The Comprehensive Aramaic Lexicon

00332_9	ܗܽܘ ܕܹܝܢ ܗܵܢܵܐ ܓܲܒܪܵܐ ܛܠܝܼܡܵܐ ܠܵܐ ܡܲܠܸܠ ܗ̄ܘܵܐ܃
00333_0	ܘܡܵܢܵܐ ܗ̄ܝ ܥܸܠܬܸܗ ܕܪܲܘܒܵܐ ܕܲܥܠܵܘܗ̄ܝ ܠܵܐ ܝܵܕܲܥ ܗ̄ܘܵܐ܀
00333_1	ܩܵܡܘ ܗ̄ܘܲܘ ܥܠܲܘܗ̄ܝ ܣܵܗ̈ܕܸܐ ܕܫܽܘܩܪܵܐ ܐܲܝܟ ܕܥܲܠ ܡܵܪܲܢ܃
00333_2	ܘܲܒܨܽܘ̈ܚܝܵܬܵܐ ܕܲܓ̈ܵܠܵܬܵܐ ܡܸܬܩܲܦܲܚ ܗ̄ܘܵܐ܀
00333_3	ܕܝܼܢܵܐ ܕܥܲܘܠܵܐ ܦܓܲܥ ܒܸܗ ܒܓܲܒܪܵܐ ܡܸܢ ܪ̈ܲܫܝܼܥܸܐ܃
00333_4	ܘܢܲܗܪܵܐ ܕܪܽܘܫܥܵܐ ܒܓܲܠܠܲܘ̈ܗ̄ܝ ܒܝܼ̈ܫܸܐ ܡܛܲܪܸܦ ܗ̄ܘܵܐ ܠܸܗ܀
00333_5	ܚܛܵܗܵܐ ܪܲܒܵܐ ܐܸܬܕܲܡܝܼ ܗ̄ܘܵܐ ܠܣܲܬܘܵܐ ܩܲܫܝܵܐ܃
00333_6	ܘܲܚܫܲܠ ܬܲܡܵܢ ܒܲܪܕܵܐ ܒܨܲܚܘܵܐ ܘܫܲܪܝܼ ܚܵܒܸܛ܀
00333_7	ܥܢܵܢܵܐ ܕܟܼܐܦܸ̈ܐ ܚܲܘܝܲܬ ܢܲܦܫܸܗ ܡܸܢ ܓܲܘ ܟܸܢܫܵܐ܃
00333_8	ܘܲܕܠܵܐ ܪܲܥܡܵܐ ܢܸܣܟܲܬ ܫܸܦ̈ܥܸܝܗ݀ ܥܲܠ ܬܲܡܝܼܡܵܐ܀
00333_9	ܪܽܘܚܵܐ ܕܫܽܘܩܪܵܐ ܚܸܫܠܲܬ ܒܲܪܕܵܐ ܠܲܘ ܡܸܢ ܡܲܝ̈ܵܐ܃
00334_0	ܕܬܸܚܒܽܘܛ ܗ̄ܘܵܬ ܒܸܗ ܠܚܲܕ ܐܝܼܠܵܢܵܐ ܡܠܸܐ ܚܲܠܝܽܘܬܵܐ܀
00334_1	ܐܸܬܬܙܝܼܥ ܪܲܒܲܬ ܗܲܘ ܟܝܼܡܽܘܢܵܐ ܕܚܝܼܠܵܐ ܕܲܕܡܵܐ܃
00334_2	ܘܲܐܡܛܲܪ ܟܼܐܦܸ̈ܐ ܡܸܢ ܟܽܠ ܓܲܒܝܼ̈ܢ ܥܲܠ ܙܲܕܝܼܩܵܐ܀
00334_3	ܨܲܘܡܵܐ ܕܼܐܝܙܒܸܠ ܚܲܘܝܼ ܢܲܦܫܸܗ ܕܡܵܢ ܒܵܥܸܐ ܗ̄ܘܵܐ܃
00334_4	ܘܸܐܬܝܲܕܥܲܬ ܗ̄ܘܵܬ ܥܸܠܬܸܗ ܕܚܲܓܵܐ ܠܡܵܢ ܐܸܬܟܲܢܲܫ܀
00334_5	ܫܘܲܪ ܗ̄ܘܵܐ ܦܲܚܵܐ ܗܲܘ ܕܲܨܠܸܐ ܗ̄ܘܵܐ ܒܟܸܣܝܵܐ ܗܵܝܕܸܝܢ܃
