The Comprehensive Aramaic Lexicon

082:473	ܚܠܵܦ ܣܸܓ̈ܕܵܬܵܐ ܕܟܽܠܗܽܘܢ ܥܲܡ̈ܡܸܐ ܡܸܬܚܲܫܒܵܐ ܠܝܼ܀
082:474	ܐ̄ܡܲܪ ܗ̄ܘܵܐ ܒܝܼܫܵܐ ܥܲܠ ܫܽܘ̈ܠܛܵܢܸܐ ܕܕܝܼܠܸܗ ܐܸܢܽܘܢ܃
082:475	ܘܗܵܪܟܵܐ ܚܲܘܝܼ ܛܢܵܢܵܐ ܡܵܪܲܢ ܟܲܕ ܓܵܥܲܪ ܒܸܗ܀
082:476	ܐܸܬܬܥܝܼܩ ܝܵܪܬܵܐ ܥܲܠ ܩܸܢܝܵܢܸܗ ܕܲܐܒܵܐ ܕܲܒܙܝܼܙ܃
082:477	ܘܸܐܬܥܲܙܲܙ ܗ̄ܘܵܐ ܕܢܲܦܢܸܐ ܫܒܝܼܬܵܐ ܡܸܢ ܫܲܒܵܝܵܐ܀
082:478	ܫܲܡܥܸܗ ܕܸܐܡܲܪ ܥܲܠ ܫܽܘ̈ܠܛܵܢܸܐ ܕܕܝܼܠܸܗ ܐܸܢܽܘܢ܃
082:479	ܘܟܸܪܝܲܬ̤ ܗ̄ܘܵܬ̤ ܠܸܗ ܥܲܠ ܕܲܫܒܸܝܢ ܗ̄ܘܲܘ ܡܸܢ ܒܸܝܬ ܐܲܒܽܘܗ̄ܝ܀
082:480	ܐܵܘ ܡܵܪܽܘܕܵܐ ܠܲܘ ܕܝܼܠܵܟ ܗ̄ܘܲܘ ܠܵܐ ܬܸܫܬܲܒܗܲܪ܃
082:481	ܡܸܫܒܵܐ ܫܒܸܝܢ ܠܵܟ ܘܡܸܫܬܲܩܠܵܐ ܠܵܗ݀ ܫܒܝܼܬܵܐ ܡܸܢܵܟ܀
082:482	ܐܸܠܽܘ ܠܵܐ ܨܒܲܘ ܢܸܗܘܽܘܢ ܕܝܼܠܵܟ ܠܵܐ ܗܵܘܸܝܢ ܗ̄ܘܲܘ܃
082:483	ܕܲܐܒܵܐ ܐܸܢܽܘܢ ܘܲܒܨܸܒܝܵܢܗܽܘܢ ܐܸܫܬܲܥܒܲܕܘ ܠܵܟ܀
082:484	ܠܡܽܘܢ ܡܲܡܪܲܚ ܐܲܢ̄ܬ ܬܼܐܡܲܪ ܗܵܫܵܐ ܕܕܝܼܠܵܟ ܐܸܢܽܘܢ܃
082:485	ܕܠܵܐ ܡܸܫܬܲܒܩܝܼܢ ܢܸܗܘܽܘܢ ܕܝܼܠܵܟ ܡܸܟܵܐ ܘܲܠܗܲܠ܀
082:486	ܙܸܠ ܣܵܛܵܢܵܐ ܠܒܸܣܬܪܵܟ ܕܲܐܥܠܝܼܬ ܥܲܠ ܐܲܠܵܗܵܐ܃
082:487	ܘܲܠܩܸܢܝܵܢܲܘ̈ܗ̄ܝ ܐܲܪܦܵܐ ܘܫܲܢܵܐ ܕܕܝܼܠܸܗ ܐܸܢܽܘܢ܀
082:488	ܗܵܪܟܵܐ ܒܝܼܫܵܐ ܢܦܲܠ ܐܲܝܟ ܒܲܪܩܵܐ ܩܲܠܝܼܠܵܐܝܼܬ܃
