← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: MaryMagi

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܡܲܪܝܲܡ ܘܲܡܓܽܘ̈ܫܸܐ
01 ܒܝܲܠܕܸܗ ܕܲܒܪܵܐ ܢܽܘܗܪܵܐ ܕܢܲܚ ܘܲܥܪܲܩ ܚܸܫܟܵܐ ܡܸܢ ܥܵܠܡܵܐ݁ ܘܢܸܗܪܲܬ ܬܼܒܸܝܠ ܕܲܬܫܲܒܚܼܝܘܗܝ ܠܨܸܡܚܸܗ ܕܲܐܒܵܐ ܕܗܽܘ ܐܲܢܗܪܸܗ܀
02 ܕܢܲܚ ܡܸܢ ܟܲܪܣܵܐ ܕܲܒܬܽܘܠܬܵܐ ܘܣܵܦܘ ܛܸܠ̈ܵܠܸܐ ܟܲܕ ܐܸܬܚܙܼܝ݁ ܘܚܸܫܟܵܐ ܘܛܽܘܥܝܲܝ ܒܸܗ ܐܸܬܚܢܸܩܘ ܘܲܢܗܲܪܘ ܣܲܘ̈ܦܸܐ ܕܲܢܫܲܒܚܽܘܢ܀
03 ܒܥܲܡ̈ܡܸܐ ܪܲܘܒܵܐ ܪܲܒܵܐ ܗܘܵܐ ܕܲܒܚܸܫܽܘܟܵܐ ܢܽܘܗܪܵܐ ܕܢܲܚ݁ ܘܕܵܨ̈ܝ ܐܸܡ̈ܘܵܬܵܐ ܕܲܢܫܲܒ̈ܚܵܢ ܠܗܲܘ ܕܲܒܝܲܠܕܸܗ ܢܗܲܪ̈ܝ ܟܽܠܗܸܝܢ܀
04 ܐܲܙܠܸܓ ܢܽܘܗܪܸܗ ܥܲܠ ܡܲܕܢܚܵܐ ܘܢܸܗܪܲܬ ܦܵܪܸܣ ܡܸܢ ܟܲܘܟܒܵܐ݁ ܕܲܢܚܸܬ ܣܲܒܪܵܗ݀ ܐܵܦ ܙܲܡܢܵܗ݀ ܕܬܼܐܬܸܐ ܠܕܸܢܚܵܐ ܡܲܦܨܲܚ ܠܟܽܠ܀
05 ܪܗܸܛ ܢܲܗܼܝܪܵܐ ܘܸܐܙܲܠ ܕܢܲܚ ܒܸܝܬ ܚܸܫܽܘ̈ܟܸܐ ܘܲܩܪܵܐ ܠܗܘ݁ܢ݁ ܕܢܼܐܬܽܘܢ ܥܲܡ̈ܡܸܐ ܘܢܸܬܒܲܣܡܘ݁ܢ ܒܢܽܘܗܪܵܐ ܪܲܒܵܐ ܕܠܲܐܪܥܵܐ ܢܚܸܬ܀
06 ܚܲܕ ܐܼܝܙܓܲܕܵܐ ܟܲܘܟܒܵܐ ܢܚܸܬ ܘܸܐܙܲܠ ܣܲܒܲܪ ܘܲܐܟܪܸܙ ܠܗܘ݁ܢ݁ ܠܲܒܢ̈ܲܝ ܦܵܪܸܣ ܕܢܸܬܛܲܝܒܽܘܢ ܕܲܕܢܲܚ ܡܲܠܟܵܐ ܕܠܸܗ ܢܸܣܓܕܽܘܢ܀
