The Comprehensive Aramaic Lexicon

082:077	ܐܸܠܵܐ ܡܸܛܽܠ ܕܸܐܬܵܐ ܡܸܠܬܵܐ ܘܲܗܘܵܐ ܦܲܓܪܵܐ܃
082:078	ܦܲܓܪܵܐ ܕܲܫܩܲܠ ܐܲܛܥܝܼ ܠܒܝܼܫܵܐ ܕܲܐܩܪܸܒ ܥܲܡܸܗ܀
082:079	ܠܓܸܢܣܵܐ ܕܚܵܒ ܗ̄ܘܵܐ ܒܥܵܐ ܕܲܢܙܲܟܸܐ ܒܲܪ ܐܲܠܵܗܵܐ܃
082:080	ܘܡܸܛܽܠܗܵܢܵܐ ܦܲܓܪܵܢܵܐܝܼܬ ܡܸܬܟܲܬܲܫ ܗ̄ܘܵܐ܀
082:081	ܘܲܠܒܲܟ ܨܲܘܡܵܐ ܒܫܽܘܪܵܝ ܕܲܪܸܗ ܕܗܲܘ ܐܲܓܽܘܢܵܐ܃
082:082	ܘܡܸܛܽܠ ܕܲܚܙܵܐ ܕܲܒܡܸܐܟܽܘܠܬܵܐ ܚܵܒ ܗ̄ܘܵܐ ܐܵܕܵܡ܀
082:083	ܢܚܸܬ ܓܲܢ̄ܒܵܪܵܐ ܠܲܒܫܵܗ݀ ܠܟܽܠܵܗ݀ ܡܲܟܝܼܟܽܘܬܵܐ܃
082:084	ܘܸܐܬܢܲܚܲܬ ܗ̄ܘܵܐ ܥܕܲܡܵܐ ܠܣܵܟܵܗ݀ ܕܬܲܚܬܵܝܽܘܬܵܐ܀
082:085	ܘܲܥܒܲܕ ܕܲܪܵܐ ܥܲܡ ܢܵܛܽܘܪܸܗ ܕܠܼܠܝܵܐ ܘܲܙܟܵܝܗ̄ܝ܃
082:086	ܠܵܐ ܒܲܩܛܝܼܪܵܐ ܘܠܵܐ ܒܫܽܘܠܛܵܢܵܐ ܕܲܐܠܵܗܽܘܬܸܗ܀
082:087	ܐܸܠܵܐ ܠܡܽܘܫܚܲܬ ܐ̄ܢܵܫܵܐ ܢܚܸܬ ܗ̄ܘܵܐ ܟܲܕ ܡܲܩܪܸܒ ܗ̄ܘܵܐ܃
082:088	ܕܡܸܢ ܒܲܪ̄ܬ ܐ̄ܢܵܫܵܐ ܐܸܬܓܲܫܲܡ ܗ̄ܘܵܐ ܘܩܵܡ ܒܲܐܓܽܘܢܵܐ܀
082:089	ܘܫܲܪܝܼ ܒܨܲܘܡܵܐ ܕܲܠܠܲܥܒܽܘܬܵܐ ܘܵܐܣܽܘܛܽܘܬܵܐ܃
082:090	ܘܪܸܓܲܬ ܟܲܪܣܵܐ ܕܲܒܢܲܝܢܵܫܵܐ ܒܨܲܘܡܸܗ ܢܸܒܣܽܘܪ܀
082:091	ܘܲܢܚܲܘܸܐ ܠܲܢ ܒܲܐܝܢܵܐ ܙܲܝܢܵܐ ܡܨܸܐ ܙܵܟܸܐ ܐ̄ܢܵܫ܃
082:092	ܠܲܪ̈ܓܝܼܓܵܬܵܐ ܕܝܵܠܕ̈ܵܢ ܡܲܘܬܵܐ ܠܲܕܒܸܝܬ ܐܵܕܵܡ܀
082:093	ܘܠܽܘܩܒܲܠ ܪܸܓܬܵܐ ܕܗܵܝ ܡܸܐܟܽܘܠܬܵܐ ܕܸܐܟܲܠ ܐܵܕܵܡ܃
