The Comprehensive Aramaic Lexicon

126:303	ܠܵܐ ܬܸܬܦܲܠܲܓ ܦܸܠ ܐܸܢ ܐܲܢ̄ܬ ܗ̄ܽܘ ܒܪܸܗ ܕܲܐܠܵܗܵܐ܀
126:304	ܫܲܦܝܼܪ ܫܲܪܒܵܐ ܕܲܡܬܲܪܓܸܡ ܐܲܢ̄ܬ ܐܵܘ ܣܵܛܵܢܵܐ܃
126:305	ܘܣܲܓܝܼ ܩܵܐܸܡ ܗܽܘ ܦܽܘܫܵܩܵܐ ܕܲܡܡܲܠܸܠ ܐܲܢ̄ܬ܀
126:306	ܡܲܢ ܐܲܛܥܸܡ ܒܵܗ݀ ܒܕܲܓܵܠܽܘܬܵܟ ܫܲܪܝܼܪܽܘܬܵܐ܃
126:307	ܕܵܐܦܠܵܐ ܕܲܘܝܼܕ ܦܲܫܩܸܗ ܠܫܲܪܒܵܐ ܝܲܬܝܼܪ ܡܸܢܵܟ܀
126:308	ܩܵܠܵܐ ܕܫܲܪܝܼܪ ܡܸܢ ܐܲܒܽܘܒܵܐ ܬܒܝܼܪܵܐ ܡܲܠܸܠ܃
126:309	ܘܩܝܼܢܬܵܐ ܚܠܝܼܬܵܐ ܡܸܢ ܩܝܼܬܵܪܵܐ ܡܥܲܪܩܲܠ ܡܸܢܸ̈ܐ܀
126:310	ܡܲܛܥܸܐ ܒܪܝܼܬܵܐ ܐܲܘ ܡܲܠܦܵܢܵܐ ܚܲܕܬܵܐ ܢܸܩܪܸܝܟ܃
126:311	ܘܣܵܦܪܵܐ ܡܗܝܼܪܵܐ ܡܠܝܼܛ ܒܲܟܬܵܒܸ̈ܐ ܕܲܢܒܝܼܽܘܬܵܐ܀
126:312	ܠܵܐ ܐ̄ܢܵܫ ܦܲܫܸܩ ܛܵܒ ܡܸܢ ܗܵܠܸܝܢ ܡܸܢ ܕܲܢܒܝܼܸ̈ܐ܃
126:313	ܕܵܐܦ ܗܽܘ ܡܽܘܫܸܐ ܐܸܠܽܘ ܫܲܡܥܵܟ ܬܵܗܲܪ ܗ̄ܘܵܐ ܒܵܟ܀
126:314	ܒܲܐܝܢܵܐ ܙܲܒܢܵܐ ܒܛܸܠ ܬܲܟܬܽܘܫܵܐ ܡܸܢ ܐ̄ܢܵܫܽܘܬܵܐ܃
126:315	ܘܲܒܩܸܪܝܵܢܵܐ ܡܦܲܫܸܩ ܣܸܦܪܸ̈ܐ ܗܘܵܐ ܥܸܢܝܵܢܵܟ܀
126:316	ܘܸܐܢܗܽܘ ܕܩܲܠܝܼܠ ܬܸܬܸܒ ܬܸܒܛܲܠ ܒܸܝܬ ܩܸܪܝܵܢܵܐ܃
126:317	ܡܲܕܥܵܟ ܢܵܗܲܪ ܘܲܡܦܲܫܩܵܢܵܐ ܡܠܝܼܠܵܐ ܗܵܘܸܝܬ܀
126:318	ܫܪܵܪܵܐ ܓܫܲܦ ܒܵܟ ܠܲܘ ܡܸܢ ܕܝܼܠܵܟ ܡܲܠܸܠ ܦܽܘܡܵܟ܃
126:319	ܐܲܝܟ ܕܲܢܒܝܼܵܐ ܫܐܝܼܠܵܐ ܫܲܐܽܘܠ ܐܸܬܢܲܒܝܼ ܗ̄ܘܵܐ܀
