The Comprehensive Aramaic Lexicon

082:423	ܘܲܢܛܲܠܸܩ ܗ̄ܘܵܐ ܟܽܠܗܽܘܢ ܦܽܘܪ̈ܣܸܐ ܕܲܢܟܝܼܠܽܘܬܸܗ܃
082:424	ܘܠܵܐ ܢܲܪܦܸܐ ܠܸܗ ܘܠܵܐ ܚܲܕ ܦܲܚܵܐ ܕܠܵܐ ܨܵܠܸܐ ܠܸܗ܃
082:425	ܘܠܵܐ ܚܲܕ ܢܸܫܒܵܐ ܡܸܢ ܡܨܝܼ̈ܕܵܬܸܗ ܕܠܵܐ ܛܵܡܲܪ ܠܸܗ܀
082:426	ܘܡܸܛܽܠ ܗܵܢܵܐ ܡܲܓܲܪ ܗ̄ܘܵܐ ܠܸܗ ܒܲܪ ܐܲܠܵܗܵܐ܃
082:427	ܟܲܕ ܡܸܬܢܲܣܸܐ ܕܲܒܟܽܠ ܦܽܘܪ̈ܣܝܼܢ ܗܽܘ ܢܸܒܗܲܬ ܗ̄ܘܵܐ܀
082:428	ܘܲܒܟܽܠ ܙܵܟ̈ܘܵܢ ܘܲܒܟܽܠ ܕܲܪ̈ܝܼܢ ܡܸܬܡܲܟܲܟ ܗ̄ܘܵܐ܃
082:429	ܡܫܝܼܚܵܐ ܕܢܸܙܟܸܐ ܘܲܢܙܲܟܸܐ ܟܽܠ ܒܡܲܟܝܼܟܽܘܬܸܗ܀
082:430	ܘܟܲܕ ܐܸܫܬܲܗܝܼ ܩܵܛܸܠ ܐ̄ܢܵܫܵܐ ܒܕܲܪܵܐ ܕܲܬܪܸܝܢ܃
082:431	ܘܲܐܡܪܲܚ ܢܸܥܒܸܕ ܗܲܘ ܕܲܬܠܵܬܵܐ ܒܛܽܘܪܵܐ ܪܵܡܵܐ܀
082:432	ܙܠܲܚ ܥܲܠ ܐܲܪܥܵܐ ܛܸܠܵܢ̈ܝܵܬܵܐ ܕܲܓ̈ܵܠܵܬܵܐ܃
082:433	ܘܲܡܠܵܐ ܛܽܘܪܵܐ ܫܪܲܓܪ̈ܵܓܝܵܬܸܗ ܟܲܕܵܒ̈ܵܬܵܐ܀
082:434	ܘܨܵܪ ܕܸܡ̈ܘܵܬܵܐ ܕܲܡܕܝܼ̈ܢܵܬܵܐ ܘܲܕܡܵܚܽܘ̈ܙܸܐ܃
082:435	ܘܲܐܘܬܸܒ ܡܲܠܟܸ̈ܐ ܘܲܐܩܝܼܡ ܪ̈ܲܒܲܝ ܚܲܝ̈ܠܲܘܵܬܵܐ܀
082:436	ܘܲܣܕܲܪ ܘܲܐܩܝܼܡ ܥܲܡ̈ܡܝܼܢ ܥܲܡ̈ܡܝܼܢ ܒܲܐܬܪ̈ܝܼܢ ܐܲܬܪ̈ܝܼܢ܃
082:437	ܘܚܲܘܝܼ ܬܲܡܵܢ ܫܽܘܒܚܵܐ ܕܡܲܠܟܸ̈ܐ ܘܚܸܙܘܵܐ ܪܲܒܵܐ܀
082:438	ܘܲܟܫܵܐ ܥܽܘܬܪܵܐ ܕܫܲܠܝܼ̈ܛܵܢܸܐ ܥܲܠ ܕܲܪ̈ܓܲܝܗܽܘܢ܃
082:439	ܘܲܡܠܵܝܗ̄ܝ ܠܲܐܬܪܵܐ ܟܽܘܪ̈ܣܲܘܵܬܵܐ ܘܡܵܪ̈ܲܘܵܬܵܐ܀
