← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 82: on Our Lord's fight with Satan

Click on a word for lexical analysis
Click on a red-colored coordinate for comments and/or translations of the line

▲ earlier lines

082:027 ܚܙܝܼܢܝ̄ ܚܵܙܸܐ ܟܽܠ ܘܲܡܠܝܼܢܝ ܬܸܗܪܵܐ ܕܓܲܢ̄ܒܵܪܽܘܬܵܟ܃
082:028 ܕܲܒܬܸܕܡܽܘܪܬܵܐ ܐܲܙܝܼܥ ܡܼܐܡܪܵܟ ܥܲܬܝܼܪܵܐܝܼܬ܀
082:029 ܗܲܒ ܡܸܢ ܕܝܼܠܵܟ ܡܸܠܬܵܐ ܕܡܲܠܝܵܐ ܦܵܪܽܘܫܽܘܬܵܐ܃
082:030 ܘܦܽܘܡܵܐ ܕܙܵܡܲܪ ܫܽܘܒܚܵܐ ܫܲܦܝܵܐ ܕܠܵܐ ܕܽܘܘܵܕܵܐ܀
082:031 ܘܗܲܘܢܵܐ ܕܬܵܗܲܪ ܒܽܐܘܪܚܵܟ ܪܵܡܲܬ ܡܸܢ ܒܵܨܽܘ̈ܝܸܐ܃
082:032 ܘܩܵܠܵܐ ܕܲܡܥܝܼܪ ܐ̄ܢܵܫܵܐ ܠܫܽܘܒܚܵܟ ܟܲܫܝܼܪܵܐܝܼܬ܀
082:033 ܒܕܲܪܵܟ ܬܸܗܪܸܬ ܟܲܕ ܡܲܩܪܸܒ ܐܲܢ̄ܬ ܥܲܡ ܣܵܛܵܢܵܐ܃
082:034 ܘܡܸܢܸܗ ܕܬܸܗܪܵܐ ܙܵܥ ܒܝܼ ܡܹܐܡܪܵܐ ܠܡܸܬܡܲܠܵܠܽܘ܀
082:035 ܘܗܵܐ ܚܵܐܲܪ ܒܸܗ ܗܲܘܢܵܐ ܒܕܲܪܵܟ ܘܲܡܠܸܐ ܡܸܢܸܗ܃
082:036 ܬܸܗܪܵܐ ܘܦܸܗܝܵܐ ܘܲܐܝܟܲܢ ܐܼܡܪܵܟ ܠܵܐ ܝܵܕܲܥ ܐ̄ܢܵܐ܀
082:037 ܐܲܠܵܗܵܐ ܐܲܢ̄ܬ ܘܲܐܝܟܲܢ ܠܵܐ ܕܚܸܠ ܒܝܼܫܵܐ ܡܸܢܵܟ܃
082:038 ܢܲܩܪܸܒ ܥܲܡܵܟ ܐܸܢ ܝܵܕܲܥ ܗ̄ܘܵܐ ܕܡܲܢܽܘ ܐܝܼܬܲܝܟ܀
082:039 ܒܪܸܗ ܕܐ̄ܢܵܫܵܐ ܐܲܢ̄ܬ ܟܲܣܝܵܐ ܘܓܲܠܝܵܐ ܘܝܼܚܝܼܕܵܝܵܐ܃
082:040 ܘܵܐܟܸܠܩܲܪܨܵܐ ܒܦܲܓܪܵܢܽܘܬܵܟ ܡܸܬܕܲܘܲܕ ܗ̄ܘܵܐ܀