00334_6	ܘܨܵܕ ܠܲܬܪܝܼܨܵܐ ܕܡܸܛܽܠܵܬܸܗ ܛܡܝܼܪ ܗ̄ܘܵܐ ܬܲܡܵܢ܀
00334_7	ܚܙܵܐ ܡܲܟܝܼܟܵܐ ܥܢܵܢܵܐ ܕܟܼܐܦܸ̈ܐ ܘܠܲܝܬ ܣܸܬܵܪܵܐ܃
00334_8	ܘܲܬܠܵܐ ܥܲܝܢܲܘ̈ܗ̄ܝ ܨܹܝܕ ܐܲܠܵܗܵܐ ܟܲܕ ܐܵܡܲܪ ܠܸܗ܀
00334_9	ܐܲܢ̄ܬ ܕܲܝܵܢܵܐ ܬܪܝܼܨܵܐ ܚܽܘܪ ܒܝܼ ܠܡܵܐ ܡܵܐܸܬ ܐ̄ܢܵܐ܃
00335_0	ܘܲܬܒܲܥ ܡܵܪܝ ܕܸܡܝ ܡܸܢ ܡܲܠܟܽܘܬܵܐ ܗܦܝܼܟܬܵܐ ܕܵܐܚܵܒ܀
00335_1	ܐܸܠܽܘ ܓܲܕܦܸܬ ܩܕܵܡ ܕܸܐܓܲܕܸܦ ܐܲܢ̄ܬ ܫܵܡܲܥ ܗ̄ܘܲܝܬ܃
00335_2	ܕܵܐܦ ܚܽܘ̈ܫܵܒܸܐ ܕܠܸܒܵܐ ܟܽܠܝܽܘܡ ܐܲܢ̄ܬ ܨܵܐܸܬ ܐܲܢ̄ܬ܀
00335_3	ܘܲܕܗܵܐ ܛܲܠܡܽܘܢܝ ܘܲܡܓܲܕܦܵܢܵܐ ܒܥܲܘܠܵܐ ܥܲܒܕܽܘܢܝ܃

00335_4	ܐܲܢ̄ܬ ܒܵܚܲܪ ܟܽܠ ܬܸܒܥܸܐ ܥܽܘܠܒܵܢܝ ܡܸܢ ܐܝܼܕܲܝ̈ܗܽܘܢ܀

00335_5	ܗܵܢܵܐ ܛܠܽܘܡܝܵܐ ܡܸܛܽܠ ܟܲܪܡܵܐ ܕܢܸܣܲܒ ܐܵܚܵܒ܃
00335_6	ܠܵܐ ܡܵܪܝ ܢܸܩܢܝܼܘܗ̄ܝ ܒܲܕܡܵܐ ܠܟܲܪܡܵܐ ܘܬܲܗܡܸܐ ܡܸܢܸܗ܀
00335_7	ܠܵܟ ܡܲܓܥܸܠ ܐ̄ܢܵܐ ܝܵܪܬܽܘܬܝ ܩܽܘܡ ܒܵܗ݀ ܐܲܝܟ ܬܵܒܲܥ ܟܽܠ܃
00335_8	ܘܲܛܪܽܘܕ ܡܸܢܵܗ݀ ܠܚܲܢ̈ܦܸܐ ܕܪܲܓܽܘܗ݀ ܕܲܢܩܽܘܡܽܘܢ ܒܵܗ݀܀
00335_9	ܠܵܐ ܬܸܬܸܠ ܠܵܗ݀ ܠܼܐܝܙܒܸܠ ܬܼܐܪܲܬ ܐܲܝܟ ܨܸܒܝܵܢܵܗ݀܃
00336_0	ܐܲܢ̄ܬ ܣܲܒ ܟܲܪܡܵܐ ܘܠܵܐ ܬܸܥܽܘܠ ܠܸܗ ܒܲܪ̄ܬ ܪ̈ܲܫܝܼܥܸܐ܀
00336_1	ܗܘܝܼ ܠܝܼ ܝܵܪܬܵܐ ܘܩܽܘܡ ܠܝܼ ܒܟܲܪܡܵܐ ܘܟܽܠ ܡܲܢ ܕܵܐܬܸܐ܃
00336_2	ܠܵܟ ܡܸܫܟܲܚ ܒܸܗ ܕܲܠܒܝܼܟܲܬ ܠܸܗ ܐܲܝܟ ܓܲܢ̄ܒܵܪܵܐ܀
00336_3	ܦܩܽܘܕ ܠܵܗ݀ ܠܲܐܪܥܵܐ ܕܡܸܫܬܲܦܲܥ ܒܵܗ݀ ܕܡܵܐ ܙܲܟܵܝܵܐ܃
00336_4	ܕܠܵܐ ܬܟܲܣܸܐ ܥܠܲܘܗ̄ܝ ܐܸܠܵܐ ܬܦܲܪܣܝܼܘܗ̄ܝ ܐܲܝܟ ܕܠܲܕܗܵܒܸܝܠ܀
00336_5	ܬܵܓܸܗ ܕܵܐܚܵܒ ܢܚܽܘܒ ܠܵܟ ܕܸܡܝ ܘܲܬܒܲܥ ܡܸܢܸܗ܃
00336_6	ܥܝܵܪܬܵܐ ܕܩܸܛܠܵܐ ܒܕܝܼܢܵܐ ܟܼܐܢܵܐ ܕܠܵܐ ܫܽܘܒܩܵܢܵܐ܀
00336_7	ܟܬܽܘܒ ܥܲܠ ܐܝܼܙܒܸܠ ܟܼܐܦܸ̈ܐ ܕܒܸܠܥܸܬ ܟܲܕ ܠܵܐ ܣܸܪܚܸܬ܃
00336_8	ܘܡܵܐ ܕܡܸܬܬܲܒܥܵܐ ܚܫܽܘܒ ܫܽܘ̈ܩܵܦܲܝ ܘܲܦܪܽܘܥ ܐܸܢܽܘܢ܀
00336_9	ܕܡܵܐ ܕܲܥܠܝܼ̈ܒܸܐ ܡܲܢܽܘ ܬܵܒܲܥ ܐܸܠܵܐ ܐܸܢ ܐܲܢ̄ܬ܃
00337_0	ܘܲܠܡܲܢ ܢܸܩܪܸܐ ܐܲܝܢܵܐ ܕܲܥܠܝܼܒ ܐܸܠܵܐ ܐܸܢ ܠܵܟ܀
00337_1	ܡܲܓܥܲܠ ܣܽܘܪܚܵܢܝ ܠܲܬܪܝܼܨܽܘܬܵܟ ܠܵܐ ܢܸܬܚܲܦܸܐ܃
00337_2	ܓܠܝܼܘܗ̄ܝ ܐܲܝܟ ܫܸܡܫܵܐ ܕܢܸܒܗܲܬ ܐܵܚܵܒ ܒܲܥܒܝܼ̈ܕܵܬܸܗ܀
00337_3	ܥܢܵܢܵܐ ܕܪܽܘܓܙܵܐ ܢܸܦܨܲܬ ܥܽܘܙܵܗ݀ ܥܲܠ ܫܲܦܝܼܪܵܐ܃
00337_4	ܘܸܐܫܬܲܡܠܝܼ ܗ̄ܘܵܐ ܥܒܵܕܵܐ ܒܝܼܫܵܐ ܒܨܲܘܡܵܐ ܛܲܡܐܵܐ܀
00337_5	ܐܲܝܟܲܢ ܕܝܼܠܸܦܘ ܡܸܢ ܐܸܓܲܪܬܵܐ ܥܒܲܕܘ ܥܲܘ̈ܵܠܸܐ܃
00337_6	ܘܚܵܒ ܙܲܟܵܝܵܐ ܒܕܝܼܢܵܐ ܕܥܲܘܠܵܐ ܡܸܢ ܪ̈ܲܫܝܼܥܸܐ܀
00337_7	ܟܼܐܢܽܘܬܵܐ ܕܹܝܢ ܫܸܬܩܲܬ ܡܸܢܸܗ ܟܲܕ ܡܵܐܸܬ ܗ̄ܘܵܐ܃
00337_8	ܘܲܠܣܽܘܥܪܵܢܵܐ ܟܬܲܒܬܸܗ ܘܣܵܡܬܸܗ ܒܣܸܦܪܵܐ ܪܲܒܵܐ܀
00337_9	ܚܲܦܝܲܬ ܐܲܦܸ̈ܝܗ݀ ܟܲܕ ܪܵܓܡܝܼܢ ܠܸܗ ܕܐ̄ܢܵܫ ܠܵܐ ܢܸܚܙܸܝܗ݀܃