The Comprehensive Aramaic Lexicon

152:14	ܒܪܗ ܕܐܠܗܐ ܡܗܝܡ݁ܢ܂ ܘܣ݁ܩܘܒܠܐ ܗ݂ܘ ܕܡܠܦܢܘܬܗ
152:15	ܕܦܘܠܘܣ܂ ܐܢ ܒܪܐ ܓܝܪ ܘܐܢ ܡܫܝܚܐ ܘܐܢ ܝܚܝܕܝܐ
152:16	ܐܡ݁ܪܝܢ ܟܬܒ̈ܐ ܩܕܝ̈ܫܐ ܕܡܝ݂ܬ݂܂ ܗ݂ܝ ܗ݀ܝ ܕܐܠܗܐ ܡܝ݂ܬ܂ ܗ݀ܝ
152:17	ܓܝܪ ܕܐܡ݂ܪ ܕܒܪܫܝܬ ܐܝܬܘܗܝ ܗܘܐ ܡܠܬܐ݂܂ ܝܕܝܥܐ ܗܝ
152:18	ܕܒ݂ܪܐ ܗܘ ܕܐܠܗܐ܂ ܡܛܠ ܕܠܐ ܐܚܪܢܐ ܗܘ ܒܪܐ
152:19	ܘܐܚܪܢܐ ܡܠܬܐ܂ ܘܥܠܘܗܝ ܕܗ݀ܢܐ ܒܪܐ ܐܡ݂ܪ ܫܠܝܚܐ݁܂
152:20	ܕܐ݂ܬܪܥܝ ܠܐܠܗܐ ܒܡܘܬܗ܀ ܗ݀ܘ ܓܝܪ ܕܟ݁ܘܙ ܡܢ ܫܡܥܐ
152:21	ܕܡܘܬܐ݂܂ ܠܐ ܡܗܝܡܢ ܕܒܪܗ ܕܐܠܗܐ ܐܠܗܐ ܗ݂ܘ܀
152:22	ܘܗ݀ܘ ܕܡ݁ܦܪܫ ܠܡܫܝܚܐ ܠܬܪ̈ܝܢ݂܂ ܠܐ ܣ݁ܓܕ ܠܬܠܝܬܝܘܬܐ܀
153:01	ܘܗ݀ܘ ܕܐܡ݁ܪ ܠܡܫܝܚܐ ܕܒܪܢܫܐ ܗ݂ܘ ܚ݁ܒܪܐ ܗ݂ܘ ܕܚ̈ܢܦܐ
153:02	ܘܕܝܗܘ̈ܕܝܐ܀ ܘܗ݀ܘ ܕܝܗ݀ܒ ܪ̈ܡܬܐ ܠܚܕ ܘܡܟ̈ܬܐ
153:03	ܠܐܚܪܢܐ݂܂ ܬܪ̈ܝܢ ܒܢܝܢ ܡܘܕܐ ܓܠܝܐܝܬ܂ ܘܦܘܪܩܢܐ
153:04	ܕܗܘ݂݂ܐ ܠܟܝܢܢ ܡܒ݁ܛܠ܀ ܘܗ݀ܘ ܕܐܡ݁ܪ ܕܩܢܘܡܐ ܕܒܪܢܫܐ݂
153:05	ܐܬܥܒ݂ܕ ܟܕ ܠܐ ܐܝܬܘܗܝ ܗ݂ܘܐ ܐܬܥܒܕ ܐܠܗܐ݂܂
153:06	ܦܬܟܪܐ ܚܫ݁ܠ ܘܓܠܝܦܐ ܡ݁ܪܟܒ ܘܐܠܗܐ ܚܕܬܐ ܒܪܐ܀
153:07	ܗ݀ܘ ܕܠܐ ܡܘ݁ܕܐ ܕܐܠܗܐ ܐܣܬ݁ܪܩ ܘܢܣ݂ܒ ܕܡܘܬܐ
