← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: MaryJoseph

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܝܲܘܣܸܦ ܘܡܲܪܝܲܡ
01 ܐܲܚ̈ܲܝ ܡܵܪܲܢ ܬܸܗܪܵܐ ܣܥܲܪ ܕܲܢܚܸܬ ܘܲܫܪܵܐ ܒܲܒܬܽܘܠܬܵܐ݁ ܡܟܼܝܪܵܐ ܘܢܲܟܦܵܐ ܘܲܡܝܲܬܪܵܐ ܘܲܚܬܼܝܡ ܥܽܘܒܵܗ݀ ܘܒܲܛܢܵܗ݀ ܫܒܼܝܚ܀
02 ܐܲܝܬܼܝ ܥܼܝܪܵܐ ܫܠܵܡܵܐ ܘܝܲܗ̄ܒ ܠܒܲܪ̄ܬ ܡܸܣ̈ܟܼܢܸܐ ܘܥܽܘܬܪܵܐ ܡܠܵܗ݀݁ ܘܩܲܒܠܲܬ ܒܲܛܢܵܐ ܡܲܬܗܲܪ ܟܽܠ ܘܲܒܬܸܕܡܽܘܪܬܵܐ ܠܸܗ ܙܲܝܚܲܬ܀
03 ܒܟܲܪܣܵܗ݀ ܥܽܘܠܵܐ ܨܵܐܲܪ ܠܟܽܠ ܘܒܲܬܕܸ̈ܝܗ݀ ܚܲܠܒܵܐ ܡܲܬܗܲܪ ܠܟܽܠ݁ ܒܬܽܘ̈ܠܸܝܗ݀ ܚܬܼܝܡܼܝܢ ܘܥܽܘܒܵܗ݀ ܡܠܸܐ ܟܲܪܣܵܐ ܛܥܼܝܢܵܐ ܘܐ̄ܪ̈ܵܙܸܐ ܟܣܸܐ܀
04 ܒܡܲܪܝܲܡ ܝܲܘܣܸܦ ܬܲܗܼܝܪ ܗ̄ܘܵܐ ܕܲܚܙܵܐ ܒܲܛܢܵܐ ܕܠܵܐ ܪܓܼܝܫ ܒܸܗ݀ ܘܫܲܪܼܝ ܕܢܲܪܫܼܝܗ݀ ܘܲܢܟܲܚܕܼܝܗ݀ ܟܲܕ ܐܵܡܲܪ ܠܵܗ݀ ܛܠܼܝܬܵܐ ܫܡܲܥܝ܀
05 ܝܲܘܣܸܦ ܓܠܵܝ ܠܼܝ ܐ̄ܪܵܙܵܐ ܕܡܵܢܵܐ ܗܘܵܟܝ ܓܽܘܢܚܵܐ ܗ̄ܘ ܪܲܒܵܐ ܕܲܡܡܲܠܠܲܬܝ݁ ܡܲܢ ܐܲܛܥܼܝ ܒܸܟܝ ܐܵܘ ܒܬܽܘܠܬܵܐ ܘܚܲܠܸܨ ܥܽܘܬܪܸܟܝ ܐܵܘ ܢܲܟܦܬܵܐ܀
06 ܡܲܪܝܲܡ ܓܵܠܝܵܐ ܐ̄ܢܵܐ ܠܵܟ ܐܲܝܟܲܢ ܗܘܵܬ ܐܵܡܪܵܐ ܡܲܪܝܲܡ ܝܲܘܣܵܦ ܫܡܲܥ݁ ܓܲܒܪܵܐ ܕܢܽܘܪܵܐ ܨܸܐܕܲܝ ܢܚܸܬ ܫܠܵܡܵܐ ܝܲܗ̄ܒ ܠܼܝ ܘܗܵܕܸܐ ܗܘܵܬ܀
