The Comprehensive Aramaic Lexicon

126:103	ܢܸܗܘܸܐ ܫܸܠܝܵܐ ܒܲܐܪܒܲܥ ܦܸܢ̈ܝܵܢ ܥܲܕ ܙܵܟܸܝܢܲܢ܃
126:104	ܠܵܐ ܬܸܦܟܲܗ݀ ܠܵܗ݀ ܒܓܲܒܵܐ ܐ̄ܚܪܼܢܵܐ ܐܽܘܡܵܢܽܘܬܲܢ܀
126:105	ܐܸܢܗܽܘ ܕܡܲܡܠܸܟ ܫܲܝܢܵܐ ܩܲܠܝܼܠ ܠܵܐ ܬܸܬܟܲܡܪܽܘܢ܃
126:106	ܐܝܼܬ ܗ̄ܽܘ ܠܲܢ ܓܹܝܪ ܙܲܒܢܵܐ ܕܢܸܕܠܽܘܚ ܐܲܝܟ ܨܸܒܝܵܢܲܢ܀
126:107	ܐܸܢܗܽܘ ܕܢܵܝܚܵܐ ܒܪܝܼܬܵܐ ܡܸܢܲܢ ܠܲܘ ܒܸܛܠܵܢܵܐ ܗ̄ܘ܃
126:108	ܩܪܵܒܵܐ ܗ̄ܘ ܗܵܢܵܐ ܕܟܽܠܵܗ݀ ܒܪܝܼܬܵܐ ܡܸܙܕܲܟܝܵܐ ܒܸܗ܀
126:109	ܕܲܠܡܵܐ ܬܸܪܢܽܘܢ ܥܲܠ ܕܲܫܠܲܝܢܲܢ ܫܲܝܢܵܐ ܢܸܣܓܸܐ܃
126:110	ܗܽܘ ܓܹܝܪ ܫܸܠܝܲܢ ܒܸܟܝܵܐ ܡܩܲܛܲܪ ܐܸܢ ܙܵܟܸܝܢܲܢ܀
126:111	ܠܵܐ ܬܸܬܐܲܒܠܽܘܢ ܐܸܠܵܐ ܡܚܲܒ̈ܠܵܢ ܝܲܠܵܕ̈ܵܬܵܐ܃
126:112	ܗܵܘܸܐ ܗ̄ܘ ܙܲܒܢܵܐ ܕܵܐܦ ܠܲܥܠܲܝ̈ܡܸܐ ܒܚܲܪܒܵܐ ܢܩܲܛܸܠ܀
126:113	ܠܵܐ ܬܸܬܲܗܽܘܢ ܐܲܘ ܬܸܬܒܲܛܠܽܘܢ ܡܸܢ ܣܽܘܪܚܵܢܵܐ܃
126:114	ܕܵܐܦ ܗܽܘ ܟܢܽܘܫܝܲܢ ܡܸܛܽܠ ܗܵܕܸܐ ܗ̄ܘ ܕܢܲܣܓܸܐ ܬܽܘ̈ܟܸܐ܀
126:115	ܘܠܵܐ ܐܸܢ ܒܵܛܸܠ ܓܲܘܪܵܗ݀ ܕܲܐܪܥܵܐ ܒܩܸܢܛܵܐ ܬܸܗܘܽܘܢ܃
126:116	ܕܡܵܐ ܕܲܙܟܲܝܢܲܢ ܥܵܛܸܝܢܲܢ ܠܵܗ݀ ܠܩܲܕܝܼܫܽܘܬܵܐ܀
126:117	ܘܠܵܐ ܐܸܢ ܕܼܐܝܬ ܗ̄ܽܘ ܫܲܝܢܵܐ ܒܲܐܬܪܵܐ ܬܲܟܪܽܘܢ ܬܲܡܵܢ܃
126:118	ܕܒܵܬܲܪ ܕܲܪܲܢ ܚܵܪܒܝܼܢ ܟܲܪ̈ܟܸܐ ܡܸܢ ܝܵܪ̈ܽܘܬܸܐ܀
