The Comprehensive Aramaic Lexicon

Gen25:01	ואוסיף אברהם ונסיב איתא ושמא קטורה היא הגר דקטירא ליה מן שירויא
Gen25:02	וילידת ליה ית זמרן וית יקשן וית מדן וית מדין וית ישבק וית שוח
Gen25:03	ויקשן אוליד ית שבא וית דדן ובני דדן הוון תגרין ואמפורין ורישי אומין
Gen25:04	ובני דמדין עיפה ועפר וחנוך ואבידע ואלדעה כל אילין בנהא דקטורא
Gen25:05	ויהב אברהם במתנה ית כל דליה ליצחק
Gen25:06	ולבניהום דפלקתין דלאברהם יהב אברהם ניכסין מיטלטלין למתנן ותריכינון מעילוי יצחק בריה עד דהוא בחיי ואזלו למיתב קידומא לארע מדינחא
Gen25:07	ואילין סכום יומי חיי אברהם דחיא מאה ושובעין וחמש שנין
Gen25:08	ואתנגיד ומית אברהם בשיבו טבא סיב ושבע כל טובא ברם ישמעאל עבד תתובא ביומוי ובתר כן אתכנש לעמיה
Gen25:09	וקברו יתיה יצחק וישמעאל בנוי למערת כפילתא לחקיל עפרון בר צחר חיתאה דעל אנפי ממרא
Gen25:10	חקלא דיזבן אברהם מן בני חיתאה תמן איתקבר אברהם ושרה אינתתיה
Gen25:11	ומן בגלל דלא אברהם צבי לברכא ית ישמעאל בגין כן לא בריך ית יצחק דאין הוה מבריך ליצחק ולא מבריך לישמעאל הוה נטיר ליה דב<ב>ו ובתר דמית אברהם בריך ייי ית יצחק בריה ויתיב יצחק סמיך לבירא דאתגלי עלוי יקר חי וקיים דחמי ולא מתחמי
Gen25:12	ואילין תולדת ישמעאל בר אברהם דילידת הגר מצריתא אמתא דשרה לאברהם
Gen25:13	ואילין שמהת בני ישמעאל בשומהון לתולדתהון בוכרא דישמעאל נבט וערב ואדבאל ומבשם
Gen25:14	וצאיתא ושתוקא וסוברא
Gen25:15	חריפא ותימא יטור נפיש וקדמה
Gen25:16	אילין הינון בנוי דישמעאל ואילין שומהון בכופרניהון ובקסטרוותהון תריסר רברבין לאומתהון
Gen25:17	ואילין שני חיי ישמעאל מאה ותלתין ושבע שנין והדר בתייובא ואיתנגיד ואתכנש לעמיה
Gen25:18	ושרו מן הנדקי עד חלוצא דעל אנפי מצרים מעלך לאתור על אנפי כל אחוי שרא באחסנתיה
Gen25:19	ואילין תולדת יצחק בר אברהם ומן בגלל דהוה איקונין דיצחק מדמיין לאיקונין דאברהם הוון בני נשא אמרין בקושטא אברהם אוליד ית יצחק
Gen25:20	והוה יצחק בר ארבעין שנין במיסביה ית רבקה ברת בתואל ארמאה דמן פדן ארם אחתיה דלבן ארמאה ליה לאינתו
Gen25:21	ואזל יצחק לטוור פולחנא אתר דכפתיה אבוי והפך יצחק בצלותיה דעתיה ממה דגזר על אינתתיה ארום עקרא הוות גביה עשרין ותרתין שנין ואתהפיך בגיניה דעתיה ממה דגזר עליה דאף הוא הוה עקר ואתרווח ואיתעברת רבקה אינתתיה
Gen25:22	ואידחיקו בניא במעהא הי כגיברין עבדי קרבא ואמרת אם כדין הוא צערא דילידתא למה דין לי בנין ואזלת לבי מדרשא דשם רבא למבעי רחמין מן קדם ייי

Gen25:23	ואמר ייי לה תרין עממין במעייכי ותרין מלכוון ממעייכי יתפרשון ומלכ{ן}<ו> ממלכ{ן}<ו> יהי אלים ורבא יהוי משתעבד לזעירא אם בנוי דזעירא נטרין פיקודייא דאורייתא

Gen25:24	ושלימו מאתן ושובעין יומי עיבורהא למילד והא תיומין במעהא
Gen25:25	ונפק קמאה סמוקריי כוליה ככלן/כבילנ#2#/ דשער וקרו שמיה עשו מן בגלל דאתיליד כוליה גמיר בשיער רישא ודיקנא ושינין וככין
Gen25:26	ובתר כדין נפק אחוי וידיה אחידא בעקיבא דעשו וקרא שמיה יעקב ויצחק בר שיתין שנין כד ילידת יתהום
Gen25:27	ורביאו טליא והוה עשו גבר נחשירכן למיצוד עופן וחיוון גבר נפיק חקל קטיל נפשן דהוא קטל ית נמרוד וית חנוך בריה ויעקב{ו} גבר שלים בעובדוי משמש בבי מדרשא דעבר תבע אולפן מן קדם ייי
Gen25:28	ורחים יצחק ית עשו ארום מלי רמייותא בפומיה ורבקה רחימת ית יעקב
Gen25:29	ובההוא יומא דמית אברהם בשיל יעקב תבשילי דטלופחי ואזל לנחמא לאבוי ואתא עשו מן ברא והוא משלהי ארום חמש עבירן עבר בההוא יומא פלח פולחנא נוכראה שפך אדמא זכיא ועל על עולימתא מארשה וכפר בחיי עלמא דאתי ובזה ית בכירותא
Gen25:30	ואמר עשו ליעקב אטעם יתי כדון מן תבשילא סמוקא הדין ארום משלהי אנא בגין כן קרא שמיה אדום
Gen25:31	ואמר יעקב זב{ו}<י>ן יומנא כיום דאנת עתיד למחסן ית בכירותא לי
Gen25:32	ואמר עשו הא אנא אזיל לממת ולית אנא חיי תוב בעלם אוחרן ולמה דנן לי בכירותא וחולקא בעלמא דאת אמר
Gen25:33	ואמר יעקב קיים לי כיום דיהי וקיים ליה וזבין ית בכירותיה ליעקב
Gen25:34	ויעקב יהב לעשו לחם ותבשיל דטלופחי ואכל ושתי וקם ואזל ושט עשו ית בכירותא וחולק עלמא דאתי