The Comprehensive Aramaic Lexicon

Gen22:01	והוה בתר פיתגמיא האילין מן דינצו יצחק וישמעאל ישמעאל הוה אמר לי חמי למירות ית אבא דאנא בריה בוכרייא ויצחק הוה אמר לי חמי למירות ית אבא דאנא בר שרה אינתתיה ואנת בר הגר אמתא דאימי עני ישמעאל ואמר אנא זכאי יתיר מינך דאנא איתגזרית לתלסירי שנין ואין הוה צבותי למעכבא לא הוינא מסר נפשי לאתגזרא ואנת אתגזרת בר תמניא יומין אילו הוה בך מנדעא דילמא לא הוית מסר נפשך לאתגזרא מתיב יצחק ואמר האנא יומנא בר תלתין ושב שנין ואילו בעי קודשא בריך הוא לכולי איבריי לא הויתי מעכב מן יד אישתמעו פיתגמיא האילין קדם מרי עלמא ומן יד מימרא דייי נסי ית אברהם ואמר ליה אברהם ואמר ליה האנא
Gen22:02	ואמר דבר כדון ית ברך ית יחידך דאת רחים ית יצחק ואיזל לך לארע פולחנא ואסיקהי תמן לעלתא על חד מן טוורייא דאימר לך
Gen22:03	ואקדים אברהם בצפרא וזריז ית חמריה ודבר ית תרין טלייוי ית אליעזר וית ישמעאל עימיה וית יצחק בריה וקטע קיסין דזיתא ותאנתא ודיקלא דחזיין לעלתא וקם ואזל לאתרא דאמר ליה ייי
Gen22:04	ביומא תליתאה וזקף אברהם ית עינוי וחמא ענן איקרא קטיר על טוורא ואשתמודעיה מן רחיק
Gen22:05	ואמר אברהם לעולימוי אוריכ{ן}<ו> לכון הכא עם חמרא ואנא ועולימא נתמטי עד כא לבחוני אין יתקיים מה דאתבשרית כדין יהון בנך ונסגוד למרי עלמא ונתוב לוותכון
Gen22:06	ונסיב אברהם ית קיסי דעלתא ושוי עילוי יצחק בריה ונסיב בידיה ית אישתא וית סכינא ואזלו תרוויהום כחדא
Gen22:07	ואמר יצחק לאברהם אבוי ואמר אבא ואמר האנא ואמר הא אישתא וקיסין והאן אימרא לעלתא
Gen22:08	ואמר אברהם ייי יבחר ליה אימרא לעלתא ברי ואזלו תרויהום בלב שלים כחדא
Gen22:09	ואתו לאתרא דאמר ליה ייי ובנא תמן אברהם ית מדבחא דבנא אדם ואיתפכר במוי דטובענא ותב נח ובנייה ואיתפכר בדרא דפלוגתא וסדר ע{י}לוי ית קיסיא וכפת ית יצחק בריה ושוי יתיה על מדבחא לעיל מן קיסין:
Gen22:10	ופשט אברהם ית ידיה ונסיב׳<י>ת סכינא למיכס ית בריה עני ואמר יצחק לאבוי כפת יתי יאות דלא נפרכס מן צערא דנפשי ונדחי לגובא דחבלא וישתכח פסולא בקרבנך עיינויי דאברהם מסתכלן בעינויי דיצחק ועיינויי דיצחק מסתכלן למלאכי מרומא יצחק הוה חמי יתהום ואברהם לא חמי יתהום עניין מלאכי מרומא איתון חמון תרין יחידאין דאית בעלמא חד נכיס וחד מתנכיס דנכיס לא מעכב ודמתנכיס פשיט צווריה
Gen22:11	וקרא ליה מלאכא דייי מן שמיא ואמר ליה אברהם אברהם ואמר האנא
Gen22:12	ואמר אל תושיט ידך לטלייא ולא תעביד ליה מידעם ביש ארום כדון גלי קדמי ארום דחלא דייי אנת ולא עכיבתא ית ברך ית יחידך מיני
Gen22:13	וזקף אברהם ית עינוי וחזא והא דיכרא חד דאיתברי ביני שימשתא דשכלול עלמא אחיד ברחישותא דאילנא בקרנוי ואזל אברהם ונסיב יתיה ואסיקהי לעלתא חולף בריה
Gen22:14	ואודי וצלי אברהם תמן באתרא ההוא ואמר בבעו ברחמין מן קדמך ייי גלי קדמך דלא הוה בלבבי עוקמא ובעית למיעבד גזירתך בחדווא כדין כד יהון בנוי דיצחק ברי עליין לשעת אניקי תהוי מידכר להום ועני תהום ופריק יתהום ועתידין הינון כל דריא דקימון למהוי אמרין בטוורא הדין כפת אברהם ית יצחק בריה ותמן איתגליית עילוי שכינתא דייי
Gen22:15	וקרא מלאכא דייי לאברהם תניינות מן שמיא
Gen22:16	ואמר במימרי קיימית אמר ייי חולף דעבדת ית פיתגמא הדין ולא מנעת ית ברך ית יחידך
Gen22:17	ארום ברכא אברכינך ואסגא אסגי ית בנך ככוכבי שמיא והי כחלא דעל כיף ימא ויירתון בנך ית קוריי שנאיהון
Gen22:18	ויתברכון בגין זכוות בנך כל עממי ארעא חולף דקבילתא במימרי
Gen22:19	ודברו מלאכי מרומא ית יצחק ואובלוהי לבי מדרשא דשם רבא והוה תמן תלת שנין ובההוא יומא תב אברהם לות עולימוי וקמו ואזלו כחדא לבירא דשבע ויתיב אברהם בבירא דשבע

Gen22:20	והוה בתר פתגמיא האילין מן בתר דיכפת אברהם ית יצחק ואזל סטנא ותני לות שרה דאברהם נכס ית יצחק וקמת שרה ופגנת ואשתנקת ומיתת מן אניקא ואתא אברהם ובת באורחא ותניאו לאברהם למימר הא ילידת מילכה אף היא אתרווחת בזכותא דאחתה למילד בנין לנחור אחוך

Gen22:21	ית עוץ בוכריה וית בוז אחוי וית קמואל רב קסומיא דארמאי
Gen22:22	וית כשד וית חזו וית פלדש וית ידלף וית בתואל
Gen22:23	ובתואל אוליד ית רבקה תמניא אילין ילידת מלכה לנחור אחוי דאברהם
Gen22:24	ו{ת}פלקתיה ושמה ראומה וילידת אוף היא ית טבח וית גחם וית תחש וית מעכה