← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: SoulBody3

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܢܲܦܫܵܐ ܘܦܲܓܪܵܐ
01 ܛܸܒܵܐ ܫܸܡܥܸܬ ܕܬܲܟܬܽܘܫܵܐ ܕܗܵܘܸܐ ܠܦܲܓܪܵܐ ܘܲܠܢܲܦܫܵܐ݁ ܘܪܸܓܸܬ ܒܲܕܡܽܘܬ ܦܵܪܽܘܫܵܐ ܕܸܐܚܙܸܐ ܕܡܲܢ ܚܵܢܸܐ ܠܢܼܝܫܵܐ܀
02 ܢܲܦܫܵܐ ܐܵܡܪܵܐ ܢܲܦܫܵܐ ܟܡܵܐ ܐܸܠܐܸܐ ܒܥܽܘܕܪ̈ܵܢܸܐ ܘܲܒܒܽܘ̈ܝܵܐܸܐ݁ ܘܦܲܓܪܵܐ ܓܪܲܦ ܠܼܝ ܒܡܸ̈ܠܐܸܐ ܕܲܣܢܼܝܬܸܗ ܘܠܲܟܝܵܢܝ ܡܲܠܐܸܐ܀
03 ܦܲܓܪܵܐ ܐܲܓܼܝܒ ܦܲܓܪܵܐ ܕܠܵܐ ܝܵܐܸܐ ܕܸܐܓܠܸܐ ܠܒܼܝ̈ܫܵܬܸܟܝ ܘܠܵܐ ܦܐܸܐ݁ ܒܕܲܠܟܽܠ ܣܽܘܪ̈ܚܵܢܼܝܢ ܡܠܽܘ̈ܐܸܐ ܐܲܢ̄ܬܝ ܐܲܘܫܸܛܬܝ ܠܼܝ ܕܸܐܬܓܲܐܸܐ܀
04 ܢܲܦܫܵܐ ܒܪܵܐ ܕܲܦܪܲܩ ܠܲܬܪܸܝܢ ܒܚܽܘܒܵܐ ܘܡܵܐܸܫ ܟܲܣ̈ܝܵܬܵܐ ܕܠܸܒܵܐ݁ ܣܵܗܸܕ ܠܼܝ ܕܡܸܢ ܟܽܠ ܓܲܒܵܐ ܣܸܕܪܸܬ ܥܠܲܝ ܩܪܵܒܵܐ ܪܲܒܵܐ܀
05 ܦܲܓܪܵܐ ܒܼܐܝ̈ܕܲܝܟܝ ܗ̄ܽܘ ܦܲܚܵܐ ܘܢܸܫܒܵܐ ܘܲܐܢ̄ܬܝ ܣܲܚܸܦܬܝ ܒܪܼܝܪܸ̈ܐ ܠܓܽܘܒܵܐ݁ ܒܫܽܘ̈ܕܵܠܲܝ ܒܼܝܫܬܸܟܝ ܕܝܵܪܒܵܐ ܘܒܸܟܝ ܗܵܦܸܟ ܫܢܵܢܵܐ ܠܚܲܪܒܵܐ܀
06 ܢܲܦܫܵܐ ܓܲܠܝܵܐ ܕܲܬܪܼܝܥܽܘܬ ܣܝܵܓܵܐ ܡܲܪܵܚܽܘܬܵܟ ܡܸܬܗܲܓܓܵܐ݁ ܘܫܵܒܝܵܐ ܠܙܲܘܥܵܐ ܪܲܓܽܘܓܵܐ ܒܪܸܓܬܵܐ ܕܲܒܚܸܡܬܵܐ ܡܙܼܝܓܵܐ܀