07 ܩܪܵܬ ܠܲܡܓܽܘ̈ܫܸܐ ܘܸܐܡܪܲܬ ܠܗܘ݁ܢ ܫܒܼܝܚܬܵܐ ܐܵܬܽܘܪ ܟܲܕ ܐܲܪܓܫܲܬ݁ ܕܣܲܒܘ ܩܽܘܪ̈ܒܵܢܸܐ ܘܙܸܠܘ ܝܲܩܪܽܘܗܝ ܠܡܲܠܟܵܐ ܪܲܒܵܐ ܕܒܼܝܗܽܘܕ ܕܢܲܚ܀
08 ܪܹ̈ܝܫܲܝ ܦܵܪܸܣ ܟܲܕ ܪܵܘܙܼܝܢ ܛܥܸܢܘ ܩܽܘܪ̈ܒܵܢܸܐ ܡܸܢ ܐܲܬܪܗܘ݁ܢ݁ ܘܲܐܝܬܼܝܘ ܠܲܒܪܵܐ ܕܲܒܬܽܘܠܬܵܐ ܕܲܗܒܵܐ ܘܡܽܘܪܵܐ ܘܲܠܒܽܘܢܬܵܐ܀
09 ܐܲܝܟ ܝܲܠܽܘܕܵܐ ܥܲܠܘ ܐܸܫܟܚܽܘܗܝ ܕܲܫܪܵܐ ܒܒܲܝܬܵܐ ܕܡܸܣܟܼܢ̄ܬܵܐ݁ ܘܲܒܪܸܟܘ ܘܲܣܓܸܕܘ ܟܲܕ ܕܵܝܨܼܝܢ ܘܩܲܪܸܒܘ ܩܕܵܡܲܘܗܝ ܣܼܝ̈ܡܵܬܗܘ݁ܢ܀
10 ܡܲܪܝܲܡ܃ ܐܵܡܪܵܐ ܡܲܪܝܲܡ ܗܵܠܸܝܢ ܠܡܲܢ ܘܡܸܛܽܠ ܡܵܢܵܐ ܘܡܵܢ ܥܸܠܬܵܐ݁ ܩܪܵܬܟܽܘܢ ܕܬܼܐܬܽܘܢ ܡܸܢ ܐܲܬܪܟܽܘܢ ܨܹܝܕ ܝܲܠܽܘܕܵܐ ܒܣܼܝ̈ܡܵܬܟܽܘܢ܀
11 ܡܓܽܘ̈ܫܸܐ܃ ܐܵܡܪܼܝܢ ܡܓܽܘ̈ܫܸܐ ܡܲܠܟܵܐ ܗ̄ܘ ܒܪܸܟܝ ܘܩܵܛܲܪ ܬܵܓܸ̈ܐ ܘܡܵܪܵܐ ܕܟܽܠ݁ ܘܪܲܒ ܫܽܘܠܛܵܢܸܗ ܥܲܠ ܥܵܠܡܵܐ ܘܲܠܡܲܠܟܽܘܬܸܗ ܟܽܠ ܡܸܫܬܡܲܥ܀
12 ܡܲܪܝܲܡ܃ ܒܲܐܝܢܵܐ ܙܲܒܢܵܐ ܗܵܕܸܐ ܗܘܵܬ ܕܬܼܐܠܲܕ ܡܲܠܟܵܐ ܡܸܣܟܼܢ̄ܬܵܐ݁ ܕܲܣܢܼܝܩܵܐ ܐ̄ܢܵܐ ܘܲܡܓܲܙܝܵܢܝ ܘܲܐܝܟܲܢ ܡܲܠܟܵܐ ܡܸܢܝ ܡܸܬܚܙܸܐ܀
13 ܡܓܽܘ̈ܫܸܐ܃ ܒܸܟܝ ܒܲܠܚܽܘܕܲܝܟܝ ܗܵܕܸܐ ܗ̄ܘܵܬ ܕܡܲܠܟܵܐ ܪܲܒܵܐ ܒܸܟܝ ܢܸܬܚܙܸܐ݁ ܘܡܸܣܟܼܢܽܘܬܸܟܝ ܒܸܗ ܝܵܪܒܵܐ ܕܠܲܒܪܸܟܝ ܬܵܓܸ̈ܐ ܡܸܫܬܲܥܒܕܼܝܢ܀
