The Comprehensive Aramaic Lexicon

00320_7	ܓܒܲܐܽܘܗ̄ܝ ܢܸܗܘܸܐ ܪܝܼܫܵܐ ܠܥܲܡܵܐ ܒܨܲܘܡܵܐ ܕܲܓܙܲܪܘ܃
00320_8	ܘܲܒܢ̈ܲܝ ܥܲܘܠܵܐ ܬܪܸܝܢ ܐܲܩܸܦܘ ܠܸܗ ܐܲܝܟ ܕܝܼܠܸܦܘ ܗ̄ܘܲܘ܀
00320_9	ܫܽܘܒܚܵܐ ܠܵܟ ܡܵܪܝ ܕܲܒܟܽܠ ܕܵܪ̈ܝܼܢ ܩܸܛܠܵܟ ܕܝܼܠܵܟ܃
00321_0	ܡܸܬܢܲܨܲܪ ܗ̄ܘܵܐ ܨܹܝܕ ܦܵܪ̈ܽܘܫܸܐ ܚܲܒܝܼܒܵܐܝܼܬ܀
00321_1	ܟܽܠ ܙܲܕܝܼܩܸ̈ܐ ܕܡܝܼܬܘ ܒܲܚܣܵܡܵܐ ܡܲܘܬܵܟ ܐܲܟܪܸܙܘ܃
00321_2	ܘܟܽܠ ܡܲܢ ܕܲܛܠܝܼܡ ܘܲܢܟܝܼܠ ܘܲܩܛܝܼܠ ܒܵܟ ܐܸܬܕܲܡܝܼ܀
00321_3	ܐ̄ܪܵܙܸܗ ܕܡܵܪܲܢ ܥܲܡ ܟܽܠ ܕܵܪ̈ܝܼܢ ܡܸܬܝܲܒܲܠ ܗ̄ܘܵܐ܃
00321_4	ܘܲܕܡܸܗ ܚܲܣܝܵܐ ܨܝܼܪ ܗ̄ܘܵܐ ܒܟܼܐܢܸ̈ܐ ܡܵܐ ܕܡܸܬܩܲܛܠܝܼܢ܀
00321_5	ܘܗܵܢܵܐ ܢܵܒܽܘܬ ܕܵܐܦ ܗܽܘ ܥܠܝܼܒܵܐ ܘܲܛܠܝܼܡܵܐ ܗ̄ܘܵܐ܃
00321_6	ܡܲܘܬܸܗ ܕܡܵܪܲܢ ܨܝܼܪ ܗ̄ܘܵܐ ܒܡܲܘܬܸܗ ܟܲܕ ܡܸܬܩܲܦܲܚ܀
00321_7	ܬܪܸܝܢ ܥܲܘ̈ܵܠܸܐ ܡܸܢ ܝܲܡܝܼܢܸܗ ܘܡܸܢ ܣܸܡܵܠܸܗ܃
00321_8	ܐܲܝܟ ܓܲܝ̈ܵܣܸܐ ܬܪܸܝܢ ܕܲܡܫܝܼܚܵܐ ܒܛܽܘܦܣܵܐ ܓܲܠܝܵܐ܀
00321_9	ܓܵܓܽܘܠܬܵܐ ܗ̄ܘܵܬ ܗܵܝ ܒܵܥܽܘܬܵܐ ܠܗܲܘ ܙܲܕܝܼܩܵܐ܃
00322_0	ܕܵܐܦ ܗܽܘ ܟܸܢܫܵܐ ܕܨܵܠܽܘ̈ܒܸܐ ܗ̄ܘܵܐ ܐ̄ܪܵܙܵܢܵܐܝܼܬ܀
00322_1	ܢܸܚܙܸܐ ܗܵܫܵܐ ܠܵܐܚܵܒ ܡܲܠܟܵܐ ܐܲܝܟ ܗܸܪܽܘܕܸܣ܃
00322_2	ܘܲܢܨܽܘܪ ܒܼܐܝܙܒܸܠ ܠܵܗ݀ ܠܲܟܢܽܘܫܬܵܐ ܨܲܗܝܲܬ ܠܲܕܡܵܐ܀
00322_3	ܘܲܠܨܵܠܽܘ̈ܒܸܐ ܠܟܽܠܸܗ ܟܸܢܫܵܐ ܕܼܐܝܬ ܗ̄ܘܵܐ ܬܲܡܵܢ܃
