← Back
The Comprehensive Aramaic Lexicon
← Return to the Text Browser
click on the file description for more information
60040: OS MtCur

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

00:00 ܐܘܢܓܠܝܘܢ ܕܡ̈ܦܪܫܐ
00:01 ܡܬܝ
01:01 ܟܬܒܐ ܕܬ̈ܘܠܕܬܗ ܕܝܫܘܥ ܡܫܝܚܐ܂ ܒܪܗ ܕܕܘܝܕ ܒܪܗ ܕܐܒܪܗܡ܂
01:02 ܐܒܪܗܡ ܐܘܠܕ ܠܐܝܣܚܩ܂ ܐܝܣܚܩ ܐܘܠܕ ܠܝܥܩܘܒ܂ ܝܥܩܘܒ ܐܘܠܕ ܠܝܗܘܕܐ ܘܠܐ̈ܚܘܗܝ܂
01:03 ܝܗܘܕܐ ܐܘܠܕ ܠܦܪܨ ܘܠܙܪܚ ܡܢ ܬܡܪ܂ ܦܪܨ ܐܘܠܕ ܠܚܨܪܘܢ܂ ܚܨܪܘܢ ܐܘܠܕ ܠܐܪܡ܂
01:04 ܐܪܡ ܐܘܠܕ ܠܥܡܝܢܕܒ܂ ܥܡܝܢܕܒ ܐܘܠܕ ܠܢܚܫܘܢ܂ ܢܚܫܘܢ ܐܘܠܕ ܠܫܠܐ܂
01:05 ܫܠܐ ܐܘܠܕ ܠܒܥܙ ܡܢ ܪܚܒ܂ ܒܥܙ ܐܘܠܕ ܠܥܘܒܪ ܡܢ ܐܪܥܘܬ܂ ܥܘܒܪ ܐܘܠܕ ܠܐܝܫܝ܂
01:06 ܐܝܫܝ ܐܘܠܕ ܠܕܘܝܕ ܡܠܟܐ܂ ܕܘܝܕ ܐܘܠܕ ܠܫܠܝܡܘܢ ܡܢ ܐܢܬܬܗ ܕܐܘܪܝܐ܂
01:07 ܫܠܝܡܘܢ ܐܘܠܕ ܠܪܚܒܥܡ܂ ܪܚܒܥܡ ܐܘܠܕ ܠܐܒܝܐ܂ ܐܒܝܐ ܐܘܠܕ ܠܐܣܐ܂
01:08 ܐܣܐ ܐܘܠܕ ܠܝܗܘܫܦܛ܂ ܝܗܘܫܦܛ ܐܘܠܕ ܠܝܗܘܪܡ܂ ܝܗܘܪܡ ܐܘܠܕ ܠܐܚܙܝܐ܂ ܐܚܙܝܐ ܐܘܠܕ ܠܝܘܐܫ܂ ܝܘܐܫ ܐܘܠܕ ܠܐܡܘܨܝܐ܂ ܐܡܘܨܝܐ ܐܘܠܕ ܠܥܘܙܝܐ܂
01:09 ܥܘܙܝܐ ܐܘܠܕ ܠܝܘܬܡ܂ ܝܘܬܡ ܐܘܠܕ ܠܐܚܙ܂ ܐܚܙ ܐܘܠܕ ܠܚܙܩܝܐ܂
01:10 ܚܙܩܝܐ ܐܘܠܕ ܠܡܢܫܐ܂ ܡܢܫܐ ܐܘܠܕ ܠܐܡܘܢ܂ ܐܡܘܢ ܐܘܠܕ ܠܝܘܫܝܐ܂
01:11 ܝܘܫܝܐ ܐܘܠܕ ܠܝܘܟܢܝܐ ܘܠܐܚ̈ܘܗܝ ܒܓܠܘܬܐ ܕܒܒܠ܂
01:12 ܡܢ ܒܬܪ ܓܠܘܬܐ ܕܝܢ ܕܒܒܠ܂ ܝܘܟܢܝܐ ܐܘܠܕ ܠܫܐܠܬܐܝܠ܂ ܫܐܠܬܐܝܠ ܐܘܠܕ ܠܙܘܪܒܒܠ܂
01:13 ܙܘܪܒܒܠ ܐܘܠܕ ܠܐܒܝܘܪ܂ ܐܒܝܘܪ ܐܘܠܕ ܠܐܠܝܩܝܡ܂ ܐܠܝܩܝܡ ܐܘܠܕ ܠܥܙܘܪ܂
01:14 ܥܙܘܪ ܐܘܠܕ ܠܨܕܘܩ܂ ܨܕܘܩ ܐܘܠܕ ܠܐܟܝܢ܂ ܐܟܝܢ ܐܘܠܕ ܠܐܠܝܘܪ܂
01:15 ܐܠܝܘܪ ܐܘܠܕ ܠܐܠܝܥܙܪ܂ ܐܠܝܥܙܪ ܐܘܠܕ ܠܡܬܢ܂ ܡܬܢ ܐܘܠܕ ܠܝܥܩܘܒ܂
01:16 ܝܥܩܘܒ ܐܘܠܕ ܠܝܘܣܦ܂ ܗܘ ܕܡܟܝܪܐ ܗܘܬ ܠܗ ܡܪܝܡ ܒܬܘܠܬܐ܂ ܗܝ ܕܝܠܕܬ ܠܝܫܘܥ ܡܫܝܚܐ܀
01:17 ܟܠܗܝܢ ܗܟܝܠ ܫܪ̈ܒܬܐ ܡܢ ܐܒܪܗܡ ܘܥܕܡܐ ܠܕܘܝܕ܂ ܗܘܝܢ ܫܪ̈ܒܬܐ ܐܪ̈ܒܥܣܪܐ܂ ܘܡܢ ܕܘܝܕ ܘܥܕܡܐ ܠܓܠܘܬܐ ܕܒܒܠ܂ ܫܪ̈ܒܬܐ ܐܪ̈ܒܥܣܪܐ܂ ܘܡܢ ܓܠܘܬܐ ܕܒܒܠ ܥܕܡܐ ܠܡܫܝܚܐ܂ ܫܪ̈ܒܬܐ ܐܪ̈ܒܥܣܪܐ܀
01:18 ܝܠܕܗ ܕܝܢ ܕܡܫܝܚܐ ܗܟܢܐ ܗܘܐ܂ ܟܕ ܡܟܝܪܐ ܗܘܬ ܡܪܝܡ ܐܡܗ ܠܝܘܣܦ܂ ܟܕ ܠܐ ܢܬܩܪܒܘܢ ܚܕ ܠܘܬ ܚܕ܂ ܐܫܬܟܚܬ ܒܛܢܐ ܡܢ ܪܘܚܐ ܕܩܘܕܫܐ܂
01:19 ܝܘܣܦ ܕܝܢ ܡܛܠ ܕܓܒܪܐ ܗܘܐ ܟܐܢܐ܂ ܠܐ ܨܒܐ ܗܘܐ ܕܢܦܪܣܝܗ ܠܡܪܝܡ܂ ܘܐܬܪܥܝ ܗܘܐ ܕܒܗܝܠܐܝܬ ܢܕܠܠܝܗ܂
01:20 ܟܕ ܗܠܝܢ ܕܝܢ ܐܬܪܥܝ܂ ܐܬܚܙܝ ܠܗ ܠܝܘܣܦ ܡܠܐܟܐ ܕܡܪܝܐ ܒܚܙܘܐ ܕܠܠܝܐ ܘܐܡܪ ܠܗ܂ ܝܘܣܦ ܒܪܗ ܕܕܘܝܕ ܠܐ ܬܕܚܠ ܠܡܕܒܪ ܠܡܪܝܡ ܡܟܝܪܬܟ܂ ܗܘ ܓܝܪ ܕܡܬܝܠܕ ܡܢܗܿ ܡܢ ܪܘܚܐ ܗܘ ܕܩܘܕܫܐ ܒܛܝܢ܂
01:21 ܬܐܠܕ ܠܟ ܕܝܢ ܒܪܐ܂ ܘܢܬܩܪܐ ܫܡܗ ܝܫܘܥ܂ ܗܘ ܓܝܪ ܢܚܝܘܗܝ ܠܥܠܡܐ ܡܢ ܚ̈ܛܗܘܗܝ܂
01:22 ܗܕܐ ܕܝܢ ܕܗܘܬ܂ ܕܢܬܡܠܐ ܡܕܡ ܕܐܬܐܡܪ ܡܢ ܡܪܝܐ ܒܦܘܡ ܐܫܥܝܐ ܢܒܝܐ ܕܐܡܪ ܗܘܐ܂
01:23 ܗܐ ܒܬܘܠܬܐ ܬܒܛܢ ܘܬܐܠܕ ܒܪܐ܂ ܘܢܬܩܪܐ ܫܡܗ ܥܡܢܘܐܝܠ܂ ܕܡܬܬܪܓܡ ܐܠܗܢ ܥܡܢ܂
01:24 ܟܕ ܩܡ ܕܝܢ ܝܘܣܦ ܡܢ ܫܢܬܗ܂ ܥܒܕ ܐܝܟܢܐ ܕܦܩܕ ܠܗ ܡܠܐܟܐ ܕܡܪܝܐ܂ ܘܕܒܪܗܿ ܠܡܪܝܡ܂
01:25 ܘܕܟܝܐܝܬ ܥܡܪ ܗܘܐ ܥܡܗ܂ ܥܕܡܐ ܕܝܠܕܬܗ ܠܒܪܐ܂ ܘܩܪܬ ܫܡܗ ܝܫܘܥ܀
02:01 ܘܟܕ ܐܬܝܠܕ ܝܫܘܥ ܒܝܬ ܠܚܡ ܕܝܗܘܕܐ܂ ܒܝ̈ܘܡܝ ܗܪܘܕܣ ܡܠܟܐ܂ ܘܗܐ ܡ̈ܓܘܫܐ ܐܬܘ ܡܢ ܡܕܢܚܐ ܠܐܘܪܫܠܡ܂
02:02 ܘܐܡܪܝܢ ܐܝܟܐ ܗܘ ܡܠܟܐ ܕܝ̈ܗܘܕܝܐ ܕܐܬܝܠܕ܂ ܐܢܚܢܢ ܓܝܪ ܚܙܝܢ ܟܘܟܒܗ ܒܡܕܢܚܐ܂ ܘܐܬܝܢ ܠܡܣܓܕ ܠܗ܀
02:03 ܟܕ ܫܡܥ ܕܝܢ ܗܪܘܕܣ ܡܠܟܐ ܐܬܬܙܝܥ܂ ܘܟܠܗܿ ܐܘܪܫܠܡ ܥܡܗ܂
02:04 ܘܟܢܫ ܠܟܠܗܘܢ ܪ̈ܒܝ ܟܗ̈ܢܐ ܘܣ̈ܦܪܐ ܕܥܡܐ ܘܐܡܪ ܠܗܘܢ܂ ܐܝܟܐ ܡܬܝܠܕ ܡܫܝܚܐ܂
02:05 ܐܡܪܝܢ ܠܗ ܒܝܬ ܠܚܡ ܕܝܗܘܕܐ܂ ܗܟܢܐ ܓܝܪ ܟܬܝܒ ܒܢܒܝܐ܂
02:06 ܐܦ ܐܢܬܝ ܒܝܬ ܠܚܡ ܕܝܗܘܕܐ܂ ܠܐ ܗܘܝܬܝ ܒܨܝܪܐ ܡܢ ܡܠܟܘܬܐ ܕܝܗܘܕܐ܂ ܡܢܟܝ ܓܝܪ ܢܦܘܩ ܡܠܟܐ ܕܗܘ ܢܪܥܝܘܗܝ ܠܥܡܝ ܐܝܣܪܝܠ܂
02:07 ܗܝܕܝܢ ܗܪܘܕܣ ܡܛܫܝܐܝܬ ܩܪܐ ܠܗܢܘܢ ܡ̈ܓܘܫܐ܂ ܘܡܥܩܒ ܗܘܐ ܠܗܘܢ܂ ܕܢܕܥ ܒܐܝܢܐ ܙܒܢܐ ܐܬܚܙܝ ܠܗܘܢ ܟܘܟܒܐ܂
02:08 ܘܫܕܪ ܐܢܘܢ ܠܒܝܬ ܠܚܡ܂ ܘܐܡܪ ܠܗܘܢ ܙܠܘ ܥܩܒܘ ܥܠܘܗܝ ܥܠ ܛܠܝܐ ܚܦܝܛܐܝܬ܂ ܘܡܐ ܕܐܫܟܚܬܘܢܝܗܝ ܬܘ ܚܘܐܘܢܝ܂ ܕܐܙܠ ܐܦ ܐܢܐ ܐܣܓܘܕ ܠܗ܂
02:09 ܗܢܘܢ ܕܝܢ ܟܕ ܩܒܠܘ ܦܘܩܕܢܐ ܡܢ ܡܠܟܐ ܐܙܠܘ܂ ܘܐܬܚܙܝ ܠܗܘܢ ܟܘܟܒܐ ܗܘ ܕܚܙܘ ܗܘܘ ܒܡܕܢܚܐ ܐܙܠ ܗܘܐ ܩܕܡܝܗܘܢ܂ ܥܕܡܐ ܕܐܬܐ ܘܩܡ ܠܥܠ ܡܢ ܟܪ ܕܬܡܢ ܗܘܐ ܛܠܝܐ܂
02:10 ܗܢܘܢ ܕܝܢ ܟܕ ܚܙܘܘܗܝ ܠܟܘܟܒܐ ܚܕܘܬܐ ܪܒܬܐ ܚܕܝܘ܂
02:11 ܘܥܠܘ ܠܒܝܬܐ ܘܚܙܘܘܗܝ ܠܛܠܝܐ ܥܡ ܡܪܝܡ ܐܡܗ܂ ܘܢܦܠܘ ܣܓܕܘ ܠܗ܂ ܘܦܬܚܘ ܣܝ̈ܡܬܗܘܢ ܘܩܪܒܘ ܠܗ ܩܘܪܒܢܐ܂ ܕܗܒܐ ܘܡܘܪܐ ܘܠܒܘܢܬܐ܂
02:12 ܘܐܬܚܙܝ ܠܗܘܢ ܒܚܙܘܐ ܕܠܐ ܢܗܦܟܘܢ ܠܘܬ ܗܪܘܕܣ܂ ܘܗܢܘܢ ܒܐܘܪܚܐ ܐܚܪܬܐ ܐܙܠܘ ܗܘܘ ܠܐܬܪܗܘܢ܂
02:13 ܘܡܢ ܒܬܪܗܘܢ ܐܬܚܙܝ ܠܝܘܣܦ ܡܠܐܟܐ ܕܡܪܝܐ ܒܚܠܡܐ ܘܐܡܪ ܠܗ܂ ܩܘܡ ܫܩܘܠ ܠܛܠܝܐ ܘܠܐܡܗ ܘܥܪܘܩ ܠܡܨܪܝܢ܂ ܘܬܡܢ ܗܘܝ ܥܕܡܐ ܕܐܡܪܢܐ ܠܟ܂ ܡܛܘܠ ܕܥܬܝܕ ܗܘ ܗܪܘܕܣ ܠܡܒܥܝܗ ܠܛܠܝܐ ܐܝܟܢܐ ܕܢܘܒܕܝܘܗܝ܀
02:14 ܝܘܣܦ ܕܝܢ ܩܡ ܘܫܩܠܗ ܠܛܠܝܐ ܘܠܐܡܗ ܒܠܠܝܐ ܘܐܙܠ ܠܗ ܠܡܨܪܝܢ܂
02:15 ܘܗܘܐ ܬܡܢ ܥܕܡܐ ܕܡܝܬ ܗܪܘܕܣ ܡܠܟܐ܂ ܕܢܬܡܠܐ ܡܕܡ ܕܐܬܐܡܪ ܡܢ ܡܪܝܐ ܒܝܕ ܢܒܝܐ ܕܐܡܪ ܗܘܐ܂ ܕܡܢ ܡܨܪܝܢ ܩܪܝܬ ܠܒܪܝ܀
02:16 ܗܝܕܝܢ ܗܪܘܕܣ ܟܕ ܚܙܐ ܕܒܙܚܘ ܒܗ ܗܢܘܢ ܡ̈ܓܘܫܐ܂ ܐܬܚܡܬ ܛܒ܂ ܘܫܕܪ ܩܛܠ ܠܟܠܗܘܢ ܛ̈ܠܝܐ ܕܐܝܬ ܗܘܘ ܒܝܬ ܠܚܡ܂ ܘܒܟܠܗܘܢ ܬܚܘ̈ܡܝܗ܂ ܡܢ ܒܪ ܬܪ̈ܬܝܢ ܫ̈ܢܝܢ ܘܠܬܚܬ܂ ܠܕܡܘܬܐ ܕܙܒܢܐ ܕܐܡܪܘ ܠܗ ܗܠܝܢ ܡ̈ܓܘܫܐ܂
02:17 ܗܝܕܝܢ ܫܠܡܬ ܡܠܬܐ ܗܝ ܕܐܡܪ ܐܪܡܝܐ ܢܒܝܐ܂
02:18 ܩܠܐ ܐܫܬܡܥ ܒܪܡܬܐ܂ ܐܠܝܐ ܘܒܟܝܐ ܘܬܢܚ̈ܬܐ ܣܓܝܐ̈ܬܐ܂ ܩܠܐ ܕܪܚܝܠ ܕܒܟܝܐ ܥܠ ܒ̈ܢܝܗ܂ ܘܠܐ ܨܒܝܐ ܠܡܬܒܝܐܘ܂ ܡܛܠ ܕܠܐ ܐܝܬ ܐܢܘܢ܂
02:19 ܟܕ ܡܝܬ ܕܝܢ ܗܪܘܕܣ ܡܠܟܐ܂ ܐܬܚܙܝ ܠܝܘܣܦ ܒܡܨܪܝܢ ܡܠܐܟܐ ܕܡܪܝܐ ܒܚܠܡܐ
02:20 ܘܐܡܪ ܠܗ܂ ܩܘܡ ܕܒܪ ܠܛܠܝܐ ܘܠܐܡܗ ܘܙܠ ܠܐܪܥܐ ܕܐܝܣܪܝܠ܂ ܡܛܠ ܕܡܝܬܘ ܠܗܘܢ ܗܢܘܢ ܕܒܥܝܢ ܗܘܘ ܢܦܫܗ ܕܛܠܝܐ ܠܡܥܕܝܘ܂
02:21 ܗܘ ܕܝܢ ܩܡ ܫܩܠܗ ܠܛܠܝܐ ܘܠܐܡܗ܂ ܘܐܬܐ ܠܗ ܠܐܪܥܐ ܕܐܝܣܪܝܠ܀
02:22 ܟܕ ܫܡܥ ܕܝܢ ܝܘܣܦ ܕܐܪܟܠܐܘܣ ܗܘܐ ܡܠܟܐ ܒܝܗܘܕ܂ ܒܕܘܟܬ ܗܪܘܕܣ ܐܒܘܗܝ܂ ܕܚܠ ܕܢܐܙܠ ܠܬܡܢ܂ ܘܐܬܚܙܝ ܠܗ ܒܚܙܘܐ ܕܢܐܙܠ ܠܗ ܠܐܬܪܐ ܕܓܠܝܠܐ܂
02:23 ܘܐܬܐ ܠܬܡܢ܂ ܘܥܡܪ ܗܘܐ ܒܡܕܝܢܬܐ ܚܕܐ ܕܡܬܩܪܝܐ ܢܨܪܬ܂ ܘܐܬܡܠܝܬ ܡܠܬܐ ܕܐܡܝܪܐ ܒܢܒܝܐ܂ ܕܢܨܪܝܐ ܢܬܩܪܐ܀
03:01 ܘܒܗܢܘܢ ܝܘ̈ܡܬܐ܂ ܐܬܐ ܝܘܚܢܢ ܡܥܡܕܢܐ܂ ܘܡܟܪܙ ܗܘܐ ܒܡܕܒܪܐ ܕܝܗܘܕ
03:02 ܘܐܡܪ ܗܘܐ܂ ܕܬܘܒܘ܂ ܡܛܠ ܕܩܪܒܬ ܠܗܿ ܡܠܟܘܬܐ ܕܫܡܝܐ܂
03:03 ܗܢܘ ܓܝܪ ܕܟܬܝܒ ܥܠܘܗܝ ܒܐܫܥܝܐ ܢܒܝܐ ܕܐܡܪ ܗܘܐ܂ ܩܠܐ ܕܩܪܐ ܒܡܕܒܪܐ܂ ܛܝܒܘ ܐܘܪܚܐ ܠܡܪܝܐ܂ ܘܬܪܘܨܘ ܫܒ̈ܝܠܘܗܝ ܕܐܠܗܢ܂
03:04 ܗܘ ܕܝܢ ܝܘܚܢܢ ܠܒܝܫ ܗܘܐ ܠܒܘܫܐ ܕܒܥܘܐ ܕܓ̈ܡܠܐ܂ ܘܐܣܝܪ ܗܘܐ ܥܪܩܬܐ ܒܚܨ̈ܘܗܝ܂ ܘܡܐܟܘܠܬܗ ܐܝܬܝܗ ܗܘܬ ܩ̈ܡܨܐ ܘܕܒܫܐ ܕܒܪܐ܂
03:05 ܗܝܕܝܢ ܐܬܝܢ ܗܘܘ ܠܘܬܗ ܒ̈ܢܝ ܐܘܪܫܠܡ ܘܟܠܗܿ ܝܗܘܕ܂ ܘܟܠܗ ܥܒܪܐ ܕܚ̈ܕܪܝ ܝܘܪܕܢܢ ܢܗܪܐ܂
03:06 ܘܡܥܡܕ ܗܘܐ ܠܗܘܢ ܒܝܘܪܕܢܢ ܢܗܪܐ܂ ܟܕ ܡܘܕܐ ܗܘܐ ܐܢܫ ܐܢܫ ܒܚܛ̈ܗܘܗܝ܂
03:07 ܟܕ ܚܙܐ ܕܝܢ ܡ̈ܟܣܐ ܘܦܪ̈ܝܫܐ ܘܙܕ̈ܘܩܝܐ ܕܐܬܝܢ ܠܡܥܡܘܕܝܬܗ܂ ܐܡܪ ܠܗܘܢ܂ ܝܠܕܐ ܕܐ̈ܟܕܢܐ ܡܢܘ ܚܘܝܟܘܢ ܠܡܥܪܩ ܡܢ ܪܘܓܙܐ ܕܐܬܐ܂
03:08 ܥܒܕܘ ܗܟܝܠ ܦܐ̈ܪܐ ܕܫܘܝܢ ܠܬܝܒܘܬܐ܂
03:09 ܘܠܐ ܬܐܡܪܘܢ ܒܢܦܫܟܘܢ ܕܐܒܐ ܐܝܬ ܠܢ ܐܒܪܗܡ܂ ܐܡܪܢܐ ܠܟܘܢ ܓܝܪ ܕܡܫܟܚ ܐܠܗܐ ܡܢ ܗܠܝܢ ܟܐ̈ܦܐ ܠܡܩܡܘ ܒ̈ܢܝܐ ܠܐܒܪܗܡ܂
03:10 ܘܗܐ ܡܛܝ ܠܗ ܢܪܓܐ ܥܠ ܥܩܪܗܘܢ ܕܐ̈ܝܠܢܐ܂ ܟܘܠ ܐܝܠܢܐ ܗܟܝܠ ܕܦܐ̈ܪܐ ܛܒ̈ܐ ܠܐ ܥܒܕ܂ ܡܬܦܣܩ ܘܠܢܘܪܐ ܐܙܠ܂
03:11 ܐܢܐ ܕܝܢ ܗܐ ܡܥܡܕ ܐܢܐ ܠܟܘܢ ܒܡ̈ܝܐ ܠܬܝܒܘܬܐ܂ ܗܘ ܕܝܢ ܐܝܢܐ ܕܐܬܐ ܒܬܪܝ ܚܣܝܢ ܗܘ ܡܢܝ܂ ܘܠܐ ܫܘܐ ܐܢܐ ܡܣ̈ܢܘܗܝ ܠܡܫܩܠ܂ ܗܘ ܢܥܡܕܟܘܢ ܒܪܘܚܐ ܕܩܘܕܫܐ ܘܒܢܘܪܐ܂
03:12 ܗܘ ܕܐܚܝܕ ܪܦܫܐ ܒܐܝܕܗ ܘܡܕܟܐ ܐܕܪܗ܂ ܘܚ̈ܛܐ ܚܡܠ ܒܐ̈ܘܨܪܘܗܝ܂ ܘܬܒܢܐ ܡܘܩܕ ܒܢܘܪܐ ܕܠܐ ܕܥܟܐ܀
03:13 ܗܝܕܝܢ ܐܬܐ ܝܫܘܥ ܡܢ ܓܠܝܠܐ ܠܝܘܪܕܢܢ܂ ܠܘܬ ܝܘܚܢܢ ܕܢܥܡܕܝܘܗܝ܂
03:14 ܘܟܠܝܗܝ ܝܘܚܢܢ ܘܐܡܪ ܠܗ܂ ܐܢܐ ܚܫܚ ܐܢܐ ܕܐܢܬ ܬܥܡܕܢܝ܂ ܘܐܢܬ ܠܘܬ ܐܬܝܬ܂
03:15 ܐܡܪ ܠܗ ܝܫܘܥ ܫܒܘܩ ܕܗܫܐ܂ ܡܛܠ ܕܗܟܢܐ ܘܠܐ ܠܢ ܕܢܡܠܐ ܟܠܗܿ ܟܐܢܘܬܐ܂ ܗܝܕܝܢ ܫܒܩܗ ܠܡܥܡܕ܂
03:16 ܘܥܡܕ ܗܘܐ ܝܫܘܥ܂ ܘܟܕ ܥܡܕ܂ ܒܗܿ ܒܫܥܬܐ ܕܣܠܩ ܝܫܘܥ ܡܢ ܡ̈ܝܐ܂ ܘܗܐ ܐܬܦܬܚܘ ܫܡܝܐ܂ ܘܚܙܐ ܪܘܚܐ ܕܐܠܗܐ ܕܢܚܬܬ ܐܝܟ ܝܘܢܐ ܘܩܘܝܬ ܥܠܘܗܝ܂
03:17 ܘܩܠܐ ܐܫܬܡܥ ܡܢ ܫܡܝܐ ܕܐܡܪ ܠܗ܂ ܐܢܬ ܗܘ ܒܪܝ ܘܚܒܝܒܝ ܕܒܟ ܐܨܛܒܝܬ܂
04:01 ܗܝܕܝܢ ܝܫܘܥ ܐܬܕܒܪ ܡܢ ܪܘܚܐ ܕܩܘܕܫܐ ܠܡܕܒܪܐ܂ ܕܢܬܢܣܐ ܡܢ ܣܛܢܐ܂
04:02 ܘܡܢ ܒܬܪ ܐܪ̈ܒܥܝܢ ܝܘ̈ܡܝܢ ܕܨܐܡ ܗܘܐ ܟܦܢ܂
04:03 ܘܩܪܒ ܠܘܬܗ ܗܘ ܕܡܢܣܐ ܘܐܡܪ ܠܗ܂ ܐܢ ܒܪܗ ܐܢܬ ܕܐܠܗܐ ܐܡܪ ܕܗܠܝܢ ܟܐ̈ܦܐ ܢܗܘܝܢ ܠܚܡܐ܂
04:04 ܥܢܐ ܝܫܘܥ ܘܐܡܪ ܠܗ܂ ܟܬܝܒ ܗܘ ܕܠܐ ܗܘܐ ܒܠܚܡܐ ܒܠܚܘܕ ܚܝܐ ܒܪܢܫܐ܂ ܐܠܐ ܒܟܠ ܦܬܓܡ ܕܢܦܩ ܡܢ ܦܘܡܗ ܕܡܪܝܐ܂
04:05 ܗܝܕܝܢ ܕܒܪܗ ܐܟܠ ܩܪܨܐ ܘܐܝܬܝܗ ܠܡܕܝܢܬ ܩܘܕܫܐ܂ ܘܐܩܝܡܗ ܥܠ ܩܪܢܐ ܕܗܝܟܠܐ܂
04:06 ܘܐܡܪ ܠܗ ܐܢ ܒܪܗ ܐܢܬ ܕܐܠܗܐ ܐܪܡܐ ܢܦܫܟ ܠܬܚܬ܂ ܟܬܝܒ ܓܝܪ ܕܠܡ̈ܠܐܟܘܗܝ ܢܦܩܕ ܥܠܝܟ܂ ܕܥܠ ܕܪ̈ܥܝܗܘܢ ܢܫܩܠܘܢܟ܂ ܕܠܐ ܡܡܬܘܡ ܬܬܩܠ ܒܪܓܠܟ ܒܟܐܦܐ܂
04:07 ܬܘܒ ܐܡܪ ܠܗ ܝܫܘܥ܂ ܟܬܝܒ ܗܘ ܕܠܐ ܬܢܣܐ ܠܡܪܟ ܘܐܠܗܟ܂
04:08 ܬܘܒ ܕܒܪܗ ܐܟܠ ܩܪܨܐ ܠܛܘܪܐ ܐܝܢܐ ܕܛܒ ܪܡ܂ ܘܚܘܝܗ ܟܠܗܝܢ ܡ̈ܠܟܘܬܐ ܕܥܠܡܐ ܘܫܘܒܚܗܝܢ܂
04:09 ܘܐܡܪ ܠܗ ܗܠܝܢ ܟܠܗܝܢ ܐܬܠ ܠܟ ܐܢ ܗܘ ܕܬܦܠ ܘܬܣܓܘܕ ܩܕܡܝ܂
04:10 ܗܝܕܝܢ ܐܡܪ ܠܗ ܝܫܘܥ܂ ܙܠ ܠܟ ܠܒܣܬܪܝ ܣܛܢܐ܂ ܟܬܝܒ ܗܘ ܓܝܪ ܕܠܡܪܟ ܐܠܗܟ ܬܣܓܘܕ܂ ܘܠܗ ܒܠܚܘܕܘܗܝ ܬܦܠܘܚ܂
04:11 ܗܝܕܝܢ ܫܒܩܗ ܐܟܠ ܩܪܨܐ ܥܕ ܙܒܢܐ܂ ܘܗܐ ܡ̈ܠܐܟܐ ܩܪܒܘ ܘܡܫܡܫܝܢ ܗܘܘ ܠܗ ܠܝܫܘܥ܀
04:12 ܟܕ ܫܡܥ ܕܝܢ ܝܫܘܥ ܕܝܘܚܢܢ ܐܫܬܠܡ܂ ܐܙܠ ܠܗ ܠܓܠܝܠܐ܂
04:13 ܘܫܒܩܗܿ ܠܢܨܪܬ܂ ܘܐܬܐ ܥܡܪ ܒܟܦܪܢܚܘܡ܂ ܕܥܠ ܝܕ ܝܡܐ܂ ܒܬܚܘܡܐ ܕܙܒܘܠܘܢ ܘܕܢܦܬܠܝ܂
04:14 ܕܢܬܡܠܐ ܡܕܡ ܕܐܬܐܡܪ ܒܝܕ ܐܫܥܝܐ ܢܒܝܐ ܕܐܡܪ ܗܘܐ܂
04:15 ܐܪܥܐ ܕܙܒܘܠܘܢ ܘܐܪܥܐ ܕܢܦܬܠܝ܂ ܐܘܪܚܐ ܕܝܡܐ܂ ܥܒܪ̈ܘܗܝ ܕܝܘܪܕܢܢ ܢܗܪܐ܂ ܓܠܝܠܐ ܕܥ̈ܡܡܐ܂
04:16 ܥܡܐ ܕܝܬܒ ܗܘܐ ܒܚܫܘܟܐ ܚܙܘ ܢܘܗܪܐ ܪܒܐ܂ ܘܐܝܠܝܢ ܕܝܬܒܝܢ ܗܘܘ ܒ̈ܛܠܠܐ ܕܡܘܬܐ܂ ܢܘܗܪܐ ܪܒܐ ܕܢܚ ܥܠܝܗܘܢ܀
04:17 ܡܢ ܗܝܕܝܢ ܫܪܝ ܝܫܘܥ ܠܡܟܪܙܘ ܘܠܡܐܡܪ܂ ܩܪܒܬ ܠܗܿ ܡܠܟܘܬܐ ܕܫܡܝܐ܂
04:18 ܘܟܕ ܡܗܠܟ ܗܘܐ ܡܪܢ ܥܠ ܝܕ ܝܡܬܐ ܕܓܠܝܠܐ܂ ܚܙܐ ܬܪ̈ܝܢ ܐ̈ܚܝܢ܂ ܠܫܡܥܘܢ ܕܡܬܩܪܐ ܟܐܦܐ܂ ܘܠܐܢܕܪܝܘܣ ܐܚܘܗܝ܂ ܟܕ ܪܡܝܢ ܗܘܘ ܡܨ̈ܝܕܬܗܘܢ ܒܝܡܐ ܡܛܠ ܕܨ̈ܝܕܐ ܗܘܘ܂
04:19 ܐܡܪ ܠܗܘܢ ܝܫܘܥ܂ ܬܘ ܒܬܪܝ ܘܐܥܒܕܟܘܢ ܨܝ̈ܕܐ ܕܒ̈ܢܝ ܐܢܫܐ܂
04:20 ܘܗܢܘܢ ܒܗܿ ܒܫܥܬܐ܂ ܫܒܩܘ ܡ̈ܨܝܕܬܗܘܢ ܘܐܙܠܘ ܒܬܪܗ܀