07 ܝܲܘܣܸܦ ܕܲܐܫܲܪ ܗܵܕܸܐ ܥܲܣܩܵܐ ܗ̄ܝ ܠܼܝ ܠܵܐ ܫܲܦܼܝܪܵܐ ܠܵܐ ܬܸܬܢܼܝܗ݀݁ ܗܵܝ ܕܸܐܣܬܲܥܪܲܬ ܐܸܢ ܨܵܒܝܲܬܝ ܡܲܠܸܠܝ ܨܸܐܕܲܝ ܡܲܢ ܐܲܛܥܸܟܝ܀
08 ܡܲܪܝܲܡ ܕܼܐܡܲܪ ܠܵܟ ܬܽܘܒ ܠܵܐ ܝܵܕܥܵܢ ܕܸܐܡܲܪܬܵܗ݀ ܠܵܟ ܐܲܝܟ ܕܵܐܦ ܗܘܵܬ݁ ܪܹܝܫܵܐ ܕܥܼܝܪܸ̈ܐ ܢܚܸܬ ܣܵܒܪܲܢܝ ܘܩܲܒܠܸܬ ܒܲܛܢܵܐ ܘܠܵܐ ܐܲܪܓܫܸܬ܀
09 ܝܲܘܣܸܦ ܗܵܠܸܝܢ ܡܸ̈ܠܸܐ ܠܲܒܬܽܘܠܬܵܐ ܠܵܐ ܡܸܬܒܲܥ̈ܝܵܢ ܡܲܪܝܲܡ ܫܠܵܝ݁ ܕܕܲܓܵܠܽܘܬܵܐ ܠܵܐ ܩܵܝܡܵܐ ܫܪܵܪܵܐ ܡܲܠܸܠܝ ܐܸܢ ܨܵܒܝܲܬܝ܀
10 ܡܲܪܝܲܡ ܗܵܢܸܝܢ ܗܵܠܸܝܢ ܬܽܘܒ ܬܵܢܝܵܢ ܘܲܐ̄ܚܪ̈ܵܢܝܵܬܵܐ ܠܵܐ ܐܵܡܪܵܢ݁ ܕܲܚܬܼܝܡܵܐ ܐ̄ܢܵܐ ܟܲܕ ܣܵܗܕܼܝܢ ܒܬܽܘ̈ܠܸܐ ܕܲܩܢܽܘܡܝ ܕܠܵܐ ܐܸܫܬܪܼܝܘ܀
11 ܝܲܘܣܸܦ ܘܵܠܸܐ ܗ̄ܘܵܐ ܠܸܟܝ ܕܠܵܐ ܬܣܲܒܪܼܝܢ ܐܸܠܵܐ ܕܬܲܘܕܸܝܢ ܥܲܠ ܕܸܐܫܬܪܲܥܬܝ݁ ܒܬܲܪܬܸܝܢ ܒܼܝ̈ܫܵܢ ܗܵܐ ܢܵܦܠܲܬܝ ܕܒܵܬܲܪ ܒܲܛܢܸܟܝ ܗܵܐ ܡܕܲܓܠܲܬܝ܀
12 ܡܲܪܝܲܡ ܘܵܠܸܐ ܗ̄ܘܵܐ ܠܵܟ ܕܬܲܫܲܪ ܠܩܵܠܝ ܕܕܲܓܵܠܽܘܬܵܐ ܠܵܐ ܚܙܲܝܬ ܒܼܝ݁ ܢܲܟܦܽܘܬܝ ܘܲܫܪܵܪܝ ܣܵܗܕܼܝܢ ܥܠܲܝ ܕܲܒܬܽܘܠܬܵܐ ܐ̄ܢܵܐ ܘܠܵܐ ܟܲܕܒܸܬ܀