00322_4	ܘܒܲܒܢ̈ܲܝ ܥܲܘܠܵܐ ܬܪܸܝܢ ܓܲܝ̈ܵܣܸܐ ܐܲܝܟ ܕܸܐܬܐܲܡܪܲܬ܀
00322_5	ܘܗܲܘ ܕܹܝܢ ܕܲܚܣܝܼܡ ܘܲܢܟܝܼܠ ܘܲܛܠܝܼܡ ܟܲܕ ܙܲܟܵܝܵܐ ܗ̄ܘ܃
00322_6	ܓܲܠܝܵܐ ܨܽܘܪܬܸܗ ܘܕܵܡܸܐ ܒܡܲܘܬܸܗ ܠܒܲܪ ܐܲܠܵܗܵܐ܀
00322_7	ܗܵܐ ܒܢ̈ܲܝ ܥܲܘܠܵܐ ܬܪܸܝܢ ܓܲܝ̈ܵܣܸܐ ܕܥܲܠ ܓܵܓܽܘܠܬܵܐ܃
00322_8	ܐܸܬܛܲܝܲܒܘ ܗ̄ܘܲܘ ܨܹܝܕ ܬܲܡܝܼܡܵܐ ܡܸܢ ܪ̈ܲܫܝܼܥܸܐ܀
00322_9	ܐܝܼܙܒܸܠ ܦܸܩܪܲܬ ܕܲܬܨܽܘܪ ܨܲܠܡܵܐ ܠܲܨܠܝܼܒܽܘܬܵܐ܃
00323_0	ܘܟܲܕ ܠܵܐ ܝܵܕܥܵܐ ܪܫܲܡܬܸܗ ܠܩܸܛܠܸܗ ܕܒܲܪ ܐܲܠܵܗܵܐ܀
00323_1	ܒܢ̈ܲܝ ܥܲܘܠܵܐ ܬܪܸܝܢ ܐܲܩܦܲܬ ܗ̄ܘܵܬ ܠܸܗ ܠܗܲܘ ܠܙܲܕܝܼܩܵܐ܃

00323_2	ܕܲܢܨܽܘܪ ܕܽܘܡܝܸܗ ܕܗܲܘ ܕܸܐܬܡܲܨܲܥ ܒܸܝܬ ܓܲܝ̈ܵܣܸܐ܀

00323_3	ܟܬܝܼܒ ܥܲܠ ܡܵܪܲܢ ܕܲܡܢܲܐܽܘܗ̄ܝ ܗ̄ܘܲܘ ܥܲܡ ܥܲܘ̈ܵܠܸܐ܃
00323_4	ܘܗܵܢܵܐ ܥܠܝܼܒܵܐ ܒܲܒܢ̈ܲܝ ܥܲܘܠܵܐ ܐܵܦ ܠܸܗ ܚܲܠܛܽܘܗ̄ܝ܀
00323_5	ܗܵܐ ܥܲܘ̈ܵܠܸܐ ܘܲܒܢ̈ܲܝ ܥܲܘܠܵܐ ܠܥܲܒܕܵܐ ܘܡܵܪܸܗ܃
00323_6	ܬܪܸܝܢ ܬܪܸܝܢ ܝܲܗ̄ܒ ܗ̄ܘ̈ܲܝ ܨܸܗܝܽܘܢ ܘܼܐܝܙܒܸܠ ܟܲܕ ܡܸܬܩܲܛܠܝܼܢ܀
00323_7	ܕܲܗܘܵܬ ܕܵܡܝܵܐ ܟܢܽܘܫܬܵܐ ܠܼܐܝܙܒܸܠ ܒܲܥܒܝܼ̈ܕܵܬܵܗ݀܃
00323_8	ܘܗܲܘ ܡܲܟܝܼܟܵܐ ܒܡܲܘܬܸܗ ܥܠܝܼܒܵܐ ܠܲܕܦܵܪܽܘܩܲܢ܀
00323_9	ܠܗܵܢܵܐ ܓܲܒܪܵܐ ܠܵܐ ܐܝܼܬ ܗ̄ܘܵܐ ܠܸܗ ܒܲܪ ܝܲܡܝܼܢܵܐ܃
00324_0	ܕܲܒܢ̈ܲܝ ܥܲܘܠܵܐ ܬܪ̈ܲܝܗܽܘܢ ܕܝܼܠܸܗ ܕܣܸܡܵܠܵܐ ܗ̄ܘܲܘ܀
