082:217 ܠܵܟ ܠܵܐ ܬܲܒܥܽܘܟ ܬܼܐܡܲܪ ܡܲܢܽܘ ܡܽܘܢ ܝܵܩܸܕ ܐܲܢ̄ܬ܃
082:218 ܘܗܵܐ ܡܫܲܐܸܠ ܐܲܢ̄ܬ ܐܸܢܗܽܘ ܕܗܽܘܝܽܘ ܒܪܵܐ ܕܲܐܠܵܗܵܐ܀
082:219 ܠܡܽܘܢ ܝܵܨܸܦ ܐܲܢ̄ܬ ܢܸܗܘܸܐ ܠܲܚܡܵܐ ܠܲܐܝܢܵܐ ܕܲܟܦܸܢ܃
082:220 ܕܒܵܟ ܡܸܢ ܥܵܠܲܡ ܛܵܒܽܘܬ ܥܲܝܢܵܐ ܠܵܐ ܐܸܬܚܲܙܝܲܬܹ܀
082:221 ܡܪܲܚܡܵܢܽܘܬܵܐ ܒܲܐܝܢܵܐ ܙܲܒܢܵܐ ܐܸܬܚܲܙܝܲܬ̤ ܒܵܟ܃
082:222 ܕܡܸܛܽܠ ܟܲܦܢܸܗ ܕܝܸܫܽܘܥ ܪܸܒܲܬ ܗܵܐ ܝܵܨܸܦ ܐܲܢ̄ܬ܀
082:223 ܐܵܘ ܡܵܪܽܘܕܵܐ ܠܲܘ ܕܝܼܠܵܟ ܗ̄ܝܼ ܕܲܟܦܸܢ ܡܵܪܵܟ܃
082:224 ܠܡܽܘܢ ܦܵܩܸܕ ܐܲܢ̄ܬ ܕܢܸܗܘܸܐ ܠܲܚܡܵܐ ܕܠܵܐ ܫܵܡܲܥ ܠܵܟ܀
082:225 ܒܗܲܘܢܵܐ ܪܲܒܵܐ ܢܸܫܡܲܥ ܡܼܐܡܪܸܗ ܕܒܲܪ ܐܲܠܵܗܵܐ܃
082:226 ܟܲܕ ܬܵܗܪܵܐ ܒܸܗ ܢܲܦܫܵܐ ܒܕܲܪܵܐ ܕܡܲܟܝܼܟܽܘܬܸܗ܀
082:227 ܟܡܵܐ ܕܸܐܬܬܪܝܼܡ ܗ̄ܘܵܐ ܐܵܟܸܠܩܲܪܨܵܐ ܐܸܬܬܲܚܬܝܼ ܗܽܘ܃
082:228 ܕܲܠܪܵܡܽܘܬܵܐ ܒܡܲܟܝܼܟܽܘܬܵܐ ܕܝܼܠܸܗ ܢܸܣܚܽܘܦ܀
082:229 ܢܼܐܡܲܪ ܗܵܫܵܐ ܕܡܵܢ ܝܵܬܲܪ ܗ̄ܘܵܐ ܐܵܟܸܠܩܲܪܨܵܐ܃
082:230 ܐܸܠܽܘ ܥܒܲܕ ܗ̄ܘܵܐ ܠܲܚܡܵܐ ܡܵܪܲܢ ܐܲܝܟ ܕܸܐܡܲܪ ܠܸܗ܀
082:231 ܐܸܠܽܘ ܦܩܲܕ ܗ̄ܘܵܐ ܠܟܼܐܦܸ̈ܐ ܘܲܗܘ̈ܲܝ ܠܲܚܡܵܐ ܬܲܡܵܢ܃
082:232 ܡܸܬܚܲܘܸܐ ܗ̄ܘܵܐ ܡܫܝܼܚܵܐ ܕܗܽܘܝܽܘ ܒܪܵܐ ܕܲܐܠܵܗܵܐ܀
082:233 ܘܠܲܡܢܲܣܝܵܢܵܐ ܗܵܕܸܐ ܕܬܸܗܘܸܐ ܙܵܟܽܘܬܵܐ ܗ̄ܘܵܬܹ܃