13 ܝܲܘܣܸܦ ܙܲܘܥܵܐ ܗ̄ܘ ܪܲܒܵܐ ܕܲܡܡܲܠܠܲܬܝ ܐܲܝܟܲܢ ܐܸܫܡܲܥ ܡܵܢ ܕܵܐܡܪܲܬ݁ ܒܬܽܘܠܬܵܐ ܡܸܡܬܽܘܡ ܠܵܐ ܒܵܛܢܵܐ ܐܸܠܵܐ ܢܸܩܦܲܬ ܘܸܐܙܕܲܘܓܲܬ܀
14 ܡܲܪܝܲܡ ܙܲܘܥܵܐ ܗ̄ܘ ܪܲܒܵܐ ܕܠܵܐ ܡܲܫܪܲܬ ܕܲܦܫܼܝܩ ܗ̄ܽܘ ܠܡܵܪܸܗ ܕܟܽܠ݁ ܕܢܸܬܸܠ ܦܼܐܪܵܐ ܠܲܒܬܽܘܠܬܵܐ ܐܲܝܟ ܗܲܘ ܐܸܡܪܵܐ ܕܡܸܢ ܣܲܘܟܬܵܐ܀
15 ܝܲܘܣܸܦ ܚܲܘܵܐ ܠܵܐܕܵܡ ܐܸܙܕܲܘܓܲܬ ܘܡܸܢ ܙܽܘܘܵܓܵܐ ܝܲܠܕܸ̈ܝܗ݀ ܣܓܼܝܘ݁ ܘܲܐܢ̄ܬܝ ܒܲܠܚܽܘܕܲܝܟܝ ܗܵܐ ܣܵܪܒܲܬܝ ܕܲܕܠܵܐ ܓܲܒܪܵܐ ܥܽܘܒܸܟܝ ܡܠܸܐ܀
16 ܡܲܪܝܲܡ ܚܲܘܵܐ ܠܡܸ̈ܠܲܝ ܗܵܐ ܣܵܗܕܵܐ ܕܲܕܠܵܐ ܢܸܩܦܵܐ ܕܓܲܒܪܵܐ ܗ̄ܘܵܬ݁ ܡܸܢܸܗ ܕܵܐܕܵܡ ܗܲܘ ܕܲܐܦܪܝܵܗ݀ ܘܠܼܝ ܥܲܠ ܡܵܢܵܐ ܠܵܐ ܡܲܫܪܲܬ܀
17 ܝܲܘܣܸܦ ܛܥܲܝܬܝ ܐܲܝܟ ܡܲܝ̈ܵܐ ܐܵܘ ܢܲܟܦܬܵܐ ܣܲܒܝ ܠܲܟ̈ܬܵܒܸܐ ܘܲܩܪܼܝ ܒܗܘ݁ܢ݁ ܕܲܒܬܽܘ̈ܠܵܬܵܐ ܠܵܐ ܒܵܛܢ̈ܵܢ ܕܠܵܐ ܙܽܘܘܵܓܵܐ ܐܲܝܟ ܡܸܠܬܸܟܝ܀
18 ܡܲܪܝܲܡ ܛܥܲܝܬ ܐܵܘ ܝܲܘܣܸܦ ܣܲܒ ܠܵܟ ܘܲܩܪܼܝ ܕܗܵܐ ܒܸܐܫܲܥܝܵܐ ܟܬܼܝܒ ܗ̄ܽܘ ܥܠܲܝ݁ ܕܢܸܗܘܸܐ ܦܼܐܪܵܐ ܠܲܒܬܽܘܠܬܵܐ ܘܸܐܠܵܐ ܫܲܪܼܝܪ ܠܵܐ ܬܩܲܒܠܲܢܝ܀
19 ܝܲܘܣܸܦ ܝܵܐܸܐ ܗ̄ܘܵܐ ܠܸܟܝ ܕܬܸܬܟܲܚܕܼܝܢ ܡܸܢ ܣܽܘܥܪܵܢܵܐ ܕܟܽܠܸܗ ܓܠܸܐ ܗ̄ܘ݁ ܕܒܵܬܲܪ ܒܲܛܢܸܟܝ ܗܵܐ ܡܕܲܓܠܲܬܝ ܕܲܒܬܽܘܠܬܵܐ ܐܲܢ̄ܬܝ ܐܲܝܟ ܕܵܐܡܪܲܬܝ܀