082:041 ܒܨܲܘܡܵܟ ܬܸܗܪܸܬ ܕܲܠܣܵܛܵܢܵܐ ܗܽܘ ܐܲܛܥܝܼ ܗ̄ܘܵܐ܃
082:042 ܕܲܢܢܲܣܸܝܟ ܗ̄ܘܵܐ ܘܢܸܕܲܥ ܡܲܢ ܐܲܢ̄ܬ ܒܲܪ ܐܲܠܵܗܵܐ܀
082:043 ܘܒܲܝܢܵܬ ܗܵܠܸܝܢ ܐܲܚܕܲܢܝ ܬܸܡܗܵܐ ܒܡܲܟܝܼܟܽܘܬܵܟ܃
082:044 ܕܟܲܕ ܓܲܢ̄ܒܵܪܵܐ ܐܢ̄ܬ ܐܲܝܟ ܚܲܠܵܫܵܐ ܥܒܲܕܬ ܐܲܓܽܘܢܵܐ܀
082:045 ܟܲܣܝܼܬ ܚܲܝܠܵܟ ܒܲܡܚܝܼܠܽܘܬܵܟ ܟܲܕ ܡܲܩܪܸܒ ܐܲܢ̄ܬ܃
082:046 ܐܵܦ ܪܲܒܽܘܬܵܟ ܐܸܬܓܲܢܝܲܬ̤ ܠܵܗ݀ ܒܲܙܥܽܘܪܽܘܬܵܟ܀
082:047 ܘܲܒܐ̄ܢܵܫܽܘܬܵܟ ܐܲܠܵܗܽܘܬܵܟ ܚܲܟܝܼܡܵܐܝܼܬ܃
082:048 ܘܲܛܥܵܐ ܒܝܼܫܵܐ ܘܲܥܒܲܕ ܕܲܪܵܐ ܕܬܸܗܪܵܐ ܥܲܡܵܟ܀
082:049 ܘܗܵܐ ܡܙܝܼܥܝܼܢ ܠܝܼ ܓ̈ܲܠܠܸܐ ܕܡܼܐܡܪܵܟ ܣܲܓܝܼ ܬܸܗܪܸ̈ܐ܃
082:050 ܗܲܒ ܠܝܼ ܡܸܠܬܵܐ ܕܲܕܠܵܐ ܒܨܵܬܵܐ ܡܡܲܠܠܵܐ ܫܲܪܒܵܟ܀
082:051 ܒܲܪ ܐܲܠܵܗܵܐ ܚܲܘܒܲܬ ܓܲܘܵܐ ܒܥܵܐ ܗ̄ܘܵܐ ܢܸܦܪܽܘܥ܃
082:052 ܘܡܸܛܽܠܗܵܢܵܐ ܣܒܲܠ ܢܸܣܝܽܘܢܸܗ ܕܵܐܟܸܠܩܲܪܨܵܐ܀
082:053 ܥܲܠ ܕܲܢܦܲܠ ܗ̄ܘܵܐ ܒܕܲܪܵܐ ܐܵܕܵܡ ܟܲܕ ܐܸܬܢܲܣܝܼ܃
082:054 ܐܸܬܚܲܕܲܬ ܗ̄ܘܵܐ ܕܲܪܵܐ ܕܲܢܚܽܘܒ ܐܵܟܸܠܩܲܪܨܵܐ܀
082:055 ܕܚܵܒ ܗ̄ܘܵܐ ܐܵܕܵܡ ܘܲܐܠܸܦ ܠܲܒܢܲܘ̈ܗ̄ܝ ܚܲܝܵܒܽܘܬܵܐ܃
082:056 ܒܲܪ ܐܲܠܵܗܵܐ ܐܲܠܸܦ ܐܸܢܽܘܢ ܕܲܐܝܟܲܢ ܢܸܙܟܽܘܢ܀
082:057 ܘܡܸܛܽܠܗܵܢܵܐ ܢܚܸܬ ܗ̄ܘܵܐ ܠܕܲܪܵܐ ܗܲܘ ܙܵܟܸܐ ܟܽܠ܃
082:058 ܕܢܸܗܘܸܐ ܕܡܽܘܬܵܐ ܠܟܽܠܡܲܢ ܕܵܐܟܸܦ ܥܲܠ ܙܵܟܽܘܬܵܐ܀
082:059 ܘܚܲܘܝܼ ܠܐ̄ܢܵܫܵܐ ܕܲܐܝܟܲܢ ܢܸܙܟܽܘܢ ܠܲܒܥܸܠܕܲܪܵܐ܃