082:094	ܥܵܢܘܵܝܽܘܬܵܐ ܣܕܲܪ ܗ̄ܘܵܐ ܢܩܲܦܚܝܼܗ݀ ܙܲܕܝܼܩܵܐܝܼܬ܀
082:095	ܒܝܲܕ ܡܸܐܟܽܘܠܬܵܐ ܕܦܼܐܪܵܐ ܚܵܒܲܬ̤ ܚܲܘܵܐ ܘܵܐܕܵܡ܃
082:096	ܘܡܸܛܽܠ ܗܵܢܵܐ ܒܨܲܘܡܵܐ ܫܲܪܝܼ ܒܪܵܐ ܕܲܐܠܵܗܵܐ܀
082:097	ܐܲܪܒܥܝܼܢ ܝܲܘ̈ܡܝܼܢ ܨܵܡ ܐܲܝܟ ܡܽܘܫܸܐ ܘܲܐܝܟ ܐܸܠܝܼܵܐ܃
082:098	ܢܗܲܠܸܟ ܒܽܐܘܪܚܵܐ ܗܵܝ ܕܲܕܪܲܫܘ ܠܸܗ ܢܒܝܼܸ̈ܐ ܕܲܐܒܽܘܗ̄ܝ܀
082:099	ܩܲܕܸܡܘ ܕܵܩܽܘܗ̄ܝ ܒܲܢܒܝܼܽܘܬܵܐ ܚܵܙܝܲܬ ܐ̄ܪ̈ܵܙܸܐ܃
082:100	ܘܲܒܨܲܘ̈ܡܲܝܗܽܘܢ ܨܵܪܘ ܗ̄ܘܲܘ ܨܲܘܡܸܗ ܕܲܢܕܲܡܽܘܢ ܒܸܗ܀
082:101	ܫܲܪܝܼ ܒܨܲܘܡܵܐ ܘܙܵܥ ܐܲܪܟܽܘܢܸܗ ܕܥܵܠܡܵܐ ܡܸܢܸܗ܃
082:102	ܘܲܣܕܲܪ ܕܲܪܵܐ ܕܢܸܐܪܽܘܥ ܩܼܐܪܣܵܐ ܓܲܢ̄ܒܵܪܵܐܝܼܬ܀
082:103	ܘܲܡܕܲܘܲܕ ܗ̄ܘܵܐ ܘܡܲܢܽܘ ܘܒܲܪ ܡܲܢ ܠܵܐ ܝܵܕܲܥ ܗ̄ܘܵܐ܃
082:104	ܕܒܲܪ ܐܲܠܵܗܵܐ ܘܲܒܪܸܗ ܕܐ̄ܢܵܫܵܐ ܣܒܲܪ ܕܼܐܝܬܲܘܗ̄ܝ ܗ̄ܘܵܐ܀
082:105	ܡܸܛܽܠ ܕܼܐܝܬ ܗ̄ܘܵܐ ܓܸܫܬܵܐ ܘܓܽܘܫܡܵܐ ܠܒܲܪ ܐܲܠܵܗܵܐ܃
082:106	ܡܸܬܠܲܒܲܒ ܗ̄ܘܵܐ ܥܲܠ ܬܲܟܬܽܘܫܵܐ ܕܢܲܩܪܸܒ ܥܲܡܸܗ܀
082:107	ܘܲܕܠܵܐ ܐܝܼܬ ܗ̄ܘܵܐ ܒܦܲܓܪܸܗ ܚܛܝܼܬܵܐ ܕܲܒܢܲܝܢܵܫܵܐ܃
082:108	ܡܸܣܬܲܪܲܕ ܗ̄ܘܵܐ ܕܕܲܠܡܵܐ ܗܽܘܝܽܘ ܒܪܵܐ ܕܲܐܠܵܗܵܐ܀
082:109	ܘܟܲܕ ܝܵܕܲܥ ܗ̄ܘܵܐ ܘܟܲܕ ܠܵܐ ܝܵܕܲܥ ܩܪܸܒ ܢܸܬܟܲܬܲܫ܃
082:110	ܕܲܒܢܸܣܝܵܢܵܐ ܢܼܐܠܲܦ ܢܸܚܙܸܐ ܢܲܗܝܼܪܵܐܝܼܬ܀
