The Comprehensive Aramaic Lexicon

Exod04:01	ואתיב משה ואמר והא לא יהימנון לי ולא יקבלון מיני ארום יימרון לא איתגלי ייי
Exod04:02	ואמר ליה ייי מה דין בידך ואמר חוטרא
Exod04:03	ואמר טלוק יתיה לארעא וטלקיה לארעא והוה לחויא וערק משה מן קדמוי
Exod04:04	ואמר ייי למשה אושיט ידך ואיחוד בקוטניה ואושיט ידיה ואתקיף ביה והוה לחוטרא בידיה
Exod04:05	מן בגלל דיהמנון ארום אתגלי לך ייי אלקא דאבהתכון אלקיה דאברהם אלקיה דיצחק ואלקיה דיעקב
Exod04:06	ואמר ייי ליה תוב אעיל כדון ידך בחובך ואעל ידיה בגו חוביה והנפקא והא ידיה סגירתא מחוורא היא כתלגא
Exod04:07	ואמר אתיב ידך לעיטפך ואתיב ידיה לחוביה והנפקה ומן גו חוביה תבת למיהוי ברייא הי כבישריה
Exod04:09	ויהי אין לא יהימנון אוף לתרין אתייא האילין ולא יקבלון מינך ותיסב מן מוי דבנהרא ותשוד ליבשתא ויהון מוי דתיסב מן נהרא ויהון לדמא ביבשתא
Exod04:10	ואמר משה קדם ייי בבעו ייי לא גבר דברן אנא אוף מאיתמלי אוף מן לקדמוי אוף מן שעתא דמלילתא עם עבדך ארום חגר פום וקשי ממלל אנא
Exod04:11	ואמר ייי ליה מאן הוא דשוי ממלל פומא בפום אדם קדמאי או מאן שוי אילימא או חרשא או פתיחא או סמיא הלא אנא ייי
Exod04:12	וכדון איזל ואנא במימרי אהא עם ממלל פומך ואליף יתך מה דתמליל
Exod04:13	ואמר בבעו ברחמין מן קדמך ייי שלח כדון שליחותך ביד פינחס דחמי למשתלחא בסוף יומיא
Exod04:14	ותקיף רוגזא דייי במשה ואמר הלא אהרן אחוך לוואי גלי קדמי ארום מללא ימליל הוא ואוף הא הוא נפיק לקדמותך ויחמינך ויחדי בליביה
Exod04:15	ותמליל עימיה ותשוי ית פיתגמייא בפומיה ומימרי יהא עם מימר פומך ועם מימר פומיה ואליף יתכון ית מה דתעבדון
Exod04:16	וימלל הוא לך עם עמא ויהי הוא יהוי לך למתורגמן ואנת תהוי ליה לרב תבוע אולפן מן קדם ייי
Exod04:17	וית חוטרא הדין תיסב בידך דתעביד ביה ית אתייא
Exod04:18	ואזל משה ותב לות יתרו חמוי ואמר ליה איזיל כדון ואיתוב לות אחיי דבמצרים ואיחמי העד כדון אינון קיימין ואמר יתרו למשה איזיל לשלם

Exod04:19	ואמר ייי למשה במדין איזל תוב למצרים ארום איתרוקנו ונחתו מנכסיהון והא אינון חשיבין כמיתיא כל גוברייא דהוו תבעין ית נפשך למיסב יתה

Exod04:20	ודבר משה ית אינתתיה וית בנוי וארכיבינון על חמרא ותב לארעא דמצרים ונסיב משה ית חוטרא דנסב מן גינוניתא דחמוי והוא מספיר כורסי יקרא מתקליה ארבעין סאין וע{י}לוי חקיק ומפרש שמא רבא ויקירא וביה איתעבידו ניסין מן קדם ייי בידיה
Exod04:21	ואמר ייי למשה במהכך למתוב למצרים חמי כל תמהיא דשויתי בידך ותעבידינון קדם פרעה ואנא אתקיף ית יצרא דליביה ולא יפטור ית עמא
Exod04:22	ותימר לפרעה כדנא אמר ייי ברי בוכרי ישראל
Exod04:23	ואמרית לך פטור ית ברי ויפלח קדמוי ומסרב אנת למיפטריה הא אנא קטיל ית ברך בוכרך
Exod04:24	והוה באורחא בבית אבתותא וארע ביה מלאכא דייי ובעא למיקטליה מן בגלל גרשום בריה דלא הוה גזיר על עיסק יתרו חמוי דלא שבקיה למגזריה ברם אליעזר הוה גזר בתנאה דאתנייו תרוויהון
Exod04:25	ונסיבת צפורה טינרא וגזרת ית ערלת גרשום ברה ואקריבת ית גזירת מהולתא לריגלוי דמלאך חבלא ואמרת חתנא בעא למגזור וחמוי עכיב עלוי וכדון אדם גוזרתא הדין יכפר על חתנא דילי
Exod04:26	ופסק מלאך חבלא מיניה בכן שבחת צפורה ואמרת מה חביב הוא אדם גוזרתא הדין דשיזב ית חתנא מן ידוי דמלאך חבלא
Exod04:27	ואמר ייי לאהרן איזל לקדמות משה למדברא ואזל וארעיה בטוורא דאיתגלי עלוי יקרא דייי ונשיק ליה
Exod04:28	ותני משה לאהרן ית כל פיתגמייא האילין דשלחיה וית כל אתייא דפקדיה למעבד
Exod04:29	ואזל משה ואהרן וכנשו ית כל סבי בני ישראל
Exod04:30	ומליל אהרן ית כל פיתגמייא דמליל ייי עם משה ועבד אתייא לעיני עמא
Exod04:31	והימין עמא ושמעו ארום דכיר ייי ית בני ישראל וארום גלי קדמוי שיעבודהון וגחנו וסגידו