14 ܡܲܪܝܲܡ܃ ܓܲܙܵܐ ܕܡܲܠܟܸ̈ܐ ܠܵܐ ܐܼܝܬ ܠܼܝ ܒܥܽܘܬܪܵܐ ܡܸܡܬܽܘܡ ܠܵܐ ܦܓܼܝܥ ܠܼܝ݁ ܒܲܝܬܵܐ ܡܸܣܟܼܝܢ ܘܥܽܘܡܪܵܐ ܣܦܼܝܩ ܘܲܕܡܲܠܟܵܐ ܗ̄ܘ ܒܸܪܝ ܠܵܐ ܬܲܟܪܙܽܘܢ܀
15 ܡܓܽܘ̈ܫܸܐ܃ ܓܲܙܵܐ ܪܲܒܵܐ ܐܼܝܬܲܘܗܝ ܒܪܸܟܝ ܘܥܽܘܬܪܵܐ ܕܣܵܦܸܩ ܢܲܥܬܲܪ ܠܟܽܠ݁ ܕܓܲܙܸ̈ܐ ܕܡܲܠܟܸ̈ܐ ܡܸܬܡܲܣܟܢܼܝܢ ܘܗܽܘ ܠܵܐ ܚܵܣܲܪ ܐܲܘ ܡܸܬܬܟܼܝܠ܀
16 ܡܲܪܝܲܡ܃ ܕܲܠܡܵܐ ܐ̄ܚܪܼܢܵܐ ܗ̄ܘ ܗܲܘ ܕܼܝܠܟܽܘܢ ܡܲܠܟܵܐ ܕܼܝܠܼܝܕ ܥܲܩܸܒܘ ܥܠܲܘܗܝ݁ ܕܗܵܢܵܐ ܒܪܵܗ݀ ܗ̄ܽܘ ܕܡܸܣܟܼܢ̄ܬܵܐ ܕܬܸܚܙܸܐ ܠܡܲܠܟܵܐ ܠܵܐ ܣܵܦܩܵܐ܀
17 ܡܓܽܘ̈ܫܸܐ܃ ܕܲܠܡܵܐ ܡܲܨܝܵܐ ܢܸܛܥܸܐ ܡܬܽܘܡ ܐܽܘܪܚܵܐ ܢܽܘܗܪܵܐ ܡܵܐ ܕܡܸܫܬܲܠܗܲܒ݁ ܠܲܘ ܚܸܫܽܘܟܵܐ ܩܪܵܐ ܘܲܐܦܩܲܢ ܒܢܽܘܗܪܵܐ ܪܕܲܝܢܲܢ ܘܡܲܠܟܵܐ ܗ̄ܘ ܒܪܸܟܝ܀
18 ܡܲܪܝܲܡ܃ ܗܵܐ ܚܵܙܸܝܬܽܘܢ ܥܽܘܠܵܐ ܫܠܸܐ ܘܒܲܝܬܵܐ ܕܸܐܡܸܗ ܡܓܲܙܲܝ ܣܢܼܝܩ݁ ܘܫܲܪܒܵܐ ܕܡܲܠܟܵܐ ܠܵܐ ܐܼܝܬ ܒܸܗ ܘܲܐܝܟܲܢ ܡܲܠܟܵܐ ܒܸܗ ܡܸܬܚܙܸܐ܀
19 ܡܓܽܘ̈ܫܸܐ܃ ܗܵܐ ܚܵܙܸܝܢܲܢ ܕܲܫܠܸܐ ܘܢܼܝܚ ܛܲܠܝܵܐ ܘܡܲܟܼܝܟ ܐܲܝܟ ܕܵܐܡܪܲܬܝ݁ ܘܚܵܙܸܝܢܲܢ ܬܽܘܒ ܕܲܠܟܲܘ̈ܟܒܸܐ ܒܪܲܘܡܵܐ ܡܲܢܗܲܪ ܕܲܢܣܲܒܪܽܘܢ܀
20 ܡܲܪܝܲܡ܃ ܘܵܠܸܐ ܗ̄ܘܵܐ ܐ̄ܢܵܫ̈ܵܐ ܕܲܬܥܲܩܒܽܘܢ ܡܲܢܽܘ ܡܲܠܟܵܐ ܘܟܸܢ ܬܸܣܓܕܽܘܢ݁ ܕܲܠܡܵܐ ܐܽܘܪܚܵܐ ܐܸܫܬܲܚܠܦܲܬ ܘܡܲܠܟܵܐ ܗ̄ܘ ܐ̄ܚܪܼܢܵܐ ܗܲܘ ܕܸܐܬܼܝܠܸܕ܀