00324_1	ܪܵܡ ܗ̄ܽܘ ܡܵܪܲܢ ܡܸܢ ܕܸܡܘ̈ܵܬܵܐ ܘܡܸܢ ܨܽܘܪ̈ܵܬܵܐ܃
00324_2	ܕܝܼܚܝܼܕܵܝܵܐ ܗ̄ܘ ܘܗܽܘ ܠܸܗ ܕܵܡܸܐ ܘܲܐ̄ܚܪܼܢܵܐ ܠܵܐ܀
00324_3	ܡܵܐ ܕܸܐܬܬܲܚܬܝܼ ܕܢܸܬܬܨܝܼܪ ܛܽܘܦܣܸܗ ܒܕܽܘܟܵܐ ܕܽܘܟܵܐ܃
00324_4	ܫܸܦܥܲܬ ܨܽܘܪܬܸܗ ܠܵܐ ܡܸܬܚܲܒܫܵܐ ܒܓܲܘ ܕܸܡܘ̈ܵܬܵܐ܀
00324_5	ܡܵܐ ܕܝܲܗ̄ܒ ܢܲܦܫܸܗ ܡܲܟܝܼܟܵܐܝܼܬ ܕܲܢܨܽܘܪܽܘܢܵܝܗܝ܃
00324_6	ܐܲܙܠܸܓ ܫܽܘܦܪܸܗ ܚܵܒܘ ܣܲܡ̈ܡܵܢܸܐ ܘܠܵܐ ܡܲܘܦܸܝܢ ܠܸܗ܀
00324_7	ܒܲܒܢ̈ܲܝ ܥܲܘܠܵܐ ܕܝܼܬܸܒܘ ܥܲܡܸܗ ܨܵܪܸܗ ܢܵܒܽܘܬ܃
00324_8	ܘܦܵܫ ܠܸܗ ܡܸܢܸܗ ܒܗܵܝ ܕܲܐܚܝܼ ܗ̄ܘܵܐ ܠܒܲܪ ܝܲܡܝܼܢܵܐ܀
00324_9	ܐܸܬܕܲܡܝܼ ܠܸܗ ܒܲܬܪܸܝܢ ܒܝܼ̈ܫܝܼܢ ܕܲܐܩܸܦܘ ܗ̄ܘܲܘ ܠܸܗ܃
00325_0	ܠܵܐ ܕܹܝܢ ܐܸܫܟܲܚ ܕܲܠܚܲܕ ܡܸܢܗܽܘܢ ܓܲܢܬܵܐ ܢܸܦܬܲܚ܀
00325_1	ܠܗܲܘ ܕܲܝܵܢܵܐ ܕܡܝܼ̈ܬܸܐ ܘܚܲܝܸ̈ܐ ܐܸܫܬܲܟܚܲܬ ܗܵܝ܃
00325_2	ܕܒܸܝܬ ܝܲܡܝܼܢܵܐ ܘܲܠܣܸܡܵܠܵܐ ܒܡܲܘܬܸܗ ܢܸܦܪܽܘܫ܀
00325_3	ܗܽܘܝܽܘ ܡܸܫܟܲܚ ܘܵܐܦ ܡܸܢ ܕܼܐܒܸ̈ܐ ܐܸܡܪܸ̈ܐ ܢܸܥܒܸܕ܃
00325_4	ܘܲܚܘܲܘ̈ܵܬܵܐ ܠܝܲܘ̈ܢܸܐ ܢܸܗܦܽܘܟ ܡܵܐ ܕܲܩܪܸܒܘ ܠܸܗ܀
00325_5	ܢܕܲܟܸܐ ܠܛܲܡ̈ܐܸܐ ܠܵܐ ܐ̄ܢܵܫ ܡܸܫܟܲܚ ܐܸܠܵܐ ܐܸܢ ܗܽܘ܃
00325_6	ܘܠܵܐ ܕܲܠܒܝܼ̈ܫܸܐ ܢܸܥܒܸܕ ܛܵܒܸ̈ܐ ܘܢܲܚܸܐ ܐܸܢܽܘܢ܀
00325_7	ܦܫܝܼܩ ܠܸܗ ܕܝܼܠܸܗ ܕܵܐܦ ܡܸܢ ܟܽܘ̈ܒܸܐ ܚܸ̈ܛܸܐ ܢܸܟܢܽܘܫ܃