← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: Joseph and Benjamin

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܝܲܘܣܸܦ ܘܒܸܢܝܵܡܸܝܢ
01 ܐܵܘ ܐܲܚܲܝ̈ ܠܵܐ ܚܙܸܐ ܠܟܽܘܢ ܬܪܸܝܢ ܐܲܚܸ̈ܐ ܟܲܕ ܝܵܬܒܼܝܢ݁ ܘܲܡܡܲܠܠܼܝܢ ܥܲܡ ܚܕܵܕܸ̈ܐ ܘܚܲܕ ܠܵܐ ܝܵܕܲܥ ܗ̄ܘܵܐ ܠܚܲܕ܀
02 ܝܲܘܣܸܦ ܃ ܒܵܟ ܬܲܗܼܝܪ ܐ̄ܢܵܐ ܛܲܠܝܵܐ ܟܡܵܐ ܡܲܪܼܝܪܵܐ ܢܲܦܫܵܟ݁ ܘܲܟܡܵܐ ܥܲܝܼܝܩ ܠܸܒܵܟ ܘܲܟܡܵܐ ܫܵܦ̈ܥܵܢ ܕܸܡ̈ܥܲܝܟ܀
03 ܒܸܢܝܵܡܸܝܢ ܃ ܓܵܠܸܐ ܐ̄ܢܵܐ ܠܵܟ ܡܵܪܝ ܡܲܠܟܵܐ ܟܼܐܒܵܐ ܪܲܒܵܐ ܕܼܐܝܬ ܠܼܝ݁ ܕܡܲܘܩܸܕ ܠܼܝ ܘܠܵܐ ܫܵܠܸܐ ܢܽܘܗܪܵܐ ܕܥܲܝ̈ܢܲܝ ܝܲܘܣܸܦ܀
04 ܝܲܘܣܸܦ ܃ ܕܽܘܡܵܪܵܐ ܐܵܚܸܕ ܠܼܝ ܘܬܸܗܪܵܐ ܛܵܒ ܡܲܬܗܲܪ ܠܼܝ݁ ܕܲܐܝܟܲܢ ܥܲܠ ܚܲܕ ܒܵܟܸܐ ܐܲܢ̄ܬ ܘܥܸܣܪܵܐ ܐ̄ܚܪ̈ܵܢܸܐ ܐܼܝܬ ܠܵܟ܀
05 ܗܵܕܸܐ ܡܸܠܬܵܐ ܨܽܘܬ ܐܲܢ̄ܬ ܛܲܠܝܵܐ ܕܵܐܡܲܪ ܐ̄ܢܵܐ ܠܵܟ݁ ܕܲܐܣܠܼܝܘܗܝ ܠܝܲܘܣܸܦ ܥܸܣܪܵܐ ܐܲܚ̈ܐ ܐ̄ܚܪ̈ܵܢܸܐ ܕܼܐܝܬ ܠܵܟ܀
06 ܒܸܢܝܵܡܸܝܢ ܃ ܘܲܐܝܟܲܢ ܡܲܣܠܸܐ ܐ̄ܢܵܐ ܠܸܗ ܠܘܲܪܕܵܐ ܕܢܼܝܣܵܢ ܝܲܘܣܸܦ݁ ܘܲܐܝܟܲܢ ܛܵܥܸܐ ܐ̄ܢܵܐ ܠܸܗ ܠܢܽܘܗܪܵܐ ܕܥܲܝ̈ܢܲܝ ܝܲܘܣܸܦ܀