153:08	ܕܥ݂ܒܕܐ ܐܝܟ ܕܡ݁ܠܦ ܦܘܠܘܣ݂܂ ܠܐ ܝܕܥ ܠܗ ܠܡܫܝܚܐ
153:09	ܕܦܚ݂ܡܐ ܗ݂ܘ ܕܐܠܗܐ܀ ܗ݀ܘ ܕܠܐ ܡܗܝܡܢ ܕܝܚܝܕܝܗ
153:10	ܕܐܠܗܐ ܐܬܝܗ݂ܒ ܚܠܦ ܦܘܪܩܢܗ ܕܥܠܡܐ ܒܚܘܒܗ
153:11	ܕܐܒܐ݂܂ ܠܐ ܪܓܝܫ ܒܚܘܒܗ ܕܐܠܗܐ ܕܠܘܬ ܥܠܡܐ܀
153:12	ܗ݀ܘ ܕܠܐ ܡܫ݁ܪ ܕܚܕ ܡܢ ܬܠܝܬܝܘܬܐ ܗ݂ܘ ܗ݀ܘ ܕܐܨܛܠܒ݂܂
153:13	ܠܐ ܢܣ݂ܒ ܚܐܪܘܬܐ ܘܚܕܘܬܐ ܕܡܢ ܡܥܡܘܕܝܬܐ܂ ܘܠܐ
153:14	ܥܕܟܝܠ ܐܬܦ݂ܪܩ ܡܢ ܓܙܪ ܕܝܢܗ ܕܡܘܬܐ ܘܠܘܛܬܐ
153:15	ܩܕܡܝܬܐ܀ ܗ݀ܘ ܕܒܗ݀ܬ ܕܢܟܪܙܝܘܗܝ ܠܡܫܝܚܐ ܐܠܗܐ݂܂
153:16	ܡܒ݁ܗܬ ܠܗ ܐܦ ܗ݂ܘ ܡܫܝܚܐ ܩܕܡ ܐܠܗܐ ܘܩܕܡ
153:17	ܡܠܐ̈ܟܘܗܝ ܩܕܝ̈ܫܐ܀ ܬܠܡܝܕܐ ܐ݁ܝܢܐ ܕܠܐ ܡܘܕܐ ܕܠܐ
153:18	ܚܫܘܫܐ ܚܫ݁ ܘܠܐ ܡ݁ܝܘܬܐ ܡܝܬ ܚܠܦܝܢ݂܂ ܚܢܦܐ ܗ݂ܘ
153:19	ܗ݀ܢܐ܂ ܘܠܐ ܬܠܡܝܕܐ ܗ݂ܘ܀ ܡ݁ܢ ܕܠܐ ܡܘ݁ܕܐ ܕܝܫܘܥ
153:20	ܡܪܝܐ ܗܘ݂܂ ܕܡܢ ܥܠܡ݂܂ ܒܗ݀ܢܐ ܪܘܚܗ ܕܡܫܝܚܐ ܠܝܬ
154:01	ܒܗ܀ ܡ݁ܢ ܕܐܡ݁ܪ ܕܡܢ ܐܚܪܝܢ ܐܬܥܒ݂ܕ ܝܫܘܥ ܡܪܝܐ
154:02	ܘܡܫܝܚܐ܂ ܐܝܟ ܕܠܐ ܐܝܬܘܗܝ ܘܚܕܬܐ݁ܝܬ ܗ݂ܘܐ݂܂
154:03	ܠܐܠܗܐ ܢܘܟܪܝܐ ܦܠܚ݁܀ ܡ݁ܢ ܕܣܐ݁ܡ ܡܢܝܢܐ ܥܠ ܚܕ
154:04	ܡܫܝܚܐ܃ ܘܚ݁ܫܒ ܠܗ ܬܪ̈ܝܢ ܩܢܘ̈ܡܝܢ܂ ܐܘ ܬܪ̈ܝܢ ܒܢܝܢ
154:05	ܡ݁ܦܪܫ ܗܢܐ ܠܐ ܐܝܬܘܗܝ ܗܕܡܗ ܕܡܫܝܚܐ ܘܠܐ
