The Comprehensive Aramaic Lexicon

01:1	ܡܪܐ ܕܐܬܐ ܠܐܢܫܘܬܐ
01:2	ܕܢܚܪܪܢ ܡܢ ܥܒܕܘܬܐ
01:3	ܘܐܦ ܡܛܠ ܗܕܐ ܐܬܓܠܝ
01:4	ܕܢܗܘܐ ܠܐܢܫܐ ܡܚܪܪܢܐ܀
02:1	ܪ̈ܚܡܘܗܝ ܐܝܬܝܘܗܝ ܨܐܕܝܗܘܢ
02:2	ܡܛܠ ܕܚܣ ܥܠ ܚܝܝ̈ܗܘܢ
02:3	ܘܐܦ ܡܪܝܪܘܬܗܘܢ ܚܠܝ
02:4	ܒܛܥܡܐ ܕܚܘܒܗ ܡܚܠܝܢܐ܀
03:1	ܝܗܒ ܠܣܡ̈ܝܐ ܒܒ̈ܬܐ
03:2	ܘܠܡܫܪ̈ܝܐ ܗܠܟ̈ܬܐ
03:3	ܘܠܐܝܢܐ ܕܥܘܠܐ ܐܬܡܠܝ
03:4	ܒܚܘܒܗ ܗܘܐ ܠܗ ܡܙܕܩܢܐ܀
04:1	ܡܢ ܕܐܬܐ ܠܢܐܝܢ ܡܕܝܢܬܐ
04:2	ܫܡܥܬ ܛܒܗ ܚܛܝܬܐ
04:3	ܘܐܦ ܚܘܒܗ݀ ܒܚܘܒܗ ܐܬܓܠܝ
04:4	ܕܬܒܥܐ ܡܢܗ ܫܘܒܩܢܐ܀
05:0	ܒܝܫܐ
05:1	ܐܪܓܫ ܒܝܫܐ ܒܚܛܝܬܐ
05:2	ܕܒܥܝܐ ܕܗܘ݁ܝܐ ܬܝܒܬܐ
05:3	ܘܐܡܪ ܠܗ݀ ܛܠܝܬܐ ܓܠܝ ܠܝ
05:4	ܡܐ ܠܟܝ ܕܒܟܝܬܝ ܝܘܡܢܐ݁
06:0	ܚܛܝܬܐ
06:1	ܒ݁ܟܝܐ ܐܢܐ ܘܡܪܝܪܐ ܠܝ
06:2	ܕܡܢ ܙܒܢܐ ܕܚܒܪܐ ܗܘܝܬ ܠܝ
06:3	ܒܥܠܕܒܒܐ ܘܣܢܐܐ ܗܘܝܬ ܠܝ
06:4	ܘܠܡܚܙܝܟ ܠܐ ܨܒ݁ܝܐ ܐܢܐ܀
07:0	ܒܝܫܐ
07:1	ܓܙܝ̈ܟܝ ܕܗܒܐ ܡܠܝܬ ܐܢܘܢ
07:2	ܓܠܘܣܩ̈ܡܝܟܝ ܣܐܡܐ ܟܫܝܬ ܐܢܘܢ
07:3	ܘܠܡܢܐ ܗܐ ܡܨܥܪܬܝ ܠܝ
07:4	ܘܩܪܝܬܝ ܠܝ ܡܛܥܝܢܐ܀
08:0	ܚܛܝܬܐ
08:1	ܕܗܒܟ ܥܡܟ ܠܐܒܕܢܐ
08:2	ܘܣܐܡܟ ܥܡܟ ܠܝܩܕܢܐ
08:3	ܠܐ ܒܥܝܐ ܐܢܐ ܕܬܬܠ ܠܝ
08:4	ܘܠܘ ܕܐܢܐ ܠܟ ܝܗ݀ܒܐ ܐܢܐ܀
09:0	ܒܝܫܐ
09:1	ܗܕܐ ܟܠܗ݀ ܣܢܐܬܐ
09:2	ܘܒܥܠܕܒܒܘܬ ܪܒܬܐ
09:3	ܠܡܢܐ ܣ݁ܢܝܬܝ ܘܣܩܪܬܝ ܠܝ
09:4	ܟܕ ܐܢܐ ܠܟܝ ܪܚ݁ܡ ܐܢܐ܀
