← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 126: 2nd Homily on Our Lord's fight with Satan

Click on a word for lexical analysis
Click on a red-colored coordinate for comments and/or translations of the line

▲ earlier lines

126:153 ܕܒܲܐܬܪܵܐ ܕܡܸܫܟܲܚ ܢܲܩܪܸܒ ܥܲܡܸܗ ܒܽܐܘܡܵܢܽܘܬܸܗ܀
126:154 ܡܸܬܦܲܪܬܲܟ ܗ̄ܘܵܐ ܒܝܼܫܵܐ ܒܕܲܪܵܐ ܕܲܪܡܸܐ ܗ̄ܘܵܐ ܒܸܗ܃
126:155 ܕܲܐܝܕܵܐ ܢܸܣܥܽܘܪ ܠܵܐ ܝܵܕܲܥ ܗ̄ܘܵܐ ܒܲܕܩܵܢܸܛ ܗ̄ܘܵܐ܀
126:156 ܥܲܠ ܚܽܘ̈ܫܵܒܸܐ ܕܚܝܼ̈ܠܸܐ ܕܟܽܠܝܽܘܡ ܡܸܬܝܲܒܲܠ ܗ̄ܘܵܐ܃
126:157 ܘܲܒܬܸܢܵܢܵܐ ܕܡܸܢ ܡܲܪܢܝܼܬܸܗ ܡܸܬܥܲܘܲܪ ܗ̄ܘܵܐ܀
126:158 ܒܓ̈ܲܠܠܸܐ ܙܩܝܼ̈ܦܸܐ ܕܡܸܢ ܪܸܥܝܵܢܸܗ ܡܸܬܢܲܓܲܕ ܗ̄ܘܵܐ܃
126:159 ܕܢܲܩܪܸܒ ܕܵܚܸܠ ܘܲܕܠܵܐ ܢܲܩܪܸܒ ܡܸܣܬܲܪܲܕ ܗ̄ܘܵܐ܀
126:160 ܕܲܫܡܝܼܥ ܗ̄ܘܵܐ ܠܸܗ ܕܒܲܪ ܐܲܠܵܗܵܐ ܗ̄ܘ ܛܵܒ ܩܵܢܸܛ ܗ̄ܘܵܐ܃
126:161 ܘܲܕܓܲܫ ܦܲܓܪܸܗ ܘܲܠܒܲܟ ܓܽܘܫܡܸܗ ܡܸܬܠܲܒܲܒ ܗ̄ܘܵܐ܀
126:162 ܥܲܠ ܐ̄ܢܵܫܽܘܬܵܐ ܕܡܸܬܚܲܙܝܵܐ ܗ̄ܘܵܬ̤ ܡܸܬܓܲܙܲܡ ܗ̄ܘܵܐ܃
126:163 ܘܲܕܓܲܢܝܵܐ ܗ̄ܘܵܬ̤ ܐܲܠܵܗܽܘܬܵܐ ܡܸܬܓܲܪܸܐ ܗ̄ܘܵܐ܀
126:164 ܒܕܲܪܵܐ ܕܩܸܢܛܵܐ ܐܲܪܒܥܝܼܢ ܝܲܘ̈ܡܝܼܢ ܡܸܬܦܲܫܲܚ ܗ̄ܘܵܐ܃
126:165 ܘܲܕܚܵܐܸܒ ܗ̄ܘܵܐ ܐܲܘ ܐܸܢ ܙܵܟܸܐ ܠܵܐ ܝܵܕܲܥ ܗ̄ܘܵܐ܀
126:166 ܚܙܵܝܗ̄ܝ ܠܲܡܫܝܼܚܵܐ ܕܲܠܒܝܼܟ ܨܲܘܡܵܐ ܒܫܽܘܪܵܝ ܕܲܪܸܗ܃
