← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 82: on Our Lord's fight with Satan

Click on a word for lexical analysis
Click on a red-colored coordinate for comments and/or translations of the line

▲ earlier lines

082:523 ܡܸܢ ܡܲܠܲܐܟܸ̈ܐ ܐܲܝܟ ܡܵܐ ܕܡܲܬܲܝ ܣܵܦܪܵܐ ܐܵܡܲܪ܀
082:524 ܟܲܕ ܡܸܬܟܲܬܲܫ ܥܲܡ ܥܲܘܵܠܵܐ ܒܡܲܟܝܼܟܽܘܬܸܗ܃
082:525 ܚܲܙܵܝܸ̈ܐ ܗܘܲܘ ܚܲܝ̈ܠܲܘܵܬܵܐ ܓܢܝܼ̈ܙܸܐ ܕܲܠܥܸܠ܀
082:526 ܘܠܵܐ ܡܲܪܦܸܐ ܗ̄ܘܵܐ ܪܸܡܙܸܗ ܕܲܐܒܵܐ ܠܚܲܝ̈ܠܲܘܵܬܵܐ܃
082:527 ܕܲܢܥܲܕܪܽܘܢܵܝܗ̄ܝ ܠܲܒܪܵܐ ܒܕܲܪܵܐ ܕܩܵܐܸܡ ܗ̄ܘܵܐ ܒܸܗ܀
082:528 ܐܵܦܠܵܐ ܒܚܲܝܠܵܐ ܕܲܐܠܵܗܽܘܬܸܗ ܒܪܵܐ ܡܲܩܪܸܒ ܗ̄ܘܵܐ܃
082:529 ܕܣܲܪܸܩ ܢܲܦܫܸܗ ܘܟܸܢ ܐܸܬܬܲܚܬܝܼ ܕܢܸܥܒܸܕ ܕܲܪܵܐ܀
082:530 ܒܲܕܡܽܘܬ ܥܲܒܕܵܐ ܗܵܝ ܕܲܢܣܲܒ ܗ̄ܘܵܐ ܡܸܢ ܓܲܘ ܟܲܪܣܵܐ܃
082:531 ܩܵܡ ܒܲܐܓܽܘܢܵܐ ܡܲܟܝܼܟܵܐܝܼܬ ܥܲܠ ܕܲܫܦܲܪ ܠܸܗ܀
082:532 ܘܠܵܐ ܠܡܲܠܲܐܟܸ̈ܐ ܫܒܲܩ ܗ̄ܘܵܐ ܢܩܽܘܡܽܘܢ ܥܲܠ ܬܸܫܡܸܫܬܸܗ܃
082:533 ܘܠܵܐ ܗܽܘ ܚܲܘܝܼ ܚܲܝܠܵܐ ܕܡܲܢܽܘ ܟܲܕ ܡܸܬܢܲܣܸܐ܀
082:534 ܡܸܢ ܩܒܽܘܠ ܩܵܡܘ ܗ̄ܘܲܘ ܥܲܒ̈ܕܲܘܗ̄ܝ ܕܲܐܒܽܘܗ̄ܝ ܕܲܢܚܽܘܪܽܘܢ ܒܸܗ܃
082:535 ܚܲܝ̈ܠܲܘܵܬܵܐ ܘܪ̈ܲܒܲܝ ܚܲܝ̈ܠܸܐ ܟܲܕ ܬܲܗܝܼܪܝܼܢ܀
082:536 ܟܲܕ ܛܲܢܵܢܝܼܢ ܟܲܕ ܕܲܚܝܼܠܝܼܢ ܟܲܕ ܪܲܬܝܼܬܝܼܢ܃
