The Comprehensive Aramaic Lexicon

126:335	ܕܲܗܘܵܬ̤ ܚܲܪܲܬܝ ܕܸܐܬܢܸܐ ܢܒܝܼܸ̈ܐ ܘܦܽܘ̈ܫܵܩܲܝܗܽܘܢ܀
126:336	ܠܥܵܩܲܬܝ ܝܸܬܒܸܬ ܥܲܠ ܡܲܙܡܽܘܪܵܐ ܕܸܐܫܬܲܒܗܲܪ ܒܸܗ܃
126:337	ܘܟܲܕ ܝܼܠܸܦܬܸܗ ܕܪܲܫ ܠܸܗ ܥܲܡܝ ܕܝܼܠܝ ܡܸܢ ܕܲܬܢܝܼܬܸܗ܀
126:338	ܦܣܲܩ ܗ̄ܘܵܐ ܒܝܼܫܵܐ ܕܬܽܘܒ ܒܲܟܬܵܒܸ̈ܐ ܠܵܐ ܢܸܬܚܲܫܲܚ܃
126:339	ܥܕܲܡܵܐ ܠܗܵܪܟܵܐ ܣܵܦ̈ܩܵܢ ܕܲܬܢܝܼܬ ܟܲܕ ܠܵܐ ܝܸܬܪܸܬ܀
126:340	ܘܟܲܕ ܚܵܒ ܗ̄ܘܵܐ ܠܸܗ ܒܕܲܪܵܐ ܕܲܬܪܸܝܢ ܐܸܬܛܲܝܲܒ ܬܽܘܒ܃
126:341	ܕܲܒܫܽܘܘܕܵܝܵܐ ܕܕܲܓܵܠܽܘܬܵܐ ܢܲܛܥܸܝܘܗ̄ܝ ܠܲܒܪܵܐ܀
126:342	ܕܒܲܪ ܚܸܫܽܘܟܵܐ ܠܫܸܡܫܵܐ ܦܲܐܝܵܐ ܕܟܽܠ ܙܲܠܝܼ̈ܩܝܼܢ܃
126:343	ܕܲܡܟܲܣܲܝ ܗ̄ܘܵܐ ܥܢܵܢܵܐ ܕܦܲܓܪܵܐ ܘܠܵܐ ܐܸܬܢܲܒܪܲܫ܀
126:344	ܣܠܸܩ ܗ̄ܘܵܐ ܥܲܡܸܗ ܠܛܽܘܪܵܐ ܪܵܡܵܐ ܘܲܡܛܲܘ ܪܝܼܫܸܗ܃
126:345	ܕܡܸܢ ܪܝܼܫ ܪܲܘܡܵܐ ܢܸܦܸܠ ܒܝܼܫܵܐ ܡܵܐ ܕܸܐܬܚܲܝܲܒ܀
126:346	ܡܝܲܒܸܠ ܫܲܦܠܵܐ ܠܗܲܘ ܓܲܢ̄ܒܵܪܵܐ ܥܲܠ ܟܽܠ ܕܲܪ̈ܝܼܢ܃
126:347	ܘܠܵܐ ܐܸܬܚܲܡܲܬ ܟܲܕ ܡܸܬܝܲܒܲܠ ܥܲܠ ܬܲܟܬܽܘܫܵܐ܀
126:348	ܠܵܐ ܐܸܬܩܲܫܝܼ ܥܲܡ ܣܵܛܵܢܵܐ ܒܓܲܘ ܐܲܓܽܘܢܵܐ܃
126:349	ܕܢܸܬܸܠ ܙܸܕܩܵܐ ܠܲܐܡܝܼܢܽܘܬܵܐ ܕܗܝܼ ܬܸܬܢܲܨܲܚ܀
126:350	ܠܵܐ ܓܥܲܪ ܗ̄ܘܵܐ ܒܸܗ ܒܒܝܼܫܵܐ ܘܛܲܠܸܩ ܐܲܝܟ ܕܲܡܨܸܐ ܗ̄ܘܵܐ܃
126:351	ܐܲܓܲܪ ܪܽܘܚܸܗ ܘܲܙܟܵܐ ܒܕܲܪܸܗ ܘܲܣܥܲܪ ܐܽܘܪܚܸܗ܀