21 ܡܓܽܘ̈ܫܸܐ܃ ܘܵܠܸܐ ܗ̄ܘ ܛܠܼܝܬܵܐ ܕܲܬܩܲܒܠܼܝܢ ܕܼܝܠܸܦܢܲܢ ܠܲܢ ܕܡܲܠܟܵܐ ܗ̄ܘ ܒܪܸܟܝ݁ ܡܸܢ ܢܲܗܼܝܪܵܐ ܠܵܐ ܡܸܬܥܒܲܪ ܕܫܲܦܝܵܐ ܗ̄ܝ ܐܽܘܪܚܸܗ ܘܗܽܘ ܐܲܝܬܝܲܢ܀
22 ܡܲܪܝܲܡ܃ ܙܥܽܘܪ ܝܲܠܽܘܕܵܐ ܘܗܵܐ ܠܲܝܬ ܠܸܗ ܬܵܓܵܐ ܕܡܲܠܟܵܐ ܘܠܵܐ ܟܽܘܪܣܝܵܐ݁ ܘܡܵܢܵܐ ܚܙܲܝܬܽܘܢ ܕܲܬܩܲܪܒܽܘܢ ܐܲܝܟ ܕܲܠܡܲܠܟܵܐ ܣܼܝ̈ܡܵܬܟܽܘܢ܀
23 ܡܓܽܘ̈ܫܸܐ܃ ܙܥܽܘܪ ܥܲܠ ܕܲܨܒܵܐ ܘܡܸܛܽܠ ܕܢܼܝܚ ܛܲܠܝܵܐ ܘܡܲܟܼܝܟ ܥܲܕ ܡܸܬܓܠܸܐ݁ ܘܼܐܝܬ ܠܸܗ ܙܲܒܢܵܐ ܕܢܸܬܟܲܦܦܽܘܢ ܟܽܠܗܘ݁ܢ ܬܵܓܸ̈ܐ ܘܠܸܗ ܢܸܣܓܕܽܘܢ܀
24 ܡܲܪܝܲܡ܃ ܚܲܝ̈ܠܲܘܵܬܵܐ ܠܵܐ ܐܼܝܬ ܠܸܗ ܘܠܵܐ ܠܸܓܝܽܘ̈ܢܸܐ ܘܣܸܕܪܸ̈ܐ ܠܒܸܪܝ݁ ܒܡܸܣܟܼܢܽܘܬܵܐ ܕܸܐܡܸܗ ܫܠܸܐ ܘܡܸܢܟܽܘܢ ܡܲܠܟܵܐ ܠܡܵܢ ܡܸܬܟܪܸܙ܀
25 ܡܓܽܘ̈ܫܸܐ܃ ܚܲܝ̈ܠܲܘܵܬܵܐ ܕܲܒܪܸܟܝ ܠܥܸܠ ܪܟܼܝܒܼܝܢ ܪܲܘܡܵܐ ܘܡܸܬܓܲܘܙܠܼܝܢ݁ ܘܡܸܢ ܚܲܕ ܡܸܢܗܘ݁ܢ ܕܸܐܬܵܐ ܩܪܵܢ ܟܽܠܵܗ݀ ܦܢܼܝܬܲܢ ܐܸܫܬܲܓܫܲܬ܀
26 ܡܲܪܝܲܡ܃ ܛܠܸܐ ܝܲܠܽܘܕܵܐ ܘܲܐܝܟܲܢ ܦܫܼܝܩ ܕܢܸܗܘܸܐ ܡܲܠܟܵܐ ܥܲܠ ܥܵܠܡܵܐ݁ ܘܲܠܓܲܢ̄ܒܵܪܸ̈ܐ ܘܠܲܡܫܲܡ̈ܗܸܐ ܐܲܝܟܲܢ ܫܲܒܪܵܐ ܡܕܲܒܲܪ ܠܗܘ݁ܢ܀