082:440	ܥܲܡ̈ܡܸܐ ܕܣܵܓܕܝܼܢ ܠܲܐܠܵܗܲܝ̈ܗܽܘܢ ܒܲܬܚܽܘ̈ܡܲܝܗܽܘܢ܃
082:441	ܘܟܽܠ ܐܸܡ̈ܘܵܬܵܐ ܕܢܵܩ̈ܫܵܢ ܟܲܦܸ̈ܐ ܠܲܦܬܲܟܪ̈ܲܝܗܸܝܢ܀
082:442	ܟܸܢ̈ܫܸܐ ܕܣܵܓܕܝܼܢ ܠܲܣܪܝܼܩܽܘܬܵܐ ܒܲܐܬܪ̈ܲܘܵܬܵܐ܃
082:443	ܘܟܽܘܡܪܸ̈ܐ ܕܥܲܡ̈ܡܸܐ ܕܡܲܣܩܝܼܢ ܕܸܒ̈ܚܸܐ ܠܲܐܠܵܗ̈ܵܬܵܐ܀
082:444	ܕܲܗܒܵܐ ܕܠܵܐ ܣܵܟ ܘܣܼܐܡܵܐ ܕܲܟܫܸܐ ܕܠܵܐ ܡܲܬܩܵܠܵܐ܃
082:445	ܠܒܽܘ̈ܫܸܐ ܡܫܲܒ̈ܚܸܐ ܘܛܲܒ̈ܥܸܐ ܘܟܼܐܦܸ̈ܐ ܝܲܩܝܼܪ̈ܵܬܵܐ܀
082:446	ܟܽܠ ܡܲܠܟ̈ܘܵܬܵܐ ܥܲܡ ܫܽܘ̈ܒܚܲܝܗܸܝܢ ܐܵܦ ܥܽܘܬܪ̈ܲܝܗܸܝܢ܃
082:447	ܒܲܐܬܪ̈ܲܘܵܬܗܸܝܢ ܒܫܽܘ̈ܠܛܵܢܲܝܗܸܝܢ ܘܲܒܥܲܡ̈ܡܲܝܗܸܝܢ܀
082:448	ܘܚܲܘܝܸܗ ܠܲܒܪܵܐ ܥܽܘܬܪܸ̈ܐ ܘܓܲܙܸ̈ܐ ܘܟܽܠ ܣܝܼ̈ܡܵܬܵܐ܃
082:449	ܘܟܲܕ ܡܸܬܡܲܟܲܟ ܩܲܒܸܠ ܡܵܪܲܢ ܢܸܚܙܸܐ ܗܵܠܸܝܢ܀
082:450	ܐܸܠܽܘ ܠܵܐ ܒܥܵܐ ܠܵܐ ܚܵܙܸܐ ܗ̄ܘܵܐ ܟܲܕ ܚܲܘܝܼ ܠܸܗ܃
082:451	ܐܸܠܵܐ ܡܸܛܽܠ ܡܲܟܝܼܟܽܘܬܸܗ ܚܙܵܐ ܗ̄ܘܵܐ ܗܵܠܸܝܢ܀
082:452	ܐܲܝܟܲܢ ܕܲܨܒܵܐ ܢܚܲܘܸܐ ܒܝܼܫܵܐ ܚܙܵܐ ܗ̄ܘܵܐ ܡܵܪܲܢ܃
082:453	ܕܲܢܚܲܘܸܐ ܠܸܗ ܕܠܵܐ ܡܸܬܪܲܓܪܲܓ ܠܲܫܐܝܼ̈ܠܵܬܸܗ܀
082:454	ܘܩܵܡ ܣܵܛܵܢܵܐ ܒܛܽܘܪܵܐ ܪܵܡܵܐ ܨܹܝܕ ܦܵܪܽܘܩܲܢ܃
082:455	ܘܚܲܘܝܼ ܗ̄ܘܵܐ ܠܸܗ ܥܲܡ̈ܡܸܐ ܘܡܲܠܟܸ̈ܐ ܘܽܐܘ̈ܚܕܵܢܲܝܗܽܘܢ܀
082:456	ܘܸܐܡܲܪ ܗ̄ܘܵܐ ܠܸܗ ܕܗܵܠܸܝܢ ܟܽܠܗܽܘܢ ܗܵܐ ܕܝܼܠܝ ܐܸܢܽܘܢ܃