126:119	ܠܵܐ ܬܸܬܲܗܽܘܢ ܨܹܝܕ ܩܵܨܽܘ̈ܡܸܐ ܕܲܠܐ̄ܢܵܫ ܬܲܛܥܽܘܢ܃
126:120	ܘܠܵܐ ܡܸܢ ܩܸܛܪܸ̈ܐ ܬܡܲܠܠܽܘܢ ܩܸܨܡܸ̈ܐ ܒܗܵܠܸܝܢ ܝܲܘ̈ܡܸܐ܀
126:121	ܠܵܐ ܬܸܬܐܲܣܪܽܘܢ ܨܹܝܕ ܡܲܘ̈ܡܵܬܵܐ ܠܘܵܬ ܐܵܫܽܘ̈ܦܸܐ܃
126:122	ܘܲܒܠܽܘ̈ܚܫܵܬܵܐ ܠܵܐ ܬܸܬܢܲܓܕܽܘܢ ܨܹܝܕ ܚܲܪ̈ܵܫܸܐ܀
126:123	ܠܵܐ ܒܽܘܗܵܠܵܐ ܂ ܂ ܂ ܐܸܠܵܐ ܙܟܲܝܬܽܘܢ܀
126:124	ܐܵܦ ܠܵܐ ܬܸܣܩܽܘܢ ܥܲܡ ܙܲܟܘܪܸ̈ܐ ܕܠܵܐ ܐܲܡܠܸܟܬܽܘܢ܃
126:125	ܠܵܐ ܬܸܫܬܲܕܽܘܢ ܨܹܝܕ ܕܸܡ̈ܘܵܬܵܐ ܕܡܝܼ̈ܬܸܐ ܕܲܫܟܸܒܘ܀
126:126	ܠܵܐ ܬܚܲܘܽܘܢ ܠܸܗ ܛܸܠܵܢ̈ܝܵܬܵܐ ܠܲܐܝܢܵܐ ܕܨܵܒܸܐ܃
126:127	ܠܵܐ ܬܽܘܒ ܬܢܲܨܪܽܘܢ ܐܵܦܠܵܐ ܬܢܲܗܡܽܘܢ ܕܲܓܵܠܵܐܝܼܬ܀
126:128	ܕܲܒܓܲܠܝ̈ܵܬܵܐ ܡܸܫܬܲܠܛܝܼܢ ܚ̄ܢܲܢ ܐܸܢ ܗܽܘ ܕܢܸܙܟܸܐ܃
126:129	ܠܵܐ ܬܸܣܬܲܢܩܽܘܢ ܥܲܠ ܛܸܠ̈ܵܠܸܐ ܕܕܸܡ̈ܘܵܢ ܕܸܡ̈ܘܵܢ܀
126:130	ܕܲܐܦܝܼ̈ܢ ܒܲܐܦܝܼ̈ܢ ܓܲܒܲܢ ‍{‍ܡܡܲܠܸܝܢ‍}‍‍<‍ܡܡܲܠܠܝܼܢ‍>‍ ܡܵܐ ܕܲܙܟܲܝܢܲܢ܃
126:131	ܗܵܪܟܵܐ ܗ̄ܘ ܕܲܪܵܐ ܕܟܽܠܵܗ݀ ܐܲܪܥܵܐ ܠܸܗ ܐܸܬܟܲܫܲܪܘ܀
126:132	ܚܕܵܐ ܠܬܲܪܬܸܝܢ ܗ̄ܝܼ ܕܲܐܘ ܐܲܡܠܸܟܢܲܢ ܐܲܘ ܐܲܚܦܲܪܢܲܢ܃
126:133	ܐܸܢ ܗܽܘ ܕܢܸܙܟܸܝܢ ܠܲܘ ܡܸܕܸܡ ܗ̄ܽܘ ܕܲܙܟܝܼܬ ܠܵܐܕܵܡ܀
126:134	ܘܸܐܢܗܽܘ ܕܸܐܙܟܸܝܘܗ̄ܝ ܟܸܢ ܐܸܫܬܲܒܗܲܪ ܥܲܠ ܙܵܟܽܘܬܵܐ܃
126:135	ܠܕܲܪܵܐ ܐ̄ܚܪܼܢܵܐ ܢܛܝܼܪ ܠܸܗ ܟܠܝܼܠܵܐ ܠܟܽܠ ܐܲܬܠܝܼܛܵܐ܀
