The Comprehensive Aramaic Lexicon

126:363	ܘܛܽܘܪܸ̈ܐ ܓܕܝܼ̈ܠܸܐ ܘܢܲܚ̈ܠܸܐ ܣܒܝܼ̈ܣܸܐ ܕܟܽܠ ܗܲܒܵܒ̈ܝܼܢ܀
126:364	ܢܓܲܕ ܗ̄ܘܵܐ ܘܲܐܝܬܝܼ ܫܪܲܓܪ̈ܵܓܝܵܬܵܐ ܕܲܓ̈ܵܠܵܬܵܐ܃
126:365	ܟܲܕ ܡܸܬܝܲܒܲܠ ܥܲܠ ܫܽܘ̈ܚܠܵܦܸܐ ܕܕܸܡ̈ܘܵܢ ܕܸܡ̈ܘܵܢ܀
126:366	ܚܒܲܨ ܠܲܚܕܵܕܸ̈ܐ ܛܸܠܵܢ̈ܝܵܬܵܐ ܒܟܽܠ ܐܸܣܟܼܡ̈ܝܼܢ܃
126:367	ܥܲܡ ܛܸܠ̈ܵܠܸܐ ܕܟܽܠ ܚܲܝ̈ܠܲܘܵܢ ܟܲܗܝܼܢܵܐܝܼܬ܀
126:368	ܙܪܲܩ ܥܲܠ ܬܼܒܸܝܠ ܒܠܸܨܽܘ̈ܨܝܵܬܸܗ ܟܲܕܵܒ̈ܵܬܵܐ܃
126:369	ܕܲܒܫܽܘ̈ܚܠܵܦܸܐ ܕܟܽܠ ܐܸܣܟܼܡ̈ܝܼܢ ܡܸܬܚܲܙ̈ܝܵܢ ܗ̄ܘ̈ܲܝ܀
126:370	ܟܲܢܸܫ ܘܲܐܝܬܝܼ ܦܪܲܚܪ̈ܽܘܚܝܵܬܵܐ ܣܝܼ̈ܥܵܢ ܣܝܼ̈ܥܵܢ܃
126:371	ܛܲܟ̈ܣܸܐ ܫܓܝܼ̈ܫܸܐ ܘܓܽܘ̈ܕܲܝ ܫܽܘܩܪܵܐ ܕܢܲܩܝܼ̈ܦܵܢ ܠܸܗ܀
126:372	ܕܵܡ̈ܝܲܝ ܡܲܠܟܸ̈ܐ ܘܣܸܕܪܸ̈ܐ ܡܬܝܼ̈ܚܸܐ ܘܪ̈ܲܒܲܝ ܚܲܝ̈ܠܸܐ܃
126:373	ܓܽܘܕܵܐ ܕܠܵܐ ܣܵܟ ܘܲܟܢܽܘܫܬܵܐ ܒܠܸܫܵܢܲܝ̈ܗܸܝܢ܀
126:374	ܡܲܠܟ̈ܘܵܬܵܐ ܠܲܡ ܕܥܵܠܡܵܐ ܘܫܽܘܒܚܗܸܝܢ ܚܲܘܝܼ ܠܝܸܫܽܘܥ܃
126:375	ܐܸܬܝܲܕܥܲܬ̤ ܠܵܗ݀ ܕܟܽܠ ܐܽܘ̈ܚܕܵܢܝܼܢ ܨܵܪ ܚܲܘܝܼ ܠܸܗ܀
126:376	ܗܵܠܸܝܢ ܟܽܠܗܸܝܢ ܠܵܟ ܠܲܡ ܐܸܬܸܠ ܐܸܢ ܬܸܣܓܽܘܕ ܠܝܼ܃
126:377	ܕܝܼܠܝ ܐܸܢܸܝܢ ܓܹܝܪ ܐܵܦ ܫܲܠܝܼܛ ܐ̄ܢܵܐ ܒܽܐܘ̈ܚܕܵܢܲܝܗܸܝܢ܀
126:378	ܐܵܘ ܣܵܛܵܢܵܐ ܡܲܢܽܘ ܥܲܒܕܵܟ ܐܲܒܵܐ ܕܡܲܠܟܸ̈ܐ܃
126:379	ܘܡܲܢ ܐܲܩܝܼܡܵܟ ܥܲܠ ܐܲܪ̈ܥܵܬܵܐ ܘܽܐܘ̈ܚܕܵܢܲܝܗܸܝܢ܀