20 ܡܲܪܝܲܡ ܝܵܐܸܐ ܗ̄ܘܵܐ ܠܵܟ ܐܸܠܽܘ ܒܥܲܝܬ ܕܬܲܫܲܪ ܠܡܸ̈ܠܲܝ ܕܠܵܐ ܕܲܓܠܸܬ݁ ܕܲܚܬܼܝܡܵܐ ܐ̄ܢܵܐ ܟܲܕ ܣܵܗܕܼܝܢ ܟܝܵܢܸ̈ܐ ܚܲܪ̈ܫܸܐ ܕܠܵܐ ܡܡܲܠܠܼܝܢ܀
21 ܝܲܘܣܸܦ ܟܲܕܽܘ ܛܠܼܝܬܵܐ ܡܸܫܬܲܒܗܪܲܬܝ ܒܕܲܓܵܠܽܘܬܵܐ ܕܠܵܐ ܩܵܝܡܵܐ݁ ܕܲܒܚܲܕ ܓܽܘܫܡܵܐ ܠܵܐ ܡܸܫܟܚܵܐ ܒܬܽܘ̈ܠܸܐ ܘܒܲܛܢܵܐ ܕܲܢܟܲܬܪܽܘܢ܀
22 ܡܲܪܝܲܡ ܟܲܕܽܘ ܝܲܘܣܸܦ ܐܲܥܼܝܩܬ ܠܼܝ ܟܲܕ ܕܲܟܝܵܐ ܐ̄ܢܵܐ ܘܼܐܝܬ ܣܵܗ̈ܕܸܐ݁ ܠܚܲܟܼܝ̈ܡܵܬܵܐ ܕܲܐܬܪܲܢ ܩܪܼܝ ܘܲܚܙܼܝ ܒܬܽܘ̈ܠܲܝ ܕܠܵܐ ܐܸܫܬܪܼܝܘ܀
23 ܝܲܘܣܸܦ ܠܡܲܢܽܘ ܕܵܡܝܲܬܝ ܐܸܢ ܝܵܕܥܲܬܝ ܘܡܲܢ ܦܵܚܸܡ ܠܸܟܝ ܐܲܝܟ ܕܵܐܡܪܲܬܝ݁ ܠܸܟܝ ܒܲܠܚܽܘܕܲܝܟܝ ܗܵܕܸܐ ܗܘܵܬ ܟܲܕ ܠܵܐ ܐܼܝܬܸܝܗ݀ ܫܲܪܼܝܪܬܵܐ܀
24 ܡܲܪܝܲܡ ܠܵܐ ܙܵܕܸܩ ܗ̄ܘܵܐ ܐܸܕܡܸܐ ܠܐ̄ܢܵܫ ܕܠܵܐ ܗܘܵܐ ܐܼܝܬ ܠܸܗ ܚܲܒܪܵܐ ܠܒܸܪܝ݁ ܕܼܝܚܼܝܕܵܝܵܐ ܗ̄ܘ ܘܠܵܐ ܡܸܫܟܚܵܐ ܕܒܲܛܢܵܐ ܐ̄ܚܪܼܢܵܐ ܐܲܝܟ ܕܠܼܝ ܢܗܸܐ܀
25 ܝܲܘܣܸܦ ܡܸܢܸܟܝ ܡܵܕܸܝܢ ܗܵܐ ܫܲܪܝܲܬ ܚܕܲܬܵܐ ܒܥܵܠܡܵܐ ܐܲܝܟ ܕܵܐܡܪܲܬܝ݁ ܕܠܵܐ ܬܲܚܘܼܝܬܵܐ ܠܸܟܝ ܠܵܐ ܐܼܝܬ ܠܸܟܝ ܘܠܵܐ ܦܽܘܫܵܩܵܐ ܠܡܵܢ ܕܵܐܡܪܲܬܝ܀
