The Comprehensive Aramaic Lexicon

126:322	ܫܪܵܪܵܐ ܬܒܲܥ ܗ̄ܘܵܐ ܕܠܵܐ ܢܸܬܚܲܦܸܐ ܡܸܢ ܕܲܓܵܠܵܐ܃
126:323	ܘܝܲܗ̄ܒ ܠܸܗ ܕܝܼܠܸܗ ܐܲܝܟ ܕܣܵܒܲܪ ܗ̄ܘܵܐ ܕܡܸܙܟܵܐ ܙܵܟܸܐ܀
126:324	ܬܽܘܒ ܦܲܢܝܼ ܠܸܗ ܡܫܝܼܚܵܐ ܠܒܝܼܫܵܐ ܠܽܘܩܒܲܠ ܗܵܠܸܝܢ܃
126:325	ܕܲܟܬܝܼܒ ܗ̄ܽܘ ܠܲܡ ܕܠܵܐ ܠܲܐܠܵܗܵܟ ܬܸܗܘܸܐ ܡܢܲܣܸܐ܀
126:326	ܫܕܵܐ ܒܸܗ ܓܸܐܪܵܐ ܘܣܲܟܪܸܗ ܦܽܘܡܸܗ ܡܸܢ ܕܲܟܬܝܼ̈ܒܵܢ܃
126:327	ܠܵܐ ܠܲܡ ܬܢܲܣܸܐ ܠܡܵܪܝܵܐ ܡܵܪܵܟ ܘܲܠܐܲܠܵܗܵܟ܀
126:328	ܫܡܲܥ ܣܵܛܵܢܵܐ ܘܲܐܪܦܝܼ ܐܝܼܕܵܐ ܒܲܗܦܵܟ̈ܵܬܵܐ܃
126:329	ܕܲܥܪܝܼܡܽܘܬܸܗ ܕܝܸܫܽܘܥ ܢܸܨܚܲܬ̤ ܒܲܡܠܝܼܠܽܘܬܵܐ܀
126:330	ܘܛܵܟ ܐܸܬܥܲܕܲܠ ܒܝܼܫܵܐ ܒܢܲܦܫܸܗ ܡܸܛܽܠ ܗܵܕܸܐ܃
126:331	ܥܲܠ ܕܲܐܝܬܝܼ ܗ̄ܘܵܐ ܡܸܢ ܕܲܢܒܝܼܸ̈ܐ ܘܠܵܐ ܐܸܬܥܲܕܲܪ܀
126:332	ܡܵܢܵܐ ܝܸܬܪܸܬ ܡܸܢ ܡܲܙܡܽܘܪܵܐ ܕܒܸܛܠܸܬ ܝܸܠܦܸܬ܃
126:333	ܕܲܗܘܵܐ ܠܽܘܩܒܲܠܝ ܟܲܕ ܣܵܒܲܪ ܐ̄ܢܵܐ ܕܒܸܗ ܙܵܟܸܐ ܗ̄ܘܝܼܬ܀
126:334	ܡܲܪܝܼܪ ܦܸܣܵܐ ܕܲܡܛܵܢܝ ܝܲܘܡܵܢ ܟܲܕ ܠܵܐ ܝܸܕܥܸܬ܃
126:335	ܕܲܗܘܵܬ̤ ܚܲܪܲܬܝ ܕܸܐܬܢܸܐ ܢܒܝܼܸ̈ܐ ܘܦܽܘ̈ܫܵܩܲܝܗܽܘܢ܀
126:336	ܠܥܵܩܲܬܝ ܝܸܬܒܸܬ ܥܲܠ ܡܲܙܡܽܘܪܵܐ ܕܸܐܫܬܲܒܗܲܪ ܒܸܗ܃
126:337	ܘܟܲܕ ܝܼܠܸܦܬܸܗ ܕܪܲܫ ܠܸܗ ܥܲܡܝ ܕܝܼܠܝ ܡܸܢ ܕܲܬܢܝܼܬܸܗ܀
126:338	ܦܣܲܩ ܗ̄ܘܵܐ ܒܝܼܫܵܐ ܕܬܽܘܒ ܒܲܟܬܵܒܸ̈ܐ ܠܵܐ ܢܸܬܚܲܫܲܚ܃