10:0	ܚܛܝܬܐ
10:1	ܘ݁ܠܐ ܕܬܕܥ ܕܣܢܐܬܟ
10:2	ܛܒܐ ܗܝ ܠܝ ܡܢ ܪܚܡܬܟ
10:3	ܕܐܢ ܐܣܢܝܟ ܡܪܝ ܪܚ݁ܡ ܠܝ
10:4	ܘܐܢ ܐܪܚܡܟ ܡܣܬܢܝܐ ܐܢܐ܀
11:0	ܒܝܫܐ
11:1	ܙܚܘܪ̈ܝܬܐ ܕܥܠ ܟ̈ܠܠܬܐ
11:2	ܘܐܪ̈ܓܘܢܐ ܕܥܠ ܡܠܟ̈ܬܐ
11:3	ܬܚܝܬ ܪ̈ܓܠܝܟܝ ܗܐ ܦܪܝܣܝܢ ܠܝ
11:4	ܘܐܢܬܝ ܡܨܥܪܬܝ ܠܝ ܗܟܢܐ܀
12:0	ܚܛܝܬܐ
12:1	ܚܠܐ ܘܩܛܡܐ ܛܒܝܢ ܠܝ
12:2	ܦܪܝܣܐ ܘܣܩܐ ܪܓܝܓܝܢ ܠܝ
12:3	ܠܒ̈ܘܫܝܟ ܘܐܪ̈ܓܘܢܝܟ ܣܢܝܢ ܠܝ
12:4	ܕܡܠܢ ܟܠܗܘܢ ܚܘܣܪ̈ܢܐ܀
13:0	ܒܝܫܐ
13:1	ܛܘܒ̈ܐ ܕܟܠܗ݀ ܣܘܪܝܐ
13:2	ܘܚܡܪܐ ܕܩܘܦܪܘܣ ܪܫܝܐ
13:3	ܛܝܒܬ ܠܟܝ ܘܐܢܬܝ ܣܢܝܬܝ ܠܝ
13:4	ܒܠܫܢܟܝ ܢܟܘܠܬܢܐ܀
14:0	ܚܛܝܬܐ
14:1	ܝܝ ܡܢ ܛܘܒ̈ܝܟ ܟܡܐ ܒܝܫܝܢ
14:2	ܘܡܢ ܚܡܪ̈ܢܝܟ ܟܡܐ ܫܓܝܫܝܢ
14:3	ܛܘܒ̈ܝܟ ܘܝܐ ܚܫܝܒܝܢ ܠܝ
14:4	ܘܚܡܪܟ ܡܥܝܢܐ ܕܣܝܢܐ܀
15:0	ܒܝܫܐ
15:1	ܟܠܝ̈ܠܝܟܝ ܒܪܗܘܡܐ ܓܕܝܠܝܢ ܠܝ
15:2	ܠܒܘܫ̈ܝܟܝ ܒܡܨܪܝܢ ܙܩܝܪܝܢ ܠܝ
15:3	ܫܐܪ̈ܝܟܝ ܒܒܒܠ ܚܫܝܠܝܢ ܠܝ
15:4	ܘܦܪܥܬܝ ܠܝ ܗܢ ܦܘܪܥܢܐ܀
16:0	ܚܛܝܬܐ
16:1	ܠܐ ܝܗܒܬ ܠܝ ܐܠܐ ܚܣܕܐ
16:2	ܘܡܝܩܘ ܒܝ ܡܪܐ ܘܥܒܕܐ
16:3	ܟܠܝ̈ܠܝܟ ܘܚܫ̈ܠܬܟ ܣܢܝܢ ܠܝ
16:4	ܫܩܘܠ ܐܢܘܢ ܘܙܠ ܠܐܒܕܢܐ܀
17:0	ܒܝܫܐ
17:1	ܡ̈ܠܟܐ ܐܝܬܝܬ ܠܐܝܩܪܟܝ
17:2	ܒ̈ܢܝ ܡ̈ܠܟܐ ܠܛܒܐ ܕܫܘܦܪܟܝ
17:3	ܥܒܕܘܬܐ ܕܠܟܝ ܦܠܝܚܐ ܠܝ

17:4	ܠܐ ܦܠܝܚܐ ܠܐܢܫ ܡܢ ܙܒܢܐ܀

18:0	ܚܛܝܬܐ
18:1	ܢܗܘܐ ܦܘܠܚܢܟ ܕܝܠܟ