26 ܡܲܪܝܲܡ ܡܸܢ ܦܽܘܫܵܩܵܐ ܠܵܐ ܕܵܚܠܵܢ ܕܼܐܝܬ ܠܵܟ ܕܬܸܚܙܸܐ ܐܸܢ ܚܵܝܪܲܬ݁ ܠܟܹܐܦܵܐ ܒܚܽܘܪܼܝܒ ܡܲܢ ܐܲܪܕܼܝܗ݀ ܘܲܠܗܲܘ ܫܲܒܛܵܐ ܡܲܢ ܐܲܦܪܼܝܗ݀܀
27 ܝܲܘܣܸܦ ܢܸܫܠܸܐ ܦܽܘܡܸܟܝ ܕܥܽܘܒܸܟܝ ܡܠܸܐ ܘܲܡܩܲܛܪܸܓ ܠܸܟܝ ܘܠܵܐ ܕܵܚܠܲܬܝ݁ ܗܽܘ ܣܽܘܥܪܵܢܵܐ ܣܵܗܸܕ ܥܠܲܝܟܝ ܘܵܐܦܠܵܐ ܕܬܸܫܠܸܝܢ ܠܵܐ ܨܵܒܝܲܬܝ܀
28 ܡܲܪܝܲܡ ܢܸܫܠܸܐ ܦܽܘܡܵܟ ܘܠܵܐ ܢܒܲܣܪܲܢܝ ܕܠܵܐ ܒܣܼܝܪܵܐ ܐ̄ܢܵܐ ܒܲܐܦ̈ܲܝ ܐ̄ܚܪܼܝܢ݁ ܕܠܵܟ ܐܸܬܡܲܟܪܸܬ ܘܲܐܢ̄ܬ ܝܵܕܥܲܬ ܫܪܵܪܵܟ ܝܲܘܣܸܦ ܠܵܐ ܢܸܥܫܩܲܢܝ܀
29 ܝܲܘܣܸܦ ܣܲܓܼܝ ܥܲܣܩܵܐ ܕܸܐܗܲܝܡܢܸܟܝ ܕܠܵܐ ܚܲܠܸܦܬܼܝܢܝ ܐܲܝܟ ܕܵܐܡܪܲܬܝ݁ ܕܸܐܢܵܐ ܒܒܲܛܢܸܟܝ ܠܵܐ ܪܓܼܝܫ ܐ̄ܢܵܐ ܘܸܐܬܝܲܕܥܲܬ ܠܵܗ݀ ܕܲܡܕܲܓܠܲܬܝ܀
30 ܡܲܪܝܲܡ ܣܲܓܼܝ ܦܫܼܝܩܵܐ ܕܲܬܗܲܝܡܢܲܢܝ ܘܸܐܢ ܕܲܓܸܠܬܵܢ ܐܼܝܬ ܠܸܗ ܠܒܸܪܝ݁ ܚܲܕ ܡܸܢ ܥܼܝܪܸ̈ܐ ܕܢܽܘܪܵܐ ܘܪܽܘܚ ܕܲܒܓܸܠܝܵܢܸܗ ܢܸܣܗܲܕ ܥܠܲܝ܀
31 ܝܲܘܣܸܦ ܥܲܒܕܵܐ ܒܡܸ̈ܠܸܐ ܠܵܐ ܡܸܙܕܟܸܐ ܕܟܲܣ̈ܝܵܢ ܡܸܠܲܝ̈ܟܝ ܘܥܽܘܒܸܟܝ ܡܠܸܐ݁ ܘܗܽܘ ܣܽܘܥܪܵܢܵܐ ܣܵܗܸܕ ܥܠܲܝܟܝ ܘܡܸܢ ܝܲܬܼܝܪܽܘ ܗܵܐ ܡܕܲܓܠܲܬܝ܀
32 ܡܲܪܝܲܡ ܥܸܠܬܵܐ ܕܩܲܫܝܵܐ ܡܸܢܵܟ ܘܡܸܢܝ ܗܼܝ ܥܵܨܝܵܐ ܠܼܝ ܘܲܡܡܲܠܠܵܢ݁ ܕܲܟܡܵܐ ܕܲܫܪܵܪܝ ܠܵܐ ܐܸܬܒܣܲܪ ܪܹܝܫܝ ܠܵܐ ܪܟܸܢ ܘܠܵܐ ܒܵܗܬܵܢ܀