07 ܦܲܓܪܵܐ ܓܠܸܐ ܫܪܵܪܵܐ ܕܠܵܐ ܦܽܘܠܵܓܵܐ ܕܡܼܝܬܸܐ ܠܵܐ ܩܢܸܐ ܓܽܘܪܵܓܵܐ݁ ܥܲܠ ܟܽܠܡܵܐ ܕܼܐܝܬܲܘܗܝ ܪܓܼܝܓܵܐ ܡܵܕܸܝܢ ܐܲܢ̄ܬܝ ܗܼܝ ܕܲܡܓܲܪܓܵܐ܀
08 ܢܲܦܫܵܐ ܕܟܼܝܬܵܐ ܘܲܫܦܼܝܬܵܐ ܐܲܟܚܕܵܐ ܒܪܵܢܝ ܒܫܽܘܪܵܝܵܐ ܥܵܒܽܘܕܵܐ݁ ܘܚܲܫܲܝ̈ܟ ܐܵܘ ܦܲܓܪܵܐ ܢܕܼܝܕܵܐ ܫܲܟܪܽܘܢܝ ܠܬܽܘܩܵܢܝ ܒܚܽܘܝܵܕܵܐ܀
09 ܦܲܓܪܵܐ ܕܲܐܝܟ ܕܲܠܪܲܒܵܐ ܬܲܠܡܼܝܕܵܐ ܘܥܲܒܕܵܐ ܠܡܵܪܵܐ ܒܫܽܘܥܒܵܕܵܐ݁ ܐܼܝܬܲܝ ܠܸܟܝ ܗܵܕܸܐ ܣܗܼܝܕܵܐ ܘܲܐܢ̄ܬܝ ܩܲܒܸܠܬܝ ܕܠܵܐ ܟܽܘܚܵܕܵܐ܀
10 ܢܲܦܫܵܐ ܗܵܐ ܬܵܘܝܵܐ ܐ̄ܢܵܐ ܘܡܸܬܬܲܡܗܵܐ ܕܲܐܝܟܲܢ ܗܲܘܢܝ ܒܚܽܘ̈ܬܚܵܬܲܝܟ ܦܗܸܐ݁ ܘܲܐܘܒܸܕ ܡܥܲܠܝܽܘܬ ܫܽܘܡܵܗܵܐ ܕܨܲܠܡܵܐ ܪܲܒܵܐ ܕܲܐܠܵܗܵܐ܀
11 ܦܲܓܪܵܐ ܗܽܘ ܣܵܗܸܕ ܕܒܸܟܝ ܡܸܬܟܲܪܗܵܐ ܚܠܼܝܡܽܘܬ ܪܽܘܟܵܒܸܗ ܬܡܼܝܗܵܐ݁ ܘܗܵܘܸܐ ܒܲܥܦܼܝܦܽܘ ܟܪܼܝܗܵܐ ܘܪܸܓܲܬ ܒܸܣܪܵܐ ܒܸܗ ܢܵܒܗܵܐ܀
12 ܢܲܦܫܵܐ ܘܲܐܝܢܵܐ ܕܒܲܡܪ̈ܲܘܡܸܐ ܫܪܸܐ ܗ̄ܘܵܐ ܘܲܒܢܽܘܗܪܵܐ ܡܸܬܓܲܐܸܐ ܗ̄ܘܵܐ݁ ܟܲܕ ܠܚܸܫܟܵܟ ܡܸܬܬܲܚܬܸܐ ܗ̄ܘܵܐ ܠܡܘ݁ܢ ܠܝܵܬܸܗ ܠܵܐ ܐܵܠܸܐ ܗ̄ܘܵܐ܀