126:320	ܠܵܐ ܐ̄ܢܵܫ ܐܸܫܟܲܚ ܛܵܒ ܡܸܢ ܗܵܟܲܢ ܡܸܢ ܩܸܪܝܵܢܵܐ܃
126:321	ܩܛܝܼܪܵܐ ܐܲܠܨܵܟ ܕܲܬܦܲܢܸܐ ܠܸܗ ܐ̄ܪ̈ܵܙܲܘܗ̄ܝ ܠܲܒܪܵܐ܀
126:322	ܫܪܵܪܵܐ ܬܒܲܥ ܗ̄ܘܵܐ ܕܠܵܐ ܢܸܬܚܲܦܸܐ ܡܸܢ ܕܲܓܵܠܵܐ܃
126:323	ܘܝܲܗ̄ܒ ܠܸܗ ܕܝܼܠܸܗ ܐܲܝܟ ܕܣܵܒܲܪ ܗ̄ܘܵܐ ܕܡܸܙܟܵܐ ܙܵܟܸܐ܀
126:324	ܬܽܘܒ ܦܲܢܝܼ ܠܸܗ ܡܫܝܼܚܵܐ ܠܒܝܼܫܵܐ ܠܽܘܩܒܲܠ ܗܵܠܸܝܢ܃
126:325	ܕܲܟܬܝܼܒ ܗ̄ܽܘ ܠܲܡ ܕܠܵܐ ܠܲܐܠܵܗܵܟ ܬܸܗܘܸܐ ܡܢܲܣܸܐ܀
126:326	ܫܕܵܐ ܒܸܗ ܓܸܐܪܵܐ ܘܣܲܟܪܸܗ ܦܽܘܡܸܗ ܡܸܢ ܕܲܟܬܝܼ̈ܒܵܢ܃
126:327	ܠܵܐ ܠܲܡ ܬܢܲܣܸܐ ܠܡܵܪܝܵܐ ܡܵܪܵܟ ܘܲܠܐܲܠܵܗܵܟ܀

126:328	ܫܡܲܥ ܣܵܛܵܢܵܐ ܘܲܐܪܦܝܼ ܐܝܼܕܵܐ ܒܲܗܦܵܟ̈ܵܬܵܐ܃

126:329	ܕܲܥܪܝܼܡܽܘܬܸܗ ܕܝܸܫܽܘܥ ܢܸܨܚܲܬ̤ ܒܲܡܠܝܼܠܽܘܬܵܐ܀
126:330	ܘܛܵܟ ܐܸܬܥܲܕܲܠ ܒܝܼܫܵܐ ܒܢܲܦܫܸܗ ܡܸܛܽܠ ܗܵܕܸܐ܃
126:331	ܥܲܠ ܕܲܐܝܬܝܼ ܗ̄ܘܵܐ ܡܸܢ ܕܲܢܒܝܼܸ̈ܐ ܘܠܵܐ ܐܸܬܥܲܕܲܪ܀
126:332	ܡܵܢܵܐ ܝܸܬܪܸܬ ܡܸܢ ܡܲܙܡܽܘܪܵܐ ܕܒܸܛܠܸܬ ܝܸܠܦܸܬ܃
126:333	ܕܲܗܘܵܐ ܠܽܘܩܒܲܠܝ ܟܲܕ ܣܵܒܲܪ ܐ̄ܢܵܐ ܕܒܸܗ ܙܵܟܸܐ ܗ̄ܘܝܼܬ܀
126:334	ܡܲܪܝܼܪ ܦܸܣܵܐ ܕܲܡܛܵܢܝ ܝܲܘܡܵܢ ܟܲܕ ܠܵܐ ܝܸܕܥܸܬ܃
126:335	ܕܲܗܘܵܬ̤ ܚܲܪܲܬܝ ܕܸܐܬܢܸܐ ܢܒܝܼܸ̈ܐ ܘܦܽܘ̈ܫܵܩܲܝܗܽܘܢ܀
126:336	ܠܥܵܩܲܬܝ ܝܸܬܒܸܬ ܥܲܠ ܡܲܙܡܽܘܪܵܐ ܕܸܐܫܬܲܒܗܲܪ ܒܸܗ܃