33 ܝܲܘܣܸܦ ܦܸܗܝܵܐ ܒܡܸܠܲܝ̈ܟܝ ܐܵܘ ܒܬܽܘܠܬܵܐ ܠܡܸܕܚܲܠ ܡܸܢܸܟܝ ܡܵܢ ܕܵܐܡܪܲܬܝ݁ ܣܲܒܝ ܕܽܘܠܵܠܵܐ ܒܫܲܝܢܵܐ ܘܦܽܘܩܝ ܘܡܸܢܝ ܕܼܝܠܝ ܐ̄ܪܵܙܵܐ ܠܵܐ ܢܸܬܓܠܸܐ܀
34 ܡܲܪܝܲܡ ܦܫܼܝܩ ܗ̄ܽܘ ܠܥܽܘܠܵܐ ܕܲܒܥܽܘܒܝ ܫܪܸܐ ܕܢܼܐܡܲܪ ܚܽܘܠܵܦܝ ܡܵܐ ܐܸܙܕܟܼܝܬ݁ ܘܢܸܓܠܸܐ ܐ̄ܪܵܙܵܐ ܕܨܸܐܕܲܝ ܗܘܵܐ ܘܲܢܒܲܕܸܩ ܠܵܟ ܕܠܵܐ ܕܲܓܠܸܬ܀
35 ܝܲܘܣܸܦ ܨܽܘܬܝ ܐܼܡܲܪ ܠܸܟܝ ܚܲܟܼܝܡܬܵܐ ܕܟܲܕ ܛܵܒ ܐܲܫܲܪ ܠܡܲܢ ܕܵܐܡܪܲܬܝ݁ ܠܵܐ ܡܲܡܪܲܚ ܐ̄ܢܵܐ ܐܸܩܪܽܘܒ ܠܸܗ ܠܥܽܘܒܸܟܝ ܕܲܟܝܵܐ ܕܢܽܘܪܵܐ ܡܠܸܐ܀
36 ܡܲܪܝܲܡ ܨܲܘܬܵܟ ܝܲܘܣܸܦ ܚܲܒܼܝܒ ܠܼܝ ܠܲܘ ܠܙܽܘܘܵܓܵܐ ܡܸܬܪܲܓܪܓܵܢ݁ ܥܽܘܠܵܐ ܕܲܒܥܽܘܒܝ ܗܵܐ ܡܦܼܝܣ ܠܵܟ ܕܲܒܬܽܘܠܬܵܐ ܐ̄ܢܵܐ ܘܠܵܐ ܟܲܕܒܸܬ܀
37 ܝܲܘܣܸܦ ܩܵܝ̈ܡܵܢ ܬܲܪܬܸܝܢ ܘܲܡܣܲܪ̈ܕܵܢ ܕܸܐܢ ܫܲܪܼܝܪܵܐ ܠܼܝ ܙܲܘܥܬܵܐ ܗ̄ܝ݁ ܘܸܐܢ ܕܲܓܵܠܬܵܐ ܗ̄ܝ ܗܵܐ ܥܵܩܬܵܐ ܘܡܸܢ ܬܲܪ̈ܬܲܝܗܸܝܢ ܕܸܐܥܪܽܘܩ ܒܥܼܝܬ܀
38 ܡܲܪܝܲܡ ܩ̈ܵܠܲܝ ܡܸܟܼܝܠ ܐܸܫܕܸܐ ܠܥܽܘܒܝ ܘܸܐܡܲܠܸܠ ܠܸܗ ܒܟܲܣܝܵܐ ܠܒܸܪܝ݁ ܘܗܽܘ ܢܸܓܠܸܐ ܠܵܟ ܕܲܡܓܲܙܝܵܢ ܘܡܸܢ ܥܸܢܝܵܢܵܟ ܠܵܐ ܐܸܬܓܠܸܙ܀