13 ܦܲܓܪܵܐ ܘܲܟܝܵܢܝ ܒܢܽܘܗܪܵܐ ܨܵܡܲܚ ܗ̄ܘܵܐ ܐܸܢܗܽܘ ܕܝܲܨܪܸܟܝ ܫܵܒܸܩ ܗ̄ܘܵܐ݁ ܘܥܲܡ ܥܸܠܵܝܸ̈ܐ ܡܕܲܝܲܪ ܗ̄ܘܵܐ ܐܸܠܽܘ ܟܝܵܢܸܟܝ ܨܵܒܸܐ ܗ̄ܘܵܐ܀
14 ܢܲܦܫܵܐ ܙܵܟܸܐ ܠܼܝ ܝܽܘܩܪܵܟ ܟܪܼܝܙܵܐ ܘܲܡܫܲܥܒܲܕ ܠܼܝ ܠܒܵܙܽܘܙܵܐ݁ ܘܢܵܓܸܕ ܠܼܝ ܝܲܨܪܵܟ ܠܙܼܝܙܵܐ ܨܹܝܕ ܕܽܘܒܵܪܵܐ ܡܲܟܪܙܵܐ܀
15 ܦܲܓܪܵܐ ܙܵܟܽܘܬܵܐ ܕܠܵܐ ܫܵܢܽܘܙܵܐ ܐܲܝܟܲܢ ܡܸܬܬܓܲܪ ܓܠܼܝܙܵܐ݁ ܘܲܐܝܟܲܢ ܗܵܘܸܐ ܓܵܠܽܘܙܵܐ ܘܥܲܦܪܵܢܵܐ ܠܪܽܘܚܵܐ ܓܢܼܝܙܵܐ܀
16 ܢܲܦܫܵܐ ܚܲܒܼܝܒܼܝܢ ܠܵܟ ܚܽܘ̈ܫܵܚܸܐ ܥܲܡ ܪܸ̈ܥܝܵܢܸܐ ܦܲܚܼܝ̈ܚܸܐ݁ ܘܠܼܝ ܣܵܗܕܼܝܢ ܟܝܵܢܸ̈ܐ ܫܒܼܝ̈ܚܸܐ ܕܪܵܡܼܝܢ ܡܸܢ ܗܵܠܸܝܢ ܛܲܘ̈ܚܸܐ܀
17 ܦܲܓܪܵܐ ܚܸܟܡܬܸܟܝ ܐ̄ܚܝܵܢܲܬ ܪܽܘܚܵܐ ܛܸܡܪܲܬ ܠܼܝ ܗܵܠܸܝܢ ܦܲܚܸ̈ܐ݁ ܘܸܐܠܵܐ ܐܲܝܟܲܢܵܐ ܡܸܬܕܚܸܐ ܡܸܢ ܥܲܦܪܵܐ ܟܝܵܢ ܦܵܪ̈ܽܘܚܸܐ܀
18 ܢܲܦܫܵܐ ܛܵܒ ܐܲܕܘܼܝܬܵܢܝ ܗܸܕܝܽܘܛܵܐ ܘܲܗܘܼܝܬ ܚܠܵܦ ܘܲܪܕܵܐ ܗܲܛܛܵܐ݁ ܘܸܐܫܬܲܠܡܸܬ ܠܢܵܓܕܵܐ ܕܫܲܒܛܵܐ ܕܡܵܪܵܐ ܕܲܐܪܓܙܸܬ ܘܸܐܣܲܩܛܵܐ܀
19 ܦܲܓܪܵܐ ܛܡܼܝܪ ܒܸܟܝ ܟܽܠ ܬܲܘܟܵܐ ܘܥܲܝܛܵܐ ܘܪܽܘܫܥܵܐ ܡܪܲܟܒܵܐ ܘܲܦܫܼܝܛܵܐ݁ ܘܲܟܝܵܢܸܟܝ ܡܲܓܕܵܗ݀ ܠܡܸܚܛܵܐ ܠܲܒܪܼܝܪܽܘܬܝ ܘܲܐܫܛܼܝ ܘܲܫܛܵܐ܀