082:234 ܕܣܵܪܲܚ ܗ̄ܘܵܐ ܠܵܗ݀ ܡܵܪܲܢ ܠܽܐܘܪܚܵܐ ܕܡܲܟܝܼܟܽܘܬܸܗ܀
082:235 ܐܸܠܽܘ ܦܩܲܕ ܗ̄ܘܵܐ ܘܲܗܘܵܐ ܠܲܚܡܵܐ ܐܲܝܟ ܕܸܐܬܢܲܣܝܼ܃
082:236 ܫܽܘܒܗܵܪܵܐ ܗ̄ܘܵܐ ܕܚܲܘܝܼ ܢܲܦܫܸܗ ܟܡܵܐ ܡܸܫܟܲܚ ܗ̄ܘܵܐ܀
082:237 ܘܡܸܣܬܲܪܚܵܐ ܗ̄ܘܵܬ̤ ܡܲܟܝܼܟܽܘܬܵܐ ܕܲܢܚܸܬ ܗ̄ܘܵܐ ܠܵܗ݀܃
082:238 ܘܚܵܕܸܐ ܒܝܼܫܵܐ ܕܥܲܪܩܸܠ ܐܽܘܪܚܸܗ ܕܝܼܚܝܼܕܵܝܵܐ܀
082:239 ܘܲܐܝܟ ܙܵܟܽܘܬܵܐ ܡܸܬܚܲܫܒܵܐ ܗ̄ܘܵܬ̤ ܠܲܒܥܸܠܕܲܪܵܐ܃
082:240 ܕܠܵܐ ܚܲܡܣܸܢ ܗ̄ܘܵܐ ܒܗܲܘ ܡܽܘܟܵܟܵܐ ܒܪܵܐ ܕܲܐܠܵܗܵܐ܀
082:241 ܐܸܠܽܘ ܢܚܸܬ ܗ̄ܘܵܐ ܕܢܸܬܡܲܟܲܟ ܗ̄ܘܵܐ ܘܥܲܠ ܕܸܐܬܢܲܣܝܼ܃
082:242 ܥܲܒܪܸܗ ܥܲܝܛܵܐ ܘܠܵܐ ܩܲܘܝܼ ܒܵܗ݀ ܒܡܲܟܝܼܟܽܘܬܸܗ܀
082:243 ܘܸܐܡܲܪ ܘܲܗܘ̈ܲܝ ܟܼܐܦܸ̈ܐ ܠܲܚܡܵܐ ܘܚܲܘܝܼ ܢܲܦܫܸܗ܃
082:244 ܒܪܽܘܚܵܐ ܪܵܡܬܵܐ ܕܠܵܐ ܩܲܪܝܼܒܵܐ ܠܡܲܟܝܼܟܽܘܬܵܐ܀
082:245 ܒܵܛܠܵܐ ܗ̄ܘܵܬ̤ ܠܵܗ݀ ܐܽܘܪܚܵܐ ܪܲܒܬܵܐ ܕܡܲܟܝܼܟܽܘܬܵܐ܃
082:246 ܕܒܲܪ ܐܲܠܵܗܵܐ ܕܡܲܟܸܟ ܢܲܦܫܸܗ ܕܢܲܚܸܐ ܠܵܐܕܵܡ܀
082:247 ܘܡܸܫܬܲܒܗܲܪ ܗ̄ܘܵܐ ܐܵܟܸܠܩܲܪܨܵܐ ܕܲܐܣܓܝܼ ܢܲܟܠܸܗ܃
082:248 ܥܕܲܡܵܐ ܕܢܸܣܛܸܐ ܡܸܢ ܡܽܘܟܵܟܵܐ ܕܫܲܪܝܼ ܗ̄ܘܵܐ ܒܸܗ܀
082:249 ܡܸܛܽܠ ܗܵܢܵܐ ܠܵܐ ܨܒܵܐ ܢܼܐܡܲܪ ܢܸܗܘܸܐ ܠܲܚܡܵܐ܃
082:250 ܕܠܵܐ ܢܚܲܘܸܐ ܗ̄ܘܵܐ ܒܫܽܘܒܚܵܐ ܢܲܦܫܸܗ ܘܢܸܙܟܸܐ ܒܝܼܫܵܐ܀