126:167 ܘܸܐܫܟܲܚ ܥܸܠܬܵܐ ܕܡܸܢܵܗ݀ ܢܼܐܠܲܦ ܥܲܠ ܐܲܬܠܝܼܛܵܐ܀
126:168 ܘܫܲܪܝܼ ܚܵܐܲܪ ܟܲܕ ܡܸܬܚܲܫܲܒ ܒܲܨܢܝܼܥܽܘܬܸܗ܃
126:169 ܕܸܐܠܵܐ ܟܵܦܸܐ ܗܵܕܸܐ ܕܓܸܫܸܬ ܠܲܘ ܐ̄ܢܵܫܽܘܬܵܐ ܗ̄ܝ܀
126:170 ܐܸܢܕܸܝܢ ܦܲܓܪܵܐ ܗ̄ܘ ܡܲܡܚܸܠ ܗ̄ܽܘ ܠܸܗ ܨܲܘܡܵܐ ܒܢܽܘܓܪܸܗ܃
126:171 ܠܵܐ ܬܸܡܐܲܢ ܠܝܼ ܐܲܓܲܪ ܘܸܐܚܙܸܐ ܡܵܢܵܐ ܓܵܕܸܫ܀
126:172 ܐܲܬܠܝܼܛ ܥܲܘܠܵܐ ܬܠܵܝܗ̄ܝ ܗ̄ܘܵܐ ܒܣܲܒܪܵܐ ܠܕܲܪܵܐ ܕܲܥܒܲܕ܃
126:173 ܕܲܒܝܲܕ ܨܲܘܡܵܐ ܢܸܬܟܲܬܲܫ ܗ̄ܘܵܐ ܥܲܡ ܨܲܝܵܡܵܐ܀
126:174 ܙܲܟܵܝܵܐ ܕܹܝܢ ܫܲܩܠܵܗ݀ ܠܥܸܠܬܵܐ ܡܸܢ ܚܸܪܝܵܝܵܐ܃
126:175 ܕܠܵܐ ܢܸܫܬܲܒܗܲܪ ܕܵܐܦ ܠܲܘ ܦܲܓܪܵܐ ܙܟܵܝܗ̄ܝ ܒܲܩܪܵܒܵܐ܀
126:176 ܒܚܝܼܠ ܐ̄ܢܵܫܽܘܬܵܐ ܒܲܠܚܽܘܕ ܐܲܩܪܸܒ ܥܲܡ ܚܲܣܝܼܢܵܐ܃
126:177 ܕܒܲܡܚܝܼܠܽܘܬܵܐ ܢܸܬܚܲܝܲܒ ܗ̄ܘܵܐ ܗܲܘ ܡܵܪܽܘܕܵܐ܀
126:178 ܠܵܐ ܐܸܙܕܲܗܝܼ ܘܠܵܐ ܐܲܝܟ ܡܽܘܫܸܐ ܡܵܪܸܗ ܕܡܽܘܫܸܐ܃
126:179 ܕܠܵܐ ܢܸܣܬܲܪܲܕ ܐܵܟܸܠܩܲܪܨܵܐ ܘܠܵܐ ܢܸܬܟܲܬܲܫ܀
126:180 ܥܲܒܕܵܐ ܕܲܚܙܵܐ ܠܲܐܒܵܐ ܩܲܠܝܼܠ ܐܸܬܓܲܘܙܲܠ ܗ̄ܘܵܐ܃
126:181 ܘܲܒܪܵܐ ܕܼܐܝܬܲܘܗ̄ܝ ܟܽܠܸܗ ܒܲܐܒܽܘܗ̄ܝ ܡܲܟܝܼܟ ܘܲܟܦܸܢ܀
126:182 ܒܸܣܬܲܪ ܐܲܒܵܐ ܚܙܵܐ ܗ̄ܘܵܐ ܡܽܘܫܸܐ ܘܸܐܬܢܲܒܪܲܫ ܗ̄ܘܵܐ܃
126:183 ܘܗܲܘ ܕܡܸܢ ܥܽܘܒܸܗ ܬܸܗܪܵܐ ܗ̄ܘ ܪܲܒܵܐ ܕܠܵܐ ܡܲܘܩܸܕ ܗ̄ܘܵܐ܀
126:184 ܐܲܪܒܥܝܼܢ ܝܲܘ̈ܡܝܼܢ ܨܵܡ ܗ̄ܘܵܐ ܢܒܝܼܵܐ ܘܠܵܐ ܟܬܝܼܒ ܕܲܟܦܸܢ܃
126:185 ܘܡܵܪܸܐ ܢܒܝܼܸ̈ܐ ܒܸܗ ܒܡܸܢܝܵܢܵܐ ܟܦܸܢ ܥܲܠ ܕܲܨܒܵܐ܀