04:21 ܘܟܕ ܫܢܝ ܡܢ ܬܡܢ܂ ܚܙܐ ܠܬܪ̈ܝܢ ܐ̈ܚܝܢ ܐ̈ܚܪܢܝܢ܂ ܠܝܥܩܘܒ ܘܠܝܘܚܢܢ ܐܚܘܗܝ ܒ̈ܢܝ ܙܒܕܝ܂ ܟܕ ܝܬܒܝܢ ܗܘܘ ܒܣܦܝܢܬܐ ܥܡ ܙܒܕܝ ܐܒܘܗܘܢ܂ ܘܡܬܩܢܝܢ ܡ̈ܨܝܕܬܗܘܢ܂ ܘܩܪܐ ܐܢܘܢ ܝܫܘܥ܂
04:22 ܘܗܢܘܢ ܒܗܿ ܒܫܥܬܐ ܫܒܩܘ ܡܨܝ̈ܕܬܗܘܢ ܘܐܙܠܘ ܒܬܪܗ܂
04:23 ܘܗܘ ܡܬܟܪܟ ܗܘܐ ܒܟܘܠܗܿ ܓܠܝܠܐ܂ ܘܡܠܦ ܗܘܐ ܒܟ̈ܢܘܫܬܐ܂ ܘܡܟܪܙ ܗܘܐ ܣܒܪܬܐ ܕܡܠܟܘܬܐ܂ ܘܡܐܣܐ ܗܘܐ ܟܠ ܬܫ̈ܢܝܩܝܢ ܘܟܠ ܟܘܪ̈ܗܢܝܢ ܒܥܡܐ܂
04:24 ܘܐܫܬܡܥ ܛܒܗ ܒܟܠܗ ܣܘܪܝܐ܂ ܘܐܝܬܝܘ ܠܗ ܟܠܗܘܢ ܐܝܠܝܢ ܕܒܝܫ ܒܝܫ ܥܒܝܕܝܢ܂ ܘܐܝܠܝܢ ܕܟܪܝܗܝܢ ܒܟ̈ܘܪܗܢܐ ܥ̈ܛܠܐ܂ ܘܒ̈ܬܫܢܝܩܐ ܣ̈ܢܝܐ܂ ܘܣܓ̈ܝܐܐ ܕ̈ܦܠܓܐ ܪܡܝܢ ܗܘܘ ܥܠܝܗܘܢ܂ ܘܕܒܪ ܐ̈ܓܪܐ܂ ܘܗܘ ܥܠ ܚܕ ܚܕ ܡܢܗܘܢ ܐܝܕܗ ܣܐܡ ܗܘܐ܂ ܘܠܟܠܗܘܢ ܡܐܣܐ ܗܘܐ܂
04:25 ܘܐܙܠܘ ܒܬܪܗ ܟܢܫ̈ܐ ܣ̈ܓܝܐܐ܂ ܡܢ ܓܠܝܠܐ ܘܡܢ ܥ̈ܣܪܬ ܡܕ̈ܝܢܬܐ܂ ܘܡܢ ܐܘܪܫܠܡ܂ ܘܡܢ ܝܗܘܕ܂ ܘܡܢ ܥܒܪܐ ܕܝܘܪܕܢܢ܂
05:01 ܟܕ ܚܙܐ ܕܝܢ ܠܟ̈ܢܫܐ܂ ܣܠܩ ܝܬܒ ܠܗ ܒܛܘܪܐ܂ ܘܩܪܒܘ ܠܘܬܗ ܬܠܡ̈ܝܕܘܗܝ܂
05:02 ܘܦܬܚ ܦܘܡܗ ܘܡܠܦ ܗܘܐ ܠܗܘܢ ܘܐܡܪ܀
05:03 ܛܘܒܝܗܘܢ ܠܡܣ̈ܟܢܐ ܒܪܘܚܗܘܢ ܕܕܝܠܗܘܢ ܗܝ ܡܠܟܘܬܐ ܕܫܡܝܐ܀
05:05 ܛܘܒܝܗܘܢ ܠܡ̈ܟܝܟܐ ܕܗܢܘܢ ܢܐܪܬܘܢܗܿ ܠܐܪܥܐ܀
05:04 ܛܘܒܝܗܘܢ ܠܐܒ̈ܝܠܐ ܕܗܢܘܢ ܢܬܒܝܐܘܢ܀
05:06 ܛܘܒܝܗܘܢ ܠܐܝܠܝܢ ܕܟܦܢܝܢ ܘܨܗܝܢ ܠܙܕܝܩܘܬܐ ܕܗܢܘܢ ܢܣܒܥܘܢ܀
05:07 ܛܘܒܝܗܘܢ ܠܡܪ̈ܚܡܢܐ ܕܥܠܝܗܘܢ ܢܗܘܘܢ ܪ̈ܚܡܐ܀
05:08 ܛܘܒܝܗܘܢ ܠܐܝܠܝܢ ܕܕܟܝܢ ܒܠܒܗܘܢ ܕܗܢܘܢ ܢܚܙܘܢܝܗܝ ܠܐܠܗܐ܀
05:09 ܛܘܒܝܗܘܢ ܠܥܒ̈ܕܝ ܫܠܡܐ ܕܗܢܘܢ ܒ̈ܢܘܗܝ ܕܐܠܗܐ ܢܬܩܪܘܢ܀
05:10 ܛܘܒܝܗܘܢ ܠܐܝܠܝܢ ܕܪܕܝܦܝܢ ܡܛܠ ܙܕܝܩܘܬܐ ܕܕܝܠܗܘܢ ܗܝ ܡܠܟܘܬܐ ܕܫܡܝܐ܀
05:11 ܛܘܒܝܟܘܢ ܡܐ ܕܪܕܦܝܢ ܠܟܘܢ ܒ̈ܢܝ ܐܢܫܐ ܘܡܚܣܕܝܢ ܠܟܘܢ܂ ܘܐܡܪܝܢ ܥܠܝܟܘܢ ܟܘܠ ܡܕܡ ܕܒܝܫ ܒܕܓܠܘܬܐ ܡܛܠ ܫܡܝ܂
05:12 ܐܢܬܘܢ ܕܝܢ ܚܕܘ ܘܪܘܙܘ ܒܗܿܘ ܝܘܡܐ܂ ܕܐܓܪܟܘܢ ܣܓܝ ܒܫܡܝܐ܂ ܗܟܢܐ ܓܝܪ ܪܕܦܝܢ ܗܘܘ ܐ̈ܒܗܝܟܘܢ ܠܢܒ̈ܝܐ܂ ܐܝܠܝܢ ܕܩܕܡܝܟܘܢ ܗܘܘ܀
05:13 ܐܢܬܘܢ ܐܢܘܢ ܡܠܚܐ ܕܐܪܥܐ܂ ܐܢ ܕܝܢ ܡܠܚܐ ܬܦܟܗܿ ܘܬܫܛܐ ܒܡܢܐ ܬܬܡܠܚ܂ ܠܡܕܡ ܠܐ ܐܙܠܐ܂ ܐܠܐ ܕܢܫܕܘܢܗܿ ܠܒܪ܂ ܘܢܗܘܘܢ ܕܝܫܝܢ ܠܗܿ ܒ̈ܢܝ ܐܢܫܐ܂
05:14 ܐܢܬܘܢ ܐܢܘܢ ܢܘܗܪܗ ܕܥܠܡܐ܂ ܘܠܐ ܡܫܟܚܐ ܡܕܝܢܬܐ ܕܥܠ ܛܘܪܐ ܒܢܝܐ ܕܬܛܫܐ܂
05:15 ܘܠܐ ܐܢܫ ܡܢܗܪ ܫܪܓܐ ܘܣܐܡ ܠܗ ܬܚܝܬ ܡܘܕܝܐ܂ ܐܠܐ ܣܐܡ ܠܗ ܥܠ ܡܢܪܬܐ܂ ܘܡܢܗܪ ܠܟܠܗܘܢ ܐܝܠܝܢ ܕܒܒܝܬܐ ܐܢܘܢ܂
05:16 ܗܟܢܐ ܢܢܗܪ ܢܘܗܪܟܘܢ ܩܕܡ ܒ̈ܢܝ ܐ̈ܢܫܐ ܕܢܚܙܘܢ ܥ̈ܒܕܝܟܘܢ ܫ̈ܦܝܪܐ܂ ܘܢܫܒܚܘܢ ܠܐܒܘܟܘܢ ܕܒܫܡܝܐ܀
05:17 ܠܐ ܬܣܒܪܘܢ ܕܐܬܝܬ ܕܐܫܪܐ ܢܡܘܣܐ ܘܢܒ̈ܝܐ܂ ܠܐ ܐܬܝܬ ܕܐܫܪܐ ܐܢܘܢ܂ ܐܠܐ ܠܡܡܠܝܘ ܐܢܘܢ܂
05:18 ܐܡܝܢ ܓܝܪ ܐܡܪܢܐ ܠܟܘܢ܂ ܕܥܕܡܐ ܕܢܥܒܪܘܢ ܫܡܝܐ ܘܐܪܥܐ܂ ܝܘܕ ܐܬܘܬܐ ܚܕܐ ܐܘ ܩܪܢܐ ܚܕܐ ܠܐ ܬܥܒܪ ܡܢ ܢܡܘܣܐ܂ ܥܕܡܐ ܕܟܠ ܡܕܡ ܢܗܘܐ܂
05:19 ܟܠ ܕܢܫܪܐ ܗܟܝܠ ܚܕ ܡܢ ܦܘܩ̈ܕܢܐ ܗܠܝܢ ܙܥ̈ܘܪܐ܂ ܘܢܠܦ ܗܟܢܐ ܠܒ̈ܢܝ ܐܢܫܐ܂ ܒܨܝܪܐ ܢܬܩܪܐ ܒܡܠܟܘܬܐ ܕܫܡܝܐ܂ ܟܠ ܕܢܥܒܕ ܕܝܢ ܘܢܠܦ܂ ܗܢܐ ܪܒܐ ܢܬܩܪܐ ܒܡܠܟܘܬܐ ܕܫܡܝܐ܂
05:20 ܐܡܪܢܐ ܠܟܘܢ ܓܝܪ܂ ܕܐܠܐ ܬܐܬܪ ܙܕܝܩܘܬܟܘܢ ܝܬܝܪ ܡܢ ܣܦܪ̈ܐ ܘܦܪ̈ܝܫܐ܂ ܠܐ ܬܥܠܘܢ ܠܡܠܟܘܬܐ ܕܫܡܝܐ܂
05:21 ܫܡܥܬܘܢ ܕܐܬܐܡܪ ܠܩܕ̈ܡܝܐ ܕܠܐ ܬܩܛܘܠ܂ ܘܟܘܠ ܡܢ ܕܢܩܛܘܠ ܢܬܚܝܒ ܒܕܝܢܐ܂
05:22 ܐܢܐ ܕܝܢ ܐܡܪ ܐܢܐ ܠܟܘܢ܂ ܕܟܠ ܡܢ ܕܢܪܓܙ ܥܠ ܐܚܘܗܝ ܐܝܩܐ ܢܗܘܐ ܡܚܝܒ ܠܕܝܢܐ܂ ܘܡܢ ܕܢܐܡܪ ܠܐܚܘܗܝ ܪܩܐ ܢܗܘܐ ܡܚܝܒ ܠܟܢܘܫܬܐ܂ ܘܟܠ ܡܢ ܕܢܐܡܪ ܠܐܚܘܗܝ ܫܛܝܐ܂ ܢܗܘܐ ܡܚܝܒ ܠܓܗܢܐ ܕܢܘܪܐ܀
05:23 ܐܡܬܝ ܗܟܝܠ ܕܡܩܪܒ ܐܢܬ ܩܘܪܒܢܟ ܩܕܡ ܡܕܒܚܐ܂ ܘܬܡܢ ܬܥܗܕ ܕܡܕܡ ܐܚܝܕ ܐܚܘܟ ܥܠܝܟ ܐܟܬܐ܂
05:24 ܫܒܘܩ ܩܘܪܒܢܟ ܬܡܢ ܩܕܡܘܗܝ ܕܡܕܒܚܐ܂ ܘܙܠ ܠܘܩܕܡ ܐܬܪܥܐ ܥܡ ܐܚܘܟ܂ ܘܗܝܕܝܢ ܬܐ ܘܩܪܒ ܩܘܪܒܢܟ܀
05:25 ܗܘܝܬ ܡܬܐܘܐ ܥܡ ܒܥܠܕܝܢܟ܂ ܒܥܓܠ ܥܕ ܥܡܗ ܐܢܬ ܒܐܘܪܚܐ܂ ܕܠܡܐ ܒܥܠܕܝܢܟ ܢܫܠܡܟ ܠܕܝܢܐ܂ ܘܕܝܢܐ ܢܫܠܡܟ ܠܓܒܝܐ܂ ܘܬܦܠ ܒܝܬ ܐܣ̈ܝܪܐ܂
05:26 ܘܐܡܝܢ ܐܡܪ ܐܢܐ ܠܟ܂ ܕܠܐ ܬܦܘܩ ܡܢ ܬܡܢ܂ ܥܕܡܐ ܕܬܬܠ ܫܡܘܢܐ ܐܚܪܝܐ܀
05:27 ܫܡܥܬܘܢ ܕܐܬܐܡܪ ܠܩܕ̈ܡܝܐ ܕܠܐ ܬܓܘܪ܂
05:28 ܐܢܐ ܕܝܢ ܐܡܪ ܐܢܐ ܠܟܘܢ ܕܟܠ ܡܢ ܕܚܙܐ ܐܢܬܬܐ ܘܪܐܓ ܠܗܿ ܓܪܗܿ ܒܠܒܗ܂
05:29 ܐܢ ܕܝܢ ܥܝܢܟ ܕܝܡܝܢܐ ܡܟܫܠܐ ܠܟ ܚܨܝ ܫܕܝܗ ܡܢܟ܂ ܦܩܚ ܠܟ ܓܝܪ ܕܚܕ ܗܕܡܟ ܢܐܒܕ܂ ܘܠܐ ܟܘܠܗ ܦܓܪܟ ܢܐܙܠ ܠܓܗܢܐ܂
05:30 ܘܐܢ ܐܝܕܟ ܕܝܡܝܢܐ ܡܟܫܠܐ ܠܟ ܦܣܘܩ ܫܕܝܗ ܡܢܟ܂ ܦܩܚ ܠܟ ܓܝܪ ܕܢܐܒܕ ܚܕ ܡܢ ܗܕ̈ܡܝܟ܂ ܘܠܐ ܟܠܗ ܦܓܪܟ ܢܐܙܠ ܠܓܗܢܐ܂
05:31 ܐܬܐܡܪ ܕܡܢ ܕܫܪܐ ܐܢܬܬܗ ܢܬܠ ܠܗܿ ܐܓܪܬܐ ܕܕܘܠܠܐ܂
05:32 ܐܢܐ ܕܝܢ ܐܡܪ ܐܢܐ ܠܟܘܢ ܕܡܢ ܕܫܪܐ ܐܢܬܬܗ ܕܠܐ ܐܬܐܡܪ ܥܠܝܗ ܓܘܪܐ܂ ܗܘܝܘ ܡܓܝܪ ܠܗܿ܂ ܘܡܢ ܕܫܩܠ ܫܒܝܩܬܐ ܡܓܪ ܓܐܪ܀
05:33 ܬܘܒ ܫܡܥܬܘܢ ܕܐܬܐܡܪ ܠܩ̈ܕܡܝܐ܂ ܠܐ ܬܐܡܐ ܡܘܡܬܐ ܕܫܘܩܪܐ܂ ܐܠܐ ܬܬܠ ܠܡܪܝܐ ܡܘܡܬܟ܂
05:34 ܐܢܐ ܕܝܢ ܐܡܪܢܐ ܠܟܘܢ ܕܩܢܘܡܟܘܢ ܠܐ ܬܐܡܘܢ܂ ܠܐ ܒܫܡܝܐ ܕܟܘܪܣܝܗ ܐܢܘܢ ܕܐܠܗܐ܂
05:35 ܘܐܦ ܠܐ ܒܐܪܥܐ ܡܛܠ ܕܟܘܒܫܐ ܗܝ ܕܬܚܝܬ ܪ̈ܓܠܘܗܝ܂ ܘܐܦ ܠܐ ܒܐܘܪܫܠܡ ܡܛܘܠ ܕܡܕܝܢܬܗ ܗܝ ܕܡܠܟܐ ܪܒܐ܂
05:36 ܘܐܦܠܐ ܒܪܫܟ ܬܐܡܐ܂ ܡܛܠ ܕܠܐ ܡܫܟܚ ܐܢܬ ܠܡܥܒܕ ܒܗ ܡܢܬܐ ܚܕܐ ܕܣܥܪܐ ܐܘܟܡܬܐ ܐܘ ܚܘܪܬܐ܂
05:37 ܐܠܐ ܬܗܘܐ ܡܠܬܟܘܢ ܐܝܢ ܐܝܢ ܘܠܐ ܠܐ܂ ܡܕܡ ܕܝܢ ܕܡܢ ܗܠܝܢ ܝܬܝܪ ܡܢ ܒܝܫܐ ܗܘ܀
05:38 ܫܡܥܬܘܢ ܕܐܬܐܡܪ ܕܥܝܢܐ ܚܠܦ ܥܝܢܐ܂ ܘܫܢܐ ܚܠܦ ܫܢܐ܂
05:39 ܐܢܐ ܕܝܢ ܐܡܪ ܐܢܐ ܠܟܘܢ ܕܠܐ ܬܩܘܡܘܢ ܠܘܩܒܠ ܒܝܫܐ܂ ܐܠܐ ܡܢ ܕܡܚܐ ܠܟ ܥܠ ܦܟܟ ܩܪܒ ܠܗ ܐܚܪܢܐ܂
05:40 ܘܡܢ ܕܨܒܐ ܕܢܕܘܢ ܥܡܟ ܘܢܫܩܘܠ ܟܘܬܝܢܟ܂ ܫܒܘܩ ܠܗ ܫܩܠ ܐܦ ܡܪܛܘܛܟ܂
05:41 ܘܡܢ ܕܐܡܪ ܠܟ ܕܬܐܙܠ ܥܡܗ ܡܝܠ܂ ܙܠ ܥܡܗ ܬܪܝܢ ܐܚܪܢܝܢ܂
05:42 ܘܡܢ ܕܫܐܠ ܠܟ ܗܒ ܠܗ܂ ܘܡܢ ܕܨܒܐ ܕܢܐܙܦ ܡܢܟ ܠܐ ܬܟܠܝܘܗܝ܂
05:43 ܫܡܥܬܘܢ ܕܐܬܐܡܪ ܠܩܕ̈ܡܝܐ܂ ܕܪܚܡ ܠܩܪܝܒܟ ܘܣܢܝ ܠܒܥܠܕܒܒܟ܂
05:44 ܐܢܐ ܕܝܢ ܐܡܪ ܐܢܐ ܠܟܘܢ ܕܐܚܒܘ ܠܒܥ̈ܠܕܒܒܝܟܘܢ܂ ܘܨܠܘ ܥܠ ܐܝܠܝܢ ܕܪܕܦܝܢ ܠܟܘܢ܂
05:45 ܐܝܟܢܐ ܕܬܗܘܘܢ ܒ̈ܢܘܗܝ ܕܐܒܘܟܘܢ ܕܒܫܡܝܐ܂ ܗܘ ܕܡܕܢܚ ܫܡܫܗ ܥܠ ܛ̈ܒܐ ܘܥܠ ܒܝ̈ܫܐ܂ ܘܡܚܬ ܡܛܪܗ ܥܠ ܟܐ̈ܢܐ ܘܥܠ ܥ̈ܘܠܐ܂
05:46 ܐܢ ܓܝܪ ܡܚܒܝܢ ܐܢܬܘܢ ܠܐܝܠܝܢ ܕܡܚܒܝܢ ܠܟܘܢ ܡܢܘ ܐܓܪܟܘܢ܂ ܗܟܢܐ ܓܝܪ ܐܦ ܡ̈ܟܣܐ ܥܒܕܝܢ܂
05:47 ܘܐܢ ܫܐܠܝܢ ܐܢܬܘܢ ܒܫܠܡܐ ܕܐ̈ܚܝܟܘܢ ܒܠܚܘܕ܂ ܡܢܐ ܗܝ ܛܝܒܘܬܟܘܢ܂ ܠܐ ܗܐ ܐܦ ܚ̈ܢܦܐ ܗܟܢܐ ܥܒܕܝܢ܀
05:48 ܗܘܘ ܗܟܝܠ ܓܡܝܪ̈ܐ܂ ܐܝܟܢܐ ܕܐܒܘܟܘܢ ܕܒܫܡܝܐ ܓܡܝܪ ܗܘ܂
06:01 ܐܙܕܗܪܘ ܕܠܐ ܬܥܒܕܘܢ ܡܘܗܒܬܟܘܢ ܠܥܝܢ ܒ̈ܢܝ ܐ̈ܢܫܐ܂ ܐܝܟܢܐ ܕܬܬܚܙܘܢ ܠܗܘܢ܂ ܕܠܐ ܐܓܪܐ ܠܝܬ ܠܟܘܢ ܠܘܬ ܐܒܘܟܘܢ ܕܒܫܡܝܐ܂
06:02 ܐܡܬܝ ܗܟܝܠ ܕܥܒܕ ܐܢܬ ܙܕܩܬܐ܂ ܠܐ ܬܩܪܐ ܩܪܢܐ ܩܕܡܝܟ܂ ܐܝܟܢܐ ܕܥܒܕܝܢ ܢܣ̈ܒܝ ܒܐ̈ܦܐ ܒ̈ܟܢܘܫܬܐ ܘܒܫ̈ܘܩܐ܂ ܐܝܟܢܐ ܕܢܫܬܒܚܘܢ ܡܢ ܒ̈ܢܝ ܐܢܫܐ܂ ܐܡܝܢ ܐܡܪܢܐ ܠܟܘܢ ܕܩܒܠܘ ܐܓܪܗܘܢ܂
06:03 ܐܢܬ ܕܝܢ ܡܐ ܕܥܒܕ ܐܢܬ ܙܕܩܬܐ܂ ܠܐ ܬܕܥ ܣܡܠܟ ܡܢܐ ܥܒܕܐ ܝܡܝܢܟ܂
06:04 ܕܬܗܘܐ ܙܕܩܬܟ ܒܟܣܝܐ܂ ܘܐܒܘܟ ܕܚܙܐ ܒܟܣܝܐ ܢܦܪܥܟ܂
06:05 ܘܡܐ ܕܡܨܠܐ ܐܢܬ܂ ܠܐ ܬܗܘܐ ܐܝܟ ܗܢܘܢ ܢܣ̈ܒܝ ܒܐ̈ܦܐ܂ ܕܪܚܡܝܢ ܕܢܩܘܡܘܢ ܒ̈ܟܢܘܫܬܐ ܘܒܙܘܝ̈ܬܐ ܕܫ̈ܘܩܐ ܠܡܨܠܝܘ܂ ܕܢܬܚܙܘܢ ܠܒ̈ܢܝ ܐ̈ܢܫܐ܂ ܐܡܪܢܐ ܠܟܘܢ ܕܩܒܠܘ ܐܓܪܗܘܢ܂
06:06 ܐܢܬ ܕܝܢ ܐܡܬܝ ܕܡܨܠܐ ܐܢܬ܂ ܥܘܠ ܠܟ ܠܬܘܢܐ܂ ܘܐܚܘܕ ܬܪܥܐ ܒܐܦ̈ܝܟ܂ ܘܨܠܐ ܠܐܒܘܟ ܒܟܣܝܐ܂ ܘܐܒܘܟ ܕܚܙܐ ܒܟܣܝܐ ܢܦܪܥܟ܀
06:07 ܘܐܡܬܝ ܕܡܨܠܝܢ ܐܢܬܘܢ܂ ܠܐ ܗܘܝܬܘܢ ܡܦܩܩܝܢ ܐܝܟ ܢܣ̈ܒܝ ܒܐ̈ܦܐ܂ ܕܣܒܪܝܢ ܓܝܪ ܕܒܡܡܠܠܐ ܣܓܝܐܐ ܡܫܬܡܥܝܢ܂
06:08 ܠܐ ܗܟܝܠ ܬܕܡܘܢ ܠܗܘܢ܂ ܝܕܥ ܗܘ ܓܝܪ ܐܒܘܟܘܢ܂ ܡܢܐ ܡܬܒܥܐ ܠܟܘܢ ܥܕܠܐ ܬܫܐܠܘܢܝܗܝ܂
06:09 ܗܟܢܐ ܕܝܢ ܗܘܝܬܘܢ ܡܨܠܝܢ܂ ܐܒܘܢ ܕܒܫܡܝܐ ܢܬܩܕܫ ܫܡܟ܂
06:10 ܬܐܬܐ ܡܠܟܘܬܟ܂ ܘܢܗܘܘܢ ܨܒ̈ܝܢܝܟ ܒܐܪܥܐ ܐܝܟ ܕܒܫܡܝܐ܂
06:11 ܘܠܚܡܢ ܐܡܝܢܐ ܕܝܘܡܐ ܗܒ ܠܢ܂
06:12 ܘܫܒܘܩ ܠܢ ܚܘ̈ܒܝܢ܂ ܐܝܟܢܐ ܕܐܦ ܐܢܚܢܢ ܢܫܒܘܩ ܠܚܝ̈ܒܝܢ܂
06:13 ܘܠܐ ܬܝܬܝܢ ܠܢܣܝܘܢܐ܂ ܐܠܐ ܦܨܢ ܡܢ ܒܝܫܐ܂ ܡܛܠ ܕܕܝܠܟ ܗܝ ܡܠܟܘܬܐ ܘܬܫܒܘܚܬܐ܂ ܠܥܠܡ ܥܠܡܝܢ ܐܡܝܢ܀
06:14 ܐܢ ܓܝܪ ܬܫܒܩܘܢ ܠܒ̈ܢܝ ܐ̈ܢܫܐ ܣ̈ܟܠܘܬܗܘܢ܂ ܐܦ ܐܒܘܟܘܢ ܕܒܫܡܝܐ ܢܫܒܘܩ ܠܟܘܢ܂
06:15 ܐܢ ܕܝܢ ܐܢܬܘܢ ܠܐ ܬܫܒܩܘܢ ܠܒ̈ܢܝ ܐܢܫܐ ܣܟ̈ܠܘܬܗܘܢ܂ ܘܐܦܠܐ ܐܒܐ ܢܫܒܘܩ ܠܟܘܢ ܣ̈ܟܠܘܬܟܘܢ܀
06:16 ܘܐܡܬܝ ܕܨܝܡܝܢ ܐܢܬܘܢ܂ ܠܐ ܬܗܘܘܢ ܐܝܟ ܢܣ̈ܒܝ ܒܐ̈ܦܐ܂ ܕܡܟܡܪܝܢ ܐ̈ܦܝܗܘܢ܂ ܕܢܬܚܙܘܢ ܠܒ̈ܢܝ ܐܢܫܐ ܕܡܨܡ ܨܝܡܝܢ܂ ܘܐܡܝܢ ܐܡܪܢܐ ܠܟܘܢ ܕܩܒܠܘ ܐܓܪܗܘܢ܂
06:17 ܐܢܬ ܕܝܢ ܐܡܬܝ ܕܨܐܡ ܐܢܬ܂ ܐܫܝܓ ܐ̈ܦܝܟ ܘܡܫܘܚ ܪܫܟ܂
06:18 ܕܠܐ ܬܬܚܙܐ ܠܒ̈ܢܝ ܐܢܫܐ ܕܡܨܡ ܨܐܡ ܐܢܬ܂ ܐܠܐ ܠܐܒܘܟ ܕܝܕܥ ܒܟܣܝܐ܂ ܘܐܒܐ ܕܚܙܐ ܒܟܣܝܐ ܢܦܪܥܟ܂
06:19 ܠܐ ܬܣܝܡܘܢ ܠܟܘܢ ܣܝܡܬܐ ܒܐܪܥܐ܂ ܐܬܪ ܕܢܦܠ ܣܣܐ ܘܡܚܒܠ܂ ܘܐܬܪ ܕܦܠܫܝܢ ܓ̈ܢܒܐ ܘܓܢܒܝܢ܂
06:20 ܐܠܐ ܣܝܡܘ ܠܟܘܢ ܣܝܡܬܐ ܒܫܡܝܐ܂ ܐܬܪ ܕܠܐ ܣܣܐ ܡܚܒܠ܂ ܘܐܦܠܐ ܓܢܒ̈ܐ ܦܠܫܝܢ ܘܓܢܒܝܢ܂
06:21 ܐܬܪ ܓܝܪ ܕܣܝܡܬܟܘܢ ܬܗܘܐ ܐܦ ܠܒܟܘܢ ܬܡܢ ܢܗܘܐ܂
06:22 ܫܪܓܗ ܓܝܪ ܕܦܓܪܐ ܥܝܢܐ ܗܝ܂ ܐܢ ܥܝܢܟ ܬܗܘܐ ܦܫܝܛܐ܂ ܐܦ ܦܓܪܟ ܟܠܗ ܢܗܘܐ ܢܗܝܪ܂
06:23 ܐܢ ܕܝܢ ܥܝܢܟ ܬܗܘܐ ܒܝܫܐ܂ ܐܦ ܦܓܪܟ ܟܠܗ ܚܫܘܟ ܗܘ܂ ܐܢ ܗܟܝܠ ܢܘܗܪܐ ܕܒܟ ܚܫܘܟ ܗܘ܂ ܚܫܘܟܟ ܟܡܐ ܢܗܘܐ܂
06:24 ܠܐ ܐܢܫ ܡܫܟܚ ܦܠܚ ܬܪ̈ܝܢ ܡ̈ܪܘܢ܂ ܕܠܐ ܠܚܕ ܢܣܢܐ ܘܠܐܚܪܢܐ ܢܪܚܡ܂ ܐܘ ܠܚܕ ܢܣܝܒܪ ܘܠܐܚܪܢܐ ܢܫܘܛ܂ ܠܐ ܡܫܟܚܝܢ ܐܢܬܘܢ ܠܐܠܗܐ ܠܡܦܠܚ ܘܠܡܡܘܢܐ܂
06:25 ܡܛܠ ܗܢܐ ܐܡܪ ܐܢܐ ܠܟܘܢ܂ ܕܠܐ ܬܐܨܦܘܢ ܠܢܦܫܟܘܢ ܡܢܐ ܬܐܟܠܘܢ܂ ܘܐܦܠܐ ܠܦܓܪ̈ܝܟܘܢ ܡܢܐ ܬܠܒܫܘܢ܂ ܢܦܫܐ ܓܝܪ ܝܬܝܪܐ ܗܝ ܡܢ ܣܝܒܪܬܐ܂ ܘܦܓܪܐ ܡܢ ܠܒܘܫܐ܂
06:26 ܚܘܪܘ ܒܦܪܚܬܐ ܕܫܡܝܐ܂ ܕܠܐ ܙܪܥܝܢ ܘܠܐ ܚܨܕܝܢ ܘܠܐ ܚܡܠܝܢ܂ ܘܐܒܘܟܘܢ ܕܒܫܡܝܐ ܡܬܪܣܐ ܠܗܘܢ܂ ܠܐ ܗܟܝܠ ܐܢܬܘܢ ܝܬܝܪܝܢ ܡܢܗܘܢ܂
06:27 ܡܢܘ ܕܝܢ ܡܢܟܘܢ ܡܫܟܚ ܠܡܘܣܦܘ ܥܠ ܩܘܡܬܗ ܐܡܬܐ ܚܕܐ܂
06:28 ܕܥܠ ܠܒܘܫܐ ܝܨܦܝܢ ܐܢܬܘܢ܂ ܚܙܘ ܠܫ̈ܘܫܢܐ ܕܕܒܪܐ ܐܝܟܢܐ ܡܬܪܒܝܢ܂ ܕܠܐ ܥܙܠܢ ܘܠܐ ܠܐܝܢ܂
06:29 ܘܐܡܝܢ ܐܡܪܢܐ ܠܟܘܢ ܕܐܦܠܐ ܫܠܝܡܘܢ ܒܟܘܠܗܿ ܬܫܒܘܚܬܗ ܐܬܟܣܝ ܐܟܘܬܗܝܢ܂
06:30 ܘܐܢ ܕܝܢ ܠܥܡܝܪܐ ܕܕܒܪܐ ܕܝܘܡܢ ܐܝܬܘܗܝ܂ ܘܡܚܪ ܡܬܠܩܛ ܘܢܦܠ ܒܬܢܘܪܐ ܐܠܗܐ ܡܠܒܫ܂ ܟܡܐ ܗܟܝܠ ܥܠܝܟܘܢ ܢܬܒܛܠ ܠܗ ܚ̈ܣܝܪܝ ܗܝܡܢܘܬܐ܂
06:31 ܠܐ ܗܟܝܠ ܬܐܨܦܘܢ ܘܬܐܡܪܘܢ܂ ܡܢܐ ܢܐܟܘܠ ܘܡܢܐ ܢܫܬܐ܂ ܘܡܢܐ ܢܬܟܣܐ܂
06:32 ܗܠܝܢ ܓܝܪ ܟܠܗܝܢ ܥܡ̈ܡܐ ܗܘ ܕܐܪܥܐ ܒܥܝܢ ܠܗܝܢ܂ ܝܕܥ ܗܘ ܓܝܪ ܐܒܘܟܘܢ ܕܐܦ ܠܟܘܢ ܡܬܒܥܝܢ ܗܠܝܢ܂
06:33 ܐܢܬܘܢ ܕܝܢ ܒܥܘ ܠܘܩܕܡ ܡܠܟܘܬܗ ܕܐܠܗܐ ܘܙܕܝܩܘܬܗ܂ ܘܗܠܝܢ ܟܠܗܝܢ ܢܬܬܘܣܦܢ ܠܟܘܢ܂
06:34 ܠܐ ܗܟܝܠ ܬܐܨܦܘܢ ܕܡܚܪ܂ ܡܛܠ ܕܡܚܪ ܓܝܪ ܕܝܠܗ ܝܨܦ܂ ܣܦܩ ܠܗ ܠܝܘܡܐ ܒܝܫܬܗ܂
07:01 ܠܐ ܬܕܘܢܘܢ ܕܠܐ ܬܬܕܝܢܘܢ܂