27 ܡܓܽܘ̈ܫܸܐ܃ ܛܲܠܝܸܟܝ ܣܵܒܵܐ ܗ̄ܘ ܐܵܘ ܥܠܲܝܡܬܵܐ ܘܥܲܬܼܝܩ ܝܲܘ̈ܡܸܐ ܘܩܲܕܼܝܡ ܠܟܽܠ݁ ܘܵܐܕܵܡ ܣܲܓܼܝ ܡܸܢܸܗ ܛܠܸܐ ܘܒܸܗ ܒܸܪ̈ܝܵܬܵܐ ܡܸܬܕܲܒܪ̈ܵܢ܀
28 ܡܲܪܝܲܡ܃ ܝܵܐܸܐ ܗ̄ܘ ܣܲܓܼܝ ܕܲܬܦܲܫܩܽܘܢ ܟܽܠܸܗ ܫܲܪܒܵܐ ܘܲܬܢܲܗܪܽܘܢ݁ ܡܲܢܽܘ ܓܠܵܐ ܠܟܽܘܢ ܐ̄ܪܵܙܸܗ ܕܒܸܪܝ ܕܼܐܝܬܲܘܗܝ ܡܲܠܟܵܐ ܒܲܦܢܼܝܬܟܽܘܢ܀
29 ܡܓܽܘ̈ܫܸܐ܃ ܝܵܐܸܐ ܗ̄ܘ ܐܵܦ ܠܸܟܝ ܕܲܬܩܲܒܠܼܝܢ ܕܸܐܠܽܘ ܫܪܵܪܵܐ ܠܵܐ ܐܲܝܬܝܲܢ݁ ܠܲܘ ܡܸܢ ܥܸܒܪܸ̈ܝܗ݀ ܕܲܐܪܥܵܐ ܠܟܵܐ ܛܥܲܝܢܲܢ ܘܸܐܬܲܝܢ ܡܸܛܽܠ ܒܪܸܟܝ܀
30 ܡܲܪܝܲܡ܃ ܟܽܠܸܗ ܐ̄ܪܵܙܵܐ ܐܲܝܟ ܕܸܐܣܬܥܲܪ ܠܘܵܬܟܽܘܢ ܬܲܡܵܢ ܒܲܦܢܼܝܬܟܽܘܢ݁ ܓܠܲܘ ܠܼܝ ܗܵܫܵܐ ܐܲܝܟ ܪ̈ܵܚܡܸܐ ܕܡܲܢܽܘ ܩܪܵܟܽܘܢ ܕܬܼܐܬܽܘܢ ܠܘܵܬܝ܀
31 ܡܓܽܘ̈ܫܸܐ܃ ܟܲܘܟܒܵܐ ܪܲܒܵܐ ܠܲܢ ܐܸܬܚܙܼܝ ܕܲܫܒܼܝܚ ܣܲܓܼܝ ܡܸܢ ܟܲܘ̈ܟܒܸܐ݁ ܘܲܐܪܥܲܢ ܒܢܽܘܗܪܸܗ ܐܸܬܓܲܘܙܠܲܬ ܘܕܲܕܢܲܚ ܡܲܠܟܵܐ ܗܽܘ ܣܲܒܪܲܢ܀
32 ܡܲܪܝܲܡ܃ ܠܵܐ ܒܵܥܝܵܐ ܐ̄ܢܵܐ ܕܲܬܡܲܠܠܽܘܢ ܗܵܠܸܝܢ ܒܲܐܬܪܵܐ ܕܠܵܐ ܢܸܪܓܫܽܘܢ݁ ܡܲܠܟܸ̈ܐ ܕܲܐܪܥܵܐ ܘܢܸܬܠܲܚܡܘ݁ܢ ܥܲܠ ܝܲܠܽܘܕܵܐ ܒܲܚܣܵܡܗܘ݁ܢ܀
33 ܡܓܽܘ̈ܫܸܐ܃ ܠܵܐ ܬܸܬܪܲܗܒܼܝܢ ܐܵܘ ܥܠܲܝܡܬܵܐ ܕܟܽܠܗܘ݁ܢ ܬܵܓܸ̈ܐ ܫܵܪܸܐ ܒܪܸܟܝ݁ ܘܲܬܚܸܝܬ ܥܸܩܒܸܗ ܣܵܐܸܡ ܠܗܘ݁ܢ ܘܠܵܐ ܡܲܟܸܝܢ ܠܸܗ ܐܸܢ ܚܵܣܡܼܝܢ܀