20 ܢܲܦܫܵܐ ܝܽܘܩܢܵܐ ܥܲܒܕܲܢܝ ܒܵܪܽܘܝܵܐ ܕܨܲܠܡܸܗ ܒܥܵܠܡܵܐ ܬܲܚܬܵܝܵܐ݁ ܘܣܵܡܬ ܒܸܟܝ ܟܽܘܬܡܵܐ ܓܲܠܝܵܐ ܫܲܘܬܵܦܽܘܬ ܦܲܓܪܵܐ ܕܵܘܝܵܐ܀
21 ܦܲܓܪܵܐ ܝܵܡܸܐ ܐ̄ܢܵܐ ܕܼܐܝܬܲܝ ܡܒܲܪܝܵܐ ܡܸܢ ܚܣܵܡܵܐ ܕܒܲܨܠܸܡ ܡܵܪܝܵܐ݁ ܘܢܸܟܠܵܐ ܘܚܽܘܬܪܵܐ ܘܫܽܘܥܠܵܝܵܐ ܡܸܢܸܟܝ ܝܸܠܦܸܬ ܒܫܽܘܪܵܝܵܐ܀
22 ܢܲܦܫܵܐ ܟܲܠܠܲܢܝ ܒܲܟܠܼܝܠܵܐ ܕܡܲܠܟܸ̈ܐ ܘܲܐܥܬܪܲܢܝ ܒܡܲܘܬܪܵܢܽܘܬ ܡܲܠܟܸ̈ܐ݁ ܗܲܘ ܕܠܸܗ ܟܽܠܡܸܕܸܡ ܡܣܲܟܸܐ ܘܲܐܢ̄ܬ ܚܲܘܼܝܬܵܢܝ ܐܲܝܟ ܡܵܟܸ̈ܐ܀
23 ܦܲܓܪܵܐ ܟܣܸܝܢ ܒܸܟܝ ܦܽܘܪ̈ܣܸܐ ܠܵܐ ܡܣܲܝ̈ܟܸܐ ܘܝܲܡܵܐ ܪܲܒܵܐ ܕܦܽܘ̈ܫܵܟܸܐ݁ ܘܲܐܢ̄ܬܝ ܥܒܲܕܬܝ ܠܪ̈ܵܡܸܐ ܡܡܲܟ̈ܟܸܐ ܘܲܠܡܵܪ̈ܲܝ ܥܽܘܬܪܵܐ ܨܪܼ̈ܝܟܸܐ܀
24 ܢܲܦܫܵܐ ܠܵܐ ܣܢܼܝܩ ܗ̄ܽܘ ܟܝܵܢܝ ܥܲܠ ܐܽܘܟܠܵܐ ܘܠܵܐ ܥܲܠ ܒܲܝܬܵܐ ܘܬܲܛܠܼܝܠܵܐ݁ ܘܠܵܐ ܥܲܠ ܠܒܽܘܫܵܐ ܘܲܟܠܼܝܠܵܐ ܘܒܵܟ ܩܢܼܝܬ ܗܵܢ ܟܽܠܸܗ ܥܲܡܠܵܐ܀
25 ܦܲܓܪܵܐ ܠܼܝ ܕܼܐܝܬܲܝ ܟܝܵܢܵܐ ܫܲܦܠܵܐ ܘܥܲܦܪܵܐ ܚܲܪܫܵܐ ܘܠܵܐ ܡܠܼܝܠܵܐ݁ ܡܲܢ ܐܲܥܢܼܝ ܒܥܸܢܝܵܢ ܗܸܒܠܵܐ ܐܸܠܵܐ ܝܲܨܪܸܟܝ ܩܵܛܽܘܠܵܐ܀
26 ܢܲܦܫܵܐ ܡܲܠܟܬܵܐ ܘܲܡܠܸܝܢ ܟܽܠ ܚܸܟܡܵܐ ܣܵܡܲܢܝ ܒܵܪܽܘܝܵܐ ܒܥܵܠܡܵܐ݁ ܘܲܚܕܵܝܽܘܬܵܐ ܕܥܲܡ ܓܽܘܫܡܵܐ ܛܵܫܲܬ ܒܕܲܟܝܽܘܬܝ ܟܽܠ ܡܽܘܡܵܐ܀
