The Comprehensive Aramaic Lexicon

008:0410	ܘܲܐܪܡܵܐ ܩ̈ܵܠܸܐ ܕܲܡܚܲܕܸܝܢ ܠܝܼ ܡܦܲܫܩܵܢܵܐܝܼܬ݂܀
008:0411	ܠܵܐ ܬܡܲܠܸܠ ܠܝܼ ܪܸܡܙܵܢܵܐܝܼܬ݂ ܟܲܕ݂ ܙܵܡܲܪ ܐܲܢܼܬ݁܃
008:0412	ܐܲܕ݂ܢܲܚ ܡܸܠܬ݂ܵܟ݂ ܘܲܒ݂ܩܝܼ̈ܢܵܬ݂ܵܟ݂ ܩܽܘܫܬܵܐ ܢܸܪܥܲܡ܀
008:0413	ܓܠܝܼ ܦܲܫܸܩ ܠܝܼ ܡܸܛܽܠ ܡܵܢܵܐ ܪܵܥܸܠ ܢܲܗܪܵܐ܃
008:0414	ܘܲܐܝܢܵܐ ܚܲܝܠܵܐ ܥܨܵܝܗܝ ܠܲܬ݂ܗܽܘܡܵܐ ܘܙܵܥ ܘܸܐܬ݂ܒܲܠܗܝܼ܀
008:0415	ܡܵܢܲܘ ܩܵܠܵܐ ܕܗܵܐ ܡܸܢ ܪܲܘܡܵܐ ܠܥܽܘܡܩܵܐ ܢܵܚܸܬ݂܃
008:0416	ܘܲܠܡܽܘܢ ܗܵܠܸܝܢ ܒܲܪ̈ܩܸܐ ܣܒ݂ܝܼ̈ܣܸܐ ܕܫܲܓܪܽܘܗܝ ܠܵܐܐܲܪ܀
008:0417	ܐܲܪܡܝܼ ܕܲܘܝܼܕ݂ ܩ̈ܵܠܸܐ ܕܫܽܘܒ݂ܚܵܐ ܠܽܘܩܒܲܠ ܚܲܬ݂ܢܵܐ܃
008:0418	ܕܗܽܘ ܣܽܘܥܪܵܢܵܐ ܠܥܼܕܬܵܐ ܢܦܲܫܸܩ ܐܲܝܟ݂ ܕܼܐܝܬ݂ܲܘܗܝ ܗܼܘܵܐ܀
008:0419	ܠܵܟ݂ ܐܲܠܵܗܵܐ ܚܙܲܐܽܘܟ ܡܲܝ̈ܵܐ ܚܙܲܐܽܘܟ݂ ܘܲܕ݂ܚܸܠܘ܃
008:0420	ܐܵܦ ܬܗܽܘ̈ܡܸܐ ܙܵܥܘ ܘܲܪܙܲܦ ܡܲܝ̈ܵܐ ܥܢܵܢܸ̈ܐ ܕܵܐܐܲܪ܀
008:0421	ܟܽܠܸܗ ܟܝܵܢܵܐ ܕܡܲܝ̈ܵܐ ܐܲܪܓܸܫܘ ܕܲܣܥܲܪܬ݁ ܐܸܢܽܘܢ܃
008:0422	ܝܲܡ̈ܡܸܐ ܬܗܽܘ̈ܡܸܐ ܢܲܗܪ̈ܲܘܵܬ݂ܵܐ ܡܥܝܼ̈ܢܸܐ ܘܵܐܓ̈ܡܸܐ܀
008:0423	ܚܒܲܨܘ ܠܲܚܕ݂ܵܕܸ̈ܐ ܠܡܸܬ݂ܒܲܪܵܟ݂ܽܘ ܡܸܢ ܕܽܘܪ̈ܟܵܬ݂ܵܟ݂܃
008:0424	ܕܲܐܪܗܸܒ݂ ܐܸܢܽܘܢ ܕܸܢܚܵܟ݂ ܪܲܒܵܐ ܕܲܗܘܵܐ ܥܠܲܝܗܽܘܢ܀
008:0425	ܕܪܲܟ݂ܬ݁ ܥܲܠ ܝܽܘܪܕܢܵܢ ܐܲܝܟ݂ ܕܥܲܠ ܪܝܼܫܵܐ ܕܟ݂ܽܠܗܽܘܢ ܝܲܡ̈ܡܸܐ܃
008:0426	ܘܙܵܥ ܡܸܢ ܚܲܝܠܵܟ݂ ܥܸܩ̈ܒܲܝ ܬܗܽܘܡܸ̈ܐ ܘܲܕ݂ܡܵܡ̈ܽܘܠܸܐ܀