126:186 ܠܵܐ ܚܲܘܝܼ ܗ̄ܘܵܐ ܐܲܠܵܗܽܘܬܸܗ ܒܕܲܪܵܐ ܕܲܥܒܲܕ܃
126:187 ܕܲܒܐ̄ܢܵܫܽܘܬܵܐ ܕܸܐܙܕܲܟܝܲܬ̤ ܗ̄ܘܵܬ̤ ܨܒܵܐ ܗ̄ܘܵܐ ܕܢܸܙܟܸܐ܀
126:188 ܨܒܵܐ ܗ̄ܘܵܐ ܘܲܟܦܸܢ ܘܲܬܚܸܒ ܘܲܐܡܚܸܠ ܐܲܝܟ ܬܵܚܽܘܒܵܐ܃
126:189 ܥܵܦ ܡܸܢ ܟܲܦܢܵܐ ܘܢܵܡ ܡܸܢ ܫܲܗܪܵܐ ܠܲܐܝܵܐ ܕܲܨܒܵܐ܀
126:190 ܓܲܪܓܸܗ ܠܒܝܼܫܵܐ ܕܢܸܚܽܘܬ ܢܸܒܗܲܬ ܒܓܲܘ ܐܲܓܽܘܢܵܐ܃
126:191 ܝܲܗ̄ܒ ܠܸܗ ܐܝܼܕܵܐ ܒܲܡܚܝܼܠܽܘܬܵܐ ܥܲܕ ܨܵܐܸܕ ܠܸܗ܀
126:192 ܟܦܸܢ ܗ̄ܘܵܐ ܒܲܒܣܲܪ ܕܢܸܒܣܽܘܪ ܠܲܐܝܠܸܝܢ ܕܛܵܠܡܝܼܢ ܗ̄ܘܲܘ ܠܸܗ܃
126:193 ܘܚܲܘܝܼ ܟܝܵܢܸܗ ܕܡܸܢ ܡܲܪܝܲܡ ܗ̄ܽܘ ܒܗܵܝ ܕܲܟܦܸܢ ܗ̄ܘܵܐ܀
126:194 ܟܲܦܢܵܐ ܦܬܲܚ ܠܸܗ ܬܲܪܥܵܐ ܠܒܝܼܫܵܐ ܠܡܸܬܟܲܬܵܫܽܘ܃
126:195 ܕܸܐܠܽܘܠܵܐ ܚܙܵܝܗ̄ܝ ܕܲܠܐܝܼ ܘܲܟܦܸܢ ܠܵܐ ܡܲܩܪܸܒ ܗ̄ܘܵܐ܀
126:196 ܐܸܫܟܲܚ ܠܝܼܛܵܐ ܐܲܬܪܵܐ ܠܢܸܟܠܸܗ ܐܲܝܟ ܕܲܣܒܲܪ ܠܸܗ܃
126:197 ܕܲܠܨܲܝܵܡܵܐ ܒܟܲܦܢܵܐ ܢܸܐܚܽܘܕ ܘܲܢܒܲܙܲܚ ܒܸܗ܀
126:198 ܒܽܐܘܡܵܢܽܘܬܵܐ ܗܵܝ ܕܲܙܟܵܐ ܒܵܗ݀ ܡܸܬܚܲܫܲܚ ܗ̄ܘܵܐ܃
126:199 ܕܲܒܡܸܐܟܽܘܠܬܵܐ ܨܒܵܐ ܗ̄ܘܵܐ ܕܢܲܛܥܸܝܘܗ̄ܝ ܐܲܝܟ ܕܲܠܐܵܕܵܡ܀
126:200 ܠܒܝܼܫ ܗ̄ܘܵܐ ܙܲܝܢܵܐ ܗܲܘ ܕܲܐܩܠܝܼ ܒܸܗ ܥܲܠ ܐ̄ܢܵܫܽܘܬܵܐ܃
126:201 ܕܲܒܬܲܟܬܽܘܫܵܐ ܕܸܐܬܢܲܨܲܚ ܒܸܗ ܢܸܬܟܲܐܲܪ ܗ̄ܘܵܐ܀
126:202 ܡܲܬܚܵܗ݀ ܠܩܸܫܬܸܗ ܗܵܝ ܕܲܢܨܲܚ ܒܵܗ݀ ܥܲܠ ܟܽܠ ܕܵܪ̈ܝܼܢ܃
126:203 ܕܲܒܗܲܘ ܓܸܐܪܵܐ ܕܲܡܚܵܝܗ̄ܝ ܠܵܐܕܵܡ ܢܸܒܠܲܥ ܝܸܫܽܘܥ܀

▼ later lines