39 ܝܲܘܣܸܦ ܪܲܒ ܗ̄ܽܘ ܫܲܪܒܵܐ ܕܲܡܡܲܠܠܲܬܝ ܘܠܼܝ ܣܽܘܪܵܕܵܐ ܗ̄ܘ ܡܵܢ ܕܵܐܡܪܲܬܝ݁ ܘܲܟܡܵܐ ܕܬܲܣܓܸܝܢ ܗܼܝ ܗܵܘܝܵܐ ܠܡܸܥܪܲܩ ܡܸܢܸܟܝ ܡܵܢ ܫܵܚܩܲܬܝ܀
40 ܡܲܪܝܲܡ ܪܲܘܒܵܐ ܪܲܒܵܐ ܗܵܘܸܐ ܥܠܲܝ ܘܥܲܡܵܐ ܣܲܟܠܵܐ ܣܵܒܸܟ ܥܠܲܝ݁ ܘܡܸܬܚܲܫܒܵܐ ܐ̄ܢܵܐ ܓܲܝܵܪܬܵܐ ܘܸܐܢ ܒܸܪܝ ܡܲܗܡܸܐ ܡܸܬܒܲܣܒܣܵܢ܀
41 ܫܪܵܪܵܗ݀ ܕܡܲܪܝܲܡ ܡܵܪܵܗ݀ ܚܙܵܐ ܘܠܲܛܠܼܝܡܽܘܬܵܗ݀ ܣܵܗܕܵܐ ܗ̄ܘܵܐ݁ ܘܲܪܡܲܙ ܘܲܢܚܸܬ ܚܲܕ ܦܵܠܚܵܐ ܘܫܲܕܲܪ ܡܸ̈ܠܸܝܗ݀ ܕܲܥܠܲܝܡܬܵܐ܀
42 ܫܟܸܒ ܗ̄ܘܵܐ ܝܲܘܣܸܦ ܘܥܼܝܪܵܐ ܡܛܵܐ ܘܲܓܠܵܝܗܝ ܠܐ̄ܪܵܙܵܐ ܐܲܝܟ ܕܸܐܣܬܥܲܪ݁ ܘܲܩܕܵܡ ܝܲܘܣܸܦ ܘܲܒܪܸܟ ܣܓܸܕ ܠܡܲܠܝܲܬ ܬܸܗܪܵܐ ܕܠܵܐ ܕܲܓܠܲܬ܀
43 ܬܗܲܪ ܒܵܗ݀ ܟܼܐܢܵܐ ܒܲܥܠܲܝܡܬܵܐ ܘܲܐܣܓܼܝ ܝܲܩܪܵܗ݀ ܠܲܒܬܽܘܠܬܵܐ݁ ܬܲܘܕܼܝ ܠܲܒܪܵܐ ܕܡܸܢܵܗ݀ ܕܢܲܚ ܘܲܒܡܲܘܠܵܕܸܗ ܦܪܲܩ ܥܵܠܡܸ̈ܐ܀
44 ܬܲܘܕܼܝܬܵܐ ܠܸܗ ܠܡܵܪܸܐ ܕܟܽܠ ܐܸܡܲܪ ܝܲܘܣܸܦ ܠܲܒܬܽܘܠܬܵܐ݁ ܕܲܨܒܵܐ ܘܲܫܪܵܐ ܒܓܲܘ ܡܲܪܒܥܸܟܝ ܕܲܒܡܲܘܠܵܕܸܗ ܢܲܚܸܐ ܠܟܽܠ܀
45 ܬܲܘܕܼܝܬܵܐ ܠܸܗ ܘܲܒܪܼܝܟ ܫܡܸܗ ܕܡܸܠܬܵܐ ܕܲܫܪܵܐ ܒܲܒܬܽܘܠܬܵܐ݁ ܘܝܲܪ̈ܚܸܐ ܬܸܫܥܵܐ ܗܘܵܐ ܒܡܲܪܒܥܵܗ݀ ܕܢܸܦܪܽܘܩ ܠܵܐܕܵܡ ܠܸܗ ܬܸܫܒ̈ܚܵܢ܀