008:0427	ܟܽܠܸܗ ܟܝܵܢܵܐ ܕܡܲܝ̈ܵܐ ܐܸܬ݁ܬ݁ܙܝܼܥ ܡܸܢ ܪܽܘܚܵܦܵܟ݂܃
008:0428	ܕܲܠܚܽܘܣܵܝܵܐ ܠܟ݂ܽܠܗܽܘܢ ܐܲܫܘܝܼܬ݁ ܒܡܲܥܡܽܘܕ݂ܝܼܬ݂ܵܟ݂܀
008:0429	ܡܲܝ̈ܵܐ ܕܝܲܡܡܸ̈ܐ ܟܲܕ݂ ܪܲܚܝܼܩܝܼܢ ܠܵܐ ܪܲܚܝܼܩܝܼܢ܃
008:0430	ܕܚܲܝܠܸܗ ܕܩܽܘܕ݂ܫܵܟ݂ ܕܵܠ ܟܲܣܝܵܐܝܼܬ݂ ܘܲܣܥܲܪ ܐܸܢܽܘܢ܀
008:0431	ܡܸܛܽܠ ܗܵܢܵܐ ܚܙܲܐܽܘܟ݂ ܡܲܝ̈ܵܐ ܚܙܲܐܽܘܟ݂ ܘܲܕ݂ܚܸܠܘ܃
008:0432	ܐܵܦ ܬܗܽܘܡܸ̈ܐ ܙܵܥܘ ܕܲܒ݂ܡܲܚܲܬܬܵܟ݂ ܐܲܪܗܸܒ݂ܬ݁ ܐܸܢܽܘܢ܀
008:0433	ܥܢܵܢܸ̈ܐ ܪܲܣܸܣ ܡܲܝ̈ܵܐ ܒܢܲܗܪܵܐ ܟܲܕ݂ ܥܵܡܸܕ݂ ܐܲܢܼܬ݁܃
008:0434	ܕܠܵܐ ܢܸܬ݂ܓܲܠ̈ܙܵܢ ܐܵܦܠܵܐ ܗܸܢܸܝܢ ܡܸܢ ܪܽܘܚܵܦܵܟ݂܀

008:0435	ܗܵܐ ܫܡܲܝ̈ ܫܡܝܵܐ ܝܲܗܼܒ݂ܘ ܬܽܘܒ݂ ܩܵܠܵܐ ܒܲܐܒ݂ܽܘܟ݂ ܪܵܡܵܐ܃

008:0436	ܕܲܒ݂ܣܵܗܕܽܘܬܸܗ ܐܲܪܥܵܐ ܬܸܪܓܲܫ ܕܝܼܚܝܼܕ݂ܵܝܲܐ ܐܢܼܬ݁܀
008:0437	ܐܲܢܗܲܪܘ ܒܲܪ̈ܩܵܟ݂ ܠܬܼܐܒܸܝܠ ܘܲܚܙܵܬ̤ ܢܽܘܗܪܵܐ ܓܲܐܝܵܐ܃
008:0438	ܕܲܕ݂ܠܝܼܚܵܐ ܗܼܘܵܬ݂ ܐܲܪܥܵܐ ܒܚܸܫܟܵܐ ܥܲܕ݂ܠܵܐ ܬܼܐܬܸܐ܀
008:0439	ܚܙܲܐܽܘܟ݂ ܡܲܝ̈ܵܐ ܘܲܕ݂ܚܸܠܘ ܡܸܢܵܟ݂ ܐܲܝܟ݂ ܡܸܢ ܡܵܪܵܐ܃
008:0440	ܕܗܲܘܦܵܐ ܕܥܽܘܙܵܟ݂ ܐܲܪܬܲܚ ܐܸܢܽܘܢ ܟܲܕ݂ ܢܵܚܸܬ݂ ܐܲܢܼܬ݁܀
008:0441	ܦܲܫܸܩ ܕܲܘܝܼܕ݂ ܥܸܠܬܸܗ ܕܫܲܪܒܵܐ ܟܲܕ݂ ܙܵܡܲܪ ܗܼܘܵܐ܃
008:0442	ܘܸܐܬ̤ܵܐ ܙܟܲܪܝܵܐ ܙܲܩܬܵܗ݀ ܠܥܼܕܬܵܐ ܕܲܢܚܲܘܸܐ ܠܵܗ݀܀
008:0443	ܗܵܢܲܘ ܓܲܒ݂ܪܵܐ ܕܸܐܡܪܸܬ݂ ܗܼܘܝܼܬ݂ ܠܸܟ݂ܝ ܕܲܫܡܸܗ ܕܸܢܚܵܐ܃