082:489	ܘܙܵܥܘ ܡܲܠܲܐܟܸ̈ܐ ܠܒܲܪ ܐܲܠܵܗܵܐ ܠܲܡܫܲܒܵܚܽܘ܀
082:490	ܗܵܪܟܵܐ ܐܝܼܬܸܝܗ݀ ܗܵܝ ܡܲܦܽܘܠܬܵܐ ܕܸܐܡܲܪ ܡܵܪܲܢ܃
082:491	ܕܚܵܙܸܐ ܗ̄ܘܝܼܬ ܠܸܗ ܕܒܲܕܡܽܘܬ ܒܲܪܩܵܐ ܢܦܲܠ ܣܵܛܵܢܵܐ܀
082:492	ܒܩܲܠܝܼܠܽܘܬܸܗ ܕܒܲܪܩܵܐ ܨܵܪܵܗ݀ ܠܗܵܝ ܡܲܦܽܘܠܬܵܐ܃
082:493	ܕܲܢܦܲܠ ܒܝܼܫܵܐ ܒܕܲܪܵܐ ܕܬܸܗܪܵܐ ܗܲܘ ܕܲܬܠܵܬܵܐ܀
082:494	ܡܸܚܕܵܐ ܕܲܫܡܲܥ ܕܲܩܪܵܝܗ̄ܝ ܡܵܪܲܢ ܙܸܠ ܣܵܛܵܢܵܐ܃
082:495	ܢܦܲܠ ܐܲܝܟ ܒܲܪܩܵܐ ܡܵܐ ܕܫܵܕܝܵܐ ܠܸܗ ܥܢܵܢܵܐ ܡܸܢܵܗ݀܀
082:496	ܩܲܠܝܼܠܵܐܝܼܬ ܘܲܪܗܝܼܒܵܐܝܼܬ ܘܲܕܚܝܼܠܵܐܝܼܬ܃
082:497	ܢܦܲܠ ܣܵܛܵܢܵܐ ܥܲܠ ܕܲܓܥܲܪ ܒܸܗ ܒܪܵܐ ܕܲܐܠܵܗܵܐ܀
082:498	ܣܵܒܲܪ ܗ̄ܘܵܐ ܠܸܗ ܕܠܵܐ ܝܵܕܲܥ ܠܸܗ ܡܫܝܼܚܵܐ ܡܲܢܽܘ܃
082:499	ܘܲܚܙܵܐ ܕܝܲܕܥܸܗ ܘܙܵܥ ܗ̄ܘܵܐ ܘܲܢܦܲܠ ܐܲܝܟ ܚܲܝܵܒܵܐ܀
082:500	ܡܸܚܕܵܐ ܕܲܩܪܵܝܗ̄ܝ ܡܵܪܲܢ ܒܲܫܡܸܗ ܙܸܠ ܣܵܛܵܢܵܐ܃
082:501	ܡܸܚܕܵܐ ܢܸܦܠܲܬ̤ ܪܽܘܚܵܐ ܪܵܡܬܵܐ ܕܕܲܓܵܠܽܘܬܸܗ܀
082:502	ܠܵܐ ܣܵܒܲܪ ܗ̄ܘܵܐ ܕܝܵܕܲܥ ܗ̄ܘܵܐ ܠܸܗ ܡܸܢ ܫܽܘܪܵܝܸܗ܃
082:503	ܘܲܚܙܵܐ ܕܝܲܕܥܸܗ ܘܡܸܚܕܵܐ ܒܙܲܘܥܸܗ ܥܦܲܩ ܡܲܦܽܘܠܬܵܐ܀
082:504	ܒܕܲܪܵܐ ܩܲܕܡܵܐ ܐܲܝܟ ܝܵܨܽܘܦܵܐ ܩܪܸܒ ܗ̄ܘܵܐ ܨܸܐܕܲܘܗ̄ܝ܃
082:505	ܘܲܒܗܲܘ ܕܲܬܪܸܝܢ ܐܲܝܟ ܕܲܢܫܲܒܚܸܗ ܡܓܲܪܸܓ ܗ̄ܘܵܐ ܠܸܗ܀
082:506	ܘܒܲܬܠܝܼܬܵܝܵܐ ܕܢܸܬܸܠ ܗ̄ܘܵܐ ܠܸܗ ܥܽܘܬܪܵܐ ܪܲܒܵܐ܃