154:06	ܐܬܡܢܝ ܒܓܘܕܐ ܕܓܒܝ̈ܐ ܕܐܠܗܐ܀ ܡ݁ܢ ܕܠܐ ܡܘ݁ܕܐ
154:07	ܕܗ݀ܘ ܕܩܪܝܗܝ ܝܘܚܢܢ ܡܠܬܐ܂ ܗܘܝܘ ܗ݀ܘ ܕܐܟܬܒܗ ܡܬܝ
154:08	ܒܪ ܕܘܝܕ ܘܒܪ ܐܒܪܗܡ݂܂ ܗ݀ܢܐ ܒܣܝܡ݂݂ܬ ܒ̈ܢܝܐ ܕܐܒܐ
154:09	ܫܡ݁ܝܢܐ ܠܐ ܐܬܟܬ݂ܒ܀ ܡ݁ܢ ܕܐܡ݁ܪ ܕܗ݀ܘ ܕܪܫܝܡ ܥܠܘܗܝ
154:10	ܕܒܪܫܝܬ ܐܝܬܘܗܝ ܗ݂ܘܐ܃ ܘܠܘܬ ܐܠܗܐ ܐܝܬܘܗܝ ܗ݂ܘܐ܃
154:11	ܘܐܠܗܐ ܐܝܬܘܗܝ ܗ݂ܘܐ܃ ܠܘ ܗ݀ܘܝܘ ܚܝܠܗ ܕܥܠܝܐ ܗ݀ܘ
154:12	ܕܐܡ݂ܪ ܡܠܐܟܐ ܠܒܬܘܠܬܐ܃ ܕܬܩܒܠܝܢ ܒܛܢܐ܂ ܘܬܐܠܕܝܢ
154:13	ܒܪܐ܂ ܘܬܩܪܝܢ ܫܡܗ ܝܫܘܥ܂ ܗ݀ܢܐ ܡܚܪܡ ܗ݂ܘ ܡܢ
154:14	ܡܠܬܗ ܕܝܫܘܥ܀ ܡ݁ܢ ܕܐܡ݁ܪ ܕܝܘܚܢܢ ܥܠ ܐܚܪܢܐ ܐܟܬܒ܃
154:15	ܘܡ݁ܬܝ ܘܡ݁ܪܩܘܣ ܘܠܘܩܐ ܥܠ ܐܚܪܢܐ݂܂ ܗ݀ܢܐ ܢܘܟܪܝܐ
154:16	ܗ݂ܘ ܠܣܒܪܬܐ ܕܫ̈ܠܝܚܐ ܘܟܪܘܙܘܬܐ ܕܢܒ̈ܝܐ܂ ܡ݁ܢ ܕܐܡ݁ܪ
154:17	ܕܫܡ݁ܐ ܕܡܫܝܚܐ ܬܪ̈ܝܢ ܟܝ̈ܢܝܢ ܕܡܦܪܫܝܢ ܘܪܚܝ݂ܩܝܢ ܡܢ
154:18	ܚܕ̈ܕܐ ܡܒ݁ܕܩ܃ ܘܠܘ ܚܕ ܟܝܢܐ ܘܦܪܨܘܦܐ ܘܩܢܘܡܐ
154:19	ܕܐܬܓ݁ܫܡ ܘܗܘ݂݂ܐ ܒܪܢܫܐ ܡܢ ܒܬܘܠܬܐ݂܂ ܗܢܐ ܟܦ݂ܪ ܠܗ
154:20	ܒܗܝܡܢܘܬܐ݂܂ ܘܒܝ݂ܫ ܡܢ ܐܝܠܝܢ ܕܠܐ ܡܗܝܡ݂ܢܝܢ܀ ܡ݁ܢ
154:21	ܕܐܡ݁ܪ ܕܐܝܬ ܒܡܫܝܚܐ ܐܚܪܢܐ ܘܐܚܪܢܐ܃ ܐ݁ܠܗܐ
154:22	ܥ݁ܒܘ݁ܕܐ ܘܒܪܢܫܐ ܥܒܝ݂ܕܐ ܐܝܟ ܚܕ ܡܢ݂ܢ܂ ܘܠܐ ܡܘ݁ܕܐ