The Comprehensive Aramaic Lexicon

00100_20	ܕܟܽܠܝܽܘܡ ܣܵܓܸܐ ܠܟܽܠ ܕܵܐܟܸܠ ܠܸܗ ܡܸܢ ܦܵܬܽܘܪܸܗ܀
00100_21	ܪܸܫܡܲܬ̤ ܩܲܪܢܵܐ ܠܡܲܥܡܽܘܕܝܼܬܵܐ ܕܢܵܒܥܵܐ ܚܲܝܸ̈ܐ܃
00100_22	ܕܡܸܫܚܵܗ݀ ܙܲܗܝܵܐ ܠܵܐ ܡܬܽܘܡ ܚܵܣܲܪ ܟܲܕ ܡܵܫܬܲܦܲܥ܀
00100_23	ܨ݂ܵܪ ܗܼܘܵܐ ܡܸܫܚܵܐ ܠܗܵܕܸܐ ܡܥܝܼܢܵܐ ܕܲܡܫܝܼܚܽܘܬܵܐ܃
00100_24	ܕܫܵܩܸܠ ܡܸܢܵܗ݀ ܟܽܠܸܗ ܥܵܠܡܵܐ ܘܲܐܝܟ ܕܼܐܝܬܸܝܗ݀ ܗܝܼ܀
00100_25	ܘܩܲܡܚܵܐ ܠܦܲܓܪܵܐ ܕܵܐܟܠܝܼܢ ܥܲܡܡܸ̈ܐ ܘܥܵܠ̈ܡܸܐ ܡܸܢܸܗ܃
00100_26	ܘܗܽܘ ܠܵܐ ܡܲܘܦܸܐ ܕܣܲܒܥܵܐ ܗܼܽܘ ܪܲܒܵܐ ܠܲܒܢܲܝܢ̈ܵܫܸܐ܀
00100_27	ܐܲܝܟ ܗܵܝ݁ ܐܲܢܼܬܬܵܐ ܫ݂ܲܪܝܵܐ ܥܼܕܼܬܵܐ ܒܣܲܒܥܵܐ ܝܲܘܡܵܢ܃
00100_28	ܘܗܸܢܽܘܢ ܗܵܠܸܝܢ ܪ̈ܵܐܙܸܐ ܣܲܡܟܽܘܗ݀ ܠܗܵܝ ܬܼܐܚ݂ܸܐ ܗܼܘܵܬ܀
00100_29	ܠܒܲܪ ܡܸܢ ܥܼܕܼܬܵܐ ܝܲܘܡܵܢ ܚܲܝܸ̈ܐ ܒܥܵܠܡܵܐ ܠܵܐ ܐܝܼܬ܃
00100_30	ܘܠܵܐ ܠܗܵܠ ܣܲܒܥܵܐ ܠܒܲܪ ܡܸܢ ܒܲܝܬܵܗ݀ ܕܗܵܝ ܐܸܫܬܵܡܵܗ܀
00100_31	ܒܬܽܘܠܵܐ ܡܲܠܝܼ ܕܽܘܟܲܬ݁ ܓܲܒܪܵܗ݀ ܕܗܵܝ݁ ܐܲܪܡܲܠܬܵܐ܃
00100_32	ܘܲܐܚܝܼ ܐܵܦ ܠܵܗ݀ ܘܠ̈ܲܒܢܲܝ ܒܲܝܬܵܗ݀ ܒܗܲܘ݁ ܡܲ݁ܙܽܘܢܵܐ܀
00100_33	ܕܡܽܘܬܸܗ ܕܡܵܪܲܢ ܕܲܐܫ݂ܪܝܼ ܒܥܼܕܼܬܸܗ ܣܲܒܥܵܐ ܪܲܒܵܐ܃
00100_34	ܨ݂ܵܪ ܐܸܠܝܼܵܐ ܕܚܲܙܵܝܵܐ ܗܼܘܵܐ ܕܫܲܪܝܼܪ̈ܵܬܵܐ܀
00100_35	ܘܲܒܛܸܠܵܠܵܐ ܕܗܵܠܸܝܢ ܪ̈ܵܐܙܸܐ ܚܝܵܐ ܐܵܦ ܛܲܠܝܵܐ܃