082:537 ܟܲܕ ܥܲܙܝܼܙܝܼܢ ܟܲܕ ܠܵܐ ܦܩܝܼܕܝܼܢ ܠܲܡܫܲܡܵܫܽܘ܀
082:538 ܘܡܸܚܕܵܐ ܕܫܲܠܸܡ ܕܲܪ̈ܲܘܗ̄ܝ ܡܵܪܲܢ ܡܲܟܝܼܟܵܐܝܼܬ܃
082:539 ܩܪܸܒܘ ܡܲܠܲܐܟܸ̈ܐ ܘܲܡܫܲܡܫܝܼܢ ܠܸܗ ܒܬܸܗܪܵܐ ܪܲܒܵܐ܀
082:540 ܠܵܐ ܥܲܠ ܕܲܙܟܵܐ ܐܸܠܵܐ ܡܸܛܽܠ ܕܸܐܬܡܲܟܲܟ ܗ̄ܘܵܐ܃
082:541 ܕܟܲܕ ܙܲܟܵܝܵܐ ܗ̄ܘ ܢܸܬܢܲܣܸܐ ܗ̄ܘܵܐ ܒܓܲܘ ܐܲܓܽܘܢܵܐ܀
082:542 ܬܗܲܪܘ ܡܲܠܲܐܟܸ̈ܐ ܒܗܲܘ ܚܸܙܘܵܢܵܐ ܪܲܒܵܐ ܕܲܚܙܲܘ܃
082:543 ܘܸܐܬܬܙܝܼܥܘ ܟܸܢ̈ܫܸܐ ܒܫܽܘ̈ܒܚܸܐ ܦܪ̈ܝܼܫܸܐ ܕܩܽܘ̈ܠܵܣܲܝܗܽܘܢ܀
082:544 ܘܲܩܥܲܘ ܘܝܲܒܸܒܘ ܗܵܢܵܐ ܠܗܵܢܵܐ ܟܽܠ ܒܽܘܪ̈ܟܵܬܵܐ܃
082:545 ܟܽܠ ܗܲܒܵܒܸ̈ܐ/ܝܽܘ̈ܒܵܒܸܐ/ ܟܽܠ ܩܽܘ̈ܠܵܣܸܐ ܟܽܠ ܗܽܘ̈ܠܵܠܸܐ܀
082:546 ܥܪܲܩ ܣܵܛܵܢܵܐ ܕܲܡܢܲܣܸܐ ܗ̄ܘܵܐ ܘܦܵܫܘ ܡܲܠܲܐܟܸ̈ܐ܃
082:547 ܥܲܠ ܬܸܫܡܸܫܬܸܗ ܕܒܲܪ ܐܲܠܵܗܵܐ ܐܲܝܟ ܕܲܡܟܵܢܝܼܢ܀
082:548 ܘܲܚܢܲܢ ܗܵܫܵܐ ܢܸܩܪܽܘܒ ܥܲܡܗܽܘܢ ܕܲܒܢ̈ܲܝ ܢܽܘܗܪܵܐ܃
082:549 ܢܲܣܸܩ ܫܽܘܒܚܵܐ ܠܲܒܪܵܐ ܕܲܨܒܵܐ ܕܢܸܬܢܲܣܸܐ ܗ̄ܘܵܐ܀
082:550 ܡܸܛܽܠܵܬܲܢ ܐܲܪܡܝܼ ܐܽܘܪܚܸܗ ܒܥܵܠܡܵܐ ܡܵܪܲܢ܃
082:551 ܘܲܚܢܲܢ ܝܲܬܝܼܪ ܡܸܢ ܡܲܠܲܐܟܸ̈ܐ ܘܵܠܸܐ ܕܢܲܘܕܸܐ܀
082:552 ܙܵܟܽܘܬܵܐ ܓܹܝܪ ܠܲܒܢܲܝܢܵܫܵܐ ܡܸܬܬܲܓܲܪ ܗ̄ܘܵܐ܃
082:553 ܘܡܸܛܽܠܗܵܢܵܐ ܗܘܵܐ ܒܲܪܢܵܫܵܐ ܕܢܲܠܸܦ ܐܸܢܽܘܢ܀
082:554 ܒܲܐܝܢܵܐ ܙܲܝܢܵܐ ܢܸܗܘܽܘܢ ܐܵܪܥܝܼܢ ܠܲܒܥܸܠܕܲܪܵܐ܃