34 ܡܲܪܝܲܡ܃ ܡܸܢ ܗܸܪܽܘܕܽܘܣ ܡܸܣܬܲܪܗܒܵܢܝ ܟܲܠܒܵܐ ܦܲܩܪܵܐ ܕܠܵܐ ܢܲܕܠܚܲܢܝ݁ ܘܢܸܫܡܽܘܛ ܚܲܪܒܸܗ ܘܒܸܗ ܢܸܬܩܛܸܦ ܣܓܽܘܠܵܐ ܚܲܠܝܵܐ ܟܲܕ ܠܵܐ ܒܫܼܝܠ܀
35 ܡܓܽܘ̈ܫܸܐ܃ ܡܸܢ ܗܸܪܽܘܕܽܘܣ ܠܵܐ ܬܸܕܚܠܼܝܢ ܕܒܼܐܝ̈ܕܲܘܗܝ ܕܲܒܪܸܟܝ ܣܼܝܡ ܟܽܘܪܣܝܸܗ݀ ܘܡܸܚܕܵܐ ܕܨܵܠܸܐ ܢܵܕ ܘܸܐܣܬܚܸܦ ܘܲܢܦܲܠ ܬܵܓܸܗ ܘܣܵܦ ܕܵܘܝܵܐ܀
36 ܡܲܪܝܲܡ܃ ܢܲܚܠܵܐ ܗ̄ܝ ܕܲܕܡܵܐ ܐܽܘܪܼܫܠܸܝܡ ܕܒܸܗ ܫܲܦܼܝܪܸ̈ܐ ܡܸܬܚܲܒܠܼܝܢ݁ ܘܸܐܢ ܪܵܓܫܵܐ ܒܸܗ ܣܵܘܚܵܐ ܥܠܲܘܗܝ ܒܐ̄ܪܵܙܵܐ ܢܡܲܠܸܠ ܠܵܐ ܬܲܫܓܫܽܘܢ܀
37 ܡܓܽܘ̈ܫܸܐ܃ ܢܲܚ̈ܠܸܐ ܟܽܠܗܘ݁ܢ ܐܵܦ ܢܼܐܪ̈ܒܸܐ ܕܚܼܝ̈ܠܸܐ ܒܲܒܪܸܟܝ ܡܸܫܬܲܝܢܼܝܢ݁ ܘܩܵܗܝܵܐ ܚܲܪܒܵܗ݀ ܕܽܐܘܪܼܫܠܸܝܡ ܘܸܐܠܵܐ ܨܵܒܸܐ ܠܵܐ ܡܸܬܩܛܸܠ܀
38 ܡܲܪܝܲܡ܃ ܣܵܦܪܸ̈ܐ ܘܟܵܗ̈ܢܸܐ ܕܽܐܘܪܼܫܠܸܝܡ ܡܢܲܦܩܼܝܢ ܒܲܕܡܵܐ ܘܸܐܢ ܡܲܪܓܫܼܝܢ݁ ܡܥܼܝܪܼܝܢ ܗܸܪܬܵܐ ܩܵܛܽܘܠܬܵܐ ܥܠܲܝ ܘܥܲܠ ܛܲܠܝܵܐ ܡܓܽܘ̈ܫܸܐ ܫܠܲܘ܀
39 ܡܓܽܘ̈ܫܸܐ܃ ܣܵܦܪܸ̈ܐ ܘܟܵܗ̈ܢܸܐ ܠܵܐ ܡܸܫܟܚܼܝܢ ܕܢܲܟܽܘܢ ܠܲܒܪܸܟܝ ܒܲܚܣܵܡܗܘ݁ܢ݁ ܕܒܸܗ ܡܸܫܬܲܪܝܵܐ ܟܵܗܢܽܘܬܗܘ݁ܢ ܘܥܲܕܥܼܐܕܲܝ̈ܗܘ݁ܢ ܡܸܬܒܲܛܠܼܝܢ܀
40 ܡܲܪܝܲܡ܃ ܥܼܝܪܵܐ ܓܠܵܐ ܠܼܝ ܟܲܕ ܩܲܒܠܸܬ ܒܲܛܢܵܐ ܕܛܲܠܝܵܐ ܕܡܲܠܟܵܐ ܗ̄ܘ ܒܪܸܟܝ݁ ܘܲܕܪܵܡ ܬܵܓܸܗ ܘܠܵܐ ܡܸܫܬܪܸܐ ܗܽܘ ܒܲܕܸܩ ܠܼܝ ܐܲܟܘܵܬܟܽܘܢ܀