07:02 ܒܗܘ ܓܝܪ ܕܝܢܐ ܕܕܝܢܝܢ ܐܢܬܘܢ ܡܬܕܝܢܝܢ ܐܢܬܘܢ܂ ܘܒܟܝܠܬܐ ܕܡܟܝܠܝܢ ܐܢܬܘܢ ܡܬܟܝܠ ܠܟܘܢ܂
07:03 ܡܢܘ ܕܝܢ ܓܠܐ ܕܒܥܝܢܗ ܕܐܚܘܟ ܚܙܐ ܐܢܬ܂ ܘܩܪܝܬܐ ܕܐܝܬ ܒܥܝܢܟ ܠܐ ܒܚܪ ܐܢܬ܂
07:04 ܐܘ ܐܝܟܢܐ ܡܫܟܚ ܐܢܬ ܠܡܐܡܪ ܠܐܚܘܟ܂ ܫܒܘܩ ܐܦܩ ܓܠܐ ܡܢ ܥܝܢܟ܂ ܕܗܐ ܒܥܝܢܟ ܕܝܠܟ ܩܪܝܬܐ ܣܝܡܐ܂
07:05 ܢܣܒ ܒܐ̈ܦܐ ܐܦܩ ܠܘܩܕܡ ܩܪܝܬܐ ܡܢ ܥܝܢܟ܂ ܘܗܝܕܝܢ ܢܬܒܚܪ ܠܟ ܠܡܦܩܘ ܓܠܐ ܡܢ ܥܝܢܗ ܕܐܚܘܟ܂
07:06 ܠܐ ܬܬܠܘܢ ܩܘܕܫܐ ܠܟ̈ܠܒܐ܂ ܘܠܐ ܬܪܡܘܢ ܡܪ̈ܓܢܝܬܐ ܩܕܡ ܚܙ̈ܝܪܐ܂ ܕܠܐ ܢܕܘܫܘܢ ܐܢܝܢ ܒܪ̈ܓܠܝܗܘܢ܂ ܘܢܗܦܟܘܢ ܢܒܙܥܘܢܟܘܢ܂
07:07 ܫܐܠܘ ܘܬܣܒܘܢ܂ ܘܒܥܘ ܘܬܫܟܚܘܢ܂ ܩܘܫܘ ܘܢܬܦܬܚ ܠܟܘܢ܂
07:08 ܟܠ ܡܢ ܓܝܪ ܕܫܐܠ ܢܣܒ܂ ܘܡܢ ܕܒܥܐ ܡܫܟܚ܂ ܘܡܢ ܕܢܩܫ ܡܬܦܬܚ ܠܗ܂
07:09 ܡܢܘ ܓܝܪ ܡܢܟܘܢ ܕܢܫܐܠܝܘܗܝ ܒܪܗ ܠܚܡܐ܂ ܠܡܐ ܟܐܦܐ ܡܘܫܛ ܠܗ܂
07:10 ܐܘ ܐܢ ܢܘܢܐ ܢܫܐܠܝܘܗܝ ܠܡܐ ܚܘܝܐ ܡܘܫܛ ܠܗ܂
07:11 ܐܢ ܗܟܝܠ ܐܢܬܘܢ ܕܒ̈ܝܫܐ ܐܢܬܘܢ܂ ܝܕܥܝܢ ܐܢܬܘܢ ܡܘܗ̈ܒܬܐ ܛܒ̈ܬܐ ܠܡܬܠ ܠܒ̈ܢܝܟܘܢ܂ ܟܡܐ ܝܬܝܪܐܝܬ ܐܒܘܟܘܢ ܕܒܫܡܝܐ܂ ܕܢܬܠ ܛܒ̈ܬܐ ܠܐܝܠܝܢ ܕܫܐܠܝܢ ܠܗ܂
07:12 ܟܠܡܕܡ ܗܟܝܠ ܕܨܒܝܢ ܐܢܬܘܢ ܕܢܥܒܕܘܢ ܠܟܘܢ ܒ̈ܢܝ ܐܢܫܐ܂ ܗܘܝܬܘܢ ܥܒܕܝܢ ܠܗܘܢ܂ ܗܢܘ ܓܝܪ ܢܡܘܣܐ ܘܢܒ̈ܝܐ܂
07:13 ܥܘܠܘ ܒܬܪܥܐ ܐܠܝܨܐ܂ ܡܛܘܠ ܕܦܬܐ ܬܪܥܐ ܘܪܘܝܚܐ ܐܘܪܚܐ ܕܡܘܒܠܐ ܠܐܒܕܢܐ܂ ܘܣ̈ܓܝܐܐ ܐܢܘܢ ܕܐܙܠܝܢ ܒܗܿ܂
07:14 ܡܐ ܐܠܝܨ ܬܪܥܐ ܘܩܛܝܢܐ ܐܘܪܚܐ ܕܡܘܒܠܐ ܠܚ̈ܝܐ܂ ܘܙ̈ܥܘܪܐ ܐܢܘܢ ܐܝܠܝܢ ܕܡܫܟܚܝܢ ܠܗܿ܀
07:15 ܛܪܘ ܢܦܫܟܘܢ ܡܢ ܢܒ̈ܝܐ ܕܫܘܩܪܐ܂ ܕܐܬܝܢ ܠܘܬܟܘܢ ܒܠܒܘܫܐ ܕܐ̈ܡܪܐ܂ ܘܡܢ ܠܓܘ ܕܐܒ̈ܐ ܐܢܘܢ ܚ̈ܛܘܦܐ܂
07:16 ܡܢ ܦܐ̈ܪܝܗܘܢ ܗܟܝܠ ܬܫܬܘܕܥܘܢ ܐܢܘܢ܂ ܠܐ ܓܝܪ ܠܩܛܝܢ ܡܢ ܟܘܒ̈ܐ ܥ̈ܢܒܐ܂ ܐܦܠܐ ܬܐ̈ܢܐ ܡܢ ܕܪ̈ܕܪܐ܂
07:17 ܟܠ ܐܝܠܢܐ ܛܒܐ ܦܐܪ̈ܐ ܛܒ̈ܐ ܥܒܕ܂ ܘܐܝܠܢܐ ܒܝܫܐ ܦܐܪ̈ܐ ܒ̈ܝܫܐ ܥܒܕ܂
07:18 ܠܐ ܡܫܟܚ ܐܝܠܢܐ ܛܒܐ ܕܢܥܒܕ ܦܐܪ̈ܐ ܒܝ̈ܫܐ܂ ܘܐܦܠܐ ܐܝܠܢܐ ܒܝܫܐ ܕܢܥܒܕ ܦܐܪ̈ܐ ܛ̈ܒܐ܂
07:19 ܟܠ ܐܝܠܢܐ ܗܟܝܠ ܕܦܐܪ̈ܐ ܛܒ̈ܐ ܠܐ ܥܒܕ܂ ܡܬܦܣܩ ܘܒܢܘܪܐ ܢܦܠ܂
07:20 ܡܢ ܦܪ̈ܝܗܘܢ ܗܟܝܠ ܬܫܬܘܕܥܘܢ ܐܢܘܢ܀
07:21 ܠܐ ܗܘܐ ܗܟܝܠ ܟܠ ܕܢܐܡܪ ܠܝ ܡܪܝ ܡܪܝ ܥܐܠ ܠܡܠܟܘܬܐ ܕܫܡܝܐ܂ ܐܠܐ ܗܘ ܕܥܒܕ ܨܒܝܢܗ ܕܐܒܝ ܕܒܫܡܝܐ܂ ܗܘ ܢܥܘܠ ܠܡܠܟܘܬ ܫܡܝܐ܂
07:22 ܣܓ̈ܝܐܐ ܓܝܪ ܢܐܡܪܘܢ ܠܝ ܒܗܘ ܝܘܡܐ܂ ܡܪܢ ܡܪܢ܂ ܠܐ ܒܫܡܟ ܐܟܠܢ ܘܐܫܬܝܢ܂ ܘܒܫܡܟ ܐܬܢܒܝܢ܂ ܘܒܫܡܟ ܫܐ̈ܕܐ ܐܦܩܢ܂ ܘܒܫܡܟ ܚ̈ܝܠܐ ܣ̈ܓܝܐܐ ܥܒܕܢ܂
07:23 ܗܝܕܝܢ ܐܡܪ ܠܗܘܢ܂ ܕܠܐ ܡܢ ܡܬܘܡ ܝܕܥܬܟܘܢ܂ ܙܠܘ ܠܟܘܢ ܡܢܝ ܥ̈ܒܕܝ ܥܘܠܐ܂
07:24 ܟܠ ܐܢܫ ܕܫܡܥ ܡ̈ܠܝ ܗܠܝܢ ܘܥܒܕ ܠܗܝܢ܂ ܐܕܡܝܘܗܝ ܠܓܒܪܐ ܚܟܝܡܐ܂ ܕܒܢܐ ܒܝܬܗ ܥܠ ܫܘܥܐ܂
07:25 ܘܢܚܬ ܡܛܪܐ܂ ܘܐܬܘ ܢܗܪ̈ܘܬܐ܂ ܘܢܫܒ ܪܘ̈ܚܐ ܘܐܬܛܪܝܘ ܒܗ ܒܒܝܬܐ ܘܠܐ ܢܦܠ܂ ܡܛܠ ܕܫ̈ܬܐܣܘܗܝ ܥܠ ܫܘܥܐ ܣܝܡܢ ܗܘܝ܂
07:26 ܘܟܠ ܐܢܫ ܕܫܡܥ ܡ̈ܠܝ ܗܠܝܢ ܘܠܐ ܥܒܕ ܠܗܝܢ܂ ܢܬܕܡܐ ܠܓܒܪܐ ܣܟܠܐ܂ ܕܒܢܐ ܒܝܬܗ ܥܠ ܚܠܐ܂
07:27 ܘܢܚܬ ܡܛܪܐ܂ ܘܐܬܘ ܢܗ̈ܪܘܬܐ܂ ܘܢܫܒ ܪܘ̈ܚܐ ܘܐܬܛܪܝ ܒܗ ܒܒܝܬܐ ܗܘ ܘܢܦܠ܂ ܘܗܘܬ ܡܦܘܠܬܗ ܪܒܐ܀
07:28 ܘܟܕ ܫܠܡ ܝܫܘܥ ܡ̈ܠܘܗܝ ܗܠܝܢ܂ ܬܡܝܗܝܢ ܗܘܘ ܟܢ̈ܫܐ ܥܠ ܝܘܠܦܢܗ܂
07:29 ܕܐܝܟ ܡܫܠܛܐ ܡܠܦ ܗܘܐ ܠܗܘܢ܂ ܘܠܐ ܐܝܟ ܣܦܪ̈ܝܗܘܢ ܘܦܪ̈ܝܫܐ܂
08:01 ܘܟܕ ܢܚܬ ܡܢ ܛܘܿܪܐ܂ ܐܬܝܢ ܗܘܘ ܒܬܪܗ ܟܢ̈ܫܐ ܣܓ̈ܝܐܐ
08:02 ܘܗܐ ܓܒܪܐ ܚܕ ܓܪܒܐ ܐܬܐ ܢܦܠ ܣܓܕ ܠܗ܂ ܘܐܡܪ ܠܗ ܡܪܝ܂ ܐܢ ܨܒܐ ܐܢܬ ܡܫܟܚ ܐܢܬ ܠܡܕܟܝܘܬܢܝ܂
08:03 ܘܦܫܛ ܐܝܕܗ ܝܫܘܥ ܘܩܪܒ ܠܗ܂ ܘܐܡܪ ܠܗ ܨܒܐ ܐܢܐ ܐܬܕܟܐ܂ ܘܒܗܿ ܒܫܥܬܐ ܐܬܕܟܝ ܡܢܗ ܓܪܒܐ܂
08:04 ܘܐܡܪ ܠܗ ܝܫܘܥ܂ ܕܠܡܐ ܠܐܢܫ ܐܡܪ ܐܢܬ܂ ܐܠܐ ܙܠ ܚܘܐ ܢܦܫܟ ܠܟܗ̈ܢܐ܂ ܘܩܪܒ ܩܘܪܒܢܐ ܐܝܟܢܐ ܕܦܩܕ ܡܘܫܐ܂ ܕܬܗܘܐ ܠܗܘܢ ܠܣܗܕܘܬܐ܀
08:05 ܒܬܪ ܗܠܝܢ ܟܕ ܥܠ ܠܟܦܪܢܚܘܡ܂ ܩܪܒ ܠܗ ܩܢܛܪܘܢܐ ܚܕ܂ ܘܒܥܐ ܗܘܐ ܡܢܗ ܘܡܬܟܫܦ ܠܗ
08:06 ܘܐܡܪ܂ ܥܒܕܝ ܡܫܪܝ ܘܐܪܡܐ ܒܒܝܬܐ ܒܬܫܢܝܩܐ ܪܒܐ܂
08:07 ܐܡܪ ܠܗ ܝܫܘܥ ܐܢܐ ܐܬܐ ܘܐܣܝܘܗܝ܂
08:08 ܥܢܐ ܗܘ ܩܢܛܪܘܢܐ ܘܐܡܪ ܠܗ܂ ܡܪܝ ܠܐ ܫܘܐ ܐܢܐ ܕܬܥܘܠ ܬܚܝܬ ܡܛܠܠܝ܂ ܐܠܐ ܒܠܚܘܕ ܐܡܪ ܒܡܠܬܐ ܘܢܬܐܣܐ ܛܠܝܝ܂
08:09 ܐܦ ܐܢܐ ܓܝܪ ܓܒܪܐ ܐܢܐ ܕܬܚܝܬ ܫܘܠܛܢܐ܂ ܘܐܝܬ ܠܝ ܫܘܠܛܢܐ ܐܦ ܠܝ܂ ܘܐ̈ܣܛܪܛܝܘܛܐ ܐܝܬ ܬܚܝܬ ܐܝܕܝ܂ ܘܐܡܪ ܐܢܐ ܠܗܢܐ ܕܙܠ ܘܐܙܠ܂ ܘܠܐܚܪܢܐ ܕܬܐ ܘܐܬܐ܂ ܘܠܥܒܕܝ ܐܡܪ ܐܢܐ ܕܥܒܕ ܙܦܠܢ ܘܥܒܕ܂
08:10 ܟܕ ܫܡܥ ܕܝܢ ܝܫܘܥ ܐܬܕܡܪ܂ ܘܐܡܪ ܠܐܢܫܐ ܕܐܬܝܢ ܒܬܪܗ܂ ܐܡܝܢ ܐܡܪܢܐ ܠܟܘܢ܂ ܕܐܦܠܐ ܒܐܢܫ ܒܝܬ ܐܝܣܪܝܠ ܐܫܟܚܬ ܐܝܟ ܗܕܐ ܗܝܡܢܘܬܐ܂
08:11 ܐܡܪ ܐܢܐ ܠܟܘܢ ܕܝܢ܂ ܕܣ̈ܓܝܐܐ ܢܐܬܘܢ ܡܢ ܡܕܢܚܐ ܘܡܢ ܡܥܪܒܐ܂ ܘܢܣܬܡܟܘܢ ܥܡ ܐܒܪܗܡ ܘܐܝܣܚܩ ܘܝܥܩܘܒ ܒܡܠܟܘܬܐ ܕܫܡܝܐ
08:12 ܘܒ̈ܢܝܗ ܕܡܠܟܘܬܐ ܢܦܩܘܢ ܠܚܫܘܟܐ ܒܪܝܐ܂ ܬܡܢ ܢܗܘܐ ܒܟܝܐ ܘܚܘܪܩ ܫܢ̈ܐ܂
08:13 ܗܝܕܝܢ ܐܡܪ ܝܫܘܥ ܠܩܢܛܪܘܢܐ ܗܘ܂ ܙܠ ܐܝܟܢܐ ܕܗܝܡܢܬ ܢܗܘܐ ܠܟ܂ ܘܒܗܿ ܒܫܥܬܐ ܐܬܐܣܝ ܛܠܝܗ܂
08:14 ܘܐܬܐ ܝܫܘܥ ܠܒܝܬܗ ܕܫܡܥܘܢ ܟܐܦܐ܂ ܘܚܙܐ ܠܚܡܬܗ ܕܪܡܝܐ ܘܐܚܝܕܐ ܠܗܿ ܐܫܬܐ܂
08:15 ܘܩܪܒ ܠܐܝܕܗܿ܂ ܘܒܗܿ ܒܫܥܬܐ ܫܒܩܬܗܿ ܐܫܬܐ܂ ܘܩܡܬ ܘܡܫܡܫܐ ܗܘܬ ܠܗܘܢ܂
08:16 ܡܥܪ̈ܒܝ ܫܡܫܐ ܕܝܢ܂ ܩܪܒܘ ܩܕܡܘܗܝ ܟܠܗܘܢ ܐܝܠܝܢ ܕܐܝܬ ܗܘܐ ܠܗܘܢ ܫܐ̈ܕܐ܂ ܘܐܦܩ ܐܢܘܢ ܒܡܠܬܗ܂ ܘܐܝܠܝܢ ܕܒܝܫ ܒܝܫ ܥܒܝܕܝܢ ܗܘܘ ܐܣܝ ܐܢܘܢ܂
08:17 ܕܢܬܡܠܐ ܡܕܡ ܕܐܬܐܡܪ ܒܦܘܡ ܐܫܥܝܐ ܢܒܝܐ ܕܐܡܪ ܗܘܐ܂ ܕܗܘ ܢܣܒ ܟܐ̈ܒܝܢ܂ ܘܢܫܩܘܠ ܟܘܪ̈ܗܢܝܢ܀
08:18 ܟܕ ܚܙܐ ܕܝܢ ܝܫܘܥ ܠܟܢܫܐ ܣܓܝܐܐ ܕܚܕܝܪ ܠܗ܂ ܦܩܕ ܠܬܠܡ̈ܝܕܘܗܝ ܕܢܐܙܠܘܢ ܠܥܒܪܐ ܕܠܗܠ܂
08:19 ܘܩܪܒ ܣܦܪܐ ܚܕ ܘܐܡܪ ܠܗ܂ ܡܠܦܢܐ ܐܬܐ ܒܬܪܟ ܠܐܬܪ ܕܐܙܠ ܐܢܬ܂
08:20 ܐܡܪ ܠܗ ܝܫܘܥ܂ ܠܬ̈ܥܠܐ ܢܩ̈ܥܐ ܐܝܬ ܠܗܘܢ܂ ܘܠܦܪܚܬܐ ܕܫܡܝܐ ܡܛܠܠܐ܂ ܠܒܪܗ ܕܝܢ ܕܐܢܫܐ ܠܝܬ ܠܗ ܐܬܪ ܕܢܣܡܘܟ ܪܫܗ܂
08:21 ܐܚܪܢܐ ܕܝܢ ܡܢ ܬܠܡ̈ܝܕܘܗܝ ܐܡܪ ܠܗ܂ ܡܪܝ ܐܦܣ ܠܝ ܠܘܩܕܡ ܐܙܠ ܐܩܒܘܪ ܠܐܒܝ ܘܐܬܐ܂
08:22 ܐܡܪ ܠܗ ܝܫܘܥ ܫܒܘܩ ܡ̈ܝܬܐ ܩܒܪܝܢ ܡ̈ܝܬܝܗܘܢ ܘܐܢܬ ܬܐ ܒܬܪܝ܀
10:32 ܟܠ ܐܢܫ ܗܟܝܠ ܕܢܘܕܐ ܒܝ ܩܕܡ ܒ̈ܢܝ ܐܢܫܐ܂ ܘܐܦ ܐܢܐ ܐܘܕܐ ܒܗ ܩܕܡ ܐܒܐ ܕܒܫܡܝܐ܂
10:33 ܘܡܢ ܕܢܟܦܘܪ ܒܝ ܩܕܡ ܒ̈ܢܝ ܐܢܫܐ܂ ܐܦ ܐܢܐ ܐܟܦܘܪ ܒܗ ܩܕܡ ܐܒܝ ܕܒܫܡܝܐ܂ ܘܩܕܡ ܡ̈ܠܐܟܘܗܝ܂
10:34 ܠܐ ܐܬܝܬ ܕܐܪܡܐ ܫܝܢܐ ܒܐܪܥܐ܂ ܐܠܐ ܦܠܓܘܬܐ ܕܪ̈ܥܝܢܐ ܘܣܝܦܐ܂
10:35 ܐܬܝܬ ܓܝܪ ܕܐܦܠܓ ܒܪܐ ܥܠ ܐܒܘܗܝ܂ ܘܒܪܬܐ ܥܠ ܐܡܗܿ܂ ܘܟܠܬܐ ܥܠ ܚܡܬܗ܂
10:36 ܘܒ̈ܥܠܕܒܒܘܗܝ ܕܓܒܪܐ ܒ̈ܢܝ ܒܝܬܗ܀
10:37 ܡܢ ܕܪܚܡ ܕܝܢ ܠܐܒܘܗܝ ܐܘ ܠܐܡܗ ܝܬܝܪ ܡܢ ܕܠܝ ܗܘ ܠܐ ܫܘܐ ܠܝ܂ ܘܡܢ ܕܪܚܡ ܒܪܗ ܐܘ ܒܪܬܗ ܝܬܝܪ ܡܢ ܕܠܝ ܗܘ ܠܐ ܫܘܐ ܠܝ܂
10:38 ܘܟܠ ܕܠܐ ܫܩܠ ܨܠܝܒܗ ܘܐܬܐ ܒܬܪܝ ܠܐ ܫܘܐ ܠܝ܂
10:39 ܡܢ ܕܡܫܟܚ ܓܝܪ ܢܦܫܗ ܢܘܒܕܝܗ܂ ܘܡܢ ܕܢܘܒܕ ܢܦܫܗ ܡܛܘܠܬܝ ܢܫܟܚܝܗ܂
10:40 ܡܢ ܕܡܩܒܠ ܠܟܘܢ ܠܝ ܗܘ ܡܩܒܠ܂ ܘܡܢ ܕܠܝ ܡܩܒܠ ܠܡܢ ܕܫܕܪܢܝ ܡܩܒܠ܂
10:41 ܡܢ ܕܡܩܒܠ ܢܒܝܐ ܒܫܡ ܢܒܝܐ ܐܓܪܐ ܕܢܒܝܐ ܢܣܒ܂ ܘܡܢ ܕܡܩܒܠ ܙܕܝܩܐ ܒܫܡ ܙܕܝܩܐ ܐܓܪܐ ܕܙܕܝܩܐ ܢܣܒ܂
10:42 ܘܟܠ ܡܢ ܕܢܫܩܐ ܠܚܕ ܡܢ ܗܠܝܢ ܙܥ̈ܘܪܐ ܟܣܐ ܕ̈ܡܝܐ ܩܪ̈ܝܪܐ ܒܫܡܐ ܕܬܠܡܝܕܘܬܐ܂ ܐܡܝܢ ܐܡܪܢܐ ܠܟܘܢ ܕܠܐ ܢܐܒܕ ܐܓܪܗ܀
11:01 ܘܗܘܐ ܟܕ ܫܠܡ ܝܫܘܥ ܠܡܦܩܕܘ ܠܬܪ̈ܥܣܪ ܬܠܡܝ̈ܕܘܗܝ ܫܢܝ ܠܗ ܡܢ ܬܡܢ܂ ܠܡܠܦܘ ܘܠܡܟܪܙܘ ܒܡ̈ܕܝܢܬܗܘܢ܀
11:02 ܝܘܚܢܢ ܕܝܢ ܟܕ ܫܡܥ ܒܝܬ ܐ̈ܣܝܪܐ ܥܒ̈ܕܘܗܝ ܕܝܫܘܥ܂ ܫܕܪ ܠܬܠܡ̈ܝܕܘܝ
11:03 ܘܫܠܚ ܠܗ܂ ܐܢܬ ܗܘ ܗܘ ܕܐܬܐ ܐܘ ܠܐܚܪܝܢ ܗܘ ܡܣܟܝܢ ܐܢܚܢܢ܂
11:04 ܘܥܢܐ ܝܫܘܥ ܘܐܡܪ ܠܗܘܢ܂ ܙܠܘ ܚܘܘ ܠܝܘܚܢܢ ܡܕܡ ܕܚܙܝܢ ܐܢܬܘܢ ܘܡܕܡ ܕܫܡܥܝܢ ܐܢܬܘܢ܂
11:05 ܗܐ ܓܝܪ ܣܡ̈ܝܐ ܚܙܝܢ܂ ܘܚ̈ܓܝܪܐ ܡܗܠܟܝܢ܂ ܘܓܪ̈ܒܐ ܡܬܕܟܝܢ܂ ܘܚ̈ܪܫܐ ܫܡܥܝܢ܂ ܘܡ̈ܣܟܢܐ ܡܣܬܝܒܪܝܢ܂ ܘܡ̈ܝܬܐ ܩܝܡܝܢ܂
11:06 ܘܛܘܒܘܗܝ ܐܠܐ ܢܬܟܫܠ ܒܝ܀
11:07 ܡܢ ܒܬܪ ܕܐܙܠܘ ܕܝܢ ܗܠܝܢ܂ ܫܪܝ ܗܘܐ ܝܫܘܥ ܠܡܐܡܪ ܠܟܢ̈ܫܐ ܥܠ ܝܘܚܢܢ܂ ܡܢܐ ܢܦܩܬܘܢ ܠܚܘܪܒܐ ܠܡܚܙܐ܂ ܩܢܝܐ ܕܡܢ ܪܘܚܐ ܡܬܬܙܝܥ܂
11:08 ܘܐܠܐ ܡܢܐ ܢܦܩܬܘܢ ܠܡܚܙܐ܂ ܓܒܪܐ ܕܢ̈ܚܬܐ ܪ̈ܟܝܟܐ ܠܒܝܫ܂ ܗܐ ܐܝܠܝܢ ܕܪ̈ܟܝܟܐ ܠܒܝܫܝܢ ܒܝܬ ܡ̈ܠܟܐ ܐܢܘܢ܂
11:09 ܘܐܠܐ ܡܢܐ ܢܦܩܬܘܢ ܠܡܚܙܐ ܢܒܝܐ܂ ܐܝܢ ܐܡܪܢܐ ܠܟܘܢ ܕܝܬܝܪ ܗ܂ܘ ܡܢ ܢܒ̈ܝܐ܂
11:10 ܗܢܘ ܕܟܬܝܒ ܥܠܘܗܝ܂ ܕܗܐ ܡܫܕܪ ܐܢܐ ܡܠܐܟܝ ܩܕܡ ܦܪܨܘܦܟ܂ ܕܢܬܩܢ ܐܘܪܚܐ ܩܕܡܝܟ܂
11:11 ܐܡܝܢ ܐܡܪܢܐ ܠܟܘܢ ܕܠܐ ܩܡ ܒܝ̈ܠܝܕܝ ܢܫ̈ܐ ܕܪܒ ܡܢ ܝܘܚܢܢ ܡܥܡܕܢܐ܂ ܙܥܘܪܐ ܕܝܢ ܒܡܠܟܘܬܐ ܕܫܡܝܐ ܪܒ ܗܘ ܡܢܗ܂
11:12 ܡܢ ܝܘܡ̈ܝ ܝܘܚܢܢ ܕܝܢ ܡܥܡܕܢܐ ܘܥܕܡܐ ܠܗܫܐ܂ ܐܠܝܨܐ ܗܝ ܡܠܟܘܬܐ ܕܫܡܝܐ܂ ܘܐܠ̈ܘܨܝܗ ܡܚܛܦܝܢ ܠܗܿ܂
11:13 ܟܠܗܘܢ ܓܝܪ ܢܒ̈ܝܐ ܘܐܘܪܝܬܐ ܥܕܡܐ ܠܝܘܚܢܢ ܐܬܢܒܝܘ܂
11:14 ܘܐܢ ܨܒܝܢ ܐܢܬܘܢ ܠܡܩܒܠܘ ܗܘܝܘ ܐܠܝܐ ܕܥܬܝܕ ܠܡܐܬܐ܂
11:15 ܡܢ ܕܐܝܬ ܠܗ ܐ̈ܕܢܐ ܠܡܫܡܥ ܢܫܡܥ܀
11:16 ܠܡܢ ܕܝܢ ܐܕܡܝܗ ܠܫܪܒܬܐ ܗܕܐ܂ ܕܡܝܐ ܠܛ̈ܠܝܐ ܕܝܬܒܝܢ ܒܫܘܩܐ ܘܫܠܚܝܢ ܠܚܒܪ̈ܝܗܘܢ܂
11:17 ܘܐܡܪܝܢ܂ ܙܡܪܢ ܠܟܘܢ ܘܠܐ ܪܩܕܬܘܢ܂ ܘܐܠܝܢ ܠܟܘܢ ܘܠܐ ܐܪܩܕܬܘܢ܂
11:18 ܐܬܐ ܓܝܪ ܠܘܬܟܘܢ ܝܘܚܢܢ ܟܕ ܠܐ ܐܟܠ ܘܐܦܠܐ ܫܬܐ܂ ܘܐܡܪܝܢ ܐܢܬܘܢ ܫܐܕܐ ܒܗ܂
11:19 ܘܐܬܐ ܒܪܗ ܕܐܢܫܐ ܐܟܠ ܘܫܬܐ܂ ܘܐܡܪܝܢ ܐܢܬܘܢ ܗܐ ܓܒܪܐ ܐܟܘܠܐ ܘܫܬܝܐ܂ ܘܪܚܡܐ ܕܡ̈ܟܣܐ ܘ̈ܕܚܛܝܐ܂ ܘܐܙܕܕܩܬ ܚܟܡܬܐ ܡܢ ܒ̈ܢܝܗ܀
11:20 ܗܝܕܝܢ ܫܪܝ ܗܘܐ ܝܫܘܥ ܠܡܚܣܕܘ ܡ̈ܕܝܢܬܐ܂ ܐܝܠܝܢ ܕܚܘܝ ܒܗܝܢ ܚܝ̈ܠܐ ܣܓ̈ܝܐܐ ܘܠܐ ܬܒ܂
11:21 ܘܐܡܪ ܘܝ ܠܟܝ ܟܘܪܙܝܢ ܘܝ ܠܟܝ ܒܝܬ ܨܝܕܐ܂ ܕܐܠܘ ܒܨܘܪ ܘܒܨܝܕܢ ܗܘܘ ܚ̈ܝܠܐ ܕܗܘܘ ܒܟܝܢ܂ ܟܒܪ ܕܝܢ ܒܣܩ̈ܐ ܘܒܩܛܡܐ ܬܒܘ܂
11:22 ܡܛܠ ܗܢܐ ܐܡܪܢܐ ܠܟܝܢ܂ ܕܠܨܘܪ ܘܠܨܝܕܢ ܢܗܘܐ ܢܝܚ ܒܝܘܡܐ ܕܕܝܢܐ ܝܬܝܪ ܡܢ ܕܠܟܝܢ܂
11:23 ܘܐܢܬ ܟܦܪܢܚܘܡ ܠܐ ܥܕܡܐ ܠܫܡܝܐ ܬܬܪܝܡܝܢ܂ ܐܠܐ ܥܕܡܐ ܠܫܝܘܠ ܬܚܬܝܢ܂ ܕܐܠܘ ܒܣܕܘܡ ܗܘܘ ܚܝ̈ܠܐ ܐܝܠܝܢ ܕܗܘܘ ܒܟܝ܂ ܩܝܡܐ ܗܘܬ ܥܕܡܐ ܠܝܘܡܢܐ܂
11:24 ܡܛܠ ܗܢܐ ܐܡܪܢܐ܂ ܕܠܐܪܥܐ ܕܣܕܘܡ ܢܗܘܐ ܢܝܚ ܒܝܘܡܐ ܕܕܝܢܐ ܝܬܝܪ ܡܢ ܕܠܟܝ܀
11:25 ܒܗܘ ܕܝܢ ܙܒܢܐ ܥܢܐ ܝܫܘܥ ܘܐܡܪ܂ ܡܘܕܐ ܐܢܐ ܠܟ ܐܒܐ ܡܪܐ ܕܫܡܝܐ ܘܕܐܪܥܐ܂ ܕܟܣܝܬ ܗܠܝܢ ܡܢ ܚܟܝ̈ܡܐ ܘܓܠܝܬ ܐܢܝܢ ܠܛ̈ܠܝܐ܂
11:26 ܐܝܢ ܐܒܝ ܕܗܟܢܐ ܗܘܐ ܨܒܝܢܐ ܩܕܡܝܟ܂
11:27 ܟܘܠ ܡܕܡ ܐܫܬܠܡ ܠܝ ܡܢ ܐܒܝ܂ ܘܠܐ ܐܢܫ ܝܕܥ ܠܒܪܐ ܐܠܐ ܐܢ ܐܒܐ܂ ܘܐܦ ܠܐ ܠܐܒܐ ܐܠܐ ܐܢ ܒܪܐ܂ ܘܡܢ ܕܢܨܒܐ ܒܪܐ ܕܢܓܠܐ ܠܗ܀
11:28 ܬܘ ܠܘܬܝ ܟܠܟܘܢ ܠܐ̈ܝܐ ܘܫܩܝܠܝ ܡܘܒ̈ܠܐ ܝܩܝܪ̈ܬܐ ܘܐܢܐ ܐܢܝܚܟܘܢ܂
11:29 ܘܫܩܘܠܘ ܢܝܪܝ ܥܠܝܟܘܢ܂ ܘܝܠܦܘ ܡܢܝ ܕܢܝܚ ܐܢܐ ܘܡܟܝܟ ܐܢܐ ܒܠܒܝ܂ ܘܬܫܟܚܘܢ ܢܝܚܐ ܠܢܦܫ̈ܬܟܘܢ܂
11:30 ܢܝܪܝ ܓܝܪ ܒܣܝܡ ܗܘ܂ ܘܡܘܒܠܝ ܩܠܝܠܐ܀
12:01 ܘܒܗܘ ܙܒܢܐ ܡܗܠܟ ܗܘܐ ܝܫܘܥ ܒܫܒܬܐ ܒܝܬ ܙܪ̈ܥܐ܂ ܘܬܠܡ̈ܝܕܘܗܝ ܟܦܢܘ܂ ܘܫܪܝܘ ܡܠܓܝܢ ܫܒ̈ܠܐ ܘܦܪܟܝܢ ܒܐ̈ܝܕܝܗܘܢ ܘܐܟܠܝܢ܂
12:02 ܟܕ ܚܙܘ ܐܢܘܢ ܦܪ̈ܝܫܐ ܐܡܪܝܢ ܠܗ܂ ܡܢܐ ܥܒܕܝܢ ܬܠܡ̈ܝܕܝܟ ܡܕܡ ܕܠܐ ܫܠܝܛ ܠܡܥܒܕ܂