126:352	ܠܲܘ ܕܹܝܢ ܠܲܓܡܵܪ ܫܲܒܩܸܗ ܒܝܼܫܵܐ ܠܡܸܫܬܲܥܠܵܝܽܘ܃
126:353	ܕܒܵܬܲܪ ܙܲܒܢܵܐ ܒܫܸܚܪܵܐ ܦܲܟܪܸܗ ܒܝܲܡܵܐ ܚܲܒܫܸܗ܀
126:354	ܗܵܝܕܸܝܢ ܫܲܦܠܵܐ ܟܲܕ ܐܸܬܚܲܝܲܒ ܒܲܬܪܸܝܢ ܕܲܪ̈ܝܼܢ܃
126:355	ܫܲܪܝܼ ܡܫܲܓܸܫ ܕܲܒܫܽܘܘܕܵܝܵܐ ܟܠܝܼܠܵܐ ܢܸܓܕܽܘܠ܀
126:356	ܫܸܪܥܲܬ̤ ܪܸܓܠܸܗ ܡܸܢ ܬܲܟܬܽܘܫܵܐ ܕܩܵܐܸܡ ܗ̄ܘܵܐ ܒܸܗ܃
126:357	ܘܩܲܪܸܒ ܫܽܘܚܕܵܐ ܕܲܕܙܵܟܽܘܬܵܐ ܕܡܲܝ̈ܵܐ ܢܸܣܲܒ܀
126:358	ܚܲܘܝܼ ܛܽܘܦܣܵܐ ܕܲܐܬܪ̈ܲܘܵܬܵܐ ܒܟܲܗܝܼܢܽܘܬܵܐ܃
126:359	ܟܲܪ̈ܟܸܐ ܪ̈ܵܡܸܐ ܘܲܡܕܝܼ̈ܢܵܬܵܐ ܘܥܲܡ̈ܡܸܐ ܕܲܒܗܸܝܢ܀

126:360	ܨܵܪ ܦܲܪ̈ܕܲܝܣܸܐ ܕܟܽܠ ܐܝܼ̈ܠܵܢܝܼܢ ܒܩܲܪܝܼܒܽܘܬܵܐ܃

126:361	ܩܽܘܪ̈ܝܵܐ ܘܓܲܢܸ̈ܐ ܕܪ̈ܵܘܙܵܢ ܡܲܠܝ̈ܵܢ ܟܽܠܗܽܘܢ ܛܽܘ̈ܒܸܐ܀
126:362	ܪܫܲܡ ܐܲܪ̈ܥܵܬܵܐ ܘܢܲܗܪ̈ܲܘܵܬܵܐ ܘܵܐܦ ܥܲܝ̈ܢܵܬܵܐ܃
126:363	ܘܛܽܘܪܸ̈ܐ ܓܕܝܼ̈ܠܸܐ ܘܢܲܚ̈ܠܸܐ ܣܒܝܼ̈ܣܸܐ ܕܟܽܠ ܗܲܒܵܒ̈ܝܼܢ܀
126:364	ܢܓܲܕ ܗ̄ܘܵܐ ܘܲܐܝܬܝܼ ܫܪܲܓܪ̈ܵܓܝܵܬܵܐ ܕܲܓ̈ܵܠܵܬܵܐ܃
126:365	ܟܲܕ ܡܸܬܝܲܒܲܠ ܥܲܠ ܫܽܘ̈ܚܠܵܦܸܐ ܕܕܸܡ̈ܘܵܢ ܕܸܡ̈ܘܵܢ܀
126:366	ܚܒܲܨ ܠܲܚܕܵܕܸ̈ܐ ܛܸܠܵܢ̈ܝܵܬܵܐ ܒܟܽܠ ܐܸܣܟܼܡ̈ܝܼܢ܃
126:367	ܥܲܡ ܛܸܠ̈ܵܠܸܐ ܕܟܽܠ ܚܲܝ̈ܠܲܘܵܢ ܟܲܗܝܼܢܵܐܝܼܬ܀
126:368	ܙܪܲܩ ܥܲܠ ܬܼܒܸܝܠ ܒܠܸܨܽܘ̈ܨܝܵܬܸܗ ܟܲܕܵܒ̈ܵܬܵܐ܃