00100_36	ܒܝܲܕ ܐܸܠܝܼܵܐ ܕܲܛܥܸܢ ܨܽܘܪܬܸܗ ܕܒܲܪ ܐܲܠܵܗܵܐ܀
00100_37	ܡܫܲܚ ܗܼܘܵܐ ܗܵܟܝܼܠ ܢܲܦܫܸܗ ܢܒܝܼܵܐ ܬܠܵܬ ܙܲܒܢ̈ܵܬܵܐ܃
00100_38	ܘܲܚ݂ܝܵܐ ܛܲܠܝܵܐ ܘܝܲܗܼܒܸܗ ܠܸܐܡܸܗ ܬܸܬܒܲܝܲܐܐ ܒܸܗ܀
00100_39	ܢܦܲܠ ܛܸܠܵܠܵܗ݀ ܕܨܽܘܪܬܸܗ ܕܡܵܪܵܢ ܥܲܠ ܗܵܘ ܡܝܼܬܵܐ܃
00100_40	ܘܙܸܠܥܲܬ̤ ܚܲܝܸ̈ܐ ܥܠܸܝܗ݀ ܕܲܫܠܲܕܵܐ ܠܡܸܬܢܲܚܵܡܽܘ܀
00100_41	ܢܨܲܚ ܐܸܠܝܼܵܐ ܒܕܲܐܪܵܐ ܕܲܥܒܲܕ ܥܲܡ ܐܲܒܕܵܢܵܐ܃
00100_42	ܕܡܸܢ ܒܸܝܬ ܫܸܢܸ̈ܐ ܕܡܲܘܬܵܐ ܫܠܲܕܵܐ ܫܩ݂ܲܠ ܒܲܛܢܵܢܸܗ܀
00100_43	ܕܠܲܩ ܗܼܘܵܐ ܫܪܵܓܵܗ݀ ܕܲܡܓܲܙܲܝܬܵܐ ܕܚܸܫܽܘܟܵܐ ܗܼܘܵܬ܃
00100_44	ܘܲܢܗܲܪ ܡܸܢܸܗ ܟܽܠܸܗ ܒܲܝܬܵܐ ܕܠܸܗ ܚܵܐܲܪ ܗܼܘܵܐ܀
00100_45	ܪܥܸܡ ܒܸܗ ܥܽܘܡܪܵܐ ܒܝܵܪܬܵܐ ܕܲܦܢܵܐ ܠܚܲܝܸ̈ܐ ܚܲܕܼܬܸܐ܃
00100_46	ܘܪܸܘ݂ܙܲܬ̤ ܐܲܢܼܬܬܵܐ ܒܝܼܚܝܼܕܵܝܵܗ݀ ܕܲܐܒܝܼܠܵܐ ܗܼܘܵܬ܀
00100_47	ܕܢܲܚ ܢܽܘܚܵܡܵܐ ܒܸܝܬ ܐܲܪܡܲܠܬܵܐ ܚܲܒܝܼܒܵܐܝܼܬ܃
00100_48	ܘܲܐܦܨܲܚ ܐܸܢܽܘܢ ܕܲܟܡܝܼܪܝܼܢ ܗܼܘܲܘ ܥܲܠ ܥܲܢܝܼܕܵܐ܀
00100_49	ܫܬܸܩܝ̈ ܝܼ̈ܠܠܵܬܵܐ ܘܒܸܟܝܵܐ ܪܲܒܵܐ ܕܼܐܝܬ ܗܼܘܵܐ ܬܲܡܵܢ܃
00100_50	ܘܩܵܠ̈ܲܝ ܫܽܘܒܚܵܐ ܡܸܢ ܟܽܠ ܦܽܘܡ̈ܝܼܢ ܡܸܫܬܲܡܥܝܼܢ ܗܼܘܲܘ܀
00100_51	ܙܟܵܐ ܐܸܠܝܼܵܐ ܠܡܲܘܬܵܐ ܘܲܐܗܦܸܟ ܡܝܼܬܵܐ ܠܸܐܡܸܗ܃
00100_52	ܘܙܸܡܪܲܬ̤ ܫܽܘܒܚܵܐ ܐܲܢܼܬܬܵܐ ܕܪ̈ܵܐܙܸܐ ܥܲܬܝܼܪܵܐܝܼܬ܀
00100_53	ܣܵܓܕܵܐ ܐܼܢܵܐ ܠܵܟ ܢܒܝܼܸܗ ܕܡܲܪܝܵܐ ܕܟܲܕ ܠܵܐ ܣܲܒܪܸܬ܃