082:507	ܟܲܕ ܣܵܒܲܪ ܗ̄ܘܵܐ ܕܡܲܛܥܸܐ ܠܡܵܪܲܢ ܒܲܬܠܵܬܲܝ̈ܗܽܘܢ܀
082:508	ܘܲܐܝܟ ܡܲܠܲܐܟܵܐ ܫܒܝܼܚܵܐ ܕܢܽܘܗܪܵܐ ܦܓܲܥ ܒܲܡܫܝܼܚܵܐ܃
082:509	ܘܠܵܐ ܨܵܒܸܐ ܗ̄ܘܵܐ ܢܚܲܘܸܐ ܢܲܦܫܸܗ ܕܣܵܛܵܢܵܐ ܗ̄ܘܵܐ܀
082:510	ܘܒܲܪ ܐܲܠܵܗܵܐ ܕܝܵܕܲܥ ܗ̄ܘܵܐ ܠܸܗ ܗܵܐ ܡܸܢ ܥܵܠܲܡ܃
082:511	ܠܵܐ ܚܲܘܝܼ ܗ̄ܘܵܐ ܕܝܵܕܲܥ ܗ̄ܘܵܐ ܠܸܗ ܡܸܢ ܫܽܘܪܵܝܵܐ܀
082:512	ܐܸܠܵܐ ܦܓܲܥ ܒܸܗ ܒܡܲܟܝܼܟܽܘܬܵܐ ܘܒܲܦܫܝܼܛܽܘܬܵܐ܃
082:513	ܘܲܣܒܲܪ ܒܝܼܫܵܐ ܕܛܵܥܸܐ ܒܵܬܪܸܗ ܘܠܵܐ ܝܵܕܲܥ ܠܸܗ܀
082:514	ܘܸܐܠܵܐ ܐܲܝܟܵܐ ܕܸܐܡܲܪ ܡܵܪܲܢ ܙܸܠ ܣܵܛܵܢܵܐ܃
082:515	ܠܵܐ ܐܲܪܓܸܫ ܗ̄ܘܵܐ ܕܝܵܕܲܥ ܗ̄ܘܵܐ ܠܸܗ ܕܣܵܛܵܢܵܐ ܗ̄ܘܵܐ܀
082:516	ܘܸܐܬܬܙܝܼܥ ܡܸܢܸܗ ܡܸܚܕܵܐ ܕܲܚܙܵܐ ܕܝܵܕܲܥ ܗ̄ܘܵܐ ܠܸܗ܃
082:517	ܟܲܕ ܬܵܗܲܪ ܒܸܗ ܟܡܵܐ ܐܸܬܡܲܟܲܟ ܟܲܕ ܡܸܬܟܲܬܲܫ܀
082:518	ܘܲܟܡܵܐ ܠܵܐ ܨܒܵܐ ܕܚܲܘܸܐ ܢܲܦܫܸܗ ܕܝܵܕܽܘܥܵܐ ܗ̄ܘܵܐ܃
082:519	ܘܲܟܡܵܐ ܣܲܝܒܲܪ ܟܲܕ ܡܸܬܢܲܣܸܐ ܘܠܵܐ ܡܸܐܢܲܬ̤ ܠܸܗ܀
082:520	ܡܸܚܕܵܐ ܕܲܢܦܲܠ ܐܵܟܸܠܩܲܪܨܵܐ ܩܪܸܒܘ ܡܲܠܲܐܟܸ̈ܐ܃
082:521	ܘܲܡܫܲܡܫܝܼܢ ܠܸܗ ܠܒܲܪ ܐܲܠܵܗܵܐ ܐܲܟܡܵܐ ܕܲܟܬܝܼܒ܀
082:522	ܒܵܬܲܪ ܕܲܪ̈ܲܘܗ̄ܝ ܕܝܼܚܝܼܕܵܝܵܐ ܗܘܵܬ̤ ܬܸܫܡܸܫܬܸܗ܃
082:523	ܡܸܢ ܡܲܠܲܐܟܸ̈ܐ ܐܲܝܟ ܡܵܐ ܕܡܲܬܲܝ ܣܵܦܪܵܐ ܐܵܡܲܪ܀