18:2	ܘܢܬܝܗܒ ܠܟܝ ܦܘܪܥܢܟ
18:3	ܥܒܕܘܬܟ ܠܐ ܚܫܚܐ ܠܝ
18:4	ܕܐܡܬܐ ܠܝܫܘܥ ܗܘܝܐ ܐܢܐ܀
19:0	ܒܝܫܐ
19:1	ܣܩܝܠܬܐ ܟܚܝܠܬܐ ܘܪܚܝܡܬܐ
19:2	ܫܒܝܚܬܐ ܡܪܝܩܬܐ ܘܢܗܝܪܬܐ
19:3	ܒܝܬ ܣܓܝ̈ܐܐ ܥܒܝܕܬܝ ܠܝ
19:4	ܘܐܢܬܝ ܠܝ݁ܛܬܝ ܠܝ ܗܟܢܐ܀
20:0	ܚܛܝܬܐ
20:1	ܥܝ̈ܢܝ ܠܐ ܚܙ̈ܝ ܐܟܘܬܟ
20:2	ܟܡܐ ܩܫܝܐ ܚܨܝܦܘܬܟ
20:3	ܟܡܐ ܡ̈ܠܐ ܡܫܡܥ ܐܢܬ ܠܝ
20:4	ܠܐ ܐܝܬ ܠܝ ܒܟ ܨܒܝܢܐ܀
21:0	ܒܝܫܐ
21:1	ܦܢܝ ܡܢ ܒܬܪܗ݀ ܕܗܢ ܓܒܪܐ
21:2	ܓܒܪܐ ܗܘ ܕܠܐ ܒܛܝܢ ܡܢ ܓܒܪܐ
21:3	ܐܢ ܚ݁ܙܐ ܠܟܝ ܟܪܝܐ ܠܝ
21:4	ܕܡܘܒܕ ܠܟܝ ܒܪܦܦ ܥܝܢܐ܀
22:0	ܚܛܝܬܐ
22:1	ܨܐܕܘܗܝ ܕܗܢܐ ܪܗ݀ܛܐ ܐܢܐ
22:2	ܘܡܢ ܒܬܪܗ ܠܐ ܦܢܝܐ ܐܢܐ
22:3	ܘܐܢܗܘ ܕܡܩܛܠ ܩ݁ܛܠ ܠܝ
22:4	ܣܛܪ ܡܢܗ ܠܐ ܒܥܝܐ ܐܢܐ܀
23:0	ܒܝܫܐ
23:1	ܩܕܝܫ ܡܢ ܟܠ ܥܒ̈ܝܕܐ
23:2	ܘܐܝܬ ܠܗ ܬܪܥܣܪ ܬܠܡ̈ܝܕܐ
23:3	ܩ݁ܛܠܝܢ ܠܟܝ ܘܐܢ ܩ݁ܪܝܬܝ ܠܝ
23:4	ܕܐܬܐ ܠܘܬܟܝ ܠܐ ܡܨܐ ܐܢܐ܀
24:0	ܚܛܝܬܐ
24:1	ܪܚܡܘܬܟ ܠܐ ܒܥܝܐ ܐܢܐ
24:2	ܒܥܠܕܒܒܐ ܐܢܬ ܠܝ ܝܕܥܢܐ
24:3	ܝܫܘܥ ܠܝ ܘܗܘ ܗܘ݁ܐ ܠܝ
24:4	ܗܘ݁ܐ ܠܝ ܘܠܗ ܗ݀ܘܝܐ ܐܢܐ܀
25:0	ܒܝܫܐ
25:1	ܫܘܒܚܐ ܠܗ ܕܟܡܐ ܫܦܝܪ
25:2	ܘܡܢ ܟܠ ܢܘܗܪ̈ܝܢ ܗܘ ܢܗܝܪ
25:3	ܕܐܦܢܝܢܝ ܕܚܛܝܬ ܘܩܪܐ ܠܝ
25:4	ܡܢ ܡܦܘܠܬܐ ܕܣܛܢܐ܀
26:0	ܚܛܝܬܐ
26:1	ܬܘܕܝܬܐ ܠܫܡܗ ܪܒܐ
26:2	ܕܟܡܐ ܫܒܝܚ ܗܘ ܒܟܠ ܛܒܐ
26:3	ܕܣܘܚ ܠܘܩܒܠܝ ܘܐܡܪ ܠܝ
26:4	ܕܬܝ ܐܬܒܣܡܝ ܒܓܢܘܢܐ܀