00100_54	ܕܢܲܚ ܠܝܼ ܣܲܒܪܵܐ ܒܝܲܕ ܢܽܘܚܵܡܵܐ ܕܸܐܬܚܲܕܸܐ ܒܸܗ܀
00100_55	ܣܵܓܸܕ ܠܵܟ ܡܵܪܝ ܒܲܝܬܵܐ ܥܠܝܼܒܵܐ ܕܥܲܩܪܸܗ ܡܲܘܬܵܐ܃
00100_56	ܘܒܵܟ ܐܸܬܚܲܕܲܬ ܩܵܡ ܒܸܢܝܵܢܸܗ ܡܸܢ ܡܲܦܽܘܠܬܵܐ܀
00100_57	ܣܵܓܕ̈ܵܢ ܚܸܢܟ̈ܵܬܝ ܕܲܐܡܲܪ ܐܸܢܸܝ̈ܢ ܡܲܘܬܵܐ ܥܲܠ ܒܸܪܝ܃
00100_58	ܘܲܒܢܽܘܚܵܡܵܐ ܕܲܕܢܲܚ ܡܸܢܵܟ ܚܲܠܝܲܬ̤ ܐܸܢܸܝ̈ܢ܀
00100_59	ܡܲܘܕܸܐ ܠܵܟ ܡܵܪܝ ܥܽܘܡܪܵܐ ܕܲܐܪܡܸܠ ܡܸܢ ܥ݁ܡܘܪ̈ܐ܃
00100_60	ܕܸܐܬܵܐ ܝܵܪܬܵܐ ܡܸܢ ܒܸܝܬ ܡܝܼ̈ܬܸܐ ܕܲܢܕܲܝܲܪ ܒܸܗ܀
00100_61	ܟܽܠܵܗ݀ ܒܪܝܼܬܵܐ ܬܸܚܕܸܐ ܐܲܟܘܵܬܝ ܒܵܟ ܩܲܕܝܼܫܵܐ܃
00100_62	ܟܲܕ ܬܸܫܪܸܐ ܠܵܗ݀ ܐܵܦ ܠܵܗ݀ ܩܸܛܪܵܗ݀ ܕܲܐܠܝܼܨܵܐ ܒܸܗ܀
00100_63	ܐܲܝܟ ܕܲܦ݂ܢܵܐ ܒܸܪܝ ܢܸܬ݂ܦܲܢܸܐ ܠܵܗ݀ ܠܲܐܪܥܵܐ ܡܸܛܪܵܗ݀܃
00100_64	ܘܬܸܛܥ݂ܸܐ ܐܵܦ ܗܝܼ݂ ܚܲܫܵܗ݀ ܐܲܟܘܵܬܝ ܡܵܐ ܕܪܲܘܚ݂ܲܬ̤ ܠܵܗ݀܀
00100_65	ܐܲܝܟ ܕܲܐ݂ܦܨܲܚ݂ܬ̇ܵܗ ܠܲܡܓܲܙܲܝܬܵܐ ܥܲܠ ܚܲܒܝܼܒܵܗ݀܃
00100_66	ܢܸܬܦܲܨܚ̈ܵܢ ܒܵܟ ܐܵܦ ܚܲܩܠ̈ܵܬܵܐ ܒܲܓܕܝܼܫܲܝ̈ܗܸܝܢ܀
00100_67	ܐܲܝܟ ܕܸܐܬܦܲܢܝܼ ܛܲܠܝܵܐ ܥܠܝܼܒܵܐ ܠܥܽܘܒܵܐ ܕܸܐ݂ܡܸܗ܃
00100_68	ܢܸܬܦܲܢܸܐ ܠܸܗ ܐܲܦ ܠܲܐܟܵܪܵܐ ܐܸܕܪܸܗ ܒܼܐܝܕ̈ܲܝܟ܀
00100_69	ܐܲܝܟ ܕܸܐ݂ܬ݂ܲܘ ܠܸܗ ܚܲܝܸ̈ܐ ܠܡܝܼ݁ܬܵܐ ܡܸܢ ܒܥܲܘܵܬܲܝܟ܃
00100_70	ܬܲܝܬܸܐ ܨܠܽܘܬܵܟ ܡܸܛܪܵܐ ܘܛܲܠܠܵܐ ܠܥܵܠܡܵܐ ܕܝܼܒܸܫ܀