008:0444	ܗܵܐ ܐܲܙܠܸܓ ܠܸܗ ܘܲܢܗܲܪܘ ܣܲܘ̈ܦܸܐ ܡܸܢ ܙܲܠܝܼܩܲܘ̈ܗܝ܀
008:0445	ܩܪܸܒ݂ ܝܽܘܚܲܢܵܢ ܘܲܐܪܟܸ݁ܢ ܐܝܼܕܸܗ ܥܲܠ ܓܲܘܙܲܠܬܵܐ܃
008:0446	ܘܣܕ݂ܪܸ̈ܐ ܕܥܝܼܪܸ̈ܐ ܛܦܲܣܘ ܒܲܚܕܵܪܸ̈ܐ ܡܸܢ ܣܽܘܪܵܕ݂ܵܐ܀
008:0447	ܐܸܬ݁ܕܲܡܲܪܘ ܗܼܘܲܘ ܚܲܝ̈ܠܲܘܵܬ݂ܵܐ ܒܬܸܗܪܵܐ ܕܲܚܙܲܘ܃
008:0448	ܟܲܕ݂ ܚܲܒ݁ܽܘܒ݂ܵܐ ܥܪܸܐ ܠܲܓܡܽܘܪܬܵܐ ܘܠܵܐ ܡܸܬ݂ܚܲܪܲܟ݂܀
008:0449	ܬܗܲܪܘ ܥܸܠܵܝܸ̈ܐ ܒܵܐܬ̤ܵܐ ܕܚܝܼܠܬܵܐ ܕܲܗܘ̤ܵܬ݂ ܬܲܡܵܢ܃
008:0450	ܕܼܐܝܕ݂ܵܐ ܕܒܸܣܪܵܐ ܒܫܲܠܗܸܒ݂ܝܼܬ݂ܵܐ ܠܵܐ ܐܸܬ݂ܢܲܟ݂ܝܲܬ̤܀
008:0451	ܣܪ̈ܵܦܸܐ ܡܚܲܦܸܝܢ ܦܲܪ̈ܨܽܘܦܲܝܗܽܘܢ ܡܸܢ ܓܲܘܙܲܠܬܸܗ܃
008:0452	ܘܣܝܼܡܵܐ ܐܝܼܕ݂ܵܐ ܕܛܝܼܢܵܐ ܓܒ݂ܝܼܠܵܐ ܠܥܸܠ ܡܸܢ ܪܝܼܫܸܗ܀
008:0453	ܠܒܸܬܵܐ ܛܒ݂ܝܼܥܲܬ݂ ܡܸܢ ܐܵܕ݂ܲܡܬ݂ܵܐ ܠܝܲܡܵܐ ܐܸܚܕܲܬ̤܃
008:0454	ܘܥܲܠ ܡܵܡܽܘܠܵܐ ܣܵܡܲܬ̤ ܐܝܼܕ݂ܵܗ݀ ܘܠܵܐ ܐܸܬ݂ܡܲܣܝܲܬ̤܀
008:0455	ܬܸܗܪܵܐ ܠܡܼܐܡܲܪ ܟܲܕ݂ ܢܽܘܪ̈ܵܢܸܐ ܚܵܝܒܝܼܢ ܡܸܢܸܗ܃
008:0456	ܘܲܒܝܲܡܝܼܢܸܗ ܕܒܲܪ ܥܲܩܪܽܘܬ݂ܵܐ ܢܚܸܬ݂ ܠܲܥܡܵܕ݂ܵܐ܀
008:0457	ܫܩܝܼܠ ܒܲܟ݂ܪ̈ܽܘܒܸܐ ܓܐܸܐ ܒܡܲܪܟܲܒ݂ܬܵܐ ܟܣܸܐ ܡܸܢ ܥܝܼܪܸ̈ܐ܃
008:0458	ܓܢܝܼܙ ܡܸܢ ܣܸܕ݂ܪܸ̈ܐ ܫܒ݂ܝܼܚ ܒܸܝܬ݂ ܟܸܢܫܸ̈ܐ ܕܚܝܼܠ ܥܲܠ ܬܸܓܡܸ̈ܐ܀
008:0459	ܣܸܕ݂ܪܸ̈ܐ ܡܚܲܦܸܝܢ ܟܸܢܫܸ̈ܐ ܙܪܝܼܒ݂ܝܼܢ ܛܸܟ݂ܣܸ̈ܐ ܪܗܝܼܒ݂ܝܼܢ܃
008:0460	ܚܲܝ̈ܠܸܐ ܙܵܝܥܝܼܢ ܓܽܘ̈ܕܸܐ ܪ̈ܵܥܠܵܢ ܐܲܠܦܸ̈ܐ ܪܵܐܬܝܼܢ܀