126:339	ܥܕܲܡܵܐ ܠܗܵܪܟܵܐ ܣܵܦ̈ܩܵܢ ܕܲܬܢܝܼܬ ܟܲܕ ܠܵܐ ܝܸܬܪܸܬ܀
126:340	ܘܟܲܕ ܚܵܒ ܗ̄ܘܵܐ ܠܸܗ ܒܕܲܪܵܐ ܕܲܬܪܸܝܢ ܐܸܬܛܲܝܲܒ ܬܽܘܒ܃
126:341	ܕܲܒܫܽܘܘܕܵܝܵܐ ܕܕܲܓܵܠܽܘܬܵܐ ܢܲܛܥܸܝܘܗ̄ܝ ܠܲܒܪܵܐ܀
126:342	ܕܒܲܪ ܚܸܫܽܘܟܵܐ ܠܫܸܡܫܵܐ ܦܲܐܝܵܐ ܕܟܽܠ ܙܲܠܝܼ̈ܩܝܼܢ܃
126:343	ܕܲܡܟܲܣܲܝ ܗ̄ܘܵܐ ܥܢܵܢܵܐ ܕܦܲܓܪܵܐ ܘܠܵܐ ܐܸܬܢܲܒܪܲܫ܀
126:344	ܣܠܸܩ ܗ̄ܘܵܐ ܥܲܡܸܗ ܠܛܽܘܪܵܐ ܪܵܡܵܐ ܘܲܡܛܲܘ ܪܝܼܫܸܗ܃
126:345	ܕܡܸܢ ܪܝܼܫ ܪܲܘܡܵܐ ܢܸܦܸܠ ܒܝܼܫܵܐ ܡܵܐ ܕܸܐܬܚܲܝܲܒ܀
126:346	ܡܝܲܒܸܠ ܫܲܦܠܵܐ ܠܗܲܘ ܓܲܢ̄ܒܵܪܵܐ ܥܲܠ ܟܽܠ ܕܲܪ̈ܝܼܢ܃
126:347	ܘܠܵܐ ܐܸܬܚܲܡܲܬ ܟܲܕ ܡܸܬܝܲܒܲܠ ܥܲܠ ܬܲܟܬܽܘܫܵܐ܀
126:348	ܠܵܐ ܐܸܬܩܲܫܝܼ ܥܲܡ ܣܵܛܵܢܵܐ ܒܓܲܘ ܐܲܓܽܘܢܵܐ܃
126:349	ܕܢܸܬܸܠ ܙܸܕܩܵܐ ܠܲܐܡܝܼܢܽܘܬܵܐ ܕܗܝܼ ܬܸܬܢܲܨܲܚ܀
126:350	ܠܵܐ ܓܥܲܪ ܗ̄ܘܵܐ ܒܸܗ ܒܒܝܼܫܵܐ ܘܛܲܠܸܩ ܐܲܝܟ ܕܲܡܨܸܐ ܗ̄ܘܵܐ܃
126:351	ܐܲܓܲܪ ܪܽܘܚܸܗ ܘܲܙܟܵܐ ܒܕܲܪܸܗ ܘܲܣܥܲܪ ܐܽܘܪܚܸܗ܀
126:352	ܠܲܘ ܕܹܝܢ ܠܲܓܡܵܪ ܫܲܒܩܸܗ ܒܝܼܫܵܐ ܠܡܸܫܬܲܥܠܵܝܽܘ܃
126:353	ܕܒܵܬܲܪ ܙܲܒܢܵܐ ܒܫܸܚܪܵܐ ܦܲܟܪܸܗ ܒܝܲܡܵܐ ܚܲܒܫܸܗ܀
126:354	ܗܵܝܕܸܝܢ ܫܲܦܠܵܐ ܟܲܕ ܐܸܬܚܲܝܲܒ ܒܲܬܪܸܝܢ ܕܲܪ̈ܝܼܢ܃
126:355	ܫܲܪܝܼ ܡܫܲܓܸܫ ܕܲܒܫܽܘܘܕܵܝܵܐ ܟܠܝܼܠܵܐ ܢܸܓܕܽܘܠ܀