12:03 ܐܡܪ ܠܗܘܢ ܠܐ ܩܪܝܬܘܢ ܡܢܐ ܥܒܕ ܕܘܝܕ ܟܕ ܟܦܢ ܘܐܝܠܝܢ ܕܥܡܗ܂
12:04 ܐܝܟܢܐ ܥܠ ܠܒܝܬܗ ܕܐܠܗܐ܂ ܘܐܟܠ ܡܢ ܠܚܡ ܐ̈ܦܐ܂ ܕܠܐ ܠܗ ܫܠܝܛ ܗܘܐ ܠܡܐܟܠ ܐܦܠܐ ܠܐܝܠܝܢ ܕܥܡܗ܂ ܐܠܐ ܐܢ ܠܟܗ̈ܢܐ ܒܠܚܘܕ܂
12:05 ܐܘ ܠܐ ܩܪܝܬܘܢ ܒܐܘܪܝܬܐ܂ ܕܟ̈ܗܢܐ ܒܗܝܟܠܐ ܗܢܘܢ ܡܚܠܝܢ ܠܗܿ ܠܫܒܬܐ܂ ܘܕܠܐ ܚܛ̈ܗܝܢ ܐܢܘܢ܂
12:06 ܐܡܪܢܐ ܠܟܘܢ ܓܝܪ ܕܗܐ ܕܪܒ ܡܢ ܗܝܟܠܐ ܗܪܟܐ܂
12:07 ܘܐܠܘ ܝܕܥܝܢ ܗܘܝܬܘܢ ܡܢܘ ܚܢܢܐ ܒܥܐ ܐܢܐ ܘܠܐ ܕܒܚܬܐ܂ ܠܐ ܡܚܝܒܝܢ ܗܘܝܬܘܢ ܠܙܟܝܐ܂
12:08 ܡܪܗܿ ܓܝܪ ܕܫܒܬܐ ܒܪܗ ܗܘ ܕܐܢܫܐ܂
12:09 ܘܟܕ ܫܢܝ ܡܢ ܬܡܢ ܘܐܬܐ ܠܟܢܘܫܬܗܘܢ܂
12:10 ܘܗܐ ܓܒܪܐ ܚܕ ܕܐܝܕܗ ܕܝܡܝܢܐ ܝܒܝܫܐ ܗܘܬ܂ ܘܡܫܐܠܝܢ ܗܘܘ ܠܗ ܘܐܡܪܝܢ܂ ܕܐܢ ܗܘ ܕܫܠܝܛ ܒܝܘܡܐ ܕܫܒܬܐ ܠܡܐܣܝܘ܂ ܕܢܫܟܚܘܢ ܢܐܟܠܘܢ ܩܪܨ̈ܘܗܝ܂
12:11 ܐܡܪ ܠܗܘܢ܂ ܡܢܘ ܓܒܪܐ ܡܢܟܘܢ ܕܐܝܬ ܠܗ ܥܪܒܐ܂ ܘܢܦܠ ܒܚܒܪܐ ܒܝܘܡܐ ܕܫܒܬܐ܂ ܘܠܐ ܢܓܕ ܡܣܩ ܠܗ܂
12:12 ܟܡܐ ܗܟܝܠ ܝܬܝܪ ܒܪ ܐܢܫܐ ܡܢ ܥܪܒܐ܂ ܡܟܝܠ ܫܠܝܛ ܗܘ ܒܫܒܬܐ ܠܡܥܒܕ ܕܫܦܝܪ܂
12:13 ܗܝܕܝܢ ܐܡܪ ܠܓܒܪܐ ܗܘ ܦܫܘܛ ܐܝܕܟ܂ ܘܦܫܛ ܐܝܕܗ ܘܬܩܢܬ ܐܝܟ ܚܒܪܬܗܿ܀
12:14 ܘܟܕ ܢܦܩܘ ܦܪ̈ܝܫܐ܂ ܢܣܒܘ ܥܠܘܗܝ ܡܠܟܐ ܐܝܟܢܐ ܕܢܘܒܕܘܢܝܗܝ܂
12:15 ܝܫܘܥ ܕܝܢ ܝܕܥ ܘܫܢܝ ܠܗ ܡܢ ܬܡܢ܂ ܘܐܙܠܘ ܒܬܪܗ ܐܢܫܐ ܣܓ̈ܝܐܐ܂ ܘܐܣܝ ܠܟܠܗܘܢ܂
12:16 ܘܟܐܐ ܒܗܘܢ ܕܗܢܘܢ ܠܐܢܫ ܠܐ ܢܓܠܘܢܝܗܝ܂
12:17 ܕܢܬܡܠܐ ܡܕܡ ܕܐܬܐܡܪ ܒܦܘܡ ܐܫܥܝܐ ܢܒܝܐ ܕܐܡܪ ܗܘܐ܂
12:18 ܕܗܐ ܥܒܕܝ ܕܐܨܛܒܝܬ ܒܗ܂ ܘܚܒܝܒܝ ܕܣܘܚܬ ܒܗ ܢܦܫܝ܂ ܪܘܚܝ ܐܣܝܡ ܥܠܘܗܝ܂ ܕܢܟܪܙ ܕܝܢܐ ܠܥܡ̈ܡܐ܂
12:19 ܠܐ ܢܩܥܐ ܘܠܐ ܢܪܝܒ܂ ܘܠܐ ܐܢܫ ܢܫܡܥ ܩܠܗ ܒܫܘܩܐ܂
12:20 ܩܢܝܐ ܪܥܝܥܐ ܠܐ ܢܬܬܒܪ܂ ܘܫܪܓܐ ܕܡܛܦܛܦ ܠܐ ܢܕܥܟ܂ ܥܕܡܐ ܕܢܦܩ ܕܝܢܐ ܠܙܟܘܬܐ܂
12:21 ܘܠܫܡܗ ܥܡ̈ܡܐ ܢܣܒܪܘܢ܀
12:22 ܗܝܕܝܢ ܩܪܒܘ ܩܕܡܘܗܝ ܓܒܪܐ ܚܕ ܕܐܝܬ ܗܘܐ ܥܠܘܗܝ ܫܐܕܐ܂ ܘܥܘܝܪ ܘܚܪܫ܂ ܘܐܣܝܗ ܘܡܠܠ ܚܪܫܐ ܗܘ ܘܚܙܐ ܘܫܡܥ܂
12:23 ܘܡܬܕܡܪܝܢ ܗܘܘ ܟܠܗܘܢ ܟ̈ܢܫܐ܂ ܘܐܡܪܝܢ ܗܘܘ ܕܕܠܡܐ ܟܝ ܗܢܘ ܒܪܗ ܕܕܘܝܕ܂
12:24 ܦܪܝ̈ܫܐ ܕܝܢ ܟܕ ܫܡܥܘ ܐܡܪܘ܂ ܗܢܐ ܠܐ ܡܦܩ ܫܐ̈ܕܐ ܐܠܐ ܒܒܥܠܙܒܘܒ ܪܫܗܘܢ ܕܕܝ̈ܘܐ܂
12:25 ܟܕ ܚܙܐ ܕܝܢ ܪܥܝܢܗܘܢ ܐܡܪ ܠܗܘܢ܂ ܟܠ ܡܠܟܘ ܕܬܬܦܠܓ ܥܠ ܢܦܫܗܿ ܬܚܪܒ܂ ܘܟܠ ܒܝ ܘܡܕܝܢܐ ܕܢܬܦܠܓ ܥܠ ܢܦܫܗ ܠܐ ܢܩܘܡ܂
12:26 ܘܐܢ ܣܛܢܐ ܠܣܛܢܐ ܡܦܩ ܥܠ ܢܦܫܗ ܡܬܦܠܓ܂ ܐܝܟܢܐ ܗܟܝܠ ܬܩܘܡ ܡܠܟܘܬܗ܂
12:27 ܘܐܢ ܐܢܐ ܒܒܥܠܙܒܘܒ ܡܦܩ ܐܢܐ ܫܐ̈ܕܐ ܡܢ ܒܢ̈ܝܟܘܢ܂ ܒܢ̈ܝܟܘܢ ܒܡܢܐ ܡܦܩܝܢ ܠܗܘܢ܂ ܡܛܠ ܗܢܐ ܗܢܘܢ ܢܗܘܘܢ ܠܟܘܢ ܕܝ̈ܢܐ܂
12:28 ܐܢ ܕܝܢ ܐܢܐ ܒܪܘܚܐ ܕܐܠܗܐ ܡܦܩ ܐܢܐ ܫܐ̈ܕܐ܂ ܡܟܝܠ ܩܪܒܬ ܥܠܝܟܘܢ ܡܠܟܘܬܗ ܕܐܠܗܐ܂
12:29 ܐܝܟܢܐ ܓܝܪ ܡܫܟܚ ܐܢܫ ܕܢܥܘܠ ܠܒܝܬܗ ܕܚܣܝܢܐ ܘܢܒܘܙ ܡ̈ܐܢܘܗܝ܂ ܐܠܐ ܐܢ ܠܘܩܕܡ ܠܗ ܠܚܣܝܢܐ ܢܐܣܘܪ܂ ܘܗܝܕܝܢ ܢܒܘܙ ܒܝܬܗ܂
12:30 ܡܢ ܕܠܐ ܗܘܐ ܥܡܝ ܠܘܩܒܠܝ ܗܘ܂ ܘܡܢ ܕܠܐ ܟܢܫ ܥܡܝ ܡܒܕܪܘ ܡܒܕܪ܂
12:31 ܡܛܠܗܢܐ ܐܡܪ ܐܢܐ ܠܟܘܢ܂ ܕܟܠ ܚܛ̈ܗܝܢ ܘܓܘܕ̈ܦܝܢ ܢܫܬܒܩܘܢ ܠܒ̈ܢܝ ܐܢܫܐ܂ ܟܠ ܕܥܠ ܪܘܚܐ ܕܝܢ ܕܩܘܕܫܐ ܢܓܕܦ ܠܐ ܢܫܬܒܩ ܠܗ܂
12:32 ܘܟܠ ܕܢܐܡܪ ܡܠܬܐ ܥܠ ܒܪܗ ܕܐܢܫܐ ܢܫܬܒܩ ܠܗ܂ ܟܠ ܕܥܠ ܪܘܚܐ ܕܝܢ ܕܩܘܕܫܐ ܢܓܕܦ ܠܐ ܢܫܬܒܩ ܠܗ܂ ܠܐ ܒܗܢܐ ܥܠܡܐ ܘܠܐ ܒܥܠܡܐ ܕܥܬܝܕ܂
12:33 ܐܘ ܥܒܕܘ ܐܝܠܢܐ ܛܒܐ ܘ̈ܦܐܪܘܗܝ ܛ̈ܒܝܢ܂ ܐܘ ܥܒܕܘ ܐܝܠܢܐ ܒܝܫܐ ܘܦܐܪ̈ܘܗܝ ܒܝܫܝܢ܂ ܡܢ ܦܐܪ̈ܘܗܝ ܕܝܢ ܡܬܝܕܥ ܐܝܠܢܐ܂
12:34 ܝܠܕܐ ܕܐ̈ܟܕܢܐ܂ ܐܝܟܢܐ ܡܫܟܚܝܢ ܐܢܬܘܢ ܛܒ̈ܬܐ ܠܡܡܠܠܘ ܕܒ̈ܝܫܐ ܐܢܬܘܢ܂ ܡܢ ܬܘ̈ܬܪܘܗܝ ܓܝܪ ܕܠܒܐ ܡܦܩ ܦܘܡܐ܂
12:35 ܘܓܒܪܐ ܛܒܐ ܡܢ ܣܝ̈ܡܬܐ ܛܒ̈ܬܐ ܕܒܠܒܗ ܡܦܩ ܛܒ̈ܬܐ܂ ܘܓܒܪܐ ܒܝܫܐ ܡܢ ܣܝ̈ܡܬܐ ܒܝ̈ܫܬܐ ܕܒܠܒܗ ܒܝ̈ܫܬܐ ܡܡܠܠ܂
12:36 ܐܡܪܢܐ ܠܟܘܢ ܕܝܢ܂ ܕܟܠ ܡܠܐ ܒܛܠܐ ܕܢܐܡܪܘܢ ܒ̈ܢܝ ܐܢܫܐ܂ ܢܬܠܘܢ ܥܠܝܗ ܦܬܓܡܐ ܒܝܘܡܐ ܕܕܝܢܐ܂
12:37 ܡܢ ܡ̈ܠܝܟ ܓܝܪ ܬܙܕܕܩ܂ ܘܡܢ ܡ̈ܠܝܟ ܬܬܚܝܒ܀
12:38 ܗܝܕܝܢ ܩܪܒܘ ܠܗ ܐܢܫܐ ܡܢ ܣܦ̈ܪܐ ܘܦܪ̈ܝܫܐ ܘܐܡܪܝܢ ܠܗ܂ ܡܠܦܢܐ܂ ܨܒܝܢ ܐܢܚܢܢ ܕܢܚܙܐ ܡܢܟ ܡܕܡ ܐܬܐ܂
12:39 ܗܘ ܕܝܢ ܥܢܐ ܘܐܡܪ ܠܗܘܢ܂ ܫܪܒܬܐ ܗܕܐ ܒܝܫܬܐ ܘܓܝܪܬܐ܂ ܐܬܐ ܒܥܝܐ ܘܐܬܐ ܠܐ ܬܬܝܗܒ ܠܗܿ܂ ܐܠܐ ܐܢ ܐܬܗ ܕܝܘܢܢ ܢܒܝܐ܂
12:40 ܐܝܟܢܐ ܓܝܪ ܕܗܘܐ ܝܘܢܢ ܒܟܪܣܗ ܕܢܘܢܐ ܬܠܬܐ ܝܘ̈ܡܝܢ ܘܬ̈ܠܬܐ ܠܝ̈ܠܘܢ܂ ܗܟܢܐ ܐܦ ܒܪܗ ܕܐܢܫܐ ܢܗܘܐ ܒܠܒܗܿ ܕܐܪܥܐ ܬ̈ܠܬܐ ܝܘܡ̈ܝܢ ܘܬܠܬܐ ܠܝ̈ܠܘܢ܂
12:41 ܓܒ̈ܪܐ ܒ̈ܢܝ ܢܝܢܘܐ ܢܩܘܡܘܢ ܒܕܝܢܐ ܥܡ ܫܪܒܬܐ ܗܕܐ ܘܢܚܝܒܘܢܗܿ܂ ܕܗܢܘܢ ܬܒܘ ܒܟܪܘܙܘܬܗ ܕܝܘܢܢ܂ ܘܗܐ ܕܪܒ ܡܢ ܝܘܢܢ ܗܪܟܐ܂
12:42 ܡܠܟܬܐ ܕܬܝܡܢܐ ܬܩܘܡ ܒܕܝܢܐ ܥܡ ܫܪܒܬܐ ܗܕܐ ܘܬܚܝܒܝܗ܂ ܕܐܬܬ ܡܢ ܥܒ̈ܪܝܗ ܕܐܪܥܐ ܕܬܫܡܥ ܚܟܡܬܗ ܕܫܠܝܡܘܢ܂ ܘܗܐ ܕܪܒ ܡܢ ܫܠܝܡܘܢ ܗܪܟܐ܀
12:43 ܪܘܚܐ ܕܝܢ ܛܢܦܬܐ ܡܐ ܕܢܦܩܬ ܡܢ ܒܪ ܐܢܫܐ܂ ܐܙܠܐ ܡܬܟܪܟܐ ܒܐ̈ܬܪܘܬܐ ܕܡ̈ܝܐ ܠܝܬ ܒܗܘܢ܂ ܕܬܫܟܚ ܠܗܿ ܢܝܚܐ܂ ܘܡܐ ܕܠܐ ܐܫܟܚܬ ܠܗܿ܂
12:44 ܗܝܕܝܢ ܐܡܪܐ܂ ܐܗܦܘܟ ܐܙܠ ܠܒܝܬܝ ܡܢ ܐܬܪ ܕܢܦܩܬ܂ ܘܐܢ ܐܬܬ ܐܫܟܚܬܗ ܕܣܪܝܩ ܘܟܢܝܫ ܘܡܨܒܬ܂
12:45 ܗܝܕܝܢ ܐܙܠܐ ܕܒܪܐ ܥܡܗܿ ܫܒܥ ܪܘ̈ܚܝܢ ܐܚ̈ܪܢܝܢ ܕܒܝܫܢ ܡܢܗܿ܂ ܘܥܠܢ ܘܥܡܪܢ ܒܗ܂ ܘܗܘܝܐ ܐܚܪܝܬܗ ܕܓܒܪܐ ܗܘ ܒܝܫܐ ܡܢ ܩܕܡܝܬܗ܂ ܗܟܢܐ ܢܗܘܐ ܠܗܿ ܠܫܪܒܬܐ ܗܕܐ ܒܝܫܬܐ܀
12:46 ܘܟܕ ܗܘ ܡܡܠܠ ܗܘܐ ܠܟܢܫܐ܂ ܘܗܐ ܐܡܗ ܘܐ̈ܚܘܗܝ ܩܝܡܝܢ ܗܘܘ ܠܒܪ܂ ܘܒܥܝܢ ܗܘܘ ܠܡܡܠܠܘ ܥܡܗ܂
12:48 ܗܘ ܕܝܢ ܥܢܐ ܘܐܡܪ ܠܗܘ ܡܢ ܕܐܡܪ ܠܗ܂ ܡܢ ܗܝ ܐܡܝ ܘܡܢ ܐܢܘܢ ܐ̈ܚܝ܂
12:49 ܘܦܫܛ ܐܝܕܗ ܠܘܬ ܬܠܡ̈ܝܕܘܗܝ ܘܐܡܪ܂ ܗܐ ܐܡܝ ܘܗܐ ܐ̈ܚܝ܂
12:50 ܟܠ ܡܢ ܕܥܒܕ ܓܝܪ ܨܒܝܢܗ ܕܐܒܝ ܕܒܫܡܝܐ܂ ܗܢܐ ܗܘ ܐܚ̈ܝ ܘܐܚ̈ܘܬܝ ܘܐܡܝ܀
13:01 ܘܒܗܘ ܝܘܡܐ ܢܦܩ ܝܫܘܥ ܡܢ ܒܝܬܐ܂ ܘܝܬܒ ܠܗ ܥܠ ܓܢܒ ܝܡܬܐ܂
13:02 ܘܐܬܟܢܫܘ ܠܘܬܗ ܟܢܫܐ ܣܓܝܐܐ܂ ܘܣܠܩ ܘܝܬܒ ܠܗ ܒܣܦܝܢܬܐ܂ ܘܟܠܗ ܟܢܫܐ ܩܐܡ ܗܘܐ ܥܠ ܣ̈ܦܪܝ ܝܡܐ܂
13:03 ܘܡܠܠ ܥܡܗܘܢ ܣܓܝ ܒܦܠܐ̈ܬܐ ܘܐܡܪ܂ ܗܐ ܢܦܩ ܙܪܘܥܐ ܠܡܙܪܥ܂
13:04 ܘܟܕ ܙܪܥ܂ ܐܝܬ ܕܢܦܠ ܥܠ ܝܕ ܐܘܪܚܐ ܘܐܬܬ ܦܪܚܬܐ ܕܫܡܝܐ ܘܐܟܠܬܗ܂
13:05 ܐܚܪܢܐ ܕܝܢ ܢܦܠ ܥܠ ܫܘܥܐ܂ ܘܠܝܬ ܗܘܐ ܥܦܪܐ ܣܓܝܐܐ܂ ܘܒܗܿ ܒܫܥܬܐ ܫܘܚܬ܂ ܡܛܠ ܕܠܝܬ ܥܘܡܩܐ ܕܥܦܪܐ ܣܓܝܐܐ܂
13:06 ܘܒܨܡܚܐ ܕܫܡܫܐ ܕܗܘܐ ܥܠܝܗ ܫܒܬ܂ ܘܡܛܠ ܕܠܐ ܐܪܡܝܬ ܥܩܪܐ ܒܐܪܥܐ ܝܒܫܬ܂
13:07 ܐܚܪܬܐ ܢܦܠܬ ܒܝܬ ܟܘܒ̈ܐ܂ ܘܣܠܩܘ ܟܘ̈ܒܐ ܥܡܗܿ ܘܚܢܩܘܗܿ܂
13:08 ܘܐܚܪܬܐ ܕܝܢ ܢܦܠܬ ܒܐܪܥܐ ܛܒܬܐ ܘܝܗܒܬ ܦܐ̈ܪܐ܂ ܘܪܒܘ ܘܝܗܒܘ܂ ܐܝܬ ܕܡܐܐ ܘܐܝܬ ܕܫܬܝܢ ܘܐܝܬ ܕܬܠܬܝܢ܂
13:09 ܟܘܠ ܕܐܝܬ ܠܗ ܐܕ̈ܢܐ ܠܡܫܡܥ ܢܫܡܥ܀
13:10 ܘܩܪܒܘ ܬܠܡ̈ܝܕܘܗܝ ܘܐܡܪܝܢ ܠܗ܂ ܠܡܢܐ ܒ̈ܦܠܐܬܐ ܡܡܠܠ ܐܢܬ ܥܡܗܘܢ܂
13:11 ܘܗܘ ܥܢܐ ܘܐܡܪ ܠܗܘܢ܂ ܡܛܠ ܕܠܟܘܢ ܗܘ ܝܗܝܒ ܠܡܕܥ ܐܪܙܐ ܕܡܠܟܘܬܐ ܕܫܡܝܐ܂ ܠܗܢܘܢ ܕܝܢ ܠܐ ܝܗܝܒ ܠܗܘܢ ܠܡܕܥ܂
13:12 ܡܢ ܕܐܝܬ ܠܗ ܓܝܪ ܢܬܝܗܒ ܠܗ ܘܢܬܬܘܣܦ ܠܗ܂
13:13 ܘܡܢ ܕܠܝܬ ܠܗ ܐܦ ܗܘ ܡܕܡ ܕܐܝܬ ܠܗ ܢܬܢܣܒ ܡܢܗ܂ ܡܛܠ ܗܢܐ ܒܦܠܐ̈ܬܐ ܡܡܠܠ ܐܢܐ ܥܡܗܘܢ܂ ܕܡܕܡ ܕܚܙܝܢ ܠܐ ܢܚܙܘܢ܂ ܘܡܕܡ ܕܫܡܥܝܢ ܠܐ ܢܫܡܥܘܢ ܘܠܐ ܢܣܬܟܠܘܢ܂ ܕܠܐ ܡܡܬܘܡ ܢܬܦܢܘܢ܂
13:14 ܘܬܫܠܡ ܢܒܝܘܬܗ ܕܐܫܥܝܐ ܢܒܝܐ ܕܐܡܪ ܗܘܐ܂ ܕܡܫܡܥ ܬܫܡܥܘܢ ܘܠܐ ܬܣܬܟܠܘܢ܂ ܘܚܙܘܐ ܬܚܙܘܢ ܘܠܐ ܬܚܙܘܢ܂
13:15 ܐܬܥܒܝ ܠܗ ܓܝܪ ܠܒܗ ܕܥܡܐ ܗܢܐ܂ ܘܐܕ̈ܢܝܗܘܢ ܐܘܩܪܘ ܕܠܐ ܢܫܡܥܘܢ܂ ܘܥ̈ܝܢܝܗܘܢ ܥܡܨܘ܂ ܕܠܐ ܢܚܙܘܢ ܒ̈ܥܝܢܝܗܘܢ ܘܢܫܡܥܘܢ ܒ̈ܐܕܢܝܗܘܢ܂ ܘܢܣܬܟܠܘܢ ܒܠܒܗܘܢ܂ ܘܢܬܦܢܘܢ ܘܐܣܐ ܐܢܘܢ܂
13:16 ܕܝܠܟܘܢ ܕܝܢ ܛܘܒܝܗܝܢ ܠܥܝ̈ܢܝܟܘܢ ܕܚܙܝܢ܂ ܘܛܘܒ ܠܐܕ̈ܢܝܟܘܢ ܕܫܡܥܢ܂
13:17 ܐܡܝܢ ܓܝܪ ܐܡܪܢܐ ܠܟܘܢ܂ ܕܣ̈ܓܝܐܐ ܢܒ̈ܝܐ ܘܙܕܝ̈ܩܐ ܐܬܪܓܪܓܘ ܕܢܚܙܘܢ ܡܕܡ ܕܚܙܝܢ ܐܢܬܘܢ ܘܠܐ ܚܙܘ܂ ܘܠܡܫܡܥ ܡܕܡ ܕܫܡܥܝܢ ܐܢܬܘܢ ܘܠܐ ܫܡܥܘ܂
13:18 ܐܢܬܘܢ ܕܝܢ ܫܡܥܘ ܡܬܠܐ ܕܙܪܘܥܐ܂
13:19 ܟܘܠ ܐܢܫ ܕܫܡܥ ܡܠܬܐ ܕܡܠܟܘܬܐ ܘܠܐ ܡܣܬܟܠ܂ ܐܬܐ ܒܝܫܐ ܘܚܛܦ ܠܗ ܠܙܪܥܐ ܡܢ ܠܒܗ܂ ܗܢܐ ܗܘ ܕܐܙܕܪܥ ܥܠ ܝܕ ܐܘܪܚܐ܂
13:20 ܘܗܘ ܕܐܙܕܪܥ ܥܠ ܫܘܥܐ܂ ܗܢܐ ܗܘ ܕܫܡܥ ܡܠܬܐ܂ ܘܒܚܕܘܬܐ ܡܣܪܗܒܐܝܬ ܡܩܒܠ ܠܗ܂
13:21 ܘܡܛܠ ܕܠܝܬ ܠܗܿ ܥܩܪܐ܂ ܙܒܢ ܙܥܘܪ ܡܩܘܝܐ ܒܗ܂ ܡܐ ܕܗܘܐ ܕܝܢ ܐܘܠܨܢܐ ܐܘ ܐܪܕܘܦܝܐ ܡܛܠ ܡܠܬܐ ܥܓܠ ܡܬܟܫܠ܂
13:22 ܘܗܘ ܕܢܦܠ ܒܝܬ ܟܘܒ̈ܐ܂ ܗܢܐ ܗܘ ܕܫܡܥ ܡܠܬܐ܂ ܘܒܪܢܝܐ ܗܘ ܕܥܠܡܐ ܗܢܐ܂ ܘܒܛܘܥܝܝ ܕܥܘܬܪܐ܂ ܘܗܢܝܢ ܚܢܩܢ ܠܗ܂ ܘܕܠܐ ܦܐܪ̈ܐ ܗܘܐ܂
13:23 ܘܗܘ ܕܢܦܠ ܒܐܪܥܐ ܛܒܬܐ܂ ܗܘ ܗܘ ܕܫܡܥ ܡܠܬܐ ܘܡܣܬܟܠ ܒܗܿ܂ ܘܝܗܒ ܦܐܪ̈ܐ܂ ܐܝܬ ܕܡܐܐ܂ ܘܐܝܬ ܕܫܬܝܢ܂ ܘܐܝܬ ܕܬܠܬܝܢ܀
13:24 ܐܚܪܢܐ ܕܝܢ ܡܬܠܐ ܐܘܣܦ ܘܐܡܪ ܠܗܘܢ܂ ܕܡܝܐ ܡܠܟܘܬܐ ܕܫܡܝܐ܂ ܠܓܒܪܐ ܕܙܪܥ ܙܪܥܐ ܛܒܐ ܒܩܪܝܬܗ܂
13:25 ܘܟܕ ܕܡܟܘ ܐܢܫܐ܂ ܐܬܐ ܒܥܠܕܒܒܐ ܘܙܪܥ ܙܝܙ̈ܢܐ ܒܝܬ ܚܛ̈ܐ ܘܐܙܠ܂
13:26 ܘܟܕ ܝܥܐ ܥܣܒܐ ܘܥܒܕ ܦܐܪ̈ܐ܂ ܗܝܕܝܢ ܐܬܚܙܝܘ ܙܝܙ̈ܢܐ܂
13:27 ܘܩܪܒܘ ܥܒ̈ܕܘܗܝ ܕܡܪܐ ܒܝܬܐ ܘܐܡܪܝܢ ܠܗ܂ ܡܪܢ ܠܐ ܗܘܐ ܙܪܥܐ ܛܒܐ ܙܪܥܬ ܒܩܪܝܬܟ܂ ܐܝܡܟܐ ܐܝܬ ܒܗ ܙܝܙ̈ܢܐ܂
13:28 ܗܘ ܕܝܢ ܐܡܪ ܠܗܘܢ܂ ܓܒܪܐ ܒܥܠܕܒܒܐ ܥܒܕ ܗܕܐ܂ ܐܡܪܝܢ ܠܗ ܥܒ̈ܕܘܗܝ܂ ܐܢ ܨܒܐ ܐܢܬ ܢܐܙܠ ܢܠܩܛ ܐܢܘܢ܂
13:29 ܐܡܪ ܠܗܘܢ ܠܐ܂ ܕܠܡܐ ܟܕ ܠܩܛܝܢ ܐܢܬܘܢ ܙܝܙ̈ܢܐ ܬܥܩܪܘܢ ܐܦ ܚܛ̈ܐ ܥܡܗܘܢ܂
13:30 ܐܠܐ ܫܒܘܩܘ ܪܒܝܢ ܐܟܚܕܐ ܥܕܡܐ ܠܚܨܕܐ܂ ܘܒܗܘ ܙܒܢܐ ܕܚܨܕܐ ܐܡܪ ܐܢܐ ܠܚ̈ܨܘܕܐ܂ ܠܩܛܘ ܠܘܩܕܡ ܙ̈ܝܙܢܐ܂ ܘܐܣܘܪܘ ܐܢܘܢ ܡ̈ܣܪܝܬܐ ܐܝܟ ܕܠܢܘܪܐ܂ ܘܚ̈ܛܐ ܟܢܫܘ ܐܢܝܢ ܠܐܘ̈ܨܪܐ ܕܝܠܝ܀
13:31 ܘܐܡܪ ܗܘܐ ܠܗܘܢ ܡܬܠܐ ܐܚܪܢܐ܂ ܕܡܝܐ ܡܠܟܘܬܐ ܕܫܡܝܐ ܠܦܪܕܬܐ ܕܚܪܕܠܐ܂ ܕܢܣܒ ܓܒܪܐ ܘܙܪܥܗܿ ܒܩܪܝܬܗ܂
13:32 ܗܝ ܙܥܘܪܝܐ ܗܝ ܡܢ ܟܠܗܘܢ ܙܪܥ̈ܘܢܐ܂ ܘܡܐ ܕܪܒܬ ܪܒܐ ܗܝ ܡܢ ܟܠܗܘܢ ܝܪܩ̈ܘܢܐ܂ ܘܗܘܝܐ ܐܝܠܢܐ܂ ܘܐܬܝܐ ܚܝܘܬ ܟܢܦܐ ܕܫܡܝܐ ܘܫܟܢܐ ܒܣ̈ܘܟܝܗ܀
13:33 ܡܬܠܐ ܐܚܪܢܐ܂ ܕܡܝܐ ܡܠܟܘܬܐ ܕܫܡܝܐ ܠܚܡܝܪܐ ܕܫܩܠܬ ܐܢܬܬܐ ܚܟܝܡܬܐ܂ ܘܛܡܪܬ ܒܩܡܚܐ ܥܕܡܐ ܕܗܘܐ ܟܠܗ ܚܡܝܪ܀
13:34 ܗܠܝܢ ܟܠܗܝܢ ܡܠܠ ܝܫܘܥ ܒ̈ܦܠܐܬܐ ܠܟܢ̈ܫܐ܂ ܘܕܠܐ ܦܠܐܬ̈ܐ ܠܐ ܡܡܠܠ ܗܘܐ ܥܡܗܘܢ܂
13:35 ܘܫܠܡܬ ܡܠܬܐ ܕܐܬܐܡܪܬ ܒܢܒܝܐ ܕܐܡܪ ܗܘܐ܂ ܐܦܬܚ ܦܘܡܝ ܒܡ̈ܬܠܐ܂ ܘܐܡܠܠ ܟܣܝ̈ܬܐ ܕܡܢ ܩܕܝܡ܀
13:36 ܗܝܕܝܢ ܫܒܩ ܠܟ̈ܢܫܐ ܘܐܬܐ ܠܒܝܬܐ܂ ܘܩܪܒܘ ܩܕܡܘܗܝ ܬܠܡ̈ܝܕܘܗܝ ܘܐܡܪܝܢ ܠܗ܂ ܦܫܩ ܠܢ ܡܬܠܐ ܗܘ ܕ̈ܙܝܙܢܐ ܕܩܪܝܬܐ܂
13:37 ܗܘ ܕܝܢ ܥܢܐ ܘܐܡܪ ܠܗܘܢ܂ ܙܪܘܥܗ ܕܙܪܥܐ ܛܒܐ ܒܪܗ ܗܘ ܕܐܢܫܐ܂
13:38 ܘܩܪܝܬܐ ܥܠܡܐ ܗܘ܂ ܗܘ ܕܝܢ ܙܪܥܐ ܛܒܐ ܗܠܝܢ ܐܢܘܢ ܒ̈ܢܝܗ ܕܡܠܟܘܬܐ܂ ܘܙ̈ܝܙܢܐ ܒ̈ܢܘܗܝ ܐܢܘܢ ܕܒܝܫܐ܂
13:39 ܘܙܪܘܥܐ ܗܘܝܘ ܒܝܫܐ܂ ܘܚܨܕܐ ܫܘܠܡܗ ܗܘ ܕܥܠܡܐ܂ ܘܚܨ̈ܘܕܐ ܡ̈ܠܐܟܐ ܐܢܘܢ܂
13:40 ܐܟܙܢܐ ܗܟܝܠ ܕܡܬܠܩܛܝܢ ܙܝ̈ܙܢܐ ܘܝܩܕܝܢ ܒܢܘܪܐ܂ ܗܟܢܐ ܢܗܘܐ ܒܫܘܠܡܗ ܕܥܠܡܐ܂
13:41 ܢܫܕܪ ܒܪܗ ܕܐܢܫܐ ܠܡ̈ܠܐܟܘܗܝ܂ ܕܢܓܒܘܢ ܡܢ ܒܝܬ ܡܠܟܘܬܗ ܟܠܗܘܢ ܡܟ̈ܫܘܠܐ܂ ܘܟܠܗܘܢ ܐܝܠܝܢ ܕܥܒܕܝܢ ܥܘܠܐ܂
13:42 ܘܢܪܡܘܢ ܐܢܘܢ ܒܐܬܘܢܐ ܕܢܘܪܐ܂ ܬܡܢ ܢܗܘܐ ܒܟܝܐ ܘܚܘܪܩ ܫ̈ܢܐ܂