27 ܦܲܓܪܵܐ ܡܸܠܬܸܟܝ ܥܒܲܕܬܲܢܝ ܛܵܠܽܘܡܵܐ ܘܢܸܨܒܲܬ ܒܼܝ ܢܼܝܫܵܐ ܡܕܲܪܡܵܐ݁ ܕܸܐܣܢܸܐ ܠܲܕܡܲܣ̈ܩܵܢ ܠܪܲܘܡܵܐ ܘܸܐܪܚܲܡ ܕܡܲܚ̈ܬܵܢ ܠܲܬܗܽܘܡܵܐ܀
28 ܢܲܦܫܵܐ ܢܼܝܫ ܗܵܢܲܘ ܕܟܽܠ ܕܡܸܫܬܲܓܢܸܐ ܒܙܲܒܢܵܢܵܝ̈ܵܬܵܐ ܘܙܲܒ̈ܢܸܐ݁ ܐܸܕܚܽܘܩ ܠܗܲܠ ܡܸܢ ܫܽܘܦܪܝ ܘܸܐܣܢܸܐ ܘܲܐܚܸܒ ܚܲܝܸ̈ܐ ܪ̈ܽܘܚܵܢܸܐ܀
29 ܦܲܓܪܵܐ ܢܽܘܗܪܵܐ ܕܲܕܠܵܐ ܐܽܘܪ̈ܓܲܢܸܐ ܨܵܪ ܠܼܝ ܘܠܸܟܝ ܠܵܐ ܡܽܘ̈ܡܬܵܢܸܐ݁ ܬܵܒܲܥ ܨܲܥܪܸܗ ܡܲܢ ܕܣܵܢܸܐ ܘܲܠܚܲܒܪܸܗ ܡܲܚܛܸܐ ܘܡܲܣܢܸܐ܀
30 ܢܲܦܫܵܐ ܣܽܘ̈ܟܵܠܸܐ ܒܟܽܠ ܢܵܡܽܘܣܵܐ ܝܲܗ̄ܒܬ ܠܕܸܐܫܟܲܚ ܒܸܝܬ ܓܲܘܣܵܐ݁ ܕܢܸܩܢܸܐ ܠܚܲܝ̈ܲܝܟ ܛܽܘܟܵܣܵܐ ܘܠܲܫܟܼܝܪܽܘܬܵܟ ܩܽܘܣܡܵܣܵܐ܀
31 ܦܲܓܪܵܐ ܣܲܟܠܽܘܬܵܐ ܒܸܟܝ ܗ̄ܽܘ ܣܒܼܝܣܵܐ ܘܲܒܒܼܝ̈ܫܵܬܵܐ ܠܸܟܝ ܡܥܲܣܥܣܵܐ݁ ܘܡܸܢ ܕܲܠܡܸܓܡܲܪ ܦܽܘܪܢܵܣܵܐ ܠܲܣܢܼܝܩܽܘܬܝ ܗܵܘܝܲܬܝ ܢܣܼܝܣܵܐ܀
32 ܢܲܦܫܵܐ ܥܲܡܵܟ ܐܲܣܪܲܢܝ ܝܵܕܽܘܥܵܐ ܘܫܲܘܬܦܲܢܝ ܒܚܲܫܲܝ̈ܟ ܘܲܒܡܲܕܥܵܐ݁ ܕܲܟܝܵܢܵܟ ܘܠܲܝܬ ܒܵܟ ܡܲܕܥܵܐ ܕܬܸܗܘܸܐ ܠܡܸ̈ܠܲܝ ܫܵܡܽܘܥܵܐ܀