41 ܡܓܽܘ̈ܫܸܐ܃ ܥܼܝܪܵܐ ܡܵܕܸܝܢ ܕܸܐܡܲܪܬܝ ܥܠܲܘܗܝ ܗܽܘܝܽܘ ܕܲܩܪܵܢ ܐܲܝܟ ܟܲܘܟܒܵܐ݁ ܘܸܐܬܚܲܘܼܝ ܠܲܢ ܕܲܢܣܲܒܪܸܟܝ ܕܪܲܒ ܗ̄ܽܘ ܘܲܫܒܼܝܚ ܡܸܢ ܟܲܘ̈ܟܒܸܐ܀
42 ܡܲܪܝܲܡ܃ ܦܲܫܸܩ ܗ̄ܘܵܐ ܠܼܝ ܟܲܕ ܣܲܒܪܲܢܝ ܗܲܘ ܡܲܠܲܐܟܵܐ ܕܠܼܝ ܐܸܬܚܙܼܝ݁ ܕܲܠܡܲܠܟܽܘܬܸܗ ܣܽܘܦ ܠܵܐ ܢܗܸܐ ܘܐ̄ܪܵܙܵܐ ܢܛܼܝܪ ܠܼܝ ܕܠܵܐ ܢܸܬܓܠܸܐ܀
43 ܡܓܽܘ̈ܫܸܐ܃ ܦܲܫܸܩ ܠܲܢ ܬܽܘܒ ܐܵܦ ܟܲܘܟܒܵܐ ܕܩܵܛܲܪ ܬܵܓܸ̈ܐ ܐܼܝܬܲܘܗܝ ܒܪܸܟܝ݁ ܚܙܵܬܸܗ ܡܵܕܸܝܢ ܐܸܫܬܲܚܠܦܲܬ ܕܡܲܠܲܐܟܵܐ ܗ̄ܘܵܐ ܘܠܵܐ ܐܲܘܕܥܲܢ܀
44 ܡܲܪܝܲܡ܃ ܨܸܐܕܲܝ ܥܼܝܪܵܐ ܟܲܕ ܣܲܒܪܲܢܝ ܡܵܪܸܗ ܩܪܵܝܗܝ ܟܲܕ ܠܵܐ ܒܛܼܝܢ݁ ܘܒܲܪ ܥܸܠܵܝܵܐ ܠܼܝ ܐܲܟܪܙܸܗ ܘܲܐܝܟܲܘ ܐܲܒܽܘܗܝ ܠܵܐ ܝܵܕܥܵܢܝ܀
45 ܡܓܽܘ̈ܫܸܐ܃ ܨܸܐܕܲܝܟ ܐܲܟܪܙܸܗ ܐܵܦ ܟܲܘܟܒܵܐ ܕܡܵܪܸܐ ܪ̈ܲܘܡܸܐ ܗ̄ܘ ܕܸܐܬܼܝܠܸܕ݁ ܘܥܲܠ ܢܲܗܼܝܪܸ̈ܐ ܫܲܠܼܝܛ ܒܪܸܟܝ ܘܸܐܠܵܐ ܦܵܩܸܕ ܠܵܐ ܕܵܢܚܼܝܢ܀
46 ܡܲܪܝܲܡ܃ ܩܕܵܡܲܝܟܽܘܢ ܗܽ̄ܘ ܗܵܐ ܓܵܠܝܵܢܝ ܐ̄ܪܵܙܵܐ ܐ̄ܚܪܼܢܵܐ ܕܬܸܫܬܲܪܪܽܘܢ݁ ܕܲܒܬܽܘܠܵܐܼܝܬ ܝܸܠܕܲܬ ܒܪܵܐ ܕܒܲܪ ܐܲܠܵܗܵܐ ܗ̄ܘ ܙܸܠܘ ܣܲܒܪܽܘܗܝ܀