082:111	ܐܲܪܒܥܝܼܢ ܝܲܘ̈ܡܝܼܢ ܝܼܬܸܒ ܚܵܐܲܪ ܐܵܟܸܠܩܲܪܨܵܐ܃
082:112	ܕܸܐܢ ܟܵܦܸܢ ܗ̄ܘܵܐ ܐܲܘ ܠܵܐ ܟܵܦܸܢ ܒܲܪ ܐܲܠܵܗܵܐ܀
082:113	ܘܡܸܬܚܲܫܲܒ ܗ̄ܘܵܐ ܕܸܐܠܵܐ ܟܵܦܸܢ ܪܽܘܚܵܢܵܝܵܐ ܗ̄ܘ܃
082:114	ܐܸܢܕܸܝܢ ܟܵܦܸܢ ܙܵܟܸܐ ܐ̄ܢܵܐ ܠܸܗ ܕܡܸܢ ܦܲܓܪ̈ܵܢܸܐ ܗ̄ܘ܀
082:115	ܘܲܒܚܽܘ̈ܫܵܒܸܐ ܣܪ̈ܝܼܩܸܐ ܒܝܼܫܵܐ ܡܸܬܩܲܠܸܐ ܗ̄ܘܵܐ܃
082:116	ܘܡܸܬܡܲܪܡܲܪ ܗ̄ܘܵܐ ܘܡܸܬܕܲܠܲܚ ܗ̄ܘܵܐ ܘܡܸܬܚܲܫܲܒ ܗ̄ܘܵܐ܀
082:117	ܐܲܪܥܵܢܵܐ ܗ̄ܘ ܟܲܝ ܫܡܲܝܵܢܵܐ ܗ̄ܘ ܟܲܝ ܡܽܘܢ ܟܲܝ ܒܵܥܸܐ܃
082:118	ܠܡܽܘܢ ܟܲܝ ܨܵܐܸܡ ܘܲܐܝܟܲܢ ܨܵܐܸܡ ܘܲܚܠܵܦ ܡܲܢܽܘ܀
082:119	ܒܦܲܓܪܸܗ ܕܝܼܠܸܗ ܚܛܝܼܬܵܐ ܕܐ̄ܢܵܫܵܐ ܠܵܐ ܡܸܬܓܲܫܫܵܐ܃
082:120	ܘܗܵܐ ܕܵܡܸܐ ܠܝܼ ܕܲܚܠܵܦ ܐܵܕܵܡ ܒܵܥܸܐ ܕܲܢܨܽܘܡ܀
082:121	ܡܸܣܬܲܒܪܵܐ ܠܝܼ ܕܪܸܓܠܵܐ ܕܢܸܦܠܲܬ̤ ܒܵܥܸܐ ܕܲܢܩܝܼܡ܃
082:122	ܘܕܲܪܸܗ ܕܵܐܕܵܡ ܒܵܥܸܐ ܢܚܲܕܸܬ ܕܲܢܒܲܙܲܚ ܒܝܼ܀
082:123	ܠܵܐ ܚܽܘ̈ܫܵܒܸܐ ܒܝܼ̈ܫܸܐ ܡܩܲܒܸܠ ܐܲܝܟ ܒܲܪܢܵܫܵܐ܃
082:124	ܘܵܐܦܠܵܐ ܒܪܸܢܝܵܐ ܕܲܪ̈ܓܝܼܓܵܬܵܐ ܦܫܝܼܩ ܢܸܫܬܲܕܲܠ܀
082:125	ܚܛܝܼܬܵܐ ܕܦܵܬܚܵܐ ܬܲܪܥܵܐ ܠܡܲܘܬܵܐ ܒܦܲܓܪܸܗ ܠܵܐ ܐܝܼܬ܃
082:126	ܘܲܐܝܟܲܢ ܐܸܥܽܘܠ ܕܸܐܢ ܢܵܩܸܫ ܐ̄ܢܵܐ ܠܵܐ ܦܵܬܲܚ ܠܝܼ܀
082:127	ܒܗܝܼܠ ܗ̄ܘܵܐ ܡܵܪܲܢ ܘܲܡܠܸܐ ܟܽܠܵܗ݀ ܡܲܟܝܼܟܽܘܬܵܐ܃