126:356	ܫܸܪܥܲܬ̤ ܪܸܓܠܸܗ ܡܸܢ ܬܲܟܬܽܘܫܵܐ ܕܩܵܐܸܡ ܗ̄ܘܵܐ ܒܸܗ܃
126:357	ܘܩܲܪܸܒ ܫܽܘܚܕܵܐ ܕܲܕܙܵܟܽܘܬܵܐ ܕܡܲܝ̈ܵܐ ܢܸܣܲܒ܀
126:358	ܚܲܘܝܼ ܛܽܘܦܣܵܐ ܕܲܐܬܪ̈ܲܘܵܬܵܐ ܒܟܲܗܝܼܢܽܘܬܵܐ܃
126:359	ܟܲܪ̈ܟܸܐ ܪ̈ܵܡܸܐ ܘܲܡܕܝܼ̈ܢܵܬܵܐ ܘܥܲܡ̈ܡܸܐ ܕܲܒܗܸܝܢ܀
126:360	ܨܵܪ ܦܲܪ̈ܕܲܝܣܸܐ ܕܟܽܠ ܐܝܼ̈ܠܵܢܝܼܢ ܒܩܲܪܝܼܒܽܘܬܵܐ܃
126:361	ܩܽܘܪ̈ܝܵܐ ܘܓܲܢܸ̈ܐ ܕܪ̈ܵܘܙܵܢ ܡܲܠܝ̈ܵܢ ܟܽܠܗܽܘܢ ܛܽܘ̈ܒܸܐ܀
126:362	ܪܫܲܡ ܐܲܪ̈ܥܵܬܵܐ ܘܢܲܗܪ̈ܲܘܵܬܵܐ ܘܵܐܦ ܥܲܝ̈ܢܵܬܵܐ܃
126:363	ܘܛܽܘܪܸ̈ܐ ܓܕܝܼ̈ܠܸܐ ܘܢܲܚ̈ܠܸܐ ܣܒܝܼ̈ܣܸܐ ܕܟܽܠ ܗܲܒܵܒ̈ܝܼܢ܀
126:364	ܢܓܲܕ ܗ̄ܘܵܐ ܘܲܐܝܬܝܼ ܫܪܲܓܪ̈ܵܓܝܵܬܵܐ ܕܲܓ̈ܵܠܵܬܵܐ܃
126:365	ܟܲܕ ܡܸܬܝܲܒܲܠ ܥܲܠ ܫܽܘ̈ܚܠܵܦܸܐ ܕܕܸܡ̈ܘܵܢ ܕܸܡ̈ܘܵܢ܀
126:366	ܚܒܲܨ ܠܲܚܕܵܕܸ̈ܐ ܛܸܠܵܢ̈ܝܵܬܵܐ ܒܟܽܠ ܐܸܣܟܼܡ̈ܝܼܢ܃
126:367	ܥܲܡ ܛܸܠ̈ܵܠܸܐ ܕܟܽܠ ܚܲܝ̈ܠܲܘܵܢ ܟܲܗܝܼܢܵܐܝܼܬ܀
126:368	ܙܪܲܩ ܥܲܠ ܬܼܒܸܝܠ ܒܠܸܨܽܘ̈ܨܝܵܬܸܗ ܟܲܕܵܒ̈ܵܬܵܐ܃
126:369	ܕܲܒܫܽܘ̈ܚܠܵܦܸܐ ܕܟܽܠ ܐܸܣܟܼܡ̈ܝܼܢ ܡܸܬܚܲܙ̈ܝܵܢ ܗ̄ܘ̈ܲܝ܀
126:370	ܟܲܢܸܫ ܘܲܐܝܬܝܼ ܦܪܲܚܪ̈ܽܘܚܝܵܬܵܐ ܣܝܼ̈ܥܵܢ ܣܝܼ̈ܥܵܢ܃
126:371	ܛܲܟ̈ܣܸܐ ܫܓܝܼ̈ܫܸܐ ܘܓܽܘ̈ܕܲܝ ܫܽܘܩܪܵܐ ܕܢܲܩܝܼ̈ܦܵܢ ܠܸܗ܀
126:372	ܕܵܡ̈ܝܲܝ ܡܲܠܟܸ̈ܐ ܘܣܸܕܪܸ̈ܐ ܡܬܝܼ̈ܚܸܐ ܘܪ̈ܲܒܲܝ ܚܲܝ̈ܠܸܐ܃