082:457	ܦܸܠ ܘܲܣܓܽܘܕ ܠܝܼ ܘܣܲܒ ܠܵܟ ܟܽܠܗܽܘܢ ܐܸܢ ܨܵܒܸܐ ܐܲܢ̄ܬ܀
082:458	ܡܵܪܽܘܕܽܘܬܵܐ ܒܲܛܪܽܘܢܽܘܬܵܐ ܕܠܲܝܬ ܠܵܗ݀ ܣܵܟܵܐ܃
082:459	ܥܲܘܵܠܽܘܬܵܐ ܒܡܲܪܵܚܽܘܬܵܐ ܕܠܵܐ ܡܸܬܡܲܫܚܵܐ܀
082:460	ܕܲܐܡܪܲܚ ܢܼܐܡܲܪ ܦܸܠ ܘܲܣܓܽܘܕ ܠܝܼ ܠܒܲܪ ܐܲܠܵܗܵܐ܃
082:461	ܒܕܲܪܵܐ ܕܚܝܼܠܵܐ ܕܲܡܠܸܐ ܙܲܘܥܵܐ ܘܬܸܗܪܵܐ ܪܲܒܵܐ܀
082:462	ܥܲܠ ܕܸܐܬܡܲܟܲܟ ܢܸܥܒܸܕ ܕܲܪܵܐ ܥܲܡ ܚܲܣܝܼܢܵܐ܃
082:463	ܣܒܲܪ ܡܵܪܽܘܕܵܐ ܕܲܟܒܲܪ ܙܵܟܸܐ ܐܸܢ ܡܸܬܟܲܬܲܫ܀
082:464	ܘܲܐܪܡܝܼ ܢܲܦܫܸܗ ܒܕܲܪܵܐ ܪܲܒܵܐ ܗܲܘ ܕܲܬܠܵܬܵܐ܃
082:465	ܟܡܵܐ ܕܼܐܝܬ ܗ̄ܘܵܐ ܒܸܗ ܚܲܝܠܵܐ ܕܢܲܡܪܲܚ ܥܲܠ ܙܲܟܵܝܵܐ܀
082:466	ܐܲܪܓܸܫ ܗ̄ܘܵܐ ܠܸܗ ܕܣܸܓܕܲܬ ܥܲܡ̈ܡܸܐ ܒܵܥܸܐ ܢܲܦܢܸܐ܃
082:467	ܒܪܵܐ ܠܒܸܝܬ ܐܲܒܽܘܗ̄ܝ ܐܸܢܗܽܘ ܕܲܒܪܵܐ ܗ̄ܘ ܐܲܝܟ ܕܸܐܣܬܲܒܪܲܬܹ܀
082:468	ܘܡܸܬܚܲܫܲܒ ܗ̄ܘܵܐ ܕܸܐܢܗܽܘ ܕܲܒܪܵܐ ܗ̄ܘ ܫܵܩܸܠ ܗ̄ܽܘ ܠܵܗ݀܃
082:469	ܡܽܘܢ ܐܸܥܒܸܕ ܠܸܗ ܕܕܝܼܠܸܗ ܒܵܥܸܐ ܘܠܵܐ ܡܲܪܦܸܐ ܠܵܗ݀܀
082:470	ܐܸܩܕܽܘܡ ܐܸܬܠܝܼܗ݀ ܠܣܸܓܕܲܬ ܥܲܡ̈ܡܸܐ ܒܛܝܼ̈ܡܸܐ ܬܼܐܙܲܠ܃
082:471	ܐܵܙܵܠ̄ܐ ܠܵܗ݀ ܡܸܢܝ ܐܸܣܲܒ ܛܝܼ̈ܡܸܝܗ݀ ܐܸܢ ܝܵܗܒܝܼܢ ܠܝܼ܀
082:472	ܚܕܵܐ ܙܒܲܢ ܒܲܠܚܽܘܕ ܐܸܢ ܣܵܓܸܕ ܠܝܼ ܡܵܐ ܕܫܲܓܸܫܬܸܗ܃
082:473	ܚܠܵܦ ܣܸܓ̈ܕܵܬܵܐ ܕܟܽܠܗܽܘܢ ܥܲܡ̈ܡܸܐ ܡܸܬܚܲܫܒܵܐ ܠܝܼ܀