082:251 ܐܸܠܵܐ ܒܣܵܟܸܗ ܕܗܲܘ ܡܽܘܟܵܟܵܐ ܕܩܵܐܸܡ ܗ̄ܘܵܐ ܒܸܗ܃
082:252 ܩܲܘܝܼ ܘܒܲܣܪܸܗ ܠܲܡܢܲܣܝܵܢܵܐ ܟܡܵܐ ܐܸܬܡܲܟܲܟ܀
082:253 ܘܠܵܐ ܚܲܘܝܼ ܗ̄ܘܵܐ ܕܡܸܫܟܲܚ ܢܸܥܒܸܕ ܠܲܚܡܵܐ ܗܵܝܕܸܝܢ܃
082:254 ܐܵܦܠܵܐ ܕܝܲܕܥܸܗ ܠܲܒܥܸܠܕܲܪܵܐ ܟܲܕ ܢܵܟܸܠ ܠܸܗ܀
082:255 ܐܲܪܟܸܢ ܪܲܘܡܸܗ ܘܲܠܡܽܘܟܵܟܵܐ ܘܲܠܢܸܣܝܵܢܵܐ܃
082:256 ܘܩܲܘܝܼ ܒܟܲܦܢܵܐ ܘܒܲܡܚܝܼܠܽܘܬܵܐ ܕܸܐܬܬܲܚܬܝܼ ܠܵܗ݀܀
082:257 ܘܟܲܕ ܝܵܕܲܥ ܠܸܗ ܠܵܐܟܸܠܩܲܪܨܵܐ ܗܵܐ ܡܸܢ ܥܵܠܲܡ܃
082:258 ܠܵܐ ܨܒܵܐ ܢܚܲܘܸܐ ܕܝܵܕܲܥ ܗ̄ܘܵܐ ܠܸܗ ܒܕܲܪܵܐ ܬܲܡܵܢ܀
082:259 ܘܟܲܕ ܡܸܫܟܲܚ ܗ̄ܘܵܐ ܢܸܥܒܸܕ ܠܲܚܡܵܐ ܐܲܝܟ ܕܸܐܡܲܪ ܠܸܗ܃
082:260 ܠܵܐ ܥܒܲܕ ܠܲܚܡܵܐ ܕܠܵܐ ܢܚܲܘܸܐ ܗ̄ܘܵܐ ܒܬܸܗܪܵܐ ܢܲܦܫܸܗ܀
082:261 ܘܟܲܕ ܐܸܠܽܘ ܨܒܵܐ ܦܫܝܼܩܵܐ ܗ̄ܘܵܬ̤ ܠܸܗ ܐܵܦܠܵܐ ܢܸܟܦܲܢ܃
082:262 ܠܵܐ ܨܒܵܐ ܢܸܛܪܽܘܕ ܟܲܦܢܵܐ ܡܸܢܸܗ ܒܨܲܘܡܵܐ ܕܲܠܒܲܟ܀
082:263 ܐܲܪܒܥܝܼܢ ܝܲܘ̈ܡܝܼܢ ܨܵܡ ܗ̄ܘܵܐ ܡܽܘܫܸܐ ܘܠܵܐ ܟܬܝܼܒ ܕܲܟܦܸܢ܃
082:264 ܘܒܲܪ ܐܲܠܵܗܵܐ ܟܦܸܢ ܗ̄ܘܵܐ ܒܨܲܘܡܸܗ ܟܲܕ ܡܸܬܢܲܣܸܐ܀
082:265 ܠܵܐ ܟܦܸܢ ܡܽܘܫܸܐ ܡܸܛܽܠ ܕܲܚܙܵܝܗ̄ܝ ܠܲܐܒܵܐ ܡܸܚܙܵܐ܃
082:266 ܘܲܒܪܵܐ ܕܼܐܝܬܲܘܗ̄ܝ ܟܽܠܸܗ ܒܲܐܒܵܐ ܠܡܽܘܢ ܟܵܦܸܢ ܗ̄ܘܵܐ܀
082:267 ܟܦܸܢ ܕܲܢܚܲܘܸܐ ܕܲܫܩܲܠ ܦܲܓܪܵܐ ܘܲܗܘܵܐ ܡܸܢܲܢ܃

▼ later lines