126:136	ܒܗܵܢܵܐ ܗ̄ܘ ܫܵܩܸܠ ܐܲܝܢܵܐ ܕܙܵܟܸܐ ܘܡܸܬܟܲܠܲܠ ܒܸܗ܃
126:137	ܗܵܐ ܚܠܵܦ ܥܵܠܡܵܐ ܗܲܘ ܕܲܙܟܝܼܬܸܗ ܐܸܬܵܐ ܕܢܲܩܪܸܒ܀
126:138	ܘܪܸܓܠܵܐ ܕܬܸܥܫܲܬ̤ ܡܸܢ ܬܲܟܬܽܘܫܵܐ ܨܵܒܸܐ ܕܲܢܩܝܼܡ܃
126:139	ܥܝܵܪܬܸܗ ܕܵܐܕܵܡ ܒܵܥܸܐ ܕܢܸܬܒܲܥ ܕܲܩܛܲܠܬܸܗ ܗ̄ܘܝܼܬ܀
126:140	ܘܸܐܢ ܙܵܟܸܐ ܠܝܼ ܒܥܵܐܦܵܐ ܦܵܪܲܥ ܟܽܠ ܕܲܐܣܒܸܠܬܸܗ܃
126:141	ܚܠܵܦ ܐܲܬܠܝܼܛܵܐ ܕܦܲܫܚܸܬ ܘܲܫܕܝܼܬ ܗܵܐ ܡܸܬܟܲܬܲܫ܀
126:142	ܕܲܪܵܐ ܡܚܲܕܸܬ ܕܲܠܚܲܝܵܒܵܐ ܟܠܝܼܠܵܐ ܢܸܬܸܠ܃
126:143	ܕܢܲܗܦܸܟ ܙܵܟܽܘܬܝ ܐܲܥܝܼܪ ܗܸܪܬܵܐ ܠܡܸܬܟܲܬܵܫܽܘ܀
126:144	ܘܲܕܢܲܗܸܠ ܒܝܼ ܒܓܲܘ ܬܲܟܬܽܘܫܵܐ ܡܸܬܓܲܪܸܐ ܥܲܡܝ܃
126:145	ܠܲܘܐܽܘܢܝ ܣܸܕܪ̈ܲܝ ܕܲܟܢܝܼܫܵܐܝܼܬ ܢܸܐܪܽܘܥ ܕܲܪܸܗ܀
126:146	ܬܲܘ ܢܸܗܘܸܐ ܚܲܕ ܕܲܫܟܝܼܚܝܼܢ ܒܸܗ ܪܸܒܽܘ ܚܲܝ̈ܠܝܼܢ܃
126:147	ܘܒܲܨܡܝܼܕܽܘܬܵܐ ܢܸܗܘܸܐ ܒܕܲܪܵܐ ܓܲܢ̄ܒܵܪܵܐܝܼܬ܀
126:148	ܩܪܸܒ ܛܲܪܟܵܢܵܐ ܐܲܪܡܝܼ ܐܝܼܕܸܗ ܥܲܠ ܐܲܬܠܝܼܛܵܐ܃
126:149	ܢܲܣܝܼ ܚܲܝܠܸܗ ܒܣܲܒܪܵܐ ܣܦܝܼܩܵܐ ܕܥܲܠ ܙܵܟܽܘܬܵܐ܀
126:150	ܐܲܘܫܸܛ ܓܲܫܸܗ ܘܸܐܚܲܕ ܠܲܒܟܸܗ ܘܲܕܚܸܠ ܫܲܒܩܸܗ܃
126:151	ܦܢܵܐ ܕܠܵܐ ܢܲܩܪܸܒ ܘܲܗܦܲܟ ܓܵܙܸܡ ܥܲܠ ܬܲܟܬܽܘܫܵܐ܀
126:152	ܩܵܡ ܢܵܛܲܪ ܠܸܗ ܕܢܸܗܘܸܐ ܦܸܠܥܵܐ ܠܲܢܟܝܼܠܽܘܬܸܗ܃
126:153	ܕܒܲܐܬܪܵܐ ܕܡܸܫܟܲܚ ܢܲܩܪܸܒ ܥܲܡܸܗ ܒܽܐܘܡܵܢܽܘܬܸܗ܀