07 ܙܲܘܥܬܵܐ ܢܸܦܠܲܬ ܥܠܲܝ ܘܕܸܚܠܬܵܐ ܘܲܪܬܼܝܬܵܐ݁ ܚܕܵܐ ܡܸܢܵܟ ܡܵܪܝ ܡܲܠܟܵܐ ܘܲܐ̄ܚܪܼܬܵܐ ܡܸܢ ܐܲܚܲܝ̈܀
08 ܝܲܘܣܸܦ ܃ ܚܲܝ ܗ̄ܽܘ ܡܵܪܝܵܐ ܐܲܠܵܗܵܐ ܘܚܲܝܲܘ̈ܗܝ ܕܡܲܠܟܵܐ ܕܡܸܨܪܸܝܢ݁ ܕܒܼܝܫܬܵܐ ܠܵܐ ܬܸܡܛܸܐ ܠܵܟ ܛܲܠܝܵܐ ܓܠܼܝ ܠܼܝ ܫܪܵܪܵܐ܀
09 ܒܸܢܝܵܡܸܝܢ ܃ ܛܸܐܒܸܗ ܓܢܼܝܚܵܐ ܕܝܲܘܣܸܦ ܐܸܢܗܽܘ ܕܓܵܠܸܐ ܗ̄ܘܼܝܬ ܠܵܟ݁ ܟܒܲܪ ܐܵܦ ܐܲܢ̄ܬ ܡܵܪܝ ܡܲܠܟܵܐ ܒܵܟܸܐ ܗ̄ܘܲܝܬ ܠܸܗ ܠܝܲܘܣܸܦ܀
10 ܝܲܘܣܸܦ ܃ ܝܲܘܣܸܦ ܠܡܲܢ ܕܵܡܸܐ ܗ̄ܘܵܐ ܛܲܠܝܵܐ ܓܠܼܝ ܠܼܝ ܫܪܵܪܵܐ݁ ܕܲܠܡܵܐ ܚܙܸܐ ܠܵܟ ܒܥܲܒ̈ܕܸܐ ܡܚܲܘܸܐ ܐܲܢ̄ܬ ܠܼܝ ܕܽܘܡܝܸܗ܀
11 ܟܼܐܢܵܐܼܝܬ ܬܢܼܝ ܠܼܝ ܘܲܫܪܵܪܵܐ ܓܠܼܝ ܘܸܐܡܲܪ ܠܼܝ݁ ܝܲܘܣܸܦ ܠܡܲܢ ܕܵܡܸܐ ܗ̄ܘܵܐ ܛܲܠܝܵܐ ܓܠܼܝ ܘܒܲܕܸܩ ܠܼܝ܀
12 ܒܸܢܝܵܡܸܝܢ ܃ ܠܲܝܬ ܠܸܗ ܕܽܘܡܝܵܐ ܠܝܲܘܣܸܦ ܠܵܐ ܒܡܲܠܟܸ̈ܐ ܘܠܵܐ ܒܥܲܒ̈ܕܸܐ݁ ܠܚܲܕ ܗܵܐ ܡܕܲܡܸܐ ܐ̄ܢܵܐ ܠܸܗ ܘܕܵܚܸܠ ܐ̄ܢܵܐ ܕܼܐܡܲܪ ܠܵܟ܀
13 ܡܵܪܝ ܡܲܠܟܵܐ ܠܵܟ ܕܵܡܸܐ ܘܦܲܪܨܽܘܦܸܗ ܐܲܝܟ ܦܲܪܨܽܘܦܵܟ݁ ܘܪܼܝܚܵܐ ܡܸܢܵܟ ܐܵܬܸܐ ܠܼܝ ܐܲܝܟ ܪܼܝܚܸܗ ܕܵܐܚܝ ܝܲܘܣܸܦ܀
14 ܢܦܲܠ ܒܸܟܝܵܐ ܒܲܝܢܵܬܗܘ݁ܢ ܘܫܲܪܼܝܘ ܠܲܚܕܵܕܸ̈ܐ ܡܥܲܦܩܼܝܢ݁ ܘܲܡܫܲܐܠܼܝܢ ܗ̄ܘܲܘ ܠܲܚܕܵܕܸ̈ܐ ܥܲܠ ܟܽܠ ܡܵܐ ܕܲܓܕܲܫ ܠܗܘ݁ܢ܀