126:369	ܕܲܒܫܽܘ̈ܚܠܵܦܸܐ ܕܟܽܠ ܐܸܣܟܼܡ̈ܝܼܢ ܡܸܬܚܲܙ̈ܝܵܢ ܗ̄ܘ̈ܲܝ܀
126:370	ܟܲܢܸܫ ܘܲܐܝܬܝܼ ܦܪܲܚܪ̈ܽܘܚܝܵܬܵܐ ܣܝܼ̈ܥܵܢ ܣܝܼ̈ܥܵܢ܃
126:371	ܛܲܟ̈ܣܸܐ ܫܓܝܼ̈ܫܸܐ ܘܓܽܘ̈ܕܲܝ ܫܽܘܩܪܵܐ ܕܢܲܩܝܼ̈ܦܵܢ ܠܸܗ܀
126:372	ܕܵܡ̈ܝܲܝ ܡܲܠܟܸ̈ܐ ܘܣܸܕܪܸ̈ܐ ܡܬܝܼ̈ܚܸܐ ܘܪ̈ܲܒܲܝ ܚܲܝ̈ܠܸܐ܃
126:373	ܓܽܘܕܵܐ ܕܠܵܐ ܣܵܟ ܘܲܟܢܽܘܫܬܵܐ ܒܠܸܫܵܢܲܝ̈ܗܸܝܢ܀
126:374	ܡܲܠܟ̈ܘܵܬܵܐ ܠܲܡ ܕܥܵܠܡܵܐ ܘܫܽܘܒܚܗܸܝܢ ܚܲܘܝܼ ܠܝܸܫܽܘܥ܃
126:375	ܐܸܬܝܲܕܥܲܬ̤ ܠܵܗ݀ ܕܟܽܠ ܐܽܘ̈ܚܕܵܢܝܼܢ ܨܵܪ ܚܲܘܝܼ ܠܸܗ܀
126:376	ܗܵܠܸܝܢ ܟܽܠܗܸܝܢ ܠܵܟ ܠܲܡ ܐܸܬܸܠ ܐܸܢ ܬܸܣܓܽܘܕ ܠܝܼ܃
126:377	ܕܝܼܠܝ ܐܸܢܸܝܢ ܓܹܝܪ ܐܵܦ ܫܲܠܝܼܛ ܐ̄ܢܵܐ ܒܽܐܘ̈ܚܕܵܢܲܝܗܸܝܢ܀
126:378	ܐܵܘ ܣܵܛܵܢܵܐ ܡܲܢܽܘ ܥܲܒܕܵܟ ܐܲܒܵܐ ܕܡܲܠܟܸ̈ܐ܃
126:379	ܘܡܲܢ ܐܲܩܝܼܡܵܟ ܥܲܠ ܐܲܪ̈ܥܵܬܵܐ ܘܽܐܘ̈ܚܕܵܢܲܝܗܸܝܢ܀
126:380	ܫܡܲܥ ܦܵܪܽܘܩܲܢ ܟܲܕ ܡܵܪܽܘܕܵܐ ܡܸܫܬܲܒܗܲܪ ܗ̄ܘܵܐ܃
126:381	ܥܲܠ ܐܲܪ̈ܥܵܬܵܐ ܕܕܝܼܠܸܗ ܐܸܢܸܝܢ ܘܫܽܘ̈ܠܛܵܢܲܝܗܸܝܢ܀
126:382	ܟܸܪܝܲܬ̤ ܗ̄ܘܵܬ̤ ܠܸܗ ܥܲܠ ܫܽܘܥܒܵܕܵܐ ܕܲܒܢܲܝܢܵܫܵܐ܃
126:383	ܕܲܒܡܲܕܲܐܬܵܐ ܟܕܝܼܢܝܼܢ ܗ̄ܘܲܘ ܠܸܗ ܒܨܲܠܡܸ̈ܐ ܡܝܼ̈ܬܸܐ܀
126:384	ܗܦܲܟ ܐܲܬܠܝܼܛܵܐ ܢܲܦܫܸܗ ܒܕܲܪܵܐ ܥܲܠ ܚܲܣܝܼܢܵܐ܃
126:385	ܘܲܐܪܡܝܼ ܬܲܒܪܸܗ ܘܲܫܕܵܐ ܣܲܚܦܸܗ ܕܠܵܐ ܚܲܘܣܵܢܵܐ܀