126:380	ܫܡܲܥ ܦܵܪܽܘܩܲܢ ܟܲܕ ܡܵܪܽܘܕܵܐ ܡܸܫܬܲܒܗܲܪ ܗ̄ܘܵܐ܃
126:381	ܥܲܠ ܐܲܪ̈ܥܵܬܵܐ ܕܕܝܼܠܸܗ ܐܸܢܸܝܢ ܘܫܽܘ̈ܠܛܵܢܲܝܗܸܝܢ܀
126:382	ܟܸܪܝܲܬ̤ ܗ̄ܘܵܬ̤ ܠܸܗ ܥܲܠ ܫܽܘܥܒܵܕܵܐ ܕܲܒܢܲܝܢܵܫܵܐ܃
126:383	ܕܲܒܡܲܕܲܐܬܵܐ ܟܕܝܼܢܝܼܢ ܗ̄ܘܲܘ ܠܸܗ ܒܨܲܠܡܸ̈ܐ ܡܝܼ̈ܬܸܐ܀
126:384	ܗܦܲܟ ܐܲܬܠܝܼܛܵܐ ܢܲܦܫܸܗ ܒܕܲܪܵܐ ܥܲܠ ܚܲܣܝܼܢܵܐ܃
126:385	ܘܲܐܪܡܝܼ ܬܲܒܪܸܗ ܘܲܫܕܵܐ ܣܲܚܦܸܗ ܕܠܵܐ ܚܲܘܣܵܢܵܐ܀
126:386	ܐܸܬܬܥܝܼܪ ܝܵܪܬܵܐ ܥܲܠ ܩܸܢ̈ܝܵܢܲܘܗ̄ܝ ܕܲܚܛܝܼܦܝܼܢ ܗ̄ܘܲܘ܃
126:387	ܘܲܥܒܲܕ ܕܝܼܢܵܐ ܘܲܫܩܲܠ ܐܸܢܽܘܢ ܡܸܢ ܒܵܙܽܘܙܵܐ܀
126:388	ܕܒܲܪ ܒܲܪ ܡܲܠܟܵܐ ܒܵܬܲܪ ܥܲܡܸܗ ܕܸܐܬܓܲܠܝܼ ܗ̄ܘܵܐ܃
126:389	ܘܚܲܪܒܸܗ ܠܓܲܝܣܵܐ ܘܲܐܦܢܝܼ ܫܒܝܼܬܵܐ ܡܸܢ ܫܲܒܵܝܵܗ݀܀
126:390	ܙܸܠ ܣܵܛܵܢܵܐ ܟܲܕܽܘ ܥܲܙܝܼܬ ܠܲܡܚܲܡܣܵܢܽܘ܃
126:391	ܟܬܝܼܒ ܕܲܠܡܵܪܝܵܐ ܒܲܠܚܽܘܕ ܬܸܣܓܽܘܕ ܐܵܦ ܠܸܗ ܬܸܦܠܽܘܚ܀
126:392	ܐܵܦܠܵܐ ܗܵܫܵܐ ܢܦܲܩ ܡܸܢ ܡܽܘܫܸܐ ܡܵܪܸܐ ܢܒܝܼܸ̈ܐ܃
126:393	ܕܠܵܐ ܢܸܗܘܸܐ ܗ̄ܘܵܐ ܐܲܬܪܵܐ ܕܬܸܥܽܘܠ ܢܽܘܟܪܵܝܽܘܬܵܐ܀
126:394	ܡܵܪܸܐ ܚܕܲܬܵܐ ܡܸܢ ܥܲܬܝܼܩܬܵܐ ܡܸܬܚܲܫܲܚ ܗ̄ܘܵܐ܃
126:395	ܕܲܢܚܲܘܸܐ ܗ̄ܘܵܐ ܕܲܒܬܲܪ̈ܬܲܝܗܸܝܢ ܡܸܬܡܲܠܲܠ ܗ̄ܘܵܐ܀
126:396	ܗܵܝܕܸܝܢ ܫܲܢܝܼ ܐܵܟܸܠܩܲܪܨܵܐ ܡܸܢ ܦܵܪܽܘܩܲܢ܃