13:43 ܗܝܕܝܢ ܙܕܝ̈ܩܐ ܢܙܗܪܘܢ ܐܝܟ ܫܡܫܐ ܒܡܠܟܘܬܗ ܕܐܒܘܗܘܢ܂ ܡܢ ܕܐܝܬ ܠܗ ܐ̈ܕܢܐ ܠܡܫܡܥ ܢܫܡܥ܀
13:44 ܕܡܝܐ ܡܠܟܘܬܐ ܕܫܡܝܐ ܠܣܝܡܬܐ ܕܣܝܡܐ ܒܩܪܝܬܐ܂ ܘܟܕ ܐܫܟܚܗܿ ܓܒܪܐ ܛܫܝܗܿ܂ ܘܡܢ ܚܕܘܬܗ ܐܙܠ ܙܒܢ ܟܘܠ ܡܕܡ ܕܐܝܬ ܠܗ܂ ܘܙܒܢܗܿ ܠܗ ܩܪܝܬܐ ܗܝ܀
13:45 ܬܘܒ ܕܡܝܐ ܡܠܟܘܬܐ ܕܫܡܝܐ܂ ܠܓܒܪܐ ܬܓܪܐ ܕܒܥܐ ܗܘܐ ܡ̈ܪܓܢܝܬܐ ܛܒ̈ܬܐ܂
13:46 ܘܟܕ ܐܫܟܚ ܡܪܓܢܝܬܐ ܛܒܬܐ ܘܝܩܝܪܬ ܕ̈ܡܝܐ܂ ܐܙܠ ܘܙܒܢ ܟܠ ܡܕܡ ܕܐܝܬ ܠܗ܂ ܘܐܬܐ ܘܙܒܢܗܿ ܠܗ܀
13:47 ܬܘܒ ܕܡܝܐ ܡܠܟܘܬܐ ܕܫܡܝܐ ܠܡܨܝܕܬܐ ܪܒܬܐ ܕܢܦܠܬ ܒܝܡܐ܂ ܘܡܢ ܟܠ ܓܢܣ ܟܢܫܬ܂
13:48 ܘܟܕ ܕܝܢ ܡܠܬ ܐܣܩܘܗܿ ܥܠ ܣ̈ܦܪܝ ܝܡܐ܂ ܘܝܬܒܘ ܓܒܝܘ ܢܘ̈ܢܐ ܕܛ̈ܒܝܢ ܛܒ̈ܝܢ܂ ܘܐܝܠܝܢ ܕܒܝܫܝܢ ܫܕܘ ܐܢܘܢ ܠܒܪ܂
13:49 ܗܟܢܐ ܢܗܘܐ ܒܣܘܦܗ ܕܥܠܡܐ ܢܦܩܘܢ ܡ̈ܠܐܟܐ ܘܢܦܪܫܘܢ ܠܒܝ̈ܫܐ ܡܢ ܒܝܢܬ ܙܕܝ̈ܩܐ܂
13:50 ܘܢܪܡܘܢ ܐܢܘܢ ܒܐܬܘܢܐ ܕܢܘܪܐ܂ ܬܡܢ ܢܗܘܐ ܒܟܝܐ ܘܚܘܪܩ ܫ̈ܢܐ܀
13:51 ܐܡܪ ܠܗܘܢ ܝܫܘܥ ܠܬܠܡܝ̈ܕܘܗܝ ܐܣܬܟܠܬܘܢ ܗܠܝܢ ܟܠܗܝܢ܂ ܐܡܪܝܢ ܠܗ ܐܝܢ܂
13:52 ܐܡܪ ܠܗܘܢ ܡܛܠ ܗܢܐ ܟܠ ܣܦܪܐ ܕܡܬܬܠܡܕ ܠܡܠܟܘܬܐ ܕܫܡܝܐ܂ ܕܡܐ ܠܓܒܪܐ ܡܪܐ ܒܝܬܐ܂ ܕܡܦܩ ܡܢ ܣܝ̈ܡܬܗ ܚܕܬܐ ܘܥܬܝܩܐ܀
13:53 ܘܟܕ ܫܠܡ ܝܫܘܥ ܡ̈ܬܠܐ ܗܠܝܢ܂ ܫܢܝ ܠܗ ܡܢ ܬܡܢ܂
13:54 ܘܐܬܐ ܠܗ ܠܡܕܝܢܬܗ܂ ܘܡܠܦ ܗܘܐ ܠܗܘܢ ܝܫܘܥ ܒ̈ܟܢܘܫܬܗܘܢ܂ ܐܝܟܢܐ ܕܢܬܡܗܘܢ܂ ܘܗܢܘܢ ܐܡܪܝܢ ܐܝܡܟܐ ܠܗ ܠܗܢܐ ܚܟܡܬܐ ܗܕܐ ܘܚܝܠܐ ܗܢܐ܂
13:55 ܠܐ ܗܘܐ ܗܢܐ ܒܪ ܝܘܣܦ ܢܓܪܐ܂ ܘܫܡܗܿ ܠܐܡܗ ܡܪܝܡ܂ ܘܐܚ̈ܘܗܝ ܝܥܩܘܒ ܘܝܘܣܦ ܘܫܡܥܘܢ ܘܝܗܘܕܐ܂
13:56 ܘܐ̈ܚܘܬܗ ܟܠܗܝܢ ܠܘܬܢ ܐܢܝܢ܂ ܐܝܡܟܐ ܠܗ ܗܠܝܢ ܟܠܗܝܢ ܠܗܢܐ܂
13:57 ܘܡܬܟܫܠܝܢ ܗܘܘ ܒܗ܂ ܗܘ ܕܝܢ ܝܫܘܥ ܐܡܪ ܠܗܘܢ܂ ܠܝܬ ܢܒܝܐ ܕܡܨܛܥܪ ܐܠܐ ܐܢ ܒܡܕܝܢܬܗ ܘܒܒܝܬܗ܂
13:58 ܘܠܐ ܥܒܕ ܬܡܢ ܚ̈ܝܠܐ ܣܓ̈ܝܐܐ܂ ܡܛܠ ܚܣܝܪܘܬ ܗܝܡܢܘܬܗܘܢ܂
14:01 ܒܗܘ ܕܝܢ ܙܒܢܐ ܫܡܥ ܗܪܘܕܣ ܛܝܛܪܟܐ ܫܡܥܗ ܕܝܫܘܥ܂
14:02 ܘܐܡܪ ܠܥܒ̈ܕܘܗܝ܂ ܗܢܐ ܝܘܚܢܢ ܗܘ ܡܥܡܕܢܐ ܩܡ ܡܢ ܒܝܬ ܡܝ̈ܬܐ܂ ܡܛܠ ܗܢܐ ܣܓܝ ܚܝܠܗ܂
14:03 ܗܘ ܓܝܪ ܗܪܘܕܣ ܐܚܕܗ ܗܘܐ ܠܝܘܚܢܢ ܘܐܣܪܗ܂ ܘܐܪܡܝܗ ܒܝܬ ܐܣ̈ܝܪܐ܂ ܡܛܠ ܗܪܘܕܝܐ ܐܢܬܬ ܦܝܠܝܦܘܣ ܐܚܘܗܝ܂
14:04 ܐܡܪ ܗܘܐ ܠܗ ܓܝܪ ܝܘܚܢܢ܂ ܕܠܐ ܫܠܝܛ ܠܟ ܕܬܗܘܐ ܠܟ ܐܢܬܬܐ܂
14:05 ܘܨܒܐ ܗܘܐ ܠܡܩܛܠܗ ܘܕܚܠ ܗܘܐ ܡܢ ܥܡܐ܂ ܡܛܠ ܕܐܝܟ ܕܠܢܒܝܐ ܐܚܝܕܝܢ ܗܘܘ ܠܗ ܠܝܘܚܢܢ܀
14:06 ܘܟܕ ܗܘܐ ܒܝܬ ܝܠܕܗ ܕܗܪܘܕܣ܂ ܥܠܬ ܪܩܕܬ ܒܪܬܗܿ ܕܗܪܘܕܝܐ ܡܨܥܬ ܣܡܟܐ܂ ܘܫܦܪܬ ܠܗ ܠܗܪܘܕܣ܂
14:07 ܡܛܘܠ ܗܢܐ ܐܫܬܘܕܝ ܠܗܿ ܒܡܘܡܬܐ ܕܟܠ ܡܐ ܕܬܫܐܠܝܘܗܝ ܢܬܠ ܠܗܿ܂
14:08 ܗܝ ܕܝܢ ܡܛܠ ܕܡܠܦܐ ܗܘܬ ܡܢ ܐܡܗܿ܂ ܐܡܪܬ܂ ܗܒ ܠܝ ܗܪܟܐ ܒܦܝܢܟܐ ܪܫܗ ܕܝܘܚܢܢ ܡܥܡܕܢܐ܂
14:09 ܘܟܪܝܬ ܠܗ ܠܡܠܟܐ܂ ܘܡܛܠ ܡܘܡܬܐ ܘܡܛܠ ܣ̈ܡܝܟܐ܂ ܦܩܕ ܕܢܬܝܗܒ ܠܗܿ܂
14:10 ܘܫܕܪ ܦܣܩ ܪܫܗ ܕܝܘܚܢܢ ܒܝܬ ܐܣ̈ܝܪܐ܂
14:11 ܘܐܝܬܝܘ ܪܫܗ ܕܝܘܚܢܢ ܒܦܝܢܟܐ܂ ܘܐܬܝܗܒ ܠܛܠܝܬܐ܂ ܘܗܝ ܛܠܝܬܐ ܐܘܒܠܬܗ ܠܐܡܗܿ܂
14:12 ܘܩܪܒܘ ܬܠܡ̈ܝܕܘܗܝ ܕܝܘܚܢܢ ܘܫܩܠܘ ܫܠܕܗ ܘܩܒܪܘܗܝ܂ ܘܐܬܘ ܘܚܘܝܘ ܠܝܫܘܥ܂
14:13 ܝܫܘܥ ܕܝܢ ܟܕ ܫܡܥ ܫܢܝ ܠܗ ܡܢ ܬܡܢ ܠܐܬܪܐ ܚܘܪܒܐ ܒܠܚܘܕܝܗܘܢ܂ ܘܟܕ ܫܡܥܘ ܟܢ̈ܫܐ ܕܡܢ ܡ̈ܕܝܢܬܐ ܘܡܢ ܩܘ̈ܪܝܐ܂ ܐܙܠܘ ܠܗܘܢ ܒܬܪܗ ܒܪܓܠ܂
14:14 ܘܟܕ ܚܙܐ ܟܢܫ̈ܐ ܣܓ̈ܝܐܐ܂ ܐܬܪܚܡ ܥܠܝܗܘܢ܂ ܘܠܟܪ̈ܝܗܝܗܘܢ ܐܣܝ܀
14:15 ܘܟܕ ܗܘܐ ܪܡܫܐ܂ ܩܪܒܘ ܬܠܡܝ̈ܕܘܗܝ ܘܐܡܪܝܢ ܠܗ܂ ܐܬܪܐ ܚܘܪܒܐ ܗܘ܂ ܘܥܕܢܐ ܥܒܪ܂ ܫܪܝ ܟܢ̈ܫܐ ܗܢܘܢ ܢܐܙܠܘܢ ܠܩܘ̈ܪܝܐ ܘܢܙܒܢܘܢ ܠܗܘܢ ܣܝܒܪܬܐ܂
14:16 ܘܐܡܪ ܠܗܘܢ ܠܐ ܡܬܒܥܐ ܠܗܘܢ ܠܡܐܙܠ܂ ܗܒܘ ܠܗܘܢ ܐܢܬܘܢ ܠܡܐܟܠ܂
14:17 ܐܡܪܝܢ ܠܗ ܠܝܬ ܠܢ ܬܢܢ܂ ܐܠܐ ܚܡ̈ܫ ܓܪܝ̈ܨܢ ܘܬ̈ܪܝܢ ܢܘ̈ܢܝܢ܂
14:18 ܐܡܪ ܠܗܘܢ ܐܝܬܘ ܐܢܘܢ ܠܝ܂
14:19 ܘܦܩܕ ܠܟ̈ܢܫܐ ܠܡܣܬܡܟܘ ܥܠ ܥܣܒܐ܂ ܘܫܩܠ ܗܠܝܢ ܚܡ̈ܫ ܓܪܝ̈ܨܢ ܘܬ̈ܪܝܢ ܢܘܢ̈ܝܢ܂ ܘܚܪ ܒܫܡܝܐ ܘܒܪܟ܂ ܘܩܨܐ ܠܚܡܐ ܘܝܗܒ ܠܬܠܡ̈ܝܕܘܗܝ܂ ܘܗܢܘܢ ܬܠܡܝ̈ܕܘܗܝ ܝܗܒܘ ܠܟܢ̈ܫܐ܂
14:20 ܘܐܟܠܘ ܟܠܗܘܢ ܘܣܒܥܘ܂ ܘܫܩܠܘ ܬܘܬ̈ܪܐ ܕܩ̈ܨܝܐ ܡܢ ܩܕܡܝܗܘܢ ܬܪܥ̈ܣܪ ܩܘ̈ܦܝܢܝܢ ܟܕ ܡܠܝܢ܂
14:21 ܘܗܢܘܢ ܐܢܫܐ ܕܐܟܠܘ ܗܘܝܢ ܗܘܘ ܚܡܫܐ ܐ̈ܠܦܝܢ ܓܒ̈ܪܝܢ܂ ܣܛܪ ܡܢ ܢܫ̈ܐ ܘܛ̈ܠܝܐ܂
14:22 ܘܦܩܕ ܠܬܠܡ̈ܝܕܘܗܝ ܕܢܬܒܘܢ ܒܐܠܦܐ܂ ܘܢܐܙܠܘܢ ܩܕܡܘܗܝ ܠܥܒܪܐ܂ ܥܕ ܫܪܐ ܠܟܢ̈ܫܐ ܗܠܝܢ܂
14:23 ܘܟܕ ܫܪܐ ܐܢܘܢ ܣܠܩ ܠܗ ܠܛܘܪܐ ܒܠܚܘܕܘܗܝ ܠܡܨܠܝܘ܂ ܘܟܕ ܗܘܐ ܪܡܫܐ ܒܠܚܘܕܘܗܝ ܗܘܐ ܬܡܢ܂
14:24 ܘܣܦܝܢܬܐ ܦܪܝܩܐ ܗܘܬ ܡܢ ܐܪܥܐ ܐܣ̈ܛܕܘܬܐ ܣܓ̈ܝܐܐ܂ ܘܡܫܬܢܩܝܢ ܗܘܘ ܡܢ ܓ̈ܠܠܐ܂ ܡܛܠ ܕܪܘܚܐ ܠܘܩܒܠܗܘܢ ܗܘܬ܂
14:25 ܒܡܛܪܬܐ ܕܝܢ ܪܒܝܥܝܬܐ ܕܠܠܝܐ܂ ܐܬܐ ܠܘܬܗܘܢ ܝܫܘܥ ܟܕ ܡܗܠܟ ܥܠ ܡ̈ܝܐ܂
14:26 ܘܟܕ ܚܙܐܘܗܝ ܬܠܡ̈ܝܕܘܗܝ ܕܡܗܠܟ ܥܠ ܓ̈ܠܠܝ ܝܡܐ ܐܬܙܝܥܘ܂ ܘܐܡܪܝܢ ܗܘܘ ܕܫܐܕܐ ܗܘ܂ ܘܡܢ ܕܚܠܬܗܘܢ ܝܗܒܘ ܩܠܐ܂
14:27 ܘܒܗܿ ܒܫܥܬܐ ܡܠܠ ܥܡܗܘܢ܂ ܐܬܚܝܠܘ ܐܢܐ ܐܢܐ ܠܐ ܬܕܚܠܘܢ܂
14:28 ܐܡܪ ܠܗ ܫܡܥܘܢ ܟܐܦܐ܂ ܡܪܝ ܐܢ ܐܢܬ ܗܘ ܐܦܣ ܠܝ ܐܬܐ ܠܘܬܟ ܥܠ ܡ̈ܝܐ܂
14:29 ܐܡܪ ܠܗ ܬܐ܂ ܘܢܚܬ ܫܡܥܘܢ ܟܐܦܐ ܡܢ ܣܦܝܢܬܐ܂ ܘܡܗܠܟ ܗܘܐ ܥܠ ܡ̈ܝܐ܂ ܘܐܬܐ ܠܘܬ ܝܫܘܥ܂
14:30 ܘܟܕ ܚܙܐ ܪܘܚܐ ܕܚܣܝܢܐ ܗܝ܂ ܕܚܠ ܘܫܪܝ ܠܡܛܒܥ܂ ܘܩܪܐ ܒܩܠܐ ܪܡܐ ܘܐܡܪ܂ ܡܪܝ ܐܚܢܝ܂
14:31 ܘܒܗܿ ܒܫܥܬܐ ܐܘܫܛ ܝܫܘܥ ܐܝܕܗ ܘܐܚܕܗ܂ ܘܐܡܪ ܠܗ ܚܣܝܪ ܗܝܡܢܘܬܐ ܠܡܢܐ ܐܬܦܠܓܬ܂
14:32 ܘܟܕ ܣܠܩ ܠܣܦܝܢܬܐ ܫܠܝܬ ܪܘܚܐ܂
14:33 ܘܩܪܒܘ ܗܢܘܢ ܕܒܣܦܝܢܬܐ ܣܓܕܘ ܠܗ܂ ܘܐܡܪܝܢ ܫܪܝܪܐܝܬ ܒܪܗ ܐܢܬ ܕܐܠܗܐ܂
14:34 ܘܟܕ ܣܠܩ ܠܝܒܫܐ܂ ܐܬܘ ܠܗܘܢ ܠܓܢܣܪ܂
14:35 ܘܐܫܬܘܕܥܘܗܝ ܒ̈ܢܝ ܐܬܪܐ ܗܘ܂ ܘܫܕܪܘ ܠܟܠܗܿ ܟܘܪ ܕܝܠܗܘܢ܂ ܘܩܪܒܘ ܩܕܡܘܗܝ ܟܠܗܘܢ ܐܝܠܝܢ ܕܒܝܫ ܒܝܫ ܥܒܝܕܝܢ܂
14:36 ܘܒܥܝܢ ܗܘܘ ܡܢܗ ܕܢܩܪܒܘܢ ܒܠܚܘܕ ܠܬܟܠܬܐ ܕܐܣܛܠܗ܂ ܘܐܝܠܝܢ ܕܩܪܒܘ ܗܘܘ ܐܬܐܣܝܘ ܗܘܘ܀
15:01 ܗܝܕܝܢ ܩܪܒܘ ܠܘܬܗ ܕܝܫܘܥ ܣ̈ܦܪܐ ܘܦܪ̈ܝܫܐ ܕܡܢ ܐܘܪܫܠܡ ܘܐܡܪܝܢ ܠܗ܂
15:02 ܠܡܢܐ ܥܒܪܝܢ ܬܠܡ̈ܝܕܝܟ ܥܠ ܦܘܩ̈ܕܢܐ ܕ̈ܣܒܝܢ܂ ܠܐ ܓܝܪ ܡܫܝܓܝܢ ܐܝ̈ܕܝܗܘܢ ܡܐ ܕܐܟܠܝܢ ܠܚܡܐ܂
15:03 ܗܘ ܕܝܢ ܥܢܐ ܘܐܡܪ ܠܗܘܢ܂ ܠܡܢܐ ܘܐܦ ܐܢܬܘܢ ܥܒܪܝܢ ܐܢܬܘܢ ܥܠ ܦܘܩܕܢܐ ܕܐܠܗܐ ܡܛܠ ܕܬܩܝܡܘܢ ܦܘܩ̈ܕܢܝܟܘܢ܂
15:04 ܐܠܗܐ ܓܝܪ ܐܡܪ ܝܩܪ ܠܐܒܘܟ ܘܠܐܡܟ܂ ܘܡܢ ܕܡܨܚܐ ܠܐܒܘܗܝ ܐܘ ܠܐܡܗ ܢܬܩܛܠ܂
15:05 ܐܢܬܘܢ ܕܝܢ ܐܡܪܝܢ ܐܢܬܘܢ ܐܢܫ ܠܐܒܘܗܝ ܘܠܐܡܗ܂ ܩܘܪܒܢܝ ܬܬܗܢܐ ܡܢܝ܂ ܗܢܐ ܠܐ ܝܩܪ ܠܐܒܘܗܝ܂
15:06 ܘܒܛܠܬܘܢ ܡܠܬܐ ܕܐܠܗܐ ܡܛܠ ܕܬܩܝܡܘܢ ܦܘܩ̈ܕܢܝܟܘܢ܂
15:07 ܢܣ̈ܒܝ ܒܐ̈ܦܐ܂ ܫܦܝܪ ܐܬܢܒܝ ܥܠܝܟܘܢ ܐܫܥܝܐ ܢܒܝܐ ܕܐܡܪ ܗܘܐ܂
15:08 ܥܡܐ ܗܢܐ ܒܣ̈ܦܘܬܗ ܗܘ ܡܝܩܪ ܠܝ܂ ܘܒܠܒܗ ܪܚܝܩ ܡܢܝ܂
15:09 ܣܪܝܩܐܝܬ ܕܝܢ ܕܚܠܝܢ ܠܝ܂ ܘܡܠܦܝܢ ܝܘ̈ܠܦܢܐ ܕܦܘܩ̈ܕܢܐ ܕܒܢܝܢܫܐ܀
15:10 ܘܩܪܐ ܠܟܢܫܐ ܘܐܡܪ ܠܗܘܢ܂ ܫܡܥܘ ܘܐܣܬܟܠܘ
15:11 ܕܠܐ ܗܘܐ ܡܕܡ ܕܥܐܠ ܠܦܘܡܐ ܡܣܝܒ ܠܗ ܠܒܪ ܐܢܫܐ܂ ܐܠܐ ܡܕܡ ܕܢܦܩ ܡܢ ܦܘܡܐ ܗܘ ܗܘ ܡܣܝܒ ܠܗ ܠܒܪܢܫܐ܂
15:12 ܗܝܕܝܢ ܩܪܒܘ ܬܠܡ̈ܝܕܘܗܝ ܘܐܡܪܝܢ ܠܗ܂ ܝܕܥ ܐܢܬ ܕܦܪ̈ܝܫܐ ܟܕ ܫܡܥܘ ܡܠܬܐ ܗܕܐ ܐܬܟܫܠܘ܂
15:13 ܗܘ ܕܝܢ ܥܢܐ ܘܐܡܪ ܠܗܘܢ܂ ܟܘܠ ܢܨܒܬܐ ܕܐܒܝ ܕܒܫܡܝܐ ܠܐ ܢܨܒܗܿ ܬܬܥܩܪ܂
15:14 ܫܒܘܩܘ ܠܗܘܢ܂ ܢܓܘ̈ܕܐ ܐܢܘܢ ܕ̈ܣܡܝܐ܂ ܣܡܝܐ ܕܝܢ ܕܠܣܡܝܐ ܡܕܒܪ ܥܡܗ ܒܓܘܡܨܐ ܢܦܠ܂
15:15 ܥܢܐ ܫܡܥܘܢ ܟܐܦܐ ܘܐܡܪ ܠܗ܂ ܦܫܩ ܠܢ ܡܬܠܐ ܗܢܐ܂
15:16 ܐܡܪ ܠܗ ܐܦ ܠܐ ܐܢܬܘܢ ܥܕܡܐ ܠܗܫܐ ܡܣܬܟܠܝܢ ܐܢܬܘܢ܂
15:17 ܠܐ ܝܕܥܝܢ ܐܢܬܘܢ ܕܟܠ ܡܕܡ ܕܥܐܠ ܠܦܘܡܐ ܠܟܪܣܐ ܗܘ ܐܙܠ܂ ܘܡܢ ܬܡܢ ܡܫܬܕܐ ܒܬܕܟܝܬܐ܂
15:18 ܡܕܡ ܕܝܢ ܕܢܦܩ ܡܢ ܦܘܡܐ ܡܢ ܠܒܐ ܗܘ ܢܦܩ܂ ܘܗܘ ܗܘ ܡܣܝܒ ܠܗ ܠܒܪܢܫܐ܂
15:19 ܡܢ ܠܒܐ ܗܘ ܓܝܪ ܢܦܩܢ ܡܚ̈ܫܒܬܐ ܒܝ̈ܫܬܐ܂ ܕܩܛܠܐ ܘܕܓܘܪܐ܂ ܘܕܙܢܝܘܬܐ܂ ܘܕܓܢܒܘܬܐ܂ ܘܣܗܕܘܬܐ ܕܫܘܩܪܐ ܘܓܘܕܦܐ܂
15:20 ܗܠܝܢ ܐܢܝܢ ܐܝܠܝܢ ܕܡܣܝܒܢ ܠܗ ܠܒܪܢܫܐ܂ ܟܕ ܐܢܫ ܓܝܪ ܢܐܟܘܠ ܠܚܡܐ ܟܕ ܠܐ ܡܫܓܢ ܐܝ̈ܕܘܗܝ ܠܐ ܡܣܬܝܒ܀
15:21 ܘܢܦܩ ܝܫܘܥ ܡܢ ܬܡܢ܂ ܘܐܙܠ ܠܗ ܠܬܚܘܡܐ ܕܨܘܪ ܘܕܨܝܕܢ܂
15:22 ܘܗܐ ܐܢܬܬܐ ܚܕܐ ܟܢܥܢܝܬܐ ܢܦܩܬ ܡܢܗܘܢ ܡܢ ܬܚܘ̈ܡܐ ܗܠܘܟ܂ ܘܩܥܝܐ ܗܘܬ ܘܐܡܪܐ܂ ܐܬܪܚܡ ܥܠܝ ܡܪܝ ܒܪܗ ܕܕܘܝܕ܂ ܒܪܬܝ ܒܝܫܐܝܬ ܡܬܕܒܪܐ ܡܢ ܐ̈ܝܕܝ ܫܐܕܐ܂
15:23 ܘܗܘ ܠܐ ܝܗܒ ܠܗܿ ܦܬܓܡܐ܂ ܘܩܪܒܘ ܬܠܡ̈ܝܕܘܗܝ ܘܒܥܝܢ ܗܘܘ ܡܢܗ ܘܐܡܪܝܢ ܗܘܘ ܠܗ܂ ܫܪܝܗ ܕܗܐ ܩܥܝܐ ܘܐܬܝܐ ܒܬܪܢ܂
15:24 ܗܘ ܕܝܢ ܥܢܐ ܘܐܡܪ ܠܗܘܢ܂ ܠܐ ܐܫܬܕܪܬ ܐܠܐ ܒܬܪ ܥܢܐ ܗܠܝܟ ܕܛܥܝ ܡܢ ܒܝܬ ܐܝܣܪܐܝܠ܂
15:25 ܗܝܕܝܢ ܗܝ ܩܪܒܬ ܣܓܕܬ ܠܗ ܘܐܡܪܐ܂ ܠܗ ܡܪܝ ܥܕܪܝܢܝ܂
15:26 ܗܘ ܕܝܢ ܥܢܐ ܘܐܡܪ ܠܗܿ܂ ܠܐ ܘܠܐ ܠܡܣܒ ܠܚܡܐ ܕܒ̈ܢܝܐ ܘܠܡܪܡܝܘ ܠܟ̈ܠܒܐ܂
15:27 ܐܡܪܐ ܠܗ ܐܝܢ ܡܪܝ܂ ܐܦ ܟ̈ܠܒܐ ܓܝܪ ܐܟܠܝܢ ܡܢ ܦܪ̈ܬܘܬܐ ܕܢܦܠܝܢ ܡܢ ܦܬܘܪ̈ܐ ܕܡܪ̈ܝܗܘܢ ܘܚܝܝܢ܂
15:28 ܘܥܢܐ ܘܐܡܪ ܠܗܿ܂ ܐܘ ܐܢܬܬܐ ܪܒܐ ܗܝ ܗܝܡܢܘܬܟܝ܂ ܢܗܘܐ ܠܟܝ ܐܝܟ ܕܨܒܝܐ ܐܢܬܝ܂ ܘܐܬܐܣܝܬ ܒܪܬܗܿ ܡܢ ܗܝ ܫܥܬܐ܀
15:29 ܘܫܢܝ ܝܫܘܥ ܡܢ ܬܡܢ܂ ܘܐܬܐ ܠܗ ܥܠ ܓܢܒ ܝܡܬܐ ܕܓܠܝܠܐ܂ ܘܣܠܩ ܝܬܒ ܠܗ ܒܛܘܪܐ܂
15:30 ܘܩܪܒܘ ܠܗ ܟܢ̈ܫܐ ܣܓ̈ܝܐܐ܂ ܟܕ ܐܝܬ ܗܘܘ ܥܡܗܘܢ ܚܓ̈ܝܪܐ ܘܣܡ̈ܝܐ ܘ̈ܚܪܫܐ ܘܦܫ̈ܝܓܐ܂ ܘܣܓ̈ܝܐܐ ܕ̈ܟܐܒܐ ܐܚ̈ܪܢܐ܂ ܘܐܪܡܝܘ ܐܢܘܢ ܠܘܬ ܪ̈ܓܠܘܗܝ܂ ܘܐܣܝ ܐܢܘܢ܂
15:31 ܘܡܬܕܡܪܝܢ ܗܘܘ ܟܢ̈ܫܐ ܗܢܘܢ܂ ܟܕ ܚܙܝܢ ܗܘܘ ܚܪ̈ܫܐ ܕܡܡܠܠܝܢ܂ ܘ̈ܚܓܝܪܐ ܕܡܗܠܟܝܢ܂ ܘܣܡ̈ܝܐ ܕܚܙܝܢ܂ ܘܡܫܒܚܝܢ ܗܘܘ ܠܐܠܗܐ ܕܐܝܣܪܝܠ܂
15:32 ܗܘ ܕܝܢ ܝܫܘܥ ܩܪܐ ܠܬܠܡ̈ܝܕܘܗܝ ܘܐܡܪ ܠܗܘܢ܂ ܡܬܪܚܡ ܐܢܐ ܥܠ ܟܢܫܐ ܗܢܐ܂ ܕܗܐ ܬܠܬܐ ܝܘܡ̈ܝܢ ܩܘܝܘ ܠܘܬܝ܂ ܘܠܝܬ ܠܗܘܢ ܡܢܐ ܢܐܟܠܘܢ܂ ܘܕܐܫܪܐ ܐܢܘܢ ܟܕ ܛܘܬ ܐܢܘܢ ܠܐ ܨܒܐ ܐܢܐ܂ ܕܠܐ ܢܥܘܦܘܢ ܠܗܘܢ ܒܐܘܪܚܐ܂
15:33 ܐܡܪܝܢ ܠܗ ܬܠܡ̈ܝܕܘܗܝ܂ ܡܢ ܐܝܡܟܐ ܠܢ ܒܐܬܪܐ ܚܘܪܒܐ ܠܚܡܐ ܠܡܣܒܥܘ ܠܟܠܗ ܟܢܫܐ ܗܢܐ܂
15:34 ܐܡܪ ܠܗܘܢ ܝܫܘܥ ܟܡܐ ܠܚ̈ܡܝܢ ܐܝܬ ܥܠܝܟܘܢ܂ ܐܡܪܝܢ ܠܗ ܫܒ̈ܥܐ ܠܚ̈ܡܝܢ܂ ܘܢ̈ܘܢܐ ܙܥ̈ܘܪܐ܂
15:35 ܘܦܩܕ ܠܟܢ̈ܫܐ ܕܢܣܬܡܟܘܢ ܥܠ ܐܪܥܐ܂
15:36 ܘܫܩܠ ܠܫܒܥܐ ܠܚܡ̈ܝܢ ܘ̈ܠܢܘܢܐ܂ ܘܫܒܚ ܘܩܨܐ ܘܝܗܒ ܠܬܠܡ̈ܝܕܘܗܝ܂ ܘܬܠܡ̈ܝܕܘܗܝ ܝܗܒܘ ܠܟܢ̈ܫܐ܂
15:37 ܘܐܟܠܘ ܟܠܗܘܢ ܘܣܒܥܘ܂ ܘܫܩܠܘ ܡܢ ܩܕܡܝܗܘܢ ܝܘܬܪܢܐ ܕܩ̈ܨܝܐ ܡܠܐ ܫܒܥܐ ܐܣ̈ܦܪܝܕܝܢ ܟܕ ܡܠܝܢ܂
15:38 ܘܗܘܝܢ ܗܘܘ ܐܢܫܐ ܐܝܠܝܢ ܕܐܟܠܘ ܐܪܒ̈ܥܐ ܐ̈ܠܦܝܢ ܓܒ̈ܪܝܢ܂ ܣܛܪ ܡܢ ܛ̈ܠܝܐ ܘܢܫ̈ܐ܀
15:39 ܘܟܕ ܫܪܐ ܠܟܢܫܐ܂ ܣܠܩ ܝܬܒ ܠܗ ܒܣܦܝܢܬܐ܂ ܘܐܬܐ ܠܗ ܠܬܚܘܡܐ ܕܡܓܕܘܢ܂
16:01 ܘܩܪܒܘ ܦܪܝ̈ܫܐ ܘܙܕ̈ܘܩܝܐ ܘܡܢܣܝܢ ܗܘܘ ܠܗ܂ ܘܫܐܠܝܢ ܠܗ ܐܬܐ ܡܢ ܫܡܝܐ ܕܢܚܘܐ ܐܢܘܢ܂
16:02 ܗܘ ܕܝܢ ܐܡܪ ܠܗܘܢ܂
16:04 ܫܪܒܬܐ ܒܝܫܬܐ ܘܓܝܪܬܐ܂ ܐܬܐ ܒܥܝܐ ܘܐܬܐ ܠܐ ܬܬܝܗܒ ܠܗܿ܂ ܐܠܐ ܐܢ ܐܬܗ ܕܝܘܢܢ ܢܒܝܐ܂ ܘܫܒܩ ܐܢܘܢ ܘܐܙܠ ܠܗ܂
16:05 ܘܟܕ ܐܬܐ ܠܥܒܪܐ܂ ܛܥܘ ܬܠܡܝ̈ܕܘܗܝ ܕܢܫܩܠܘܢ ܠܗܘܢ ܠܚܡܐ܂
16:06 ܐܡܪ ܠܗܘܢ ܝܫܘܥ܂ ܐܙܕܗܪܘ ܡܢ ܚܡܝܪܐ ܕܦܪ̈ܝܫܐ ܘܕܙܕ̈ܘܩܝܐ܂
16:07 ܘܗܢܘܢ ܡܬܚܫܒܝܢ ܗܘܘ ܒܝܢܬܗܘܢ ܕܠܐ ܢܣܒܘ ܠܗܘܢ ܠܚܡܐ܂
16:08 ܝܫܘܥ ܕܝܢ ܝܕܥ ܘܐܡܪ ܠܗܘܢ܂ ܡܢܐ ܡܬܚܫܒܝܢ ܐܢܬܘܢ ܒܝܢܬܟܘܢ ܚܣܝܪܝ ܗܝܡܢܘܬܐ܂ ܕܠܐ ܫܩܠܬܘܢ ܠܟܘܢ ܠܚܡܐ܂
16:09 ܥܕܡܐ ܠܗܫܐ ܠܐ ܡܣܬܟܠܝܢ ܐܢܬܘܢ܂ ܘܠܐ ܥܗܕܝܢ ܐܢܬܘܢ ܠܚܡ̈ܫܐ ܠܚ̈ܡܝܢ܂ ܐܦ ܠܚܡ̈ܫܐ ܐܠܦܝܢ ܕܐܟܠܘ ܡܢܗܘܢ܂ ܘܟܡܐ ܩܘ̈ܦܝܢܝܢ ܫܩܠܬܘܢ ܡܢ ܩܕܡܝܗܘܢ܂
16:10 ܘܐܦ ܠܐ ܠܗܢܘܢ ܫܒܥܐ ܠܚܡ̈ܝܢ ܕܐܪ̈ܒܥܐ ܐܠ̈ܦܝܢ ܐܟܠܘ ܡܢܗܘܢ܂ ܘܟܡܐ ܕܝܢ ܐܣ̈ܦܪܝܕܝܢ ܫܩܠܬܘܢ܂
16:11 ܐܝܟܘ ܠܐ ܡܣܬܟܠܝܢ ܐܢܬܘܢ ܕܠܐ ܗܘܐ ܥܠ ܠܚܡܐ ܐܡܪܬ ܠܟܘܢ܂ ܕܐܙܕܗܪܘ ܡܢ ܚܡܝܪܐ ܕܦܪܝ̈ܫܐ ܘܕܙܕ̈ܘܩܝܐ܂
16:12 ܗܝܕܝܢ ܐܣܬܟܠܘ ܕܠܐ ܗܘܐ ܥܠ ܚܡܝܪܐ ܕܦܪ̈ܝܫܐ ܘܕܙ̈ܕܘܩܝܐ ܐܡܪ ܠܗܘܢ ܕܐܙܕܗܪܘ܂ ܐܠܐ ܡܢ ܝܘܠܦܢܗܘܢ ܕܦܪ̈ܝܫܐ ܘܕܙܕ̈ܘܩܝܐ܀
16:13 ܘܟܕ ܐܬܐ ܕܝܢ ܝܫܘܥ ܠܐܬܪܐ ܕܩܣܪܝܐ ܕܦܝܠܝܦܘܣ܂ ܡܫܐܠ ܗܘܐ ܠܬܠܡ̈ܝܕܘܗܝ ܘܐܡܪ܂ ܡܢܐ ܐܡܪܝܢ ܐܢܫܐ ܥܠܝ ܕܐܝܬܝ܂ ܡܢܘ ܠܡ ܗܢܐ ܒܪܗ ܕܐܢܫܐ܂
16:14 ܐܡܪܝܢ ܠܗ ܬܠܡ̈ܝܕܘܗܝ܂ ܐܝܬ ܕܐܡܪܝܢ ܕܝܘܚܢܢ ܗܘ ܡܥܡܕܢܐ܂ ܐܚ̈ܪܢܐ ܐܡܪܝܢ ܕܐܠܝܐ ܗܘ܂ ܐ̈ܚܪܢܐ ܐܡܪܝܢ ܐܪܡܝܐ ܗܘ܂ ܐܚ̈ܪܢܐ ܐܡܪܝܢ ܚܕ ܡܢ ܢܒ̈ܝܐ ܗܘ܂
16:15 ܐܡܪ ܠܗܘܢ ܘܐܢܬܘܢ ܡܢܐ ܐܡܪܝܢ ܐܢܬܘܢ ܕܐܝܬܝ܂
16:16 ܥܢܐ ܫܡܥܘܢ ܟܐܦܐ ܘܐܡܪ܂ ܐܢܬ ܗܘ ܡܫܝܚܐ ܒܪܗ ܕܐܠܗܐ ܚܝܐ܂
16:17 ܐܡܪ ܠܗ ܝܫܘܥ ܛܘܒܝܟ ܫܡܥܘܢ ܒܪܗ ܕܝܘܢܐ܂ ܕܒܣܪܐ ܘܕܡܐ ܠܐ ܓܠܐ ܠܟ܂ ܐܠܐ ܐܒܝ ܕܒܫܡܝܐ܂
16:18 ܐܦ ܐܢܐ ܐܡܪ ܐܢܐ ܠܟ ܕܐܢܬ ܗܘ ܟܐܦܐ܂ ܘܥܠ ܗܕܐ ܟܐܦܐ ܐܒܢܝܗ ܠܥܕܬܝ܂ ܘܬܪܥ̈ܐ ܕܫܝܘܠ ܠܐ ܢܚܣܢܘܢܗܿ܂
16:19 ܠܟ ܐܬܠ ܐ̈ܩܠܝܕܐ ܕܬ̈ܪܥܐ ܕܡܠܟܘܬܐ ܕܫܡܝܐ܂ ܘܟܠ ܡܕܡ ܕܬܐܣܘܪ ܒܐܪܥܐ ܢܗܘܐ ܐܣܝܪ ܒܫܡܝܐ܂ ܘܡܕܡ ܕܬܫܪܐ ܒܐܪܥܐ ܢܗܘܐ ܫܪܐ ܒܫܡܝܐ܂
16:20 ܗܝܕܝܢ ܟܐܐ ܒܗܘܢ ܒܬܠܡ̈ܝܕܘܗܝ ܕܠܐܢܫ ܠܐ ܢܐܡܪܘܢ ܥܠܘܗܝ ܕܗܘܝܘ ܡܫܝܚܐ܀
16:21 ܡܢ ܗܝܕܝܢ ܫܪܝ ܗܘܐ ܝܫܘܥ ܠܡܚܘܝܘ ܐܢܘܢ ܠܬܠܡ̈ܝܕܘܗܝ܂ ܕܥܬܝܕ ܗܘ ܕܢܐܙܠ ܠܐܘܪܫܠܡ܂ ܘܢܣܝܒܪ ܣܓܝ܂ ܘܢܚܫ ܡܢ ܩܫܝ̈ܫܐ ܘܪ̈ܒܝ ܟܗ̈ܢܐ ܘܣ̈ܦܪܐ܂ ܘܢܩܛܠܘܢܝܗܝ܂ ܘܠܝܘܡܐ ܕܬܠܬܐ ܢܩܘܡ܂
16:22 ܘܩܪܒ ܫܡܥܘܢ ܟܐܦܐ ܘܐܡܪ ܚܣ ܠܟ ܡܪܝ܂ ܠܐ ܬܗܘܐ ܗܕܐ܂
16:23 ܗܘ ܕܝܢ ܝܫܘܥ ܐܬܦܢܝ ܘܟܐܐ ܒܗ ܒܫܡܥܘܢ ܘܐܡܪ ܠܗ܂ ܙܠ ܠܟ ܠܒܣܬܪܝ ܣܛܢܐ ܬܘܩܠܬܐ ܐܢܬ ܠܝ܂ ܕܠܐ ܡܬܪܥܐ ܐܢܬ ܕܐܠܗܐ ܐܠܐ ܕ̈ܒܢܝ ܐܢܫܐ܂
16:24 ܗܝܕܝܢ ܐܡܪ ܝܫܘܥ ܠܬܠܡ̈ܝܕܘܗܝ܂ ܡܢ ܕܨܒܐ ܕܢܐܬܐ ܒܬܪܝ ܢܟܦܘܪ ܒܢܦܫܗ܂ ܘܢܫܩܘܠ ܙܩܝܦܗ ܘܢܐܬܐ ܒܬܪܝ܂
16:25 ܡܢ ܕܨܒܐ ܓܝܪ ܕܢܚܐ ܢܦܫܗ ܢܘܒܕܝܗ܂ ܘܡܢ ܕܢܘܒܕ ܢܦܫܗ ܡܛܘܠܬܝ ܢܫܟܚܝܗ܂
16:26 ܡܢܐ ܓܝܪ ܡܬܗܢܐ ܒܪܢܫܐ ܐܢ ܥܠܡܐ ܟܘܠܗ ܢܩܢܐ ܘܢܦܫܗ ܢܚܣܪ܂ ܐܘ ܡܢܐ ܢܬܠ ܒܪܢܫܐ ܬܚܠܘܦܐ ܕܢܦܫܗ܂
16:27 ܥܬܝܕ ܗܘ ܓܝܪ ܒܪܗ ܕܐܢܫܐ ܕܢܐܬܐ ܒܬܫܒܘܚܬܐ ܕܐܒܘܗܝ ܥܡ ܡܠܐ̈ܟܘܗܝ܂ ܘܗܝܕܝܢ ܢܦܪܘܥ ܠܐܢܫ ܐܢܫ ܐܝܟ ܥܒ̈ܕܘܗܝ܂
16:28 ܐܡܝܢ ܐܡܪܢܐ ܠܟܘܢ ܕܐܝܬ ܐܢܫܐ ܡܢ ܗܠܝܢ ܕܩܝܡܝܢ ܗܪܟܐ܂ ܕܠܐ ܢܛܥܡܘܢ ܡܘܬܐ܂ ܥܕܡܐ ܕܢܚܙܘܢ ܠܒܪܗ ܕܐܢܫܐ܂ ܟܕ ܐܬܐ ܒܡܠܟܘܬܗ ܘܒܫܘܒܚܗ܀
17:01 ܒܬܪ ܫܬܐ ܝܘܡ̈ܝܢ܂ ܕܒܪ ܝܫܘܥ ܠܫܡܥܘܢ ܟܐܦܐ܂ ܘܠܝܥܩܘܒ ܘܠܝܘܚܢܢ ܐܚܘܗܝ܂ ܘܐܣܩ ܐܢܘܢ ܠܛܘܪܐ ܪܡܐ ܒܠܚܘܕܝܗܘܢ܂
17:02 ܘܐܫܬܚܠܦ ܚܙܘܐ ܕܐ̈ܦܘܗܝ ܠܥܢܝ̈ܗܘܢ܂ ܘܐܢܗܪ ܦܪܨܘܦܗ ܐܝܟ ܫܡܫܐ܂ ܘܢܚܬ̈ܘܗܝ ܚܘܪܘ ܐܝܟ ܬܠܓܐ܂
17:03 ܘܐܬܚܙܝ ܠܗܘܢ ܡܘܫܐ ܘܐܠܝܐ ܟܕ ܡܡܠܠܝܢ ܥܡܗ܂
17:04 ܐܡܪ ܫܡܥܘܢ ܟܐܦܐ ܠܝܫܘܥ܂ ܫܦܝܪ ܗܘ ܠܢ ܕܗܪܟܐ ܢܗܘܐ܂ ܐܢ ܨܒܐ ܐܢܬ ܢܥܒܕ ܗܪܟܐ ܬܠܬ ܡ̈ܛܠܝܢ܂ ܠܟ ܚܕܐ܂ ܘܠܡܘܫܐ ܚܕܐ܂ ܘܠܐܠܝܐ ܚܕܐ܂
17:05 ܘܥܕ ܗܘ ܡܡܠܠ܂ ܗܐ ܥܢܢܐ ܕܢܘܗܪܐ ܐܛܠܬ ܥܠܝܗܘܢ܂ ܘܩܠܐ ܐܫܬܡܥ ܡܢ ܥܢܢܐ ܗܝ ܕܐܡܪ܂ ܗܢܐ ܗܘ ܒܪܝ ܘܚܒܝܒܝ ܕܒܗ ܨܒܝܬ܂ ܠܗ ܫܡܥܘ܂
17:06 ܘܟܕ ܫܡܥܘ ܬܠܡܝ̈ܕܘܗܝ ܕܚܠܘ ܛܒ܂ ܘܢܦܠܘ ܥܠ ܐ̈ܦܝܗܘܢ܂
17:07 ܘܩܪܒ ܝܫܘܥ ܘܐܩܝܡ ܐܢܘܢ ܘܐܡܪ ܠܗܘܢ܂ ܠܐ ܬܕܚܠܘܢ܂
17:08 ܘܐܪܝܡܘ ܥܝܢ̈ܝܗܘܢ ܘܠܐ ܚܙܘ ܐܠܐ ܠܝܫܘܥ ܒܠܚܘܕܘܗܝ܂
17:09 ܘܟܕ ܢܚܬܝܢ ܡܢ ܛܘܪܐ܂ ܡܦܩܕ ܗܘܐ ܠܗܘܢ ܝܫܘܥ ܘܐܡܪ ܠܗܘܢ܂ ܕܠܡܐ ܠܐܢܫ ܐܡܪܝܢ ܐܢܬܘܢ ܚܙܘܐ܂ ܥܕܡܐ ܕܢܩܘܡ ܒܪܗ ܕܐܢܫܐ ܡܢ ܒܝܬ ܡ̈ܝܬܐ܀
17:10 ܘܡܫܐܠܝܢ ܗܘܘ ܠܗ ܬܠܡ̈ܝܕܘܗܝ ܘܐܡܪܝܢ܂ ܠܡܢܐ ܐܡܪܝܢ ܣ̈ܦܪܐ ܕܐܠܝܐ ܐܬܐ ܠܘܩܕܡ܂
17:11 ܐܡܪ ܠܗܘܢ ܐܠܝܐ ܐܬܐ ܕܢܬܩܢ ܟܠܡܕܡ܂
17:12 ܐܡܪܢܐ ܠܟܘܢ ܕܝܢ ܕܐܠܝܐ ܐܬܐ ܘܠܐ ܝܕܥܘܗܝ܂ ܐܠܐ ܥܒܕܘ ܒܗ ܟܠ ܡܐ ܕܨܒܘ܂ ܗܟܢܐ ܐܦ ܒܪܗ ܕܐܢܫܐ ܥܬܝܕ ܗܘ ܕܢܣܝܒܪ ܡܢܗܘܢ܂
17:13 ܗܝܕܝܢ ܐܣܬܟܠܘ ܬܠܡ̈ܝܕܘܗܝ ܕܥܠ ܝܘܚܢܢ ܗܘ ܡܥܡܕܢܐ ܐܡܪ ܠܗܘܢ ܗܟܢܐ܂
17:14 ܘܟܕ ܐܬܐ ܝܫܘܥ ܠܘܬ ܟܢܫܐ܂ ܐܬܐ ܓܒܪܐ ܚܕ ܘܢܦܠ ܥܠ ܒܘܪ̈ܟܘܗܝ܂ ܘܒܥܐ ܗܘܐ ܡܢܗ
17:15 ܘܐܡܪ ܠܗ܂ ܡܪܝ ܐܬܪܚܡ ܥܠܝ܂ ܒܪܝ ܒܪ ܐܓܪܐ ܐܝܬ ܠܗ܂ ܘܒܝܫܬܐ ܡܣܝܒܪ܂ ܟܡܐ ܓܝܪ ܙܒ̈ܢܝܢ ܒܢܘܪܐ ܢܦܠ܂ ܘܟܡܐ ܙܒ̈ܢܝܢ ܒܡ̈ܝܐ܂
17:16 ܘܩܪܒܬܗ ܠܬܠܡ̈ܝܕܝܟ ܘܠܐ ܐܫܟܚܘ ܠܡܐܣܝܘܬܗ܂
17:17 ܥܢܐ ܝܫܘܥ ܘܐܡܪ ܠܗܘܢ܂ ܐܘܢ ܫܪܒܬܐ ܡܦܬܠܬܐ ܘܕܠܐ ܗܝܡܢܘ܂ ܥܕܡܐ ܠܐܡܬܝ ܐܗܘܐ ܠܘܬܟܘܢ ܘܐܣܝܒܪܟܘܢ܂ ܐܝܬܝܗܝ ܠܝ ܠܒܪܟ ܠܟܐ܂
17:18 ܘܓܥܪ ܒܗ ܝܫܘܥ܂ ܘܢܦܩ ܡܢܗ ܫܐܕܐ܂ ܘܡܢ ܗܝ ܫܥܬܐ ܐܬܐܣܝ ܛܠܝܐ ܗܘ܂
17:19 ܗܝܕܝܢ ܩܪܒܘ ܠܘܬ ܝܫܘܥ ܬܠܡܝ̈ܕܘܗܝ ܘܐܡܪܝܢ ܠܗ ܒܝܢܝܗܘܢ ܘܠܗ܂ ܠܡܢܐ ܚܢܢ ܠܐ ܐܫܟܚܢ ܠܡܦܩܘܬܗ܂
17:20 ܐܡܪ ܠܗܘܢ ܡܛܠ ܙܥܘܪܘܬ ܗܝܡܢܘܬܟܘܢ܂ ܐܡܝܢ ܓܝܪ ܐܡܪܢܐ ܠܟܘܢ܂ ܕܐܢ ܗܘ ܕܬܗܘܐ ܒܟܘܢ܂ ܗܝܡܢܘܬܐ ܐܝܟ ܦܪܕܬܐ ܕܚܪܕܠܐ܂ ܬܐܡܪܘܢ ܠܛܘܪܐ ܗܢܐ ܕܢܫܢܐ ܡܢ ܗܡܟܐ ܘܢܫܢܐ܂ ܘܡܕܡ ܠܐ ܢܚܣܘܢܟܘܢ܀
17:22 ܘܟܕ ܗܢܘܢ ܡܬܗܦܟܝܢ ܒܓܠܝܠܐ܂ ܐܡܪ ܠܗܘܢ ܝܫܘܥ܂ ܥܬܝܕ ܗܘ ܕܝܢ ܒܪܗ ܕܐܢܫܐ ܕܢܫܬܠܡ ܒܐ̈ܝܕܝ ܒ̈ܢܝ ܐܢܫܐ
17:23 ܘܢܩܛܠܘܢܗ܂ ܘܠܝܘܡܐ ܕܬܠܬܐ ܢܩܘܡ܂ ܘܟܪܝܬ ܠܗܘܢ ܛܒ܀
17:24 ܘܟܕ ܐܬܘ ܠܟܦܪܢܚܘܡ܂ ܐܬܘ ܗܢܘܢ ܕܓܒܝܢ ܬܪ̈ܝܢ ܬܪ̈ܝܢ ܙܘ̈ܙܝܢ ܠܘܬ ܫܡܥܘܢ܂ ܘܐܡܪܝܢ ܠܗ ܪܒܟ ܠܐ ܝܗܒ ܬܪ̈ܝܢ ܙܘ̈ܙܘܗܝ܂
17:25 ܘܐܡܪ ܫܡܥܘܢ ܐܝܢ܂ ܘܟܕ ܥܠܘ ܠܒܝܬܐ ܩܕܡܗ ܝܫܘܥ܂ ܘܐܡܪ ܠܗ ܡܢܐ ܡܬܚܙܐ ܠܟ ܫܡܥܘܢ܂ ܡ̈ܠܟܝܗ ܕܐܪܥܐ ܡܢ ܡܢ ܓܒܝܢ ܡܟܣܐ ܘܟܣܦ ܪܫܐ܂ ܡܢ ܒܢܝ̈ܗܘܢ ܐܘ ܡܢ ܢܘ̈ܟܪܝܐ܂
17:26 ܐܡܪ ܠܗ ܫܡܥܘܢ ܡܢ ܢܘ̈ܟܪܝܐ܂ ܐܡܪ ܠܗ ܝܫܘܥ ܡܕܝܢ ܒ̈ܢܝ ܚܐܪ̈ܐ ܐܢܘܢ ܒ̈ܢܝܐ܂
17:27 ܕܠܐ ܕܝܢ ܢܟܫܠ ܐܢܘܢ܂ ܙܠ ܠܝܡܐ ܘܐܪܡܐ ܨܢܪܬܐ܂ ܘܢܘܢܐ ܩܕܡܝܐ ܕܣܠܩ܂ ܣܒ ܘܦܬܚ ܦܘܡܗ܂ ܘܬܫܟܚ ܬܡܢ ܐܣܬܪܐ܂ ܣܒܝܗ ܘܗܒܝܗ ܚܠܦܝ ܘܚܠܦܝܟ܀
18:01 ܘܒܗܘ ܝܘܡܐ ܩܪܒܘ ܗܘܘ ܬܠܡܝ̈ܕܘܗܝ ܕܝܫܘܥ ܘܐܡܪܝܢ ܠܗ܂ ܡܢܘ ܟܝ ܢܗܘܐ ܪܒ ܒܡܠܟܘܬܐ ܕܫܡܝܐ܂
18:02 ܘܩܪܐ ܝܫܘܥ ܠܛܠܝܐ ܚܕ ܘܐܩܝܡܗ ܒܝܢܬܗܘܢ
18:03 ܘܐܡܪ܂ ܐܡܝܢ ܐܡܪܢܐ ܠܟܘܢ܂ ܕܐܢ ܠܐ ܬܬܗܦܟܘܢ ܘܬܗܘܘܢ ܐܝܟ ܚܕ ܡܢ ܗܠܝܢ ܛ̈ܠܝܐ܂ ܠܐ ܬܥܠܘܢ ܠܡܠܟܘܬܐ ܕܫܡܝܐ܂
18:04 ܡܢ ܕܡܡܟ ܓܝܪ ܢܦܫܗ ܐܝܟ ܗܢܐ ܛܠܝܐ ܗܘ ܪܒ ܒܡܠܟܘܬܐ ܕܫܡܝܐ܂
18:05 ܘܟܠ ܕܢܩܒܠ ܐܝܟ ܚܕ ܡܢ ܗܠܝܢ ܛ̈ܠܝܐ ܒܫܡܝ ܠܝ ܗܘ ܡܩܒܠ܂
18:06 ܘܟܘܠ ܕܢܟܫܠ ܠܚܕ ܡܢ ܗܠܝܢ ܙܥ̈ܘܪܐ ܐܝܠܝܢ ܕܡܗܝܡܢܝܢ ܒܝ܂ ܦܩܚ ܗܘܐ ܠܗ ܕܬܗܘܐ ܬܠܝܐ ܪܚܝܐ ܕܚܡܪܐ ܒܨܘܪܗ܂ ܘܡܛܒܥ ܒܥܘܡ̈ܩܘܗܝ ܕܝܡܐ܂
18:07 ܘܝ ܠܗ ܠܥܠܡܐ ܡܢ ܡ̈ܟܫܘܠܐ ܕܐܬܝܢ܂ ܐܢܢܩܐ ܗܝ ܓܝܪ ܕܢܐܬܘܢ ܡܟ̈ܫܘܠܐ܂ ܐܠܐ ܘܝ ܠܓܒܪܐ ܕܒܐܝܕܗ ܢܐܬܘܢ ܡܟܫܘܠܐ܂
18:08 ܐܢ ܕܝܢ ܐܝܕܟ ܐܘ ܪܓܠܟ ܡܟܫܠܐ ܠܟ ܦܣܘܩ ܫܕܝܗ ܡܢܟ܂ ܦܩܚ ܠܟ ܓܝܪ ܕܬܐܬܐ ܠܚܝ̈ܐ ܟܕ ܚܓܝܪ ܐܢܬ ܐܘ ܟܕ ܦܫܝܚ ܐܢܬ܂ ܘܠܐ ܟܕ ܐܝܬ ܠܟ ܬܪ̈ܬܝܢ ܐܝ̈ܕܝܢ ܘܬܪ̈ܬܝܢ ܪܓ̈ܠܝܢ ܬܦܠ ܒܓܗܢܐ ܕܢܘܪܐ܂
18:09 ܘܐܢ ܗܘ ܕܥܝܢܟ ܡܟܫܠܐ ܠܟ ܚܨܝ ܫܕܝܗ ܡܢܟ܂ ܦܩܚ ܠܟ ܕܬܥܘܠ ܠܚܝ̈ܐ ܟܕ ܐܝܬ ܠܟ ܚܕܐ ܥܝܢܐ܂ ܘܠܐ ܟܕ ܐܝܬ ܠܟ ܬܪ̈ܬܝܢ ܥ̈ܝܢܝܢ ܬܐܙܠ ܠܓܗܢܐ ܕܢܘܪܐ܂
18:10 ܚܙܘ ܕܠܡܐ ܬܒܣܘܢ ܒܚܕ ܡܢ ܗܠܝܢ ܙܥ̈ܘܪܐ ܐܝܠܝܢ ܕܡܗܝܡܢܝܢ ܒܝ܂ ܐܡܪܢܐ ܠܟܘܢ ܓܝܪ ܕܡ̈ܠܐܟܝܗܘܢ ܒܫܡܝܐ ܒܟܠܙܒܢ ܚܙܝܢ ܦܪܨܘܦܗ ܕܐܒܝ ܕܒܫܡܝܐ܂
18:11 ܘܕܐܬܐ ܒܪܗ ܕܐܢܫܐ ܕܢܚܐ ܗܘ ܡܕܡ ܕܐܒܝܕ ܗܘܐ܀
18:12 ܐܝܟܢܐ ܕܝܢ ܡܬܚܙܐ ܠܟܘܢ܂ ܐܢ ܢܗܘܘܢ ܠܐܢܫ ܡܐܐ ܥܪ̈ܒܝܢ ܘܢܛܥܐ ܚܕ ܡܢܗܘܢ܂ ܠܐ ܫܒܩ ܬܫܥܝܢ ܘܬܫܥܐ ܒܛܘܪܐ܂ ܘܐܙܠ ܒܥܐ ܠܗܘ ܕܛܥܐ܂
18:13 ܘܡܐ ܕܐܫܟܚܗ܂ ܐܡܝܢ ܐܡܪܢܐ ܠܟܘܢ ܕܚܕܐ ܒܗ ܝܬܝܪ ܡܢ ܗܢܘܢ ܬܫܥܝܢ ܘܬܫܥܐ ܐܝܠܝܢ ܕܠܐ ܛܥܘ܂
18:14 ܗܟܢܐ ܠܐ ܨܒܐ ܐܒܘܟܘܢ ܕܒܫܡܝܐ ܕܢܐܒܕ ܚܕ ܡܢ ܗܠܝܢ ܙܥܘ̈ܪܐ܀
18:15 ܐܢ ܕܝܢ ܐܣܟܠ ܒܟ ܐܚܘܟ ܐܟܣܝܗܝ ܒܝܢܝܟ ܘܠܗ ܒܠܚܘܕ܂ ܐܢ ܫܡܥܟ ܝܪܬܬ ܐܚܘܟ܂
18:16 ܘܐܢ ܠܐ ܢܫܡܥܟ ܕܒܪ ܥܡܟ ܬܘܒ ܚܕ ܐܘ ܬܪ̈ܝܢ܂ ܕܥܠ ܦܘܡ ܬܪ̈ܝܢ ܘܬ̈ܠܬܐ ܣܗ̈ܕܝܢ ܬܩܘܡ ܟܘܠ ܡܠܐ܂
18:17 ܐܢ ܕܝܢ ܠܐ ܢܫܡܥ ܐܢܘܢ ܐܡܪ ܠܥܕܬܐ܂ ܘܐܢ ܠܥܕܬܐ ܠܐ ܢܫܡܥ܂ ܢܗܘܐ ܚܫܝܒ ܠܟ ܐܝܟ ܚܢܦܐ ܘܐܝܟ ܡܟܣܐ܂
18:18 ܘܐܡܝܢ ܐܡܪܢܐ ܠܟܘܢ ܕܟܘܠ ܡܐ ܕܬܐܣܪܘܢ ܒܐܪܥܐ ܢܗܘܐ ܐܣܝܪ ܒܫܡܝܐ܂ ܘܡܕܡ ܕܬܫܪܘܢ ܒܐܪܥܐ ܢܗܘܐ ܫܪܐ ܒܫܡܝܐ܀
18:19 ܬܘܒ ܐܡܝܢ ܐܡܪܢܐ ܠܟܘܢ܂ ܕܐܢ ܬܪ̈ܝܢ ܡܢܟܘܢ ܢܫܬܘܘܢ ܒܐܪܥܐ ܥܠ ܡܐ ܕܢܫܐܠܘܢ܂ ܢܗܘܐ ܠܗܘܢ ܡܢ ܠܘܬ ܐܒܝ ܕܒܫܡܝܐ܂
18:20 ܐܝܟܐ ܓܝܪ ܕܟܢܝܫܝܢ ܬܪ̈ܝܢ ܐܘ ܬܠܬܐ ܒܫܡܝ܂ ܬܡܢ ܐܢܐ ܒܝܢܬܗܘܢ܀
18:21 ܗܝܕܝܢ ܩܪܒ ܠܘܬܗ ܫܡܥܘܢ ܟܐܦܐ ܘܐܡܪ ܠܗ܂ ܡܪܝ ܟܡܐ ܙܒ̈ܢܝܢ ܐܢ ܗܘ ܕܢܣܟܠ ܒܝ ܐܚܝ ܐܫܒܘܩ ܠܗ܂ ܥܕܡܐ ܠܫܒܥ ܙܒ̈ܢܝܢ܂
18:22 ܐܡܪ ܠܗ ܠܐ ܫܒ̈ܥ܂ ܐܠܐ ܥܠ ܫܒܥܝܢ ܫܒ̈ܥ ܫܒ̈ܥ܂
18:23 ܡܛܠ ܗܢܐ ܕܡܝܐ ܡܠܟܘܬܐ ܕܫܡܝܐ ܠܓܒܪܐ ܡܠܟܐ܂ ܕܨܒܐ ܠܡܣܒ ܚܘܫܒܢܐ ܡܢ ܥܒ̈ܕܘܗܝ܂
18:24 ܘܟܕ ܫܪܝ ܠܡܣܒ ܚܘܫܒܢܐ܂ ܩܪܒ ܩܕܡܘܗܝ ܚܕ ܡܢܗܘܢ ܕܚܝܒ ܗܘܐ ܠܗ ܪܒ̈ܘ ܟ̈ܟܪܝܢ܂
18:25 ܘܟܕ ܠܝܬ ܗܘܐ ܠܗ ܠܡܦܪܥ܂ ܦܩܕ ܕܢܙܕܒܢ ܗܘ ܘܐܢܬܬܗ ܘ̈ܒܢܘܗܝ܂ ܘܢܬܢܣܒ ܟܘܠ ܕܐܝܬ ܠܗ܂
18:26 ܘܢܦܠ ܥܒܕܐ ܗܘ ܘܣܓܕ ܠܡܪܗ܂ ܘܐܡܪ ܐܓܪ ܥܠܝ ܪܘܚܐ ܘܟܠ ܡܕܡ ܦܪܥ ܐܢܐ ܠܟ܂
18:27 ܘܐܬܪܚܡ ܥܠܘܗܝ ܡܪܗ ܘܫܪܝܗܝ܂ ܐܦ ܚܘܒܬܐ ܫܒܩ ܠܗ܂
18:28 ܘܢܦܩ ܥܒܕܐ ܗܘ ܘܐܫܟܚ ܠܚܕ ܡܢ ܟܢܘ̈ܬܗ܂ ܕܚܝܒ ܗܘܐ ܠܗ ܕܝ̈ܢܕܐ ܡܐܐ܂ ܘܐܚܕܗ ܘܚܢܩ ܗܘܐ ܠܗ܂ ܘܐܡܪ ܗܘܐ ܠܗ ܦܪܘܥܝܢܝ ܡܕܡ ܕܚܝܒ ܐܢܬ ܠܝ܂
18:29 ܘܢܦܠ ܗܘ ܟܢܬܗ ܘܒܥܐ ܗܘܐ ܡܢܗ ܘܐܡܪ ܗܘܐ ܠܗ܂ ܐܓܪ ܥܠܝ ܪܘܚܐ ܘܐܦ ܐܢܐ ܦܪܥ ܐܢܐ܂
18:30 ܗܘ ܕܝܢ ܠܐ ܩܒܠ ܒܥܘܬܗ܂ ܐܠܐ ܐܙܠ ܐܪܡܝܗ ܒܝܬ ܐܣ̈ܝܪܐ܂ ܥܕܡܐ ܕܢܦܪܥܝܘܗܝ ܡܕܡ ܕܚܝܒ܂
18:31 ܟܕ ܚܙܘ ܕܝܢ ܟܢܘ̈ܬܗ ܐܝܠܝܢ ܕܗܘܝ܂ ܟܪܝܬ ܠܗܘܢ ܛܒ܂ ܘܐܬܘ ܘܚܘܝܘ ܠܡܪܗܘܢ ܟܠ ܡܕܡ ܕܗܘܐ܂
18:32 ܗܝܕܝܢ ܩܪܝܗܝ ܡܪܗ ܘܐܡܪ ܠܗ܂ ܥܒܕܐ ܒܝܫܐ܂ ܗܝ ܟܘܠܗܿ ܚܘܒܬܐ ܫܒܩܬ ܠܟ ܡܛܘܠ ܕܒܥܝܬ ܡܢܝ܂
18:33 ܠܐ ܚܝܒ ܗܘܝܬ ܐܦ ܐܢܬ ܕܬܚܘܢ ܠܟܢܬܟ ܐܝܟܢܐ ܕܐܢܐ ܚܢܬܟ܂
18:34 ܘܪܓܙ ܥܠܘܗܝ ܡܪܗ܂ ܘܐܫܠܡܗ ܕܢܗܘܐ ܡܬܢܓܕ܂ ܥܕܡܐ ܕܢܦܪܘܥ ܟܠܗܿ ܚܘܒܬܐ܂
18:35 ܗܟܢܐ ܢܥܒܕ ܠܟܘܢ ܐܒܝ ܕܒܫܡܝܐ܂ ܐܠܐ ܬܫܒܩܘܢ ܐܢܫ ܠܐܚܘܗܝ ܡܢ ܠܒܘ̈ܬܟܘܢ܀
19:01 ܘܗܘܐ ܟܕ ܫܠܡ ܝܫܘܥ ܡ̈ܠܐ ܗܠܝܢ܂ ܫܢܝ ܠܗ ܡܢ ܓܠܝܠܐ܂ ܘܐܬܐ ܠܗ ܠܬܚܘܡܐ ܕܝܗܘܕ܂ ܠܥܒܪܐ ܕܝܘܪܕܢܢ܂
19:02 ܘܐܬܐ ܒܬܪܗ ܟܢܫܐ ܣܓܝܐܐ܂ ܘܐܣܝ ܐܢܘܢ ܬܡܢ܀
19:03 ܘܩܪܒܘ ܠܘܬܗ ܦܪ̈ܝܫܐ܂ ܘܡܢܣܝܢ ܗܘܘ ܠܗ ܘܐܡܪܝܢ ܗܘܘ܂ ܕܐܢ ܗܘ ܕܫܠܝܛ ܠܓܒܪܐ ܕܢܫܪܐ ܐܢܬܬܗ ܥܠ ܟܠ ܥܠܐ܂
19:04 ܗܘ ܕܝܢ ܥܢܐ ܘܐܡܪ ܠܗܘܢ܂ ܠܐ ܩܪܝܬܘܢ ܕܡܢ ܕܥܒܕ ܠܕܟܪܐ ܡܢ ܒܪܫܝܬ ܐܦ ܠܢܩܒܬܐ ܗܘ ܥܒܕ܂
19:05 ܘܐܡܪ ܕܡܛܠ ܗܢܐ ܢܫܒܘܩ ܓܒܪܐ ܠܐܒܘܗܝ ܘܠܐܡܗ ܘܢܩܦ ܠܐܢܬܬܗ܂ ܘܢܗܘܘܢ ܬܪ̈ܝܗܘܢ ܚܕ ܒܣܪ܂
19:06 ܡܟܝܠ ܠܐ ܗܘܘ ܬܪ̈ܝܢ܂ ܐܠܐ ܚܕ ܐܢܘܢ ܒܣܪ܂ ܡܕܡ ܕܐܠܗܐ ܗܟܝܠ ܙܘܓ ܒܪܢܫܐ ܠܐ ܢܦܪܫ܂
19:07 ܐܡܪܝܢ ܠܗ ܠܡܢܐ ܗܟܝܠ ܦܩܕ ܡܘܫܐ܂ ܕܡܢ ܕܨܒܐ ܕܢܫܪܐ ܐܢܬܬܗ ܢܬܠ ܠܗܿ ܐܓܪܬܐ ܕܕܘܠܠܐ܂
19:08 ܐܡܪ ܠܗܘܢ ܡܘܫܐ ܡܛܠ ܩܫܝܘܬ ܠܒܟܘܢ ܗܘ ܐܦܣ ܠܟܘܢ ܕܬܫܪܘܢ ܢܫܝ̈ܟܘܢ܂ ܡܢ ܒܪܫܝܬ ܕܝܢ ܠܐ ܗܘܐ ܗܟܢܐ ܗܘܐ܂
19:09 ܐܡܪܢܐ ܠܟܘܢ ܕܝܢ ܕܡܢ ܕܫܒܩ ܐܢܬܬܗ ܕܠܐ ܡܠܬܐ ܕܓܘܪܐ ܘܢܣܒ ܐܚܪܬܐ ܡܓܪ ܓܐܪ ܠܗܿ܂
19:10 ܐܡܪܝܢ ܠܗ ܬܠܡ̈ܝܕܘܗܝ ܐܢ ܗܟܢܐ ܐܝܬ ܥܕܠܝܐ ܒܝܢܝ ܓܒܪܐ ܠܐܢܬܬܐ܂ ܠܐ ܦܩܚ ܠܡܣܒ ܐܢܬܬܐ܂
19:11 ܐܡܪ ܠܗܘܢ ܝܫܘܥ܂ ܠܐ ܗܘܐ ܟܠ ܐܢܫ ܣܦܩ ܠܗܿ ܠܡܠܬܐ ܗܕܐ܂ ܐܠܐ ܐܝܠܝܢ ܕܝܗܝܒ ܠܗܘܢ ܡܢ ܠܘܬ ܐܠܗܐ܂
19:12 ܐܝܬ ܓܝܪ ܡ̈ܗܝܡܢܐ ܕܡܢ ܟܪܣܐ ܕܐܡܗܘܢ ܗܘܘ ܡܗ̈ܝܡܢܐ܂ ܘܐܝܬ ܡܗ̈ܝܡܢܐ ܕܒ̈ܢܝ ܐܢܫܐ ܥܒܕܘ ܐܢܘܢ܂ ܘܐܝܬ ܕܗܢܘܢ ܥܒܕܘ ܢܦܫܗܘܢ ܡܗܝ̈ܡܢܐ ܡܛܘܠ ܡܠܟܘܬܐ ܕܫܡܝܐ܂ ܡܢ ܕܡܨܐ ܕܝܢ ܒܚܝܠܐ ܕܢܣܝܒܪ ܢܣܝܒܪ܀
19:13 ܗܝܕܝܢ ܩܪܒܘ ܠܗ ܛ̈ܠܝܐ ܕܢܣܝܡ ܐܝܕܗ ܥܠܝܗܘܢ ܘܢܨܠܐ܂ ܘܟܐܘ ܒܗܘܢ ܬܠܡ̈ܝܕܘܗܝ܂
19:14 ܐܡܪ ܠܗܘܢ ܝܫܘܥ܂ ܫܒܘܩܘ ܛ̈ܠܝܐ ܐܬܝܢ ܠܘܬܝ ܘܠܐ ܬܟܠܘܢ ܐܢܘܢ ܕܢܐܬܘܢ ܠܘܬܝ܂ ܐܝܠܝܢ ܓܝܪ ܕܐܝܟ ܗܠܝܢ ܐܢܘܢ ܕܝܠܗܘܢ ܗܝ ܡܠܟܘܬܐ ܕܫܡܝܐ܂
19:15 ܘܣܡ ܐܝܕܗ ܥܠܝܗܘܢ ܘܐܙܠ ܡܢ ܬܡܢ܀
19:16 ܘܩܪܒ ܓܒܪܐ ܚܕ ܘܐܡܪ ܠܗ܂ ܡܠܦܢܐ ܛܒܐ ܡܢܐ ܐܥܒܕ ܕܐܪܬ ܚܝ̈ܐ ܕܠܥܠܡ܂
19:17 ܐܡܪ ܠܗ ܝܫܘܥ ܡܢܐ ܡܫܐܠ ܐܢܬ ܠܝ ܥܠ ܛܒܐ܂ ܚܕ ܗܘ ܓܝܪ ܛܒܐ ܐܠܗܐ܂ ܐܢ ܨܒܐ ܐܢܬ ܕܝܢ ܕܬܥܘܠ ܠܚܝ̈ܐ ܛܪ ܦܘ̈ܩܕܢܐ܂
19:18 ܐܡܪ ܠܗ ܐܝܠܝܢ܂ ܐܡܪ ܠܗ ܝܫܘܥ܂ ܠܐ ܬܩܛܘܠ܂ ܘܠܐ ܬܓܘܪ܂ ܘܠܐ ܬܓܢܘܒ܂ ܘܠܐ ܬܣܗܕ ܣܗܕܘܬܐ ܕܫܘܩܪܐ܂
19:19 ܝܩܪ ܠܐܒܘܟ ܘܠܐܡܟ܂ ܘܐܚܒ ܠܩܪܝܒܟ ܐܝܟ ܢܦܫܟ܂
19:20 ܐܡܪ ܠܗ ܗܘ ܥܠܝܡܐ ܗܠܝܢ ܟܠܗܝܢ ܢܛܪܬ ܐܢܝܢ ܗܐ ܡܢ ܕܛܠܐ ܐܢܐ܂ ܡܢܐ ܬܘܒ ܚܣܝܪܢܐ܂
19:21 ܐܡܪ ܠܗ ܝܫܘܥ ܐܢ ܨܒܐ ܐܢܬ ܕܬܗܘܐ ܓܡܝܪ܂ ܙܠ ܙܒܢ ܩܢܝܢܟ ܘܗܒ ܠܡ̈ܣܟܢܐ܂ ܘܬܗܘܐ ܠܟ ܣܝܡܬܐ ܒܫܡܝܐ܂ ܘܣܒ ܨܠܝܒܟ ܘܬܐ ܒܬܪܝ܂
19:22 ܘܟܕ ܫܡܥ ܥܠܝܡܐ ܗܘ ܡܠܬܐ ܗܕܐ܂ ܐܙܠ ܟܕ ܟܪܝܐ ܠܗ܂ ܡܛܠ ܕܐܝܬ ܗܘܐ ܠܗ ܩܢܝܢܐ ܣܓܝܐܐ܂
19:23 ܝܫܘܥ ܕܝܢ ܐܡܪ ܠܬܠܡ̈ܝܕܘܗܝ܂ ܐܡܝܢ ܐܡܪ ܐܢܐ ܠܟܘܢ܂ ܕܥܛܠܐ ܗܝ ܠܥܬܝܪܐ ܕܢܥܘܠ ܠܡܠܟܘܬ ܫܡܝܐ܂
19:24 ܬܘܒ ܕܝܢ ܐܡܪ ܐܢܐ ܠܟܘܢ܂ ܕܦܫܝܩ ܗܘ ܠܓܡܠܐ ܕܢܥܒܪ ܒܚܪܘܪܐ ܕܡܚܛܐ܂ ܐܘ ܠܥܬܝܪܐ ܠܡܠܟܘܬܐ ܕܫܡܝܐ܂
19:25 ܬܘܒ ܕܝܢ ܟܕ ܫܡܥܘ ܬܠܡ̈ܝܕܘܗܝ ܬܡܝܗܝܢ ܗܘܘ ܘܕܚܠܘ ܛܒ܂ ܘܐܡܪܝܢ ܗܘܘ ܡܢܘ ܟܝ ܡܫܟܚ ܠܡܚܐ܂
19:26 ܚܪ ܒܗܘܢ ܝܫܘܥ ܘܐܡܪ ܠܗܘܢ܂ ܗܕܐ ܒܝܬ ܒ̈ܢܝ ܐܢܫܐ ܠܐ ܡܫܟܚܐ ܕܬܗܘܐ܂ ܐܠܗܐ ܕܝܢ ܟܠ ܡܕܡ ܡܫܟܚ ܠܡܥܒܕ܂
19:27 ܗܝܕܝܢ ܥܢܐ ܫܡܥܘܢ ܟܐܦܐ ܘܐܡܪ ܠܗ܂ ܗܐ ܚܢܢ ܫܒܩܢ ܟܠ ܡܕܡ ܘܐܬܝܢ ܒܬܪܟ܂ ܡܢܐ ܟܝ ܢܗܘܐ ܠܢ܂
19:28 ܐܡܪ ܠܗܘܢ ܝܫܘܥ܂ ܐܡܝܢ ܐܡܪܢܐ ܠܟܘܢ܂ ܕܐܢܬܘܢ ܕܐܬܝܬܘܢ ܒܬܪܝ܂ ܒܡܘܠܕܐ ܚܕܬܐ܂ ܡܐ ܕܝܬܒ ܒܪܗ ܕܐܢܫܐ ܥܠ ܬܪܘܢܘܣ ܕܫܘܒܚܗ܂ ܬܬܒܘܢ ܘܐܦ ܐܢܬܘܢ ܥܠ ܬܪܥ̈ܣܪ ܟܘܪ̈ܣܘܢ܂ ܘܬܕܘܢܘܢ ܬܪ̈ܬܥܣܪܐ ܫܪ̈ܒܢ ܕܒܝܬ ܐܝܣܪܝܠ܂
19:29 ܘܟܠ ܐܢܫ ܕܫܒܩ ܒ̈ܬܐ ܘܐ̈ܚܐ܂ ܐܘ ܐ̈ܚܘܬܐ܂ ܐܘ ܐܡܐ܂ ܐܘ ܐܢܬܬܐ܂ ܐܘ ܒ̈ܢܝܐ܂ ܐܘ ܩܘ̈ܪܝܐ܂ ܡܛܠ ܫܡܝ ܕܝܠܝ܂ ܢܩܒܠ ܚܕ ܒܡܐܐ܂ ܘܒܥܠܡܐ ܕܐܬܐ ܢܐܪܬ ܚ̈ܝܐ ܕܠܥܠܡ܂
19:30 ܣ̈ܓܝܐܐ ܕܝܢ ܩܕܡ̈ܝܐ ܕܢܗܘܘܢ ܐ̈ܚܪܝܐ܂ ܘܐ̈ܚܪܝܐ ܕܢܗܘܘܢ ܩܕ̈ܡܝܐ܀
20:01 ܕܡܝܐ ܕܝܢ ܡܠܟܘܬܐ ܕܫܡܝܐ܂ ܠܓܒܪܐ ܡܪܐ ܒܝܬܐ܂ ܕܢܦܩ ܒܫܦܪܐ ܠܡܐܓܪ ܦܥ̈ܠܐ ܠܟܪܡܗ܂
20:02 ܘܩܨ ܥܡܗܘܢ ܥܡ ܦܥ̈ܠܐ܂ ܡܢ ܕܝܢܪܐ ܚܕ ܠܦܥܠܐ ܚܕ ܒܝܘܡܐ ܚܕ܂ ܘܫܕܪ ܐܢܘܢ ܠܟܪܡܗ܂
20:03 ܘܢܦܩ ܒܬܠܬ ܫ̈ܥܝܢ܂ ܘܚܙܐ ܐ̈ܚܪܢܐ ܟܕ ܩܝܡܝܢ ܒܫܘܩܐ ܘܒܛܝܠܝܢ܂
20:04 ܘܐܡܪ ܠܗܘܢ ܙܠܘ ܘܐܦ ܐܢܬܘܢ ܠܟܪܡܐ܂ ܘܡܕܡ ܕܘܠܐ ܐܬܠ ܠܟܘܢ܂
20:05 ܘܐܙܠܘ܂ ܘܢܦܩ ܬܘܒ ܒܫܬ ܫ̈ܥܝܢ܂ ܘܒܬܫܥ ܫ̈ܥܝܢ܂ ܘܗܟܘܬ ܥܒܕ܂
20:06 ܘܢܦܩ ܒܚܕܥܣܪܐ ܫ̈ܥܝܢ܂ ܘܐܫܟܚ ܐ̈ܚܪܢܐ ܟܕ ܩܝܡܝܢ܂ ܘܐܡܪ ܠܗܘܢ ܡܢܐ ܩܝܡܝܢ ܐܢܬܘܢ ܘܒܛܝܠܝܢ ܝܘܡܐ ܟܘܠܗ܂
20:07 ܐܡܪܝܢ ܠܗ ܐܢܫ ܠܐ ܐܓܪܢ܂ ܐܡܪ ܠܗܘܢ ܙܠܘ ܐܦ ܐܢܬܘܢ ܠܟܪܡܐ܂ ܘܡܐ ܕܙܕܩ ܐܬܠ ܠܟܘܢ܂
20:08 ܘܟܕ ܗܘܐ ܪܡܫܐ ܐܡܪ ܡܪܐ ܟܪܡܐ ܠܪܒ ܒܝܬܗ܂ ܩܪܝ ܠܗܢܘܢ ܦܥ̈ܠܐ ܘܗܒ ܠܗܘܢ ܐܓܪܗܘܢ܂ ܘܫܪܐ ܡܢ ܐܚ̈ܪܝܐ ܥܕܡܐ ܠܩܕ̈ܡܝܐ܂
20:09 ܟܕ ܐܬܘ ܕܝܢ ܗܠܘܟ ܕܒ̈ܚܕܥܣܪܐ ܫ̈ܥܝܢ ܫܩܠܘ ܕܝܢܪܐ ܕܝܢܪܐ܂
20:10 ܘܟܕ ܐܬܘ ܩܕ̈ܡܝܐ ܣܒܪܝܢ ܗܘܘ ܕܠܗܘܢ ܝܬܝܪ ܢܬܠ܂ ܘܢܣܒܘ ܐܦ ܗܢܘܢ ܕܝܢܪܐ ܕܝܢܪܐ܂
20:11 ܘܟܕ ܚܙܘ ܪܛܢܘ ܥܠ ܡܪܐ ܒܝܬܐ
20:12 ܘܐܡܪܝܢ ܠܗ܂ ܗܠܝܢ ܐܚ̈ܪܝܐ ܚܕܐ ܫܥܐ ܦܠܚܘ܂ ܘܐܫܘܝܬ ܐܢܘܢ ܥܡܢ ܕܫܩܠܢ ܝܘܩܪܗ ܕܝܘܡܐ ܟܠܗ ܘܚܘܡܐ܂
20:13 ܗܘ ܕܝܢ ܥܢܐ ܘܐܡܪ ܠܚܕ ܡܢܗܘܢ܂ ܪܚܡܝ ܠܐ ܬܗܪܢܝ܂ ܠܐ ܗܘܐ ܒܕܝܢܪܐ ܩܨܬ ܥܡܝ܂
20:14 ܣܒ ܕܝܠܟ ܘܙܠ܂ ܘܐܢ ܨܒܐ ܐܢܐ ܕܐܬܠ ܠܗܢܐ ܐܚܪܝܐ ܐܝܟ ܕܠܟ܂
20:15 ܠܐ ܫܠܝܛ ܐܢܐ ܕܐܥܒܕ ܒܕܝܠܝ ܡܕܡ ܕܨܒܐ ܐܢܐ܂ ܐܘ ܕܠܡܐ ܥܝܢܟ ܒܝܫܐ ܕܐܢܐ ܛܒ ܐܢܐ܂
20:16 ܗܟܢܐ ܢܗܘܘܢ ܐܚ̈ܪܝܐ ܩܕ̈ܡܝܐ܂ ܘܩ̈ܕܡܝܐ ܢܗܘܘܢ ܐܚ̈ܪܝܐ܂ ܣܓܝܐܝܢ ܐܢܘܢ ܓܝܪ ܩ̈ܪܝܐ ܘܙܥܘܪܝܢ ܓ̈ܒܝܐ܀
20:17 ܘܟܕ ܣܠܩ ܗܘܐ ܝܫܘܥ ܠܐܘܪܫܠܡ܂ ܕܒܪ ܗܘܐ ܥܡܗ ܠܬܪܥ̈ܣܪܬܗ ܒܐܘܪܚܐ܂ ܘܐܡܪ ܠܗܘܢ ܒܝܢܘܗܝ ܘܠܗܘܢ܂
20:18 ܗܐ ܣܠܩܝܢ ܚܢܢ ܠܐܘܪܫܠܡ܂ ܘܒܪܗ ܕܐܢܫܐ ܡܫܬܠܡ ܠܪ̈ܒܝ ܟܗ̈ܢܐ ܘܠܣ̈ܦܪܐ܂ ܘܢܚܝܒܘܢܗ ܠܡܘܬܐ܂
20:19 ܘܢܫܠܡܘܢܗ ܠܥܡ̈ܡܐ܂ ܘܢܒܙܚܘܢ ܒܗ ܘܢܢܓܕܘܢܗ܂ ܘܢܙܩܦܘܢܗ܂ ܘܠܝܘܡܐ ܕܬܠܬܐ ܢܩܘܡ܀
20:20 ܗܝܕܝܢ ܩܪܒܬ ܠܘܬܗ ܐܡܗܘܢ ܕܒ̈ܢܝ ܙܒܕܝ ܗܝ ܘܒܢܝܗ܂ ܘܢܦܠܬ ܣܓܕܬ ܠܗ܂ ܘܫܐܠܐ ܗܘܬ ܠܗ ܡܕܡ܂
20:21 ܗܘ ܕܝܢ ܐܡܪ ܠܗܿ ܡܢܐ ܨܒܝܐ ܐܢܬ܂ ܐܡܪܐ ܠܗ ܡܪܝ ܕܢܬܒܘܢ ܗܠܝܢ ܬܪܝ̈ܗܘܢ ܒ̈ܢܝ ܚܕ ܡܢ ܝܡܝܢܟ ܘܚܕ ܡܢ ܣܡܠܟ ܒܡܠܟܘܬܟ ܘܒܫܘܒܚܟ܂
20:22 ܥܢܐ ܝܫܘܥ ܘܐܡܪ ܠܗܿ܂ ܠܐ ܝܕܥܝܢ ܐܢܬܘܢ ܡܢܐ ܫܐܠܝܢ ܐܢܬܘܢ܂ ܡܫܟܚܝܢ ܐܢܬܘܢ ܠܡܫܬܐ ܟܣܐ ܗܢܐ ܕܐܢܐ ܥܬܝܕ ܠܡܫܬܐ܂ ܐܡܪܝܢ ܡܫܟܚܝܢ ܐܢܚܢܢ܂
20:23 ܐܡܪ ܠܗܘܢ ܝܫܘܥ܂ ܕܬܫܬܘܢ ܟܣܐ ܗܢܐ ܡܫܟܚܝܢ ܐܢܬܘܢ܂ ܕܬܬܒܘܢ ܕܝܢ ܚܕ ܡܢ ܝܡܝܢܝ ܘܚܕ ܡܢ ܣܡܠܝ܂ ܗܕܐ ܠܐ ܗܘܬ ܕܝܠܝ ܕܐܬܠ ܠܟܘܢ܂ ܐܠܐ ܠܐܝܠܝܢ ܕܐܬܛܝܒ ܠܗܘܢ ܡܢ ܠܘܬ ܐܒܝ܂
20:24 ܘܟܕ ܫܡܥܘ ܥ̈ܣܪܐ ܪܓܙܘ ܥܠ ܗܢܘܢ ܬܪ̈ܝܢ ܐ̈ܚܝܢ܂
20:25 ܘܩܪܐ ܐܢܘܢ ܝܫܘܥ ܘܐܡܪ ܠܗܘܢ܂ ܝܕܥܝܢ ܐܢܬܘܢ ܕܪ̈ܫܝܗܘܢ ܕܥ̈ܡܡܐ ܡܪܝ̈ܗܘܢ ܐܢܘܢ܂ ܘܪܘܪ̈ܒܢܝܗܘܢ ܫܠܝܛܝܢ ܐܢܘܢ ܥܠܝܗܘܢ܂
20:26 ܒܝܢܬܟܘܢ ܕܝܢ ܠܐ ܢܗܘܐ ܗܟܢܐ܂ ܐܠܐ ܡܢ ܕܨܒܐ ܒܟܘܢ ܕܢܗܘܐ ܪܒܐ܂ ܢܗܘܐ ܠܟܘܢ ܡܫܡܫܢܐ܂
20:27 ܘܡܢ ܕܨܒܐ ܒܟܘܢ ܕܢܗܘܐ ܩܕܡܝܐ܂ ܢܗܘܐ ܠܟܘܢ ܥܒܕܐ܂
20:28 ܐܝܟܢܐ ܕܒܪܗ ܕܐܢܫܐ ܠܐ ܐܬܐ ܕܢܫܬܡܫ܂ ܐܠܐ ܕܢܫܡܫ܂ ܘܕܢܬܠ ܢܦܫܗ ܦܘܪܩܢܐ ܚܠܦ ܣܓ̈ܝܐܐ܂ ܐܢܬܘܢ ܕܝܢ ܒܥܘ ܕܡܢ ܙܥܘܪܘܬܐ ܬܐܪܒܘܢ܂ ܘܠܐ ܡܢ ܪܒܘܬܐ ܬܙܥܪܘܢ܀ ܡܐ ܕܡܙܕܡܢܝܢ ܐܢܬܘܢ ܠܒܝܬ ܐܚܫܡܝܬܐ܂ ܠܐ ܗܘܝܬܘܢ ܡܣܬܡܟܝܢ ܒܕܘܟܬܐ ܡܝܬܪܬܐ܂ ܕܠܐ ܢܐܬܐ ܡܢ ܕܡܝܬܪ ܡܢܟ܂ ܘܢܐܡܪ ܠܟ ܡܪܐ ܐܚܫܡܝܬܐ ܐܬܩܪܒ ܠܬܚܬ܂ ܘܬܒܗܬ ܒܥ̈ܝܢܝ ܣܡ̈ܝܟܐ܂ ܐܢ ܕܝܢ ܬܣܬܡܟ ܒܕܘܟܬܐ ܒܨܝܪܬܐ܂ ܘܢܐܬܐ ܡܢ ܕܒܨܝܪ ܡܢܟ܂ ܘܢܐܡܪ ܠܟ ܡܪܐ ܐܚܫܡܝܬܐ ܐܬܩܪܒ ܘܐܬܥܠܐ ܘܐܣܬܡܟ܂ ܘܬܗܘܐ ܠܟ ܬܫܒܘܚܬܐ ܡܝܬܪܬܐ ܒ̈ܥܝܢܝ ܣ̈ܡܝܟܐ܀
20:29 ܘܟܕ ܢܦܩܝܢ ܗܘܘ ܡܢ ܐܝܪܝܚܘ܂ ܐܬܐ ܗܘܐ ܒܬܪܗ ܟܢܫܐ ܣܓܝܐܐ܂
20:30 ܘܬ̈ܪܝܢ ܣܡ̈ܝܐ ܝܬܒܝܢ ܗܘܘ ܥܠ ܝܕ ܐܘܪܚܐ܂ ܘܟܕ ܫܡܥܘ ܕܝܫܘܥ ܥܒܪ܂ ܩܥܝܢ ܗܘܘ ܘܐܡܪܝܢ܂ ܐܬܪܚܡ ܥܠܝܢ ܒܪܗ ܕܕܘܝܕ܂
20:31 ܘ̈ܟܢܫܐ ܗܢܘܢ ܟܐܝܢ ܗܘܘ ܒܗܘܢ ܕܢܫܬܩܘܢ܂ ܗܢܘܢ ܕܝܢ ܐܪܝܡܘ ܩܠܗܘܢ ܘܐܡܪܝܢ܂ ܐܬܪܚܡ ܥܠܝܢ ܡܪܢ ܒܪܗ ܕܕܘܝܕ܂
20:32 ܘܩܡ ܝܫܘܥ ܘܩܪܐ ܐܢܘܢ܂ ܘܐܡܪ ܡܢܐ ܨܒܝܢ ܐܢܬܘܢ ܕܐܥܒܕ ܠܟܘܢ܂
20:33 ܐܡܪܝܢ ܠܗ ܡܪܢ ܕܢܬܦܬܚܢ ܥ̈ܝܢܝܢ ܘܢܚܙܝܟ܂
20:34 ܘܐܬܪܚܡ ܥܠܝܗܘܢ܂ ܘܩܪܒ ܠܥܝ̈ܢܝܗܘܢ܂ ܘܒܗܿ ܒܫܥܬܐ ܚܙܘ ܘܐܙܠܘ ܒܬܪܗ܀
21:01 ܘܟܕ ܩܪܒ ܠܐܘܪܫܠܡ܂ ܘܐܬܐ ܠܒܝܬ ܦܓ̈ܐ܂ ܥܠ ܓܢܒ ܛܘܪܐ ܕܒܝܬ ܙܝ̈ܬܐ܂ ܗܝܕܝܢ ܫܕܪ ܝܫܘܥ ܬܪ̈ܝܢ ܡܢ ܬܠܡ̈ܝܕܘܗܝ
21:02 ܘܐܡܪ ܠܗܘܢ܂ ܙܠܘ ܠܩܪܝܬܐ ܗܕܐ ܕܠܩܒܠܟܘܢ܂ ܗܐ ܡܫܟܚܝܢ ܐܢܬܘܢ ܚܡܪܐ ܚܕܐ ܟܕ ܐܣܝܪܐ܂ ܘܥܝܠܗܿ ܥܠ ܓܒܗܿ܂ ܫܪܘ ܐܝܬܘ ܐܢܘܢ ܠܝ܂
21:03 ܘܐܢ ܐܢܫ ܢܐܡܪ ܠܟܘܢ ܡܕܡ܂ ܐܡܪܘ ܠܗ ܠܡܪܗܘܢ ܡܬܒܥܝܢ܂ ܘܡܚܕܐ ܡܫܕܪ ܠܗܘܢ܂
21:04 ܗܕܐ ܕܝܢ ܕܗܘܬ܂ ܕܢܬܡܠܐ ܡܕܡ ܕܐܬܐܡܪ ܡܢ ܢܒܝܐ ܕܐܡܪ ܗܘܐ܂
21:05 ܐܡܪܘ ܠܒܪܬ ܨܗܝܘܢ܂ ܗܐ ܡܠܟܟܝ ܐܬܐ ܠܟܝ܂ ܙܕܝܩ ܘܡܟܝܟ܂ ܘܐܪܟܝܒ ܥܠ ܚܡܪܐ ܘܥܠ ܥܝܠܐ ܒܪ ܐܬܢܐ܂
21:06 ܘܐܙܠܘ ܗܢܘܢ ܬܠܡ̈ܝܕܘܗܝ܂ ܘܥܒܕܘ ܐܝܟ ܕܦܩܕ ܐܢܘܢ ܝܫܘܥ܂
21:07 ܘܐܝܬܝܘ ܠܚܡܪܐ ܘܠܥܝܠܐ܂ ܘܫܘܝܘ ܗܘܘ ܡܪܛ̈ܘܛܝܗܘܢ܂ ܘܪܟܒ ܝܫܘܥ ܠܥܠ ܡܢܗܘܢ܂
21:08 ܘܣܘܓܐܐ ܕܟܢܫܐ ܗܘ ܦܪܣܘ ܗܘܘ ܡܪ̈ܛܘܛܝܗܘܢ ܒܐܘܪܚܐ܂ ܐܚ̈ܪܢܐ ܕܝܢ ܦܣܩܝܢ ܗܘܘ ܣ̈ܘܟܐ ܡܢ ܐ̈ܝܠܢܐ ܘܪܡܝܢ ܗܘܘ ܒܐܘܪܚܐ܂
21:09 ܘ̈ܟܢܫܐ ܗܢܘܢ ܕܐܙܠܝܢ ܗܘܘ ܩܕܡܘܗܝ ܘܥܡܗ܂ ܩܥܝܢ ܗܘܘ ܘܐܡܪܝܢ܂ ܐܘܫܥܢܐ ܠܒܪܗ ܕܕܘܝܕ܂ ܒܪܝܟ ܗܘ ܕܐܬܐ ܒܫܡܗ ܕܡܪܝܐ܂ ܐܘܫܥܢܐ ܒܡܪܘܡܐ܂ ܘܢܦܩܘ ܠܐܘܪܥܗ ܣ̈ܓܝܐܐ܂ ܘܚܕܝܢ ܗܘܘ ܘܡܫܒܚܝܢ ܠܐܠܗܐ܂ ܥܠ ܟܠ ܡܐ ܕܚܙܘ܀
21:10 ܘܟܕ ܥܠ ܠܐܘܪܫܠܡ܂ ܐܬܙܝܥܬ ܟܠܗܿ ܡܕܝܢܬܐ܂ ܘܐܡܪܝܢ ܡܢܘ ܗܢܐ܂
21:11 ܐܡܪܝܢ ܠܗܘܢ ܟ̈ܢܫܐ ܗܠܘܟ܂ ܗܢܘ ܝܫܘܥ ܢܒܝܐ ܕܡܢ ܢܨܪܬ ܕܓܠܝܠܐ܂
21:12 ܘܥܠ ܝܫܘܥ ܠܗܝܟܠܐ ܕܐܠܗܐ܂ ܘܐܦܩ ܡܢ ܗܝܟܠܐ ܕܐܠܗܐ ܠܟܠܗܘܢ ܙܒ̈ܘܢܐ ܘܡ̈ܙܒܢܢܐ܂ ܘܣܚܦ ܝܫܘܥ ܦܬܘܪ̈ܐ ܕܡ̈ܨܪܦܢܐ܂ ܘܟܘܪ̈ܣܘܬܗܘܢ ܕܗܢܘܢ ܕܡܙܒܢܝܢ ܝܘ̈ܢܐ܂
21:13 ܘܐܡܪ ܠܗܘܢ ܟܬܝܒ ܗܘ ܕܒܝܬܝ ܒܝܬ ܨܠܘܬܐ ܢܬܩܪܐ ܠܟܠܗܘܢ ܥܡ̈ܡܐ܂ ܐܢܬܘܢ ܕܝܢ ܥܒܕܬܘܢܝܗܝ ܡܥܪܬܐ ܕܠ̈ܣܛܝܐ܂
21:14 ܘܩܪܒܘ ܠܗ ܒܗܝܟܠܐ ܣܡ̈ܝܐ ܘܚܪ̈ܫܐ ܘܐܣܝ ܐܢܘܢ܂
21:15 ܘܟܕ ܚܙܘ ܣ̈ܦܪܐ ܘܪ̈ܒܝ ܟܗ̈ܢܐ ܬܕܡ̈ܪܬܐ ܕܥܒܕ ܘܛ̈ܠܝܐ ܕܩܥܝܢ ܗܘܘ ܒܓܘ ܗܝܟܠܐ܂ ܘܐܡܪܝܢ ܗܘܘ ܐܘܫܥܢܐ ܠܒܪܗ ܕܕܘܝܕ܂ ܐܬܒܐܫ ܠܗܘܢ
21:16 ܘܐܡܪܝܢ܂ ܠܐ ܫܡܥ ܐܢܬ ܡܢܐ ܐܡܪܝܢ ܗܠܝܢ܂ ܐܡܪ ܠܗܘܢ ܝܫܘܥ܂ ܐܝܢ܂ ܠܐ ܡܡܬܘܡ ܩܪܝܬܘܢ ܕܡܢ ܦܘܡܐ ܕܛ̈ܠܝܐ ܘܕܝ̈ܠܘܕܐ ܐܥܒܕ ܬܫܒܘܚܬܐ܂
21:17 ܘܫܒܩ ܐܢܘܢ ܘܢܦܩ ܠܗ ܠܒܪ ܡܢ ܡܕܝܢܬܐ܂ ܠܒܝܬ ܥܢܝܐ ܕܢܗܘܐ ܬܡܢ܂
21:18 ܒܨܦܪܐ ܕܝܢ ܟܕ ܥܒܪ ܗܘܐ ܠܡܕܝܢܬܐ܂ ܟܦܢ܂
21:19 ܘܚܙܐ ܬܬܐ ܚܕܐ ܒܐܘܪܚܐ܂ ܘܐܬܐ ܠܘܬܗܿ ܘܠܐ ܐܫܟܚ ܒܗܿ ܡܕܡ܂ ܐܠܐ ܐܢ ܛܪ̈ܦܐ ܒܠܚܘܕ܂ ܘܐܡܪ ܠܗܿ ܬܘܒ ܦ̈ܪܐ ܠܐ ܢܗܘܘܢ ܒܟܝ ܠܥܠܡ܂ ܘܒܗܿ ܒܫܥܬܐ ܝܒܫܬ ܬܬܐ ܗܝ܂
21:20 ܘܟܕ ܚܙܘ ܬܠܡ̈ܝܕܘܗܝ ܐܬܕܡܪܘ܂ ܘܐܡܪܝܢ ܗܘܘ ܐܝܟܢܐ ܒܪܫܥܬܗ ܝܒܫܬ ܬܬܐ ܗܕܐ܂
21:21 ܥܢܐ ܝܫܘܥ ܘܐܡܪ ܠܗܘܢ܂ ܐܡܝܢ ܐܡܪܢܐ ܠܟܘܢ܂ ܕܐܢ ܬܗܘܐ ܒܟܘܢ ܗܝܡܢܘܬܐ ܘܠܐ ܬܬܦܠܓܘܢ܂ ܠܐ ܒܠܚܘܕ ܐܝܟ ܗܕܐ ܕܬܬܐ ܬܥܒܕܘܢ܂ ܐܠܐ ܐܢ ܬܐܡܪܘܢ ܠܛܘܪܐ ܗܢܐ ܕܐܫܬܩܠ ܘܦܠ ܒܝܡܐ܂ ܢܗܘܐ ܠܟܘܢ ܗܟܢܐ܂
21:22 ܘܟܘܠ ܡܕܡ ܕܬܫܐܠܘܢ ܒܨܠܘܬܐ ܘܬܗܝܡܢܘܢ ܬܣܒܘܢ܀
21:23 ܘܟܕ ܐܬܐ ܠܗܝܟܠܐ܂ ܩܪܒܘ ܠܗ ܪ̈ܒܝ ܟܗ̈ܢܐ ܘܩ̈ܫܝܫܐ ܕܥܡܐ ܘܐܡܪܝܢ ܠܗ܂ ܒܐܝܢܐ ܫܘܠܛܢ ܗܠܝܢ ܥܒܕ ܐܢܬ܂ ܘܡܢ ܝܗܒ ܠܟ ܫܘܠܛܢܐ ܗܢܐ܂
21:24 ܥܢܐ ܝܫܘܥ ܘܐܡܪ ܠܗܘܢ܂ ܐܦ ܐܢܐ ܐܫܐܠܟܘܢ ܡܠܬܐ ܗܕܐ ܕܬܐܡܪܘܢ ܠܝ܂ ܘܐܡܪ ܠܟܘܢ ܒܐܝܢܐ ܫܘܠܛܢܐ ܥܒܕܢܐ ܗܠܝܢ܂
21:25 ܡܥܡܘܕܝܬܗ ܕܝܘܚܢܢ ܡܢ ܐܝܡܟܐ ܗܘܬ܂ ܡܢ ܫܡܝܐ ܐܘ ܡܢ ܒ̈ܢܝ ܐܢܫܐ܂ ܗܢܘܢ ܕܝܢ ܡܬܪܥܝܢ ܗܘܘ ܒܝܢܬܗܘܢ ܘܐܡܪܝܢ ܗܘܘ܂ ܕܐܢ ܢܐܡܪ ܠܗ ܕܡܢ ܫܡܝܐ ܗܝ܂ ܢܐܡܪ ܠܢ ܘܠܡܢܐ ܠܐ ܗܝܡܢܬܘܢ ܒܗ܂
21:26 ܘܐܢ ܢܐܡܪ ܕܡܢ ܒ̈ܢܝ ܐܢܫܐ ܗܝ ܕܚܠܝܢ ܐܢܚܢܢ ܡܢ ܟܢܫܐ܂ ܟܠܗܘܢ ܓܝܪ ܐܢܫܐ ܐܝܟ ܕܠܢܒܝܐ ܐܚܝܕܝܢ ܗܘܘ ܠܗ ܠܝܘܚܢܢ܂
21:27 ܘܐܡܪܝܢ ܠܗ ܠܐ ܝܕܥܝܢ ܐܢܚܢܢ܂ ܐܡܪ ܠܗܘܢ ܝܫܘܥ܂ ܘܐܦ ܠܐ ܐܢܐ ܐܡܪ ܐܢܐ ܠܟܘܢ܂ ܒܐܝܢܐ ܫܘܠܛܢܐ ܥܒܕ ܐܢܐ ܗܠܝܢ܀
21:28 ܐܝܟܢܐ ܕܝܢ ܡܬܚܙܝܐ ܠܟܘܢ܂ ܠܓܒܪܐ ܚܕ ܐܝܬ ܗܘܘ ܠܗ ܬܪ̈ܝܢ ܒ̈ܢܝܢ܂ ܐܡܪ ܠܩܕܡܝܐ ܙܠ ܒܪܝ ܝܘܡܢܐ ܥܒܕ ܥܒܕܐ ܒܟܪܡܐ܂
21:29 ܐܡܪ ܠܗ ܠܐ ܨܒܐ ܐܢܐ܂ ܐܚܪܝܬ ܕܝܢ ܬܘܬܗ ܢܦܫܗ ܘܐܙܠ ܠܟܪܡܐ܂
21:30 ܘܐܡܪ ܠܐܚܪܢܐ ܗܟܘܬ܂ ܘܥܢܐ ܘܐܡܪ ܐܝܢ ܡܪܝ ܘܠܐ ܐܙܠ܂
21:31 ܡܢ ܡܢ ܗܠܝܢ ܬܪ̈ܝܢ ܡܬܚܙܐ ܠܟܘܢ ܕܥܒܕ ܨܒܝܢܐ ܕܐܒܘܗܝ܂ ܐܡܪܝܢ ܠܗ ܗܘ ܩܕܡܝܐ܂ ܐܡܪ ܠܗܘܢ ܝܫܘܥ܂ ܐܡܝܢ ܐܡܪܢܐ ܠܟܘܢ܂ ܕܡ̈ܟܣܐ ܘܙܢܝ̈ܬܐ ܡܩܕܡܝܢ ܠܟܘܢ ܠܡܠܟܘܬܐ ܕܐܠܗܐ܂
21:32 ܐܬܐ ܓܝܪ ܠܘܬܟܘܢ ܝܘܚܢܢ ܒܐܘܪܚܐ ܕܟܐܢܘܬܐ ܘܠܐ ܗܝܡܢܬܘܢܝܗܝ܂ ܡ̈ܟܣܐ ܕܝܢ ܘܙ̈ܢܝܬܐ ܗܝܡܢܘ ܒܗ܂ ܐܢܬܘܢ ܕܝܢ ܐܦ ܠܐ ܟܕ ܚܙܝܬܘܢ ܬܘܬܟܘܢ ܢܦܫܟܘܢ ܐܚܪܝܬ ܕܬܗܝܡܢܘܢܝܗܝ܀
21:33 ܫܡܥܘ ܡܬܠܐ ܐܚܪܢܐ܂ ܓܒܪܐ ܚܕ ܡܪܐ ܒܝܬܐ ܐܝܬ ܗܘܐ܂ ܢܨܒ ܟܪܡܐ ܘܐܚܕܪܗ ܣܝܓܐ܂ ܘܚܦܪ ܒܗ ܡܥܨܪܬܐ܂ ܘܒܢܐ ܒܗ ܡܓܕܠܐ܂ ܘܐܫܠܡܗ ܠܦ̈ܠܚܐ ܘܐܙܠ܂
21:34 ܘܟܕ ܩܪܒ ܙܒܢܐ ܕ̈ܦܐܪܐ܂ ܫܕܪ ܥܒ̈ܕܘܗܝ ܠܘܬ ܦܠ̈ܚܐ܂ ܕܢܫܕܪܘܢ ܠܗ ܦܐ̈ܪܐ܂
21:35 ܘܐܚܕܘ ܐܢܘܢ ܦ̈ܠܚܐ ܗܢܘܢ ܠܥܒ̈ܕܘܗܝ܂ ܐܝܬ ܕܡܚܘܘܗܝ܂ ܘܐܝܬ ܕܪܓܡܘܗܝ܂ ܘܐܝܬ ܕܩܛܠܘܗܝ܂
21:36 ܬܘܒ ܫܕܪ ܥܒ̈ܕܘܗܝ ܚܪ̈ܢܐ ܕ̈ܣܓܝܐܝܢ ܡܢ ܩܕ̈ܡܝܐ܂ ܘܥܒܕܘ ܠܗܘܢ ܗܟܘܬ܂
21:37 ܒܚܪܝܬܐ ܕܝܢ ܫܕܪ ܠܘܬܗܘܢ ܠܒܪܗ ܘܐܡܪ܂ ܟܒܪ ܢܒܗܬܘܢ ܡܢ ܒܪܝ܂
21:38 ܗܢܘܢ ܕܝܢ ܦ̈ܠܚܐ ܟܕ ܚܙܘܘܗܝ ܠܒܪܗ܂ ܐܡܪܘ ܒܝܢܬܗܘܢ܂ ܗܢܘ ܝܪܬܗ ܬܘ ܢܩܛܠܝܘܗܝ܂ ܘܢܗܘܐ ܠܗ ܝܘܪܬܢܐ ܕܝܠܢ܂
21:39 ܘܐܚܕܘܗܝ ܘܐܦܩܘܗܝ ܠܒܪ ܡܢ ܟܪܡܐ ܘܩܛܠܘܗܝ܂
21:40 ܐܡܬܝ ܗܟܝܠ ܕܢܐܬܐ ܡܪܗ ܕܟܪܡܐ ܡܢܐ ܢܥܒܕ ܠܗܘܢ ܠܦ̈ܠܚܐ ܗܠܘܟ܂
21:41 ܐܡܪܝܢ ܠܗ ܕܒܝܫ ܒܝܫ ܢܘܒܕ ܐܢܘܢ܂ ܘܟܪܡܐ ܢܫܠܡ ܠܦܠ̈ܚܐ ܐ̈ܚܪܢܐ܂ ܐܝܠܝܢ ܕܝܗܒܝܢ ܦܐ̈ܪܐ ܒܙܒܢܗܘܢ܂
21:42 ܐܡܪ ܠܗܘܢ ܝܫܘܥ܂ ܠܐ ܡܡܬܘܡ ܩܪܝܬܘܢ ܒܟܬܒܐ܂ ܕܟܐܦܐ ܗܝ ܕܐܣܠܝܘ ܒ̈ܢܝܐ܂ ܗܝ ܗܘܬ ܠܪܫܗܿ ܕܙܘܝܬܐ܂ ܡܢ ܠܘܬ ܡܪܝܐ ܗܘܬ ܗܕܐ܂ ܘܐܝܬܝܗ ܬܕܡܘܪܬܐ ܒ̈ܥܝܢܝܢ܂
21:43 ܡܛܠ ܗܢܐ ܐܡܪ ܐܢܐ ܠܟܘܢ܂ ܕܬܫܬܩܠ ܡܢܟܘܢ ܡܠܟܘܬܐ ܕܐܠܗܐ܂ ܘܬܬܝܗܒ ܠܥܡܐ ܕܥܒܕ ܦܐ̈ܪܐ܂
21:44 ܟܠ ܓܝܪ ܕܢܦܠ ܥܠ ܗܝ ܟܐܦܐ ܢܬܬܒܪ܂ ܘܟܠ ܕܬܦܠ ܥܠܘܗܝ ܬܫܚܩܝܘܗܝ܂
21:45 ܪܒ̈ܝ ܟܗ̈ܢܐ ܕܝܢ ܘܦܪܝ̈ܫܐ ܟܕ ܫܡܥܘ ܦܠܐܬܐ܂ ܝܕܥܘ ܕܥܠܝܗܘܢ ܗܘ ܐܡܪ܂
21:46 ܘܒܥܘ ܗܘܘ ܕܢܐܚܕܘܢܗ ܘܕܚܠܘ ܡܢ ܥܡܐ܂ ܡܛܘܠ ܕܐܝܟ ܕܠܢܒܝܐ ܐܚܝܕܝܢ ܗܘܘ ܠܗ܀
22:01 ܬܘܒ ܥܢܐ ܝܫܘܥ ܘܐܡܪ ܠܗܘܢ ܒ̈ܦܠܐܬܐ܂
22:02 ܐܬܕܡܝܬ ܡܠܟܘܬܐ ܕܫܡܝܐ ܠܓܒܪܐ ܡܠܟܐ܂ ܕܥܒܕ ܡܫܬܘܬܐ ܠܒܪܗ܂
22:03 ܘܫܕܪ ܠܥܒ̈ܕܘܗܝ ܕܢܩܪܘܢ ܠܗܢܘܢ ܕܡܙܡܢܝܢ ܠܡܫܬܘܬܐ܂ ܘܠܐ ܨܒܘ ܠܡܐܬܐ܀
22:04 ܬܘܒ ܫܕܪ ܥܒ̈ܕܐ ܐ̈ܚܪܢܐ ܘܐܡܪ܂ ܐܡܪܘ ܠܗܢܘܢ ܕܡܙܡܢܝܢ ܗܘܘ܂ ܗܐ ܐܚܫܡܝܬܝ ܡܛܝܒܐ܂ ܘܬ̈ܘܪܝ ܦܛܡܝ ܩܛܝܠܝܢ ܐܢܘܢ܂ ܘܟܠܡܕܡ ܡܛܝܒ ܗܘ ܬܘ ܠܡܫܬܘܬܐ܂
22:05 ܗܢܘܢ ܕܝܢ ܒܣܘ܂ ܘܐܝܬ ܕܐܙܠ ܠܩܪܝܬܐ܂ ܘܐܝܬ ܕܐܙܠ ܠܬܓܘܪܬܐ܂
22:06 ܫܪܟܐ ܕܝܢ ܕܐܫܬܚܪܘ܂ ܐܚܕܘ ܠܥܒ̈ܕܘܗܝ ܘܨܥܪܘ ܐܢܘܢ ܘܩܛܠܘ܂
22:07 ܘܪܓܙ ܡܠܟܐ ܗܘ ܘܫܕܪ ܠܚܝܠܗ܂ ܘܐܘܒܕ ܐܢܘܢ ܠܩ̈ܛܘܠܐ ܗܠܘܟ܂ ܘܠܡܕܝܢܬܗܘܢ ܐܘܩܕ ܒܢܘܪܐ܀
22:08 ܗܝܕܝܢ ܐܡܪ ܠܥܒ̈ܕܘܗܝ܂ ܡܫܬܘܬܐ ܡܛܝܒܐ ܗܝ܂ ܘܗܢܘܢ ܕܡܙܡܢܝܢ ܗܘܘ ܠܐ ܫܘܝܢ ܗܘܘ ܠܗܿ܂
22:09 ܡܟܝܠ ܦܘܩܘ ܠܒܝܬ ܐܘ̈ܪܚܬܐ܂ ܘܟܠ ܡܢ ܕܡܫܟܚܝܢ ܐܢܬܘܢ ܩܪܘ ܠܒܝܬ ܡܫܬܘܬܐ܂
22:10 ܘܢܦܩܘ ܥܒ̈ܕܐ ܗܢܘܢ ܠܒܝܬ ܐܘܪ̈ܚܬܐ ܘܟܢܫܘ ܟܠ ܕܐܫܟܚܘ ܒܝ̈ܫܐ ܘܛ̈ܒܐ܂ ܘܐܬܡܠܝ ܒܝܬ ܡܫܬܘܬܐ ܣܡ̈ܝܟܐ܂
22:11 ܘܥܠ ܡܠܟܐ ܕܢܚܙܐ ܣܡ̈ܝܟܐ܂ ܘܚܙܐ ܬܡܢ ܓܒܪܐ ܕܠܐ ܠܒܝܫ ܠܒܘܫܐ ܕܡܫܬܘܬܐ܂
22:12 ܐܡܪ ܠܗ ܚܒܪܝ ܐܝܟܢܐ ܐܬܝܬ ܠܗܪܟܐ܂ ܕܢܚ̈ܬܐ ܕܡܫܬܘܬܐ ܠܝܬ ܠܟ܂ ܘܗܘ ܫܬܩ ܠܗ܂
22:13 ܗܝܕܝܢ ܐܡܪ ܡܠܟܐ ܠܡܫ̈ܡܫܢܐ܂ ܐܘܚܕܘܗܝ ܒܐܝ̈ܕܘܗܝ ܘ̈ܒܪܓܠܘܗܝ܂ ܘܐܦܩܘܗܝ ܠܚܫܘܟܐ ܒܪܝܐ܂ ܬܡܢ ܢܗܘܐ ܒܟܝܐ ܘܚܘܪܩ ܫ̈ܢܐ܂
22:14 ܣܓܝܐܝܢ ܐܢܘܢ ܓܝܪ ܩܪ̈ܝܐ ܘܙܥܘܪܝܢ ܓ̈ܒܝܐ܀
22:15 ܗܝܕܝܢ ܐܙܠܘ ܦܪ̈ܝܫܐ܂ ܘܢܣܒܘ ܡܠܟܐ ܕܐܝܟܢܐ ܢܨܘܕܘܢܗ ܒܡܠܬܐ܂
22:16 ܘܫܕܪܘ ܠܘܬܗ ܬܠܡ̈ܝܕܝܗܘܢ ܥܡ ܥܒ̈ܕܐ ܕܗܪܘܕܣ ܘܐܡܪܝܢ ܠܗ܂ ܡܠܦܢܐ ܝܕܥܝܢ ܚܢܢ ܕܫܪܝܪ ܐܢܬ܂ ܘܐܘܪܚܐ ܕܐܠܗܐ ܒܩܘܫܬܐ ܡܠܦ ܐܢܬ܂ ܘܠܐ ܒܛܝܠ ܠܟ ܒܐܢܫ܂ ܠܐ ܓܝܪ ܢܣܒ ܐܢܬ ܒܐ̈ܦܐ ܕܐܢܫ܂
22:17 ܐܡܪ ܠܢ ܡܢܐ ܡܬܚܙܐ ܠܟ܂ ܫܠܝܛ ܠܡܬܠ ܟܣܦ ܪܫܐ ܠܩܣܪ ܐܘ ܠܐ܂
22:18 ܝܫܘܥ ܕܝܢ ܝܕܥ ܡܚ̈ܫܒܬܗܘܢ ܘܐܡܪ ܠܗܘܢ܂ ܢܣ̈ܒܝ ܒܐ̈ܦܐ ܡܢܐ ܡܢܣܝܢ ܐܢܬܘܢ ܠܝ܂
22:19 ܚܘܐܘܢܝ ܛܒܥܐ ܕܟܣܦ ܪܫܐ܂ ܘܗܢܘܢ ܩܪܒܘ ܠܗ ܕܝܢܪܐ܂
22:20 ܐܡܪ ܠܗܘܢ ܝܫܘܥ܂ ܨܠܡܐ ܗܢܐ ܘܟ̈ܬܝܒܬܐ ܕܡܢ܂
22:21 ܐܡܪܝܢ ܠܗ ܕܩܣܪ܂ ܗܝܕܝܢ ܐܡܪ ܠܗܘܢ܂ ܗܒܘ ܕܩܣܪ ܠܩܣܪ܂ ܘܕܐܠܗܐ ܠܐܠܗܐ܂
22:22 ܘܟܕ ܫܡܥܘ ܐܬܕܡܪܘ ܘܫܒܩܘܗܝ ܘܐܙܠܘ܀
22:23 ܒܗܘ ܝܘܡܐ ܩܪܒܘ ܩܕܡܘܗܝ ܙܕܘ̈ܩܝܐ ܘܐܡܪܝܢ ܠܗ܂ ܕܠܝܬ ܩܝܡܬܐ܂ ܘܫܐܠܘܗܝ
22:24 ܘܐܡܪܝܢ ܠܗ܂ ܡܠܦܢܐ܂ ܡܘܫܐ ܐܡܪ ܠܢ܂ ܕܐܢ ܗܘ ܕܢܡܘܬ ܐܢܫ ܟܕ ܠܝܬ ܠܗ ܒ̈ܢܝܐ܂ ܬܗܘܐ ܐܢܬܬܗ ܠܐܚܘܗܝ܂ ܘܢܩܝܡ ܙܪܥܐ ܠܐܚܘܗܝ܂
22:25 ܐܝܬ ܗܘܘ ܕܝܢ ܠܘܬܢ ܫܒ̈ܥܐ ܐ̈ܚܝܢ܂ ܩܕܡܝܗܘܢ ܢܣܒ ܐܢܬܬܐ ܘܡܝܬ܂ ܘܠܐ ܫܒܩ ܒ̈ܢܝܐ܂ ܘܗܘܬ ܐܢܬܬܗ ܠܐܚܘܗܝ܂
22:26 ܐܦ ܐܚܪܢܐ ܗܟܘܬ܂ ܘܐܦ ܕܬܠܬܐ܂ ܥܕܡܐ ܠܫܒ̈ܥܬܝܗܘܢ܂
22:27 ܘܐܚܪܝܬ ܒܬܪ ܟܠܗܘܢ ܡܝܬܬ ܠܗܿ ܗܝ ܐܢܬܬܐ܂
22:28 ܒܩܝܡܬܐ ܗܟܝܠ ܠܐܝܢܐ ܡܢܗܘܢ ܬܗܘܐ ܐܢܬܬܐ܂ ܗܐ ܓܝܪ ܠܫܒ̈ܥܬܝܗܘܢ ܗܘ ܗܘܬ܂
22:29 ܥܢܐ ܝܫܘܥ ܘܐܡܪ ܠܗܘܢ܂ ܣܓܝ ܛܥܝܢ ܐܢܬܘܢ܂ ܘܠܐ ܝܕܥܝܢ ܐܢܬܘܢ ܟ̈ܬܒܐ܂ ܐܦܠܐ ܚܝܠܗ ܕܐܠܗܐ܂
22:30 ܒܚܝܬ ܡ̈ܝܬܐ ܓܝܪ ܠܐ ܓܒܪ̈ܐ ܢܣܒܝܢ ܢܫ̈ܐ܂ ܐܦ ܠܐ ܢܫ̈ܐ ܗܘܝܢ ܠܓܒܪ̈ܐ܂ ܐܠܐ ܐܝܟ ܡ̈ܠܐܟܐ ܐܢܘܢ ܕܫܡܝܐ܂
22:31 ܘܥܠ ܩܝܡܬܐ ܕܝܢ ܕܡ̈ܝܬܐ ܠܐ ܩܪܝܬܘܢ܂ ܕܐܡܪ ܐܠܗܐ܂
22:32 ܕܐܢܐ ܐܢܐ ܐܠܗܗ ܕܐܒܪܗܡ܂ ܘܐܠܗܗ ܕܐܝܣܚܩ܂ ܘܐܠܗܗ ܕܝܥܩܘܒ܂ ܘܗܐ ܐܠܗܐ ܠܐ ܗܘܐ ܕܡ̈ܝܬܐ ܐܠܐ ܕܚ̈ܝܐ܀
22:33 ܘܟܕ ܫܡܥܘ ܟܢ̈ܫܐ ܗܢܘܢ܂ ܡܬܕܡܪܝܢ ܗܘܘ ܒܝܘܠܦܢܗ܂
22:34 ܦܪ̈ܝܫܐ ܕܝܢ ܟܕ ܚܙܘ ܕܫܬܩ ܐܢܘܢ ܠܙܕܘ̈ܩܝܐ܂ ܐܬܟܢܫܘ ܠܘܬܗ܂
22:35 ܘܫܐܠܗ ܗܘܐ ܚܕ ܡܢܗܘܢ ܣܦܪܐ ܟܕ ܡܢܣܐ ܠܗ ܘܐܡܪ ܠܗ܂
22:36 ܡܠܦܢܐ ܐܝܢܐ ܦܘܩܕܢܐ ܪܒ ܘܩܕܡܝ ܒܐܘܪܝܬܐ܂
22:37 ܐܡܪ ܠܗ ܝܫܘܥ܂ ܕܬܪܚܡ ܠܡܪܝܐ ܐܠܗܟ ܡܢ ܟܠܗ ܠܒܟ܂ ܘܡܢ ܟܠܗܿ ܢܦܫܟ܂ ܘܡܢ ܟܠܗ ܚܝܠܟ܂
22:38 ܗܢܐ ܗܘ ܦܘܩܕܢܐ ܪܒܐ ܘܩܕܡܝܐ܂
22:39 ܘܕܒܬܪܗ ܕܕܡܐ ܠܗ܂ ܕܬܪܚܡ ܠܩܪܝܒܟ ܐܝܟ ܢܦܫܟ܂
22:40 ܒܗܠܝܢ ܬܪ̈ܝܢ ܦܘ̈ܩܕܢܝܢ ܬܠܝܐ ܐܘܪܝܬܐ ܘܢܒ̈ܝܐ܂
22:41 ܘܟܕ ܟܢܝܫܝܢ ܦܪ̈ܝܫܐ܂ ܡܫܐܠ ܗܘܐ ܠܗܘܢ
22:42 ܘܐܡܪ܂ ܡܢܐ ܐܡܪܝܢ ܐܢܬܘܢ ܥܠ ܡܫܝܚܐ ܒܪ ܡܢܘ܂ ܐܡܪܝܢ ܠܗ ܒܪ ܕܘܝܕ܂
22:43 ܐܡܪ ܠܗܘܢ ܐܝܟܢܐ ܗܟܝܠ ܕܘܝܕ ܒܪܘܚܐ ܕܩܘܕܫܐ ܩܪܐ ܠܗ ܡܪܝ܂ ܐܡܪ ܓܝܪ
22:44 ܕܐܡܪ ܡܪܝܐ ܠܡܪܝ ܬܒ ܠܟ ܡܢ ܝܡܝܢܝ܂ ܥܕܡܐ ܕܐܣܝܡ ܒܥܠܕܒ̈ܒܝܟ ܬܚܝܬ ܪ̈ܓܠܝܟ܂
22:45 ܐܢ ܗܟܝܠ ܕܘܝܕ ܡܪܝ ܩܪܐ ܠܗ ܐܝܟܢܐ ܒܪܗ ܗܘ܂
22:46 ܘܠܐ ܐܢܫ ܐܫܟܚ ܕܢܬܠ ܠܗ ܦܬܓܡܐ܂ ܘܐܦܠܐ ܐܢܫ ܐܡܪܚ ܡܢ ܗܝ ܫܥܬܐ ܠܡܫܐܠܘܬܗ ܬܘܒ܀
23:01 ܗܝܕܝܢ ܐܡܪ ܝܫܘܥ ܠܟܢ̈ܫܐ ܘܠܬܠܡ̈ܝܕܘܗܝ܂
23:02 ܥܠ ܟܘܪܣܝܐ ܕܡܘܫܐ ܝܬܒܘ ܣ̈ܦܪܐ ܘܦܪ̈ܝܫܐ܂
23:03 ܟܠܡܕܡ ܕܐܡܪܝܢ ܠܟܘܢ ܗܘܝܬܘܢ ܫܡܥܝܢ ܘܥܒܕܝܢ܂ ܐܝܟ ܥܒܕ̈ܝܗܘܢ ܕܝܢ ܠܐ ܬܥܒܕܘܢ܂ ܐܡܪܝܢ ܓܝܪ ܘܠܐ ܥܒܕܝܢ܂
23:04 ܘܐܣܪܝܢ ܡܘ̈ܒܠܐ ܝܩ̈ܝܪܬܐ ܘܣܝܡܝܢ ܥܠ ܟܬ̈ܦܬܐ ܕܒ̈ܢܝ ܐܢܫܐ܂ ܘܗܢܘܢ ܒܚܕܐ ܡܢ ܨܒ̈ܥܬܗܘܢ ܠܐ ܩܪܒܝܢ ܠܗܝܢ܂
23:05 ܟܘܠ ܡܕܡ ܓܝܪ ܕܥܒܕܝܢ ܕܢܬܚܙܘܢ ܠܒ̈ܢܝ ܐܢܫܐ܂ ܘܡܦܬܝܢ ܥܪ̈ܩܐ ܕܬ̈ܦܠܝܗܘܢ܂ ܘܡܘܪܟܝܢ ܬܟܠܬܐ ܕܡܪ̈ܛܘܛܝܗܘܢ܂
23:06 ܘܪܚܡܝܢ ܪܝܫ ܣܡ̈ܟܐ ܘܐ̈ܚܫܡܝܬܐ܂ ܘܡܘ̈ܬܒܐ ܩܕ̈ܡܝܐ ܒܟ̈ܢܘܫܬܐ
23:07 ܘܫܠܡܐ ܒܫܘ̈ܩܐ܂ ܘܨܒܝܢ ܕܢܗܘܘܢ ܩܪܝܢ ܠܗܘܢ ܒ̈ܢܝ ܐܢܫܐ ܪܒܝ ܪܒܝ܂
23:08 ܐܢܬܘܢ ܕܝܢ ܠܐ ܬܩܪܘܢ ܪܒܝ܂ ܚܕ ܗܘ ܓܝܪ ܪܒܟܘܢ ܡܫܝܚܐ܂ ܘܐܢܬܘܢ ܐ̈ܚܐ ܐܢܬܘܢ܂
23:09 ܘܐܒܐ ܠܐ ܬܩܪܘܢ ܠܟܘܢ ܒܐܪܥܐ܂ ܚܕ ܗܘ ܓܝܪ ܐܒܘܟܘܢ ܕܒܫܡܝܐ܂
23:10 ܘܠܐ ܬܬܩܪܘܢ ܡ̈ܠܦܢܐ܂ ܡܛܠ ܕܡܠܦܢܟܘܢ ܡܫܝܚܐ ܗܘ܂
23:11 ܘܡܢ ܕܨܒܐ ܒܟܘܢ ܕܢܗܘܐ ܪܒ܂ ܢܗܘܐ ܠܟܘܢ ܡܫܡܫܢܐ܂
23:12 ܟܠ ܐܢܫ ܓܝܪ ܕܢܪܝܡ ܢܦܫܗ ܢܬܡܟܟ܂ ܘܡܢ ܕܢܡܟ ܢܦܫܗ ܢܬܬܪܝܡ܀
23:13 ܘܝ ܠܟܘܢ ܣ̈ܦܪܐ ܘܦ̈ܪܝܫܐ ܢܣ̈ܒܝ ܒܐ̈ܦܐ܂ ܕܐܚܕܝܢ ܐܢܬܘܢ ܡܠܟܘܬܐ ܕܐܠܗܐ ܩܕܡ ܒ̈ܢܝ ܐܢܫܐ܂ ܠܐ ܓܝܪ ܐܢܬܘܢ ܥܠܝܢ܂ ܘܠܐ ܠܐܝܠܝܢ ܕܐܬܝܢ ܠܡܥܠ ܫܒܩܝܢ ܐܢܬܘܢ܀
23:14 ܘܝ ܠܟܘܢ ܣ̈ܦܪܐ ܘܦܪ̈ܝܫܐ ܢܣ̈ܒܝ ܒܐ̈ܦܐ܂ ܕܐܟܠܝܢ ܐܢܬܘܢ ܒܬ̈ܐ ܕܐܪ̈ܡܠܬܐ܂ ܒܥܠܬܐ ܕܡܘܪܟܝܢ ܐܢܬܘܢ ܨ̈ܠܘܬܟܘܢ܂ ܡܛܠ ܗܢܐ ܬܩܒܠܘܢ ܕܝܢܐ ܝܬܝܪܐ܀
23:15 ܘܝ ܠܟܘܢ ܣ̈ܦܪܐ ܘܦܪ̈ܝܫܐ ܢܣ̈ܒܝ ܒܐ̈ܦܐ܂ ܕܡܬܟܪܟܝܢ ܐܢܬܘܢ ܝܡܐ ܘܝܒܫܐ ܕܬܥܒܕܘܢ ܚܕ ܓܝܘܪܐ܂ ܘܡܐ ܕܗܘܐ ܥܒܕܝܢ ܐܢܬܘܢ ܠܗ ܒܪܗ ܕܓܗܢܐ ܐܥܦܐ ܥܠܝܟܘܢ܀
23:16 ܘܝ ܠܟܘܢ ܢܓܘ̈ܕܐ ܣܡ̈ܝܐ܂ ܕܐܡܪܝܢ ܐܢܬܘܢ ܡܢ ܕܝܡܐ ܒܗܝܟܠܐ ܠܐ ܡܟܐ܂ ܘܡܢ ܕܝܡܐ ܒܕܗܒܐ ܕܒܗܝܟܠܐ ܚܛܐ܂
23:17 ܣܟ̈ܠܐ ܥ̈ܘܝܪܐ ܡܢܐ ܪܒ ܕܗܒܐ ܐܘ ܗܝܟܠܐ ܕܗܘ ܡܩܕܫ ܠܗ ܠܕܗܒܐ܂
23:18 ܘܡܢ ܕܝܡܐ ܒܩܘܪܒܢܐ ܕܥܠ ܡܕܒܚܐ ܚܛܐ܂
23:19 ܥ̈ܘܝܪܐ ܡܢܐ ܪܒ ܩܘܪܒܢܐ ܐܘ ܡܕܒܚܐ ܕܗܘ ܡܩܕܫ ܠܗ ܠܩܘܪܒܢܐ܂
23:20 ܡܢ ܕܝܡܐ ܗܟܝܠ ܒܡܕܒܚܐ ܝܡܐ ܒܗ ܘܒܟܠ ܡܐ ܕܐܝܬ ܥܠܘܗܝ܂
23:21 ܘܡܢ ܕܝܡܐ ܒܗܝܟܠܐ ܝܡܐ ܒܗ ܘܒܡܢ ܕܥܡܪ ܒܗ܂
23:22 ܘܡܢ ܕܝܡܐ ܒܫܡܝܐ ܝܡܐ ܒܟܘܪܣܝܗ ܕܐܠܗܐ ܘܒܡܢ ܕܝܬܒ ܥܠܘܗܝ܀
23:23 ܘܝ ܠܟܘܢ ܣ̈ܦܪܐ ܘܦܪ̈ܝܫܐ ܢܣ̈ܒܝ ܒܐ̈ܦܐ܂ ܕܡܥܣܪܝܢ ܐܢܬܘܢ ܢܢܥܐ ܘܫܒܬܐ ܘܟܡܘܢܐ܂ ܘܫܒܩܬܘܢ ܝܩܝ̈‍{‍ܕ‍}‍‍<‍ܪ‍>‍ܬܗܿ ܕܐܘܪܝܬܐ܂ ܕܝܢܐ ܘܚܢܢܐ ܘܗܝܡܢܘܬܐ܂ ܗܠܝܢ ܕܝܢ ܥܒܕܬܘܢ ܘܗܠܝܢ ܕܝܢ ܠܐ ܫܒܩܬܘܢ܂
23:24 ܢܓܘ̈ܕܐ ܣܡ̈ܝܐ ܕܡܨܠܠܝܢ ܐܢܬܘܢ ܡܢ ܒ̈ܩܐ܂ ܘܒܠܥܝܢ ܐܢܬܘܢ ܓܡ̈ܠܐ܂
23:25 ܘܝ ܠܟܘܢ ܣ̈ܦܪܐ ܘܦܪ̈ܝܫܐ ܢܣ̈ܒܝ ܒܐ̈ܦܐ܂ ܕܡܕܟܝܢ ܐܢܬܘܢ ܒܪܗ ܕܟܣܐ ܘܕܦܝܢܟܐ܂ ܘܡܢ ܠܓܘ