126:337	ܘܟܲܕ ܝܼܠܸܦܬܸܗ ܕܪܲܫ ܠܸܗ ܥܲܡܝ ܕܝܼܠܝ ܡܸܢ ܕܲܬܢܝܼܬܸܗ܀
126:338	ܦܣܲܩ ܗ̄ܘܵܐ ܒܝܼܫܵܐ ܕܬܽܘܒ ܒܲܟܬܵܒܸ̈ܐ ܠܵܐ ܢܸܬܚܲܫܲܚ܃
126:339	ܥܕܲܡܵܐ ܠܗܵܪܟܵܐ ܣܵܦ̈ܩܵܢ ܕܲܬܢܝܼܬ ܟܲܕ ܠܵܐ ܝܸܬܪܸܬ܀
126:340	ܘܟܲܕ ܚܵܒ ܗ̄ܘܵܐ ܠܸܗ ܒܕܲܪܵܐ ܕܲܬܪܸܝܢ ܐܸܬܛܲܝܲܒ ܬܽܘܒ܃
126:341	ܕܲܒܫܽܘܘܕܵܝܵܐ ܕܕܲܓܵܠܽܘܬܵܐ ܢܲܛܥܸܝܘܗ̄ܝ ܠܲܒܪܵܐ܀
126:342	ܕܒܲܪ ܚܸܫܽܘܟܵܐ ܠܫܸܡܫܵܐ ܦܲܐܝܵܐ ܕܟܽܠ ܙܲܠܝܼ̈ܩܝܼܢ܃
126:343	ܕܲܡܟܲܣܲܝ ܗ̄ܘܵܐ ܥܢܵܢܵܐ ܕܦܲܓܪܵܐ ܘܠܵܐ ܐܸܬܢܲܒܪܲܫ܀
126:344	ܣܠܸܩ ܗ̄ܘܵܐ ܥܲܡܸܗ ܠܛܽܘܪܵܐ ܪܵܡܵܐ ܘܲܡܛܲܘ ܪܝܼܫܸܗ܃
126:345	ܕܡܸܢ ܪܝܼܫ ܪܲܘܡܵܐ ܢܸܦܸܠ ܒܝܼܫܵܐ ܡܵܐ ܕܸܐܬܚܲܝܲܒ܀
126:346	ܡܝܲܒܸܠ ܫܲܦܠܵܐ ܠܗܲܘ ܓܲܢ̄ܒܵܪܵܐ ܥܲܠ ܟܽܠ ܕܲܪ̈ܝܼܢ܃
126:347	ܘܠܵܐ ܐܸܬܚܲܡܲܬ ܟܲܕ ܡܸܬܝܲܒܲܠ ܥܲܠ ܬܲܟܬܽܘܫܵܐ܀
126:348	ܠܵܐ ܐܸܬܩܲܫܝܼ ܥܲܡ ܣܵܛܵܢܵܐ ܒܓܲܘ ܐܲܓܽܘܢܵܐ܃
126:349	ܕܢܸܬܸܠ ܙܸܕܩܵܐ ܠܲܐܡܝܼܢܽܘܬܵܐ ܕܗܝܼ ܬܸܬܢܲܨܲܚ܀
126:350	ܠܵܐ ܓܥܲܪ ܗ̄ܘܵܐ ܒܸܗ ܒܒܝܼܫܵܐ ܘܛܲܠܸܩ ܐܲܝܟ ܕܲܡܨܸܐ ܗ̄ܘܵܐ܃
126:351	ܐܲܓܲܪ ܪܽܘܚܸܗ ܘܲܙܟܵܐ ܒܕܲܪܸܗ ܘܲܣܥܲܪ ܐܽܘܪܚܸܗ܀
126:352	ܠܲܘ ܕܹܝܢ ܠܲܓܡܵܪ ܫܲܒܩܸܗ ܒܝܼܫܵܐ ܠܡܸܫܬܲܥܠܵܝܽܘ܃
126:353	ܕܒܵܬܲܪ ܙܲܒܢܵܐ ܒܫܸܚܪܵܐ ܦܲܟܪܸܗ ܒܝܲܡܵܐ ܚܲܒܫܸܗ܀