126:397	ܘܗܵܐ ܡܲܠܲܐܟܸ̈ܐ ܩܪܸܒܘ ܐܸܬܟܲܪܟܽܘܗ̄ܝ ܠܲܡܫܲܡܵܫܽܘ܀
126:398	ܙܟܵܐ ܐܲܬܠܝܼܛܵܐ ܘܡܸܢ ܚܲܙܵܝܸ̈ܐ ܩܥܵܬܵܐ ܣܸܠܩܲܬܹ܃
126:399	ܟܲܕ ܝܵܗܒܝܼܢ ܠܸܗ ܟܠܝܼܠ ܩܽܘ̈ܠܵܣܸܐ ܠܗܲܘ ܕܸܐܬܢܲܨܲܚ܀
126:400	ܟܢܝܼܫܝܼܢ ܗ̄ܘܲܘ ܓܹܝܪ ܟܸܢ̈ܫܲܝ ܥܝܼܪܸ̈ܐ ܒܕܲܪ̈ܓܲܝ ܪܲܘܡܵܐ܃
126:401	ܕܢܸܚܙܽܘܢ ܕܲܪܵܐ ܕܲܚܠܵܦ ܥܵܠܡܵܐ ܡܫܝܼܚܵܐ ܥܵܒܸܕ܀
126:402	ܚܒܲܨܘ ܗ̄ܘܲܘ ܓܲܒܸ̈ܐ ܘܲܛܥܲܢܘ ܣܲܘ̈‍{‍ܦ‍}‍‍<‍ܟ‍>‍ܸܐ ܠܲܫܡܲܝ̈ܵܢܸܐ/ܠܡܫܒܚܘ/܃
126:403	ܕܲܡܕܝܼܩܝܼܢ ܗ̄ܘܲܘ ܥܲܠ ܚܸܙܘ̈ܵܢܸܐ ܕܡܸܬܥܲܒܕܝܼܢ ܗ̄ܘܲܘ܀
126:404	ܪܸܥܡܲܬ̤ ܕܵܪܬܵܐ ܗܵܝ ܕܲܫܡܲܝܵܐ ܒܚܲܝ̈ܠܲܘܵܬܵܐ܃
126:405	ܕܲܟܢܲܫܘ ܢܸܚܙܽܘܢ ܐܲܬܠܝܼܛܽܘܬܵܐ ܕܲܒܓܲܘ ܥܽܘܡܩܵܐ܀
126:406	ܩܵܡܘ ܪ̈ܽܘܚܵܢܸܐ ܒܡܸܕܝܵܪ̈ܲܝܗܽܘܢ ܟܲܕ ܬܲܗܝܼܪܝܼܢ܃
126:407	ܬܸܓܡ̈ܲܝ ܢܽܘܪܵܐ ܥܲܡ ܠܸܓܝܽܘ̈ܢܸܐ ܕܫܲܠܗܸܒܝܼܬܵܐ܀
126:408	ܩܵܝܡܝܼܢ ܟܸܢ̈ܫܸܐ ܒܗܝܼܠܝܼܢ ܣܸܕܪܸ̈ܐ ܘܲܫܠܸܝܢ ܛܸܟ̈ܣܸܐ܃
126:409	ܕܢܸܚܙܽܘܢ ܟܽܠܗܽܘܢ ܕܲܐܝܟܲܢ ܫܵܩܸܠ ܕܲܪܵܐ ܣܵܟܸܗ܀
126:410	ܫܠܸܡ ܬܲܟܬܽܘܫܵܐ ܘܚܵܒ ܣܵܛܵܢܵܐ ܘܲܙܟܵܐ ܡܫܝܼܚܵܐ܃
126:411	ܘܲܩܥܲܘ ܟܽܠܗܽܘܢ ܬܸܓ̈ܡܸܐ ܫܽܘܒܚܵܐ ܠܲܒܪܵܐ ܕܲܢܨܲܚ܀
126:412	ܚܕܝܼܘ ܪ̈ܽܘܚܵܢܸܐ ܒܗܵܝ ܙܵܟܽܘܬܵܐ ܕܲܚܙܲܘ ܕܲܗܘܵܬܹ܃
126:413	ܪܥܸܡܘ ܟܸܢ̈ܫܲܝܗܽܘܢ ܥܲܠ ܛܲܝܒܽܘܬܵܐ ܕܸܐܣܬܲܥܪܲܬ̤ ܗ̄ܘܵܬܹ܀