082:060 ܘܡܸܛܽܠܗܵܢܵܐ ܒܦܲܓܪܵܐ ܕܐ̄ܢܵܫܵܐ ܥܒܲܕ ܐܲܓܽܘܢܵܐ܀
082:061 ܐܸܬܓܲܫܲܡ ܓܹܝܪ ܡܸܢܸܗ ܕܓܸܢܣܵܐ ܕܲܒܢܲܝܢܵܫܵܐ܃
082:062 ܘܲܗܘܵܐ ܐ̄ܢܵܫܵܐ ܕܲܐܝܟ ܒܲܪܢܵܫܵܐ ܩܪܵܒܵܐ ܢܸܥܒܸܕ܀
082:063 ܐ̄ܢܵܫܵܝܵܐ ܗ̄ܘܵܐ ܕܲܪܸܗ ܕܡܵܪܲܢ ܕܥܲܡ ܣܵܛܵܢܵܐ܃
082:064 ܠܵܐ ܐ̄ܢܵܫ ܢܼܐܡܲܪ ܕܲܐܠܵܗܵܐܝܼܬ ܐܸܬܟܲܬܲܫ ܗ̄ܘܵܐ܀
082:065 ܐܸܠܽܘ ܐܲܩܪܸܒ ܒܲܐܠܵܗܽܘܬܸܗ ܐܲܝܟ ܕܲܡܨܸܐ ܗ̄ܘܵܐ܃
082:066 ܡܲܢ ܣܵܕܲܪ ܗ̄ܘܵܐ ܩܪܵܒܵܐ ܠܩܽܘܒܠܸܗ ܡܸܢ ܒܸܪ̈ܝܵܬܸܗ܀
082:067 ܦܲܓܪܸܗ ܕܲܒܪܵܐ ܐܲܛܥܝܼ ܠܒܝܼܫܵܐ ܘܠܵܐ ܝܲܕܥܸܗ ܗ̄ܘܵܐ܃
082:068 ܕܸܐܠܽܘ ܝܲܕܥܸܗ ܕܲܪܵܐ ܥܲܡܸܗ ܠܵܐ ܥܵܒܸܕ ܗ̄ܘܵܐ܀
082:069 ܐܵܦ ܗܽܘ ܡܵܪܲܢ ܐܸܬܡܲܟܲܟ ܠܸܗ ܠܲܒܥܸܠܕܲܪܵܐ܃
082:070 ܘܒܲܡܚܝܼܠܽܘܬܵܐ ܨܒܵܐ ܢܸܬܟܲܬܲܫ ܥܲܡ ܡܵܪܽܘܕܵܐ܀
082:071 ܘܡܸܛܽܠ ܕܲܚܙܵܝܗ̄ܝ ܐܲܝܟ ܒܲܪܢܵܫܵܐ ܣܒܲܪ ܣܵܛܵܢܵܐ܃
082:072 ܕܠܲܘ ܐܲܠܵܗܵܐ ܗ̄ܘ ܐܸܠܵܐ ܐ̄ܢܵܫܵܐ ܟܢܵܬܸܗ ܕܵܐܕܵܡ܀
082:073 ܘܒܲܪ ܐܲܠܵܗܵܐ ܣܕܲܪ ܗ̄ܘܵܐ ܒܕܲܪܵܐ ܦܲܓܪܵܢܽܘܬܸܗ܃
082:074 ܘܲܐܓܢܝܼ ܡܸܢܸܗ ܚܲܝܠܵܐ ܪܲܒܵܐ ܕܲܐܠܵܗܽܘܬܸܗ܀
082:075 ܘܟܲܕ ܠܵܐ ܝܵܕܲܥ ܡܲܢܽܘ ܘܒܲܪ ܡܲܢ ܐܲܩܪܸܒ ܥܲܡܸܗ܃
082:076 ܕܸܐܠܽܘ ܝܲܕܥܸܗ ܥܵܪܸܩ ܗ̄ܘܵܐ ܠܸܗ ܘܠܵܐ ܡܲܩܪܸܒ ܗ̄ܘܵܐ܀
082:077 ܐܸܠܵܐ ܡܸܛܽܠ ܕܸܐܬܵܐ ܡܸܠܬܵܐ ܘܲܗܘܵܐ ܦܲܓܪܵܐ܃

▼ later lines