33 ܦܲܓܪܵܐ ܥܲܛܠܽܘܬܸܟܝ ܠܵܐ ܡܸܫܬܲܡܥܵܐ ܕܬܸܬܕܲܡܸܐ ܠܬܵܓ̈ܡܸܐ ܬܸܫܥܵܐ݁ ܘܬܲܪܥܼܝܬܸܟܝ ܒܲܕܡܽܘܬ ܫܽܘܥܵܐ ܩܲܫܝܵܐ ܘܠܵܐ ܡܩܲܒܠܵܐ ܙܲܪܥܵܐ܀
34 ܢܲܦܫܵܐ ܦܽܘܠܚܵܢܵܐ ܬܲܩܢܵܐ ܘܢܲܟܦܵܐ ܕܡܲܩܢܸܐ ܝܽܘܬܪܵܢܵܐ ܥܦܼܝܦܵܐ݁ ܐܲܢ̄ܬ ܕܼܐܝܬܲܝܟ ܠܼܝ ܫܲܘܬܵܦܵܐ ܣܵܢܸܐ ܐܲܢ̄ܬ ܐܲܝܟ ܚܲܨܼܝܦܵܐ܀
35 ܦܲܓܪܵܐ ܦܲܪܼܝܕܵܐ ܫܸܢܲܬܝ ܒܚܼܐܦܵܐ ܕܒܼܝܫܬܸܟܝ ܪܲܒܬܵܐ ܒܲܪ̄ܬ ܢܸܩܦܵܐ݁ ܘܲܠܕܵܘܝܽܘܬܝ ܡܫܲܢܩܵܐ ܡܫܲܩܦܵܐ ܒܥܲܡܠܵܐ ܣܪܼܝܩܵܐ ܘܛܽܘܪܵܦܵܐ܀
36 ܢܲܦܫܵܐ ܨܸܒܝܵܢܝ ܢܲܩܼܝܦ ܠܲܬܪܼܝܨܵܐ ܘܨܵܒܸܐ ܒܚܲܝܸ̈ܐ ܘܬܽܘܪܵܨܵܐ݁ ܘܬܼܐܪܬܵܐ ܕܥܲܒܝܽܘܬܵܟ ܓܵܥܨܵܐ ܡܸܢ ܣܲܡ ܚܲܝܸ̈ܐ ܘܢܽܘܦܵܨܵܐ܀
37 ܦܲܓܪܵܐ ܨܒܽܘܬܵܐ ܕܝܽܘܬܪܵܢܵܐ ܡܲܩܨܵܐ ܒܗܵܢ ܥܵܠܡܵܐ ܘܲܒܝܽܘܡ ܩܸܨܵܐ݁ ܡܸܢ ܚܽܘ̈ܫܵܒܲܝܟܝ ܡܸܬܚܲܠܨܵܐ ܘܲܡܚܼܝܠܽܘܬܝ ܒܸܟܝ ܡܸܬܐܲܠܨܵܐ܀
38 ܢܲܦܫܵܐ ܩܲܛܼܝܢܽܘܬܝ ܬܸܗܘܸܐ ܡܵܪܩܵܐ ܠܠܲܥܓܽܘܬ ܠܸܫܵܢܵܟ ܦܼܐܩܵܐ݁ ܘܬܸܚܙܸܐ ܝܵܬܵܟ ܕܡܲܒܪܩܵܐ ܒܢܽܘܗܪܵܐ ܕܲܨܡܲܚ ܡܸܢ ܕܒܲܪܩܵܐ܀
39 ܦܲܓܪܵܐ ܩܽܘܫܬܵܐ ܕܠܸܗ ܥܲܣܩܬܵܐ ܦܫܼܝܩܵܐ ܣܵܗܸܕ ܠܠܸܫܵܢܝ ܫܲܬܼܝܩܵܐ݁ ܕܪܵܥܸܐ ܐ̄ܢܵܐ ܕܸܐܗܘܸܐ ܛܲܪܩܵܐ ܘܲܒܪܸܚܡܲܬ ܚܽܘܒܸܟܝ ܚܙܼܝܩܵܐ܀