47 ܡܓܽܘ̈ܫܸܐ܃ ܩܲܕܸܡ ܐܲܠܸܦ ܠܲܢ ܐܵܦ ܟܲܘܟܒܵܐ ܕܒܲܪ ܐܲܠܵܗܵܐ ܗ̄ܘ ܐܵܦ ܡܵܪܝܵܐ݁ ܘܲܠܥܸܠ ܡܸܢ ܟܽܠ ܐܼܝܬܲܘܗܝ ܒܪܸܟܝ ܕܪܵܡ ܗ̄ܽܘ ܝܲܠܕܸܟܝ ܡܸܢ ܥܵܠܡܸ̈ܐ܀
48 ܡܲܪܝܲܡ܃ ܪܲܘܡܵܐ ܘܥܽܘܡܩܵܐ ܣܵܗܕܼܝܢ ܥܠܲܘܗܝ ܟܽܠܗܘ݁ܢ ܥܼܝܪܸ̈ܐ ܐܵܦ ܟܲܘ̈ܟܒܸܐ݁ ܕܒܲܪ ܐܲܠܵܗܵܐ ܗ̄ܘ ܐܵܦ ܡܵܪܝܵܐ ܐܲܘܒܸܠܘ ܛܸܒܸܗ ܠܲܦܢܼܝܬܟܽܘܢ܀
49 ܡܓܽܘ̈ܫܸܐ܃ ܪܲܘܡܵܐ ܟܽܠܸܗ ܒܚܲܕ ܟܲܘܟܒܵܐ ܫܲܓܫܵܗ݀ ܠܦܵܪܸܣ ܘܸܐܫܬܲܪܪܲܬ݁ ܕܡܲܠܟܵܐ ܪܲܒܵܐ ܐܼܝܬܲܘܗܝ ܒܪܸܟܝ ܘܠܸܗ ܟܽܠ ܥܲܡ̈ܡܼܝܢ ܡܸܫܬܲܥܒܕܼܝܢ܀
50 ܡܲܪܝܲܡ܃ ܫܠܵܡܵܐ ܐܲܘܒܸܠܘ ܠܲܐܪ̈ܥܵܬܟܽܘܢ ܫܲܝܢܵܐ ܢܸܣܓܸܐ ܒܽܐܘܚܕܵܢܟܽܘܢ݁ ܫܠܼܝ̈ܚܸܐ ܕܩܽܘܫܬܵܐ ܬܸܬܗܲܝܡܢܽܘܢ ܒܟܽܠܵܗ݀ ܐܽܘܪܚܵܐ ܕܡܲܪܕܼܝܬܟܽܘܢ܀
51 ܡܓܽܘ̈ܫܸܐ܃ ܫܠܵܡܸܗ ܕܲܒܪܸܟܝ ܗܽܘ ܢܲܘܒܠܲܢ ܒܫܲܝܢܵܐ ܠܲܐܬܪܲܢ ܐܲܝܟ ܕܸܐܬܲܝܢ݁ ܡܵܐ ܕܫܽܘܠܛܵܢܸܗ ܠܒܼܝܟ ܥܵܠܡܵܐ ܢܸܣܥܽܘܪ ܠܲܐܪܥܲܢ ܘܲܢܩܲܕܫܼܝܗ݀܀
52 ܡܲܪܝܲܡ܃ ܬܸܚܕܸܐ ܦܵܪܸܣ ܒܲܣܒܲܪܬܟܽܘܢ ܘܬܸܪܘܲܙ ܐܵܬܽܘܪ ܒܡܸܐܙܲܠܬܟܽܘܢ݁ ܘܡܵܐ ܕܡܲܠܟܽܘܬܸܗ ܕܒܸܪܝ ܐܲܨܡܚܲܬ ܢܣܼܝܡ ܗܽܘ ܢܼܝܫܸܗ ܒܲܦܢܼܝܬܟܽܘܢ܀
53 ܡܓܽܘ̈ܫܸܐ܃ ܬܸܪܘܲܙ ܥܹܕܬܵܐ ܟܲܕ ܙܵܡܪܵܐ ܫܽܘܒܚܵܐ ܒܝܲܠܕܸܗ ܕܲܡܪܲܝܡܵܐ݁ ܕܪܲܘܡܵܐ ܘܥܽܘܡܩܵܐ ܒܕܸܢܚܸܗ ܢܗܲܪܘ ܒܪܼܝܟ ܕܲܒܝܲܠܕܸܗ ܟܽܠ ܐܸܬܦܨܲܚ܀