The Comprehensive Aramaic Lexicon

Gen16:01	ושרי איתת אברם לא ילידת ליה ולה אמתא מצריתא ושמ{א}<ה> הגר ברת פרעה דיהב{א}<ה> לה לאמהו בזמן דנסב{א}<ה> ואיתכתש במימר מן קדם ייי
Gen16:02	ואמרת שרי לאברם הא כדון מנעני ייי מן למילד עול כדון לות אמתי ואחררינה מאים אתבני מינה וקביל אברם למימר שרי
Gen16:03	ודברת שרי איתת אברם ית הגר מצריתא אמתא מסוף עשר שנין למיתב אברם בארעא דכנען וחררתה ויהבת יתה לאברם בעלה ליה לאינתו
Gen16:04	וע{ו}ל לות הגר ועדיאת וחמת ארום עדי{ע}<א>ת וזללת איקר ריבונתא בעינהא

Gen16:05	ואמרת שרי לאברם כל עולבני מינך דהוינא רחיצא דתעבד דיני דאנא שבקית ארעי ובית איבא ועלית עימך לארע נוכריתא וכדון בגין דלא הוינא ילדא חררית אמתי ויהבת{א}<ה> למשכוב בעיטפך וחמת ארום עברת ו<א>יתבזי איקרי באנפהא וכדון אתגלי קדם ייי עולבני ויפרוש שלמיה בינא ובינך ותתמלי ארעא מינן ולא נצטרך לבנהא דהגר ברת פרעה בר נימרוד דטלקך לאתונא דנורא

Gen16:06	ואמר אברם לשרי הא אמתיך ברשותיך עיבידי לה דתקין בעיניכי וסגפת{א}<ה> שרי וערקת מן קדמה
Gen16:07	ואשכחה מלאכא דייי על עינא דמיא במדברא על עינא דבאורח חגרא
Gen16:08	ואמר הגר אמתא דשרי מן האן אנת אתיא ולאן תיזלין ואמרת מן קדם שרי ריבונתי אנא ערקת
Gen16:09	/ואמר לה מלאכא דייי תובי לות רבונתיך ואתכבשי תחות ידהא#01#/:
Gen16:10	ואמר לה מלאכא דייי אסגאה אסגי ית בנייכי ולא יתמנון מסגי
Gen16:11	ואמר לה מלאכא הא אנת מעברא ותלדין בר ותקרין ית שמיה ישמעאל ארום גלי קדם ייי סיגופיך
Gen16:12	ואיהוא יהוי מדמי לערוד בבני נשא ידויי יתפרעון מבעלי דבבוי וידי דבעלי< דבבוי> יתושטון לאבאשא ביה ועל אנפי כל אחוי יתערבב וישרי
Gen16:13	ואודיאת קדם ייי דמימריה מתמלל לה וכן אמרת אנת הוא חי וקיים דחמי ולא מתחמי ארום אמרת הא ברם הכא איתגליאת יקר שכינתא דייי חזוא בתר חזוא
Gen16:14	בגין כן קרא לבירא בירא דאיתגלי עלה חי וקיים והא היא יהיבא בין רקם ובין חלוצא
Gen16:15	וילידת הגר לאברם בר וקרא אברם שום בריה דילידת הגר ישמעאל
Gen16:16	ואברם בר תמנן ושית שנין כד ילידת הגר ית ישמעאל לאברם