40 ܢܲܦܫܵܐ ܪܵܚܡܵܐ ܐܼܝܬܲܝܟ ܫܲܪܼܝܪܵܐ ܘܡܲܫܟܢܵܐ ܕܲܢܝܵܚܵܐ ܘܫܽܘܦܪܵܐ݁ ܘܨܵܒܝܵܐ ܐ̄ܢܵܐ ܕܬܸܥܬܲܪ ܒܥܽܘܬܪܵܐ ܪܽܘܚܵܢܵܝܵܐ ܥܲܡ ܟܽܘܫܵܪܵܐ܀
41 ܦܲܓܪܵܐ ܪܸܥܝܵܢܸܟܝ ܢܸܗܘܸܐ ܡܫܲܪܪܵܐ ܒܣܲܒܪܵܐ ܕܛܵܒܬܵܐ ܕܠܵܐ ܦܵܛܪܵܐ݁ ܘܠܼܝ ܫܲܦܠܵܐ ܘܕܲܒܟܽܠ ܒܨܼܝܪܵܐ ܢܗܸܐ ܒܟܽܠܡܸܕܸܡ ܓܵܡܽܘܪܵܐ܀
42 ܢܲܦܫܵܐ ܫܒܽܘܩ ܠܥܵܠܡܵܐ ܡܠܸܐ ܫܽܘܓܵܫܵܐ ܕܣܲܓܼܝܐܼܝܢ ܒܸܗ ܬܲܘ̈ܫܸܐ݁ ܘܲܓܒܼܝ ܚܲܝܸ̈ܐ ܕܠܵܐ ܡܛܲܘ̈ܫܸܐ ܕܬܸܫܬܘܸܐ ܠܝܵܪܬܽܘܬ ܩܲܕܼܝ̈ܫܸܐ܀
43 ܦܲܓܪܵܐ ܫܵܠܸܡ ܐ̄ܢܵܐ ܠܗܵܠܸܝܢ ܢܼܝ̈ܫܸܐ ܘܣܵܢܸܐ ܐ̄ܢܵܐ ܚܸܫܟܵܐ ܕܚܲܫܸ̈ܐ݁ ܐܸܢ ܬܸܛܪܼܝܢ ܙܲܘ̈ܥܸܐ ܘܪܸ̈ܓܫܸܐ ܡܸܢ ܫܽܘ̈ܕܵܠܸܐ ܘܲܡܟܲܬܫܸ̈ܐ܀
44 ܢܲܦܫܵܐ ܬܵܐ ܠܵܟ ܐܵܘ ܦܲܓܪܵܐ ܡܼܝܬܵܐ ܣܲܒ ܚܽܘܠܡܵܢܵܐ ܘܚܲܝܽܘܬܵܐ݁ ܡܸܢ ܒܸܝܬ ܐܲܪ̈ܟܸܐ ܕܛܲܝܒܽܘܬܵܐ ܒܼܐܝ̈ܕܲܝ ܢܲܦܫܵܐ ܕܵܘܼܝܬܵܐ܀
45 ܦܲܓܪܵܐ ܬܸܗܘܸܐ ܡܸܠܬܸܟܝ ܬܲܚܘܼܝܬܵܐ ܕܚܵܝܵܐ ܠܲܩܢܽܘܡܝ ܒܲܗܼܝܬܵܐ݁ ܘܲܬܪܼܝܡܝ ܡܸܢܸܗ ܬܲܚܦܼܝܬܵܐ ܕܢܸܡܛܸܐ ܠܲܐܬܪܵܐ ܕܫܲܦܝܽܘܬܵܐ܀
46 ܬܸܫܒܽܘܚܬܵܐ ܒܩܼܝܢܬܵܐ ܚܠܼܝܬܵܐ ܠܡܵܪܵܐ ܕܫܵܪܸܐ ܠܡܲܨܽܘܬܵܐ݁ ܘܲܓܙܵܪ ܕܼܝܢܵܐ ܘܚܽܘܕܵܬܵܐ ܠܦܲܓܪܵܐ ܘܢܲܦܫܵܐ ܒܫܲܘܝܽܘܬܵܐ܀