15 ܝܲܘܣܸܦ ܃ ܣܵܒܵܐ ܝܲܥܩܽܘܒ ܡܘ݁ܢ ܥܵܒܸܕ ܛܲܠܝܵܐ ܓܠܼܝ ܠܼܝ ܫܪܵܪܵܐ݁ ܡܸܢ ܟܲܕ ܦܸܪܫܸܬ ܡܸܢܸܗ ܛܲܠܝܵܐ ܓܠܼܝ ܠܼܝ ܘܸܐܡܲܪ ܠܼܝ܀
16 ܒܸܢܝܵܡܸܝܢ ܃ ܥܲܝ̈ܢܲܘܗܝ ܕܸܡ̈ܥܸܐ ܡܲܪ̈ܕܵܝܢ ܘܚܸܘܵܪ̈ܬܸܗ ܒܩܸܛܡܵܐ ܡܦܲܠܦ̈ܠܵܢ݁ ܘܣܲܩܵܐ ܥܒܲܕ ܠܸܗ ܠܒܽܘܫܵܐ ܡܸܢ ܟܲܕ ܫܡܲܥ ܕܡܼܝܬ ܝܲܘܣܸܦ܀
17 ܦܽܘܡܸܗ ܡܬܲܚܸܡ ܘܝܵܡܸܐ ܒܲܐܠܵܗܵܐ ܘܠܵܐ ܫܵܠܸܐ݁ ܕܲܠܥܵܠܲܡ ܠܵܐ ܡܸܬܒܲܝܲܐ ܥܕܲܡܵܐ ܕܢܸܚܙܸܝܘܗܝ ܠܝܲܘܣܸܦ܀
18 ܨܵܗܸܐ ܘܕܸܡ̈ܥܲܘܗܝ ܫܵܬܸܐ ܟܵܦܸܢ ܘܩܸܛܡܵܐ ܠܵܥܸܣ݁ ܘܝܵܡܸܐ ܕܠܵܐ ܡܲܣܠܸܐ ܐ̄ܢܵܐ ܠܸܗ ܠܢܽܘܗܪܵܐ ܕܥܲܝ̈ܢܲܝ ܝܲܘܣܸܦ܀
19 ܝܲܘܣܸܦ ܃ ܩܽܘܡ ܛܲܠܝܵܐ ܙܸܠ ܐܲܘܒܸܠ ܡܵܐܢܲܝ̈ ܠܵܣܒܵܐ ܝܲܥܩܽܘܒ݁ ܘܚܲܘܵܐ ܠܸܗ ܕܽܘܡܝܵܐ ܕܼܝܠܝ ܘܸܐܡܲܪ ܠܲܗ ܕܚܲܝ ܝܲܘܣܸܦ܀
20 ܪܼܝܚܵܐ ܕܡܼܝ̈ܬܸܐ ܣܵܩ ܗ̄ܘܵܐ ܣܵܒܵܐ ܝܲܥܩܽܘܒ ܐܸܡܲܪ݁ ܪܼܝܚܵܐ ܕܡܼܝܬ ܗ̄ܘܵܐ ܘܲܚܝܵܐ ܛܲܠܝܵܐ ܓܠܼܝ ܠܼܝ ܫܪܵܪܵܐ܀
21 ܫܽܘܒܚܵܐ ܠܸܗ ܠܲܐܠܵܗܵܐ ܕܲܐܚܼܝ ܝܲܘܣܸܦ ܠܝܲܥܩܽܘܒ݁ ܘܲܐܘܕܲܥ ܠܸܗ ܥܠܲܝܡܽܘܬܸܗ ܘܥܲܠ ܦܽܘܢܵܝܸܗ ܠܘܵܬܸܗ܀
22 ܬܲܘܕܼܝܬܵܐ ܠܲܐܠܵܗܵܐ ܐܲܒܵܐ ܘܲܒܪܵܐ ܘܪܽܘܚܩܽܘܕܫܵܐ݁ ܘܲܥܠܲܝܟܽܘܢ ܫܵܡܽܘ̈ܥܸܐ ܢܸܫܬܲܦܥܽܘܢ ܒܲܐܡܼܝܢܽܘ ܪ̈ܲܚܡܸܐ܀