082:555 ܘܒܲܐܝܢܵܐ ܚܲܝܠܵܐ ܢܕܲܥܟܽܘܢ ܚܲܫܸ̈ܐ ܒܲܥܪܝܼܪ̈ܵܝܸܐ܀
082:556 ܘܡܸܛܽܠܗܵܢܵܐ ܬܠܵܬܵܐ ܕܲܪ̈ܝܼܢ ܐܸܬܟܲܬܲܫ ܗ̄ܘܵܐ܃
082:557 ܕܢܲܠܦܵܟ ܬܸܙܟܸܐ ܬܠܵܬܵܐ ܚܲܫܸ̈ܐ ܡܲܠܝ̈ܲܝ ܡܲܘܬܵܐ܀
082:558 ܒܫܽܘܪܵܝ ܕܲܪܵܐ ܨܲܘܡܵܐ ܪܲܒܵܐ ܘܥܵܢܘܵܝܽܘܬܵܐ܃
082:559 ܟܲܕ ܡܸܬܩܲܦܚܵܐ ܪܸܚܡܲܬ ܟܲܪܣܵܐ ܘܵܐܣܽܘܛܽܘܬܵܐ܀
082:560 ܒܕܲܪܵܐ ܕܲܬܪܸܝܢ ܫܝܼܛܵܐ ܘܫܲܕܝܵܐ ܪܸܚܡܲܬ ܫܽܘܒܚܵܐ܃
082:561 ܟܲܕ ܢܲܩܝܼܦܵܐ ܢܲܦܫܵܐ ܠܥܲܦܪܵܐ ܒܡܲܟܝܼܟܽܘܬܵܐ܀
082:562 ܒܗܲܘ ܕܲܬܠܵܬܵܐ ܪܸܚܡܲܬ ܥܽܘܬܪܵܐ ܘܲܕܫܽܘܠܛܵܢܵܐ܃
082:563 ܣܚܝܼܦܵܐ ܘܕܝܼܫܵܐ ܠܲܐܝܢܵܐ ܕܪܵܚܸܡ ܙܲܕܝܼܩܽܘܬܵܐ܀
082:564 ܥܪܽܘܩ ܐܲܢ̄ܬ ܗܵܫܵܐ ܡܸܢ ܦܽܘܠܚܵܢܵܐ ܕܵܐܣܽܘܛܽܘܬܵܐ܃
082:565 ܘܡܸܢ ܪܵܡܽܘܬܵܐ ܡܵܐ ܕܲܩܢܲܝܬܵܗ݀ ܠܙܲܕܝܼܩܽܘܬܵܐ܀
082:566 ܘܡܸܢ ܟܽܠ ܡܸܕܸܡ ܕܠܵܐܟܸܠܩܲܪܨܵܐ ܢܝܵܚܵܐ ܥܵܒܸܕ܃
082:567 ܕܬܸܗܘܸܐ ܚܠܝܼܛܵܐ ܒܓܽܘܕܵܐ ܪܚܝܼܡܬܵܐ ܕܲܒܢ̈ܲܝ ܢܽܘܗܪܵܐ܀
082:568 ܘܨܲܠܸܠ ܢܲܦܫܵܟ ܡܸܢ ܩܸܢܝܵܢܵܐ ܒܡܲܟܝܼܟܽܘܬܵܐ܃
082:569 ܘܬܵܐ ܐܸܫܬܲܒܲܚ ܡܸܢ ܡܲܠܲܐܟܸ̈ܐ ܟܡܵܐ ܫܲܦܝܼܪ ܐܲܢ̄ܬ܀
082:570 ܠܵܟ ܐܸܬܬܲܚܬܝܼ ܕܢܲܠܸܦ ܕܲܪܵܐ ܒܪܵܐ ܕܲܐܠܵܗܵܐ܃
082:571 ܒܪܝܼܟ ܙܲܟܵܝܵܐ ܕܙܲܟܝܼ ܒܕܲܪܸܗ ܠܲܕܚܲܝܵܒܝܼܢ܀
082:572 ܫܠܸܡ ܡܹܐܡܪܵܐ ܕܥܲܠ ܬܲܟܬܽܘܫܸܗ ܕܡܵܪܲܢ ܕܥܲܡ ܣܵܛܵܢܵܐ܂