The Comprehensive Aramaic Lexicon

00501_6	ܘܲܕܠܵܐ ܐܝܼܬ ܠܵܗ݀ ܫܽܘܦܪܸ̈ܐ ܬܸܗܘܸܐ ܡܲܠܝܵܐ ܚܽܘܒܵܐ܀
00501_7	ܬܸܗܘܸܐ ܕܵܡܝܵܐ ܠܠܲܝܵܐ ܕܣܲܢܝܵܐ ܘܲܦܸܐܝܢ ܝܲܠܕܸ̈ܝܗ݀܃
00501_8	ܘܠܲܘ ܐܲܝܟ ܪܵܚܸܝܠ ܬܸܗܘܸܐ ܪܚܝܼܡܵܐ ܘܥܲܩܪܵܐ ܡܸܠܲܬܝ܀
00501_9	ܗܘܝܼ ܠܵܗ݀ ܦܼܐܪܵܐ ܐܲܝܟ ܕܲܠܠܲܝܵܐ ܒܲܪܒܸܝܥܵܝܵܐ܃
00502_0	ܘܡܸܛܽܠܵܬܵܟ ܬܸܗܘܸܐ ܡܩܲܒܠܵܐ ܣܢܝܼܬܵܐ ܡܸܠܲܬܝ܀
00502_1	ܠܵܟ ܡܵܪܝ ܬܼܐܠܲܕ ܒܫܲܪ̈ܒܸܐ ܘܡܼܐܡܪܸ̈ܐ ܘܲܙܡܝܼܪ̈ܵܬܵܐ܃
00502_2	ܕܟܲܕ ܛܵܒ ܣܲܢܝܵܐ ܬܸܗܘܸܐ ܪܚܝܼܡܵܐ ܒܵܟ ܫܵܦܝܼܪܵܐ܀
00502_3	ܝܲܠܕܸ̈ܝܗ݀ ܕܠܲܝܵܐ ܡܲܦܸܐܝܢ ܗ̄ܘܲܘ ܠܵܗ݀ ܟܲܕ ܣܲܢܝܵܐ ܗ̄ܘܵܬ܃
00502_4	ܘܡܸܛܽܠܵܬܵܟ ܬܸܫܦܲܪ ܡܸܠܲܬܝ ܕܲܛܥܝܼܢܵܐ ܠܵܟ܀
00502_5	ܒܚܸܒ̈ܠܸܐ ܕܚܽܘܒܵܟ ܢܼܐܠܕܵܟ ܠܸܫܵܢܝ ܥܲܠ ܡܲܫܡܲܥܬܵܐ܃
00502_6	ܘܲܐܢ̄ܬ ܡܸܢ ܣܸܦ̈ܘܵܬܝ ܐܲܘܠܸܕ ܝܵܬܵܟ ܨܹܝܕ ܫܵܡܽܘ̈ܥܸܐ܀
00502_7	ܐܲܢ̄ܬ ܗܽ̄ܘ ܡܹܐܡܪܵܐ ܕܲܡܠܸܐ ܫܽܘܦܪܸ̈ܐ ܠܲܕܫܵܡܲܥ ܠܸܗ܃
00502_8	ܐܲܢ̄ܬ ܗܽ̄ܘ ܩܵܠܵܐ ܕܲܡܠܸܐ ܚܲܝܸ̈ܐ ܠܲܕܨܵܐܸܬ ܠܸܗ܀
00502_9	ܐܲܢ̄ܬ ܗܽ̄ܘ ܡܸܠܬܵܐ ܕܟܽܠܵܗ݀ ܢܽܘܗܪܵܐ ܠܲܕܢܵܩܸܦ ܠܵܗ݀܃
00503_0	ܐܲܢ̄ܬ ܗܽ̄ܘ ܫܲܪܒܵܐ ܕܲܕܗܵܪܸܓ ܒܸܗ ܚܲܝܸ̈ܐ ܡܸܫܟܲܚ܀
00503_1	ܐܸܠܵܐ ܚܵܪ ܒܵܟ ܗܲܘܢܵܐ ܠܵܐ ܢܗܲܪ ܕܲܢܡܲܠܸܠ ܠܵܟ܃
00503_2	ܘܸܐܠܵܐ ܫܲܩܠܵܟ ܡܲܕܥܵܐ ܒܥܽܘܒܸܗ ܠܵܐ ܙܵܡܲܪ ܠܵܟ܀
00503_3	ܐܵܦܠܵܐ ܢܲܦܫܵܐ ܡܙܝܼܥܵܐ ܡܼܐܡܪܵܟ ܒܸܠܥܵܕ ܚܽܘܒܵܐ܃
00503_4	ܘܠܵܐ ܚܽܘ̈ܫܵܒܸܐ ܠܘܲܥܕܵܟ ܪܵܦܬܝܼܢ ܕܠܵܐ ܡܲܘܗܲܒܬܵܟ܀
00503_5	ܡܸܠܬܵܐ ܕܦܽܘܡܵܐ ܘܫܸܡܥܵܐ ܕܸܐܕܢܵܐ ܕܝܼܠܵܟ ܐܸܢܽܘܢ܃
00503_6	ܨܲܘܬܵܐ ܘܩܵܠܵܐ ܥܠܲܝܟ ܗܽ̄ܘ ܣܡܝܼܟܝܼܢ ܒܸܐܣܟܼܡܲܝ̈ܗܽܘܢ܀
00503_7	ܡܵܐ ܕܚܵܪܲܬ ܒܵܟ ܢܲܦܫܵܐ ܢܸܗܪܲܬ ܠܲܡܡܲܠܵܠܽܘ܃
00503_8	ܘܸܐܢ ܐܸܬܓܲܢܝܲܬ ܡܸܢܵܟ ܚܸܫܟܲܬ ܘܲܐܚܕܵܗ݀ ܫܸܬܩܵܐ܀
00503_9	ܒܵܟ ܚܵܝܪܝܼܢ ܗ̄ܘܲܘ ܟܼܐܢܸ̈ܐ ܕܲܢܗܲܪܘ ܒܲܥܒܵܕܲܝ̈ܗܽܘܢ܃
00504_0	ܐܵܦ ܙܲܕܝܼ̈ܩܸܐ ܕܲܢܨܲܚܘ ܒܲܐܪܥܵܐ ܣܽܘܥܪ̈ܵܢܲܝܗܽܘܢ܀
00504_1	ܠܵܟ ܒܵܥܸܝܢ ܗ̄ܘܲܘ ܒܲܡܝܲܬܪܽܘܬܵܐ ܕܲܩܢܽܘ̈ܡܲܝܗܽܘܢ܃
00504_2	ܕܲܢܙܲܝܚܽܘܢܵܟ ܥܲܠ ܢܲܩܕܽܘܬܵܐ ܕܚܽܘܫܵܒܲܝ̈ܗܽܘܢ܀
00504_3	ܡܸܛܽܠܵܬܵܟ ܡܸܨܛܲܠܠܝܼܢ ܗ̄ܘܲܘ ܪܸ̈ܥܝܵܢܲܝܗܽܘܢ܃
00504_4	ܕܡܵܐ ܕܸܐܙܕܲܗܝܼܘ ܢܸܚܙܽܘܢ ܫܽܘܦܪܵܟ ܕܲܕܠܵܐ ܣܵܟܵܐ ܗ̄ܘ܀
00504_5	ܡܸܛܽܠܵܬܵܟ ܩܵܡ ܐܸܠܝܼܵܐ ܒܲܒܬܽܘܠܽܘܬܵܐ܃
00504_6	ܕܢܸܗܘܸܐ ܦܫܝܼܩ ܠܸܗ ܕܲܢܚܽܘܪ ܢܸܚܙܸܝܟ ܡܸܢ ܕܲܟܝܽܘܬܵܐ܀
00504_7	ܐܸܙܕܲܗܝܼ ܗ̄ܘܵܐ ܕܡܵܐ ܕܛܵܥܸܢ ܠܵܟ ܥܲܠ ܚܽܘܫܵܒܲܘ̈ܗ̄ܝ܃
00504_8	ܒܕܲܟܝܽܘܬ ܠܸܒܵܐ ܬܸܨܒܸܐ ܠܘܵܬܸܗ ܠܲܡܟܲܬܵܪܽܘ܀
00504_9	ܡܲܪܩܵܗ݀ ܠܢܲܦܫܸܗ ܐܲܝܟ ܡܲܚܙܝܼܬܵܐ ܕܠܵܟ ܢܸܚܙܸܐ ܗ̄ܘܵܐ܃
00505_0	ܕܬܸܗܘܸܐ ܫܲܦܝܵܐ ܠܨܲܠܡܵܟ ܪܲܒܵܐ ܡܵܐ ܕܕܵܢܲܚ ܒܵܗ݀܀
00505_1	ܥܪܲܩ ܡܸܢ ܥܵܠܡܵܐ ܕܠܵܟ ܢܲܕܪܸܟ ܗ̄ܘܵܐ ܘܢܼܚܸܐ ܥܲܡܵܟ܃
00505_2	ܚܲܝܸ̈ܐ ܛܵܒܸ̈ܐ ܒܡܸܣܟܼܢܽܘܬܵܐ ܕܡܲܠܝܵܐ ܥܽܘܬܪܵܟ܀
00505_3	ܣܢܵܐ ܩܸܢܝܵܢܸ̈ܐ ܕܢܸܗܘܸܐ ܦܫܝܼܩ ܠܸܗ ܕܠܵܟ ܢܸܩܢܸܐ ܗ̄ܘܵܐ܃
00505_4	ܕܲܐܝܢܵܐ ܕܩܵܢܸܐ ܥܲܡܵܟ ܡܸܕܸܡ ܠܵܐ ܫܵܘܸܐ ܠܵܟ܀
00505_5	ܐܲܚܕܵܗ݀ ܠܢܲܦܫܸܗ ܕܠܵܐ ܬܸܥܽܘܠ ܠܵܗ݀ ܨܸܦܬܵܐ ܡܸܡܬܽܘܡ܃
00505_6	ܕܬܸܗܘܸܐ ܦܬܝܼܚܵܐ ܠܵܟ ܡܵܐ ܕܵܐܬܸܝܬ ܕܬܸܫܪܸܐ ܨܸܐܕܲܘܗ̄ܝ܀
00505_7	ܐܸܣܬܲܦܲܩ ܗ̄ܘܵܐ ܡܸܢ ܟܽܠܡܸܕܸܡ ܥܵܠܡܵܢܵܝܵܐ܃
00505_8	ܕܠܵܐ ܢܸܬܕܲܘܲܕ ܡܵܐ ܕܩܵܐܸܡ ܗ̄ܘܵܐ ܥܲܠ ܬܸܫܡܸܫܬܵܟ܀
00505_9	ܫܕܵܐ ܗ̄ܘܵܐ ܠܒܵܬܪܸܗ ܟܽܠܗܽܘܢ ܙܲܘ̈ܥܸܐ ܦܲܓܪ̈ܵܢܵܝܸܐ܃
00506_0	ܕܲܐܝܟ ܕܲܒܚܲܝܸ̈ܐ ܚܲܕ̄̈ܬܸܐ ܢܗܲܠܸܟ ܥܲܠ ܕܲܐܪܓܸܫ ܒܵܟ܀
00506_1	ܡܸܣܟܼܢܵܐܝܼܬ ܘܲܡܣܲܪܩܵܐܝܼܬ ܘܝܼܚܝܼܕܵܐܝܼܬ܃
00506_2	ܚܝܵܐ ܒܸܗ ܒܥܵܠܡܵܐ ܕܠܲܘ ܥܵܠܡܸܗ ܗ̄ܘܵܐ ܘܠܵܐ ܝܽܘܬܪܵܢܸܗ܀
00506_3	ܐܲܝܟܵܐ ܕܼܐܝܬ ܗ̄ܘܵܬ ܣܝܼܡܬܸܗ ܬܲܡܵܢ ܣܝܼܡ ܗ̄ܘܵܐ ܠܸܒܸܗ܃
00506_4	ܨܹܝܕ ܐܲܠܵܗܵܐ ܕܫܲܪܝܼܪ ܥܽܘܬܪܸܗ ܘܠܵܐ ܡܸܫܬܲܚܠܲܦ܀
00506_5	ܥܩܲܪ ܡܸܢ ܥܵܠܡܵܐ ܢܲܦܫܸܗ ܒܚܽܘܒܵܐ ܕܥܲܡ ܐܲܠܵܗܵܐ܃
00506_6	ܘܢܲܨܒܵܗ݀ ܨܸܐܕܲܘܗ̄ܝ ܕܲܗܘܵܬ ܫܵܬܝܵܐ ܡܸܢ